Ka Makaainana, Volume V, Number 21, 25 Mei 1896 — Page 7
HONOLULU, OAHU, POAKAHI, MEI 25, 1896 7
OLI VA KAZELA
KA OLALI NOHO KUAHIWI O INIA.
KA UI HOLOLIO IMUA O KE KAHUA KAUA.
Helu 6
Ua like keia paio ana me he mea la he poe iliohae e ake ana e omo i ke koko o ka lakou mea i makemake ai. O na poe i eha a make aia lakou iluna o ka honua kahi i moe ai, a o na poe ola hoi ke hehi la lakou maluna iho me ka hooponopono ole ae. Aohe manawa i ikeia ai ka makaukau a me ka loea maoli o Oli va Kazela ma ke kii'na o na mea kaua e like me keia la a laua e ku palua aku nei imua o ka nui manu o Peresia.
Ua hoohalike aku o Ka zela i kana keiki iloko o kela manawa o ka hooili kaua me he manu aeto la, a i kana koi kaua hoi imua o kona enemi me he liona hae la no Basana. E palua a pakolu ana ka make o na enemi i ka manawa hookahi i ka hoomoe hookahi ana aku i kana koi kaua.
Nana mai ia ka mahele hope o na enemi i keia poino nui o ko lakou aoao a hoomaka aku la e auhee, no ka mea, aole lakou e lanakila maluna o ka make e hele aku la imua o lakou. O ka Moi o Pe resia iloko o kela wa, aole ana mea e hana ae ai, no ka mea, o na poe ana i kaena mau ai no ka loaa mau o ka lanakila iaia, ua haalele mai iaia. No ia mea ua huli ae la oia a holo aku la maluna o kona lio me ka nana ole ae i kona mau hoa make e moe la no ko lakou manawa hope loa.
A o ia ka Ka zela i kahea mai ai i kana keiki me ka leo nui,—
"I nui ke aho, e kuu keiki; e ukali aku mahope o ko kaua mau enemi a hookau aku i ka make maluna o lakou, aole hookoe i kekahi mea hookahi ma kou alahele."
O ka leo kauoha a ka makua, o ia ka Oli va i alualu aku ai me ka mama nui maluna o kona lio, a o ka mea mua loa i loaa aku iaia o ia no ka Moi o Peresia. Kahea aku la oia, "E ku iho e ka mea hoohe wale a e pale nou iho i kela manawa."
Aole i pane mai ka Moi Dame rina i keia mau olelo a Oliva, aka, ua hooi hou ae la oia i ka holo o kona lio no ka hoopakele ana iaia iho. Aka, o ia manao ana ae pela, ua poho wale no, no ka mea, me ka eleu nui ua pili aku o Oliva ma kona aoao, a me ka awiwi nui i uhau iho ai oia i kana koi kaua maluna o ke poo o Damerina a kaawale ae la iloko o na apana elua, a hookuuia aku la kona lio e holo me kona hookapuhi e lewalewa ana ma kona aoao.
E like me kana i hookau aku ai i kela hoopai manaonao maluna o ka Moi, pela no oia i hana aku ai i na kanaka a pau e loaa aku ana iaia, a mamua o ka hoea ana aku mawaho o na palena o Peresia ua pau loa iho la na koa Peresia i ka make me ke koe ole aku o kahi mea. "O ka hopena iho la ia o ka mea hookiekie," wahi a Oliva i pane ae ai.
Maanei i hoomaha iho ai ua keiki la a haawi iho la i manawa no kona lio e ai weuweu ai. I ka aui ana ae o ka la, akahi no oia a huli hoi no kona wahi i hele mai ai a hiki i kona halawai pu ana me kona makua. Mahamaha koke mai la no nae kona makuakane no ka mea e pili ana i kana huakai hooko kauoha, a o ia kana i pane aku ai me keia mau huaolelo:
"Ua pau ka'u hana, a e hoi aku kaua. O ka lanakila hiwahiwa i loaa ia kaua, no luna mai no ia, mai ia Alahe, ke Akua o ko kaua mau kupuna."
Huli ae la laua a hoi aku la no ko laua wahi pupupu hale iloko o ka ululaau. O ka laua mea huna, aole loa laua i hoike aku i kekahi mea i halawai mai me laua ma ke alahele. Aka, imua o ka Moi wale no laua e hoike ai no ia mea.
[E hoomauia aku ana.]
Ua paa i ka hopuia i kahi o keia mau la iho la o Mi sasa Ane Luahiwa no ka loaa pono ana aku i kana kane mare e hana lealea ana me kahi kaaka eueu makai o Kakaako. Iluna laua o ka moe i loaa pono aku ai i ka po Poakahi i hala. Aloha no kahi Ala!
Ke kauohaia aku nei na poe a pau o na luna, ina he mau koena pepa kahi a lakou i koe o na helu 1, 13, 15, a me 17 o keia makahiki, e oluolu e hoihoi mai. A o na poe hoi he mau pepa ka lakou o ia mau helu e oluolu e hoihoi mai a e ukuia aku no e like me ka mea maa mau.
He kaapio no kekahi Pake ka puiwa ae i ka auwina la Poakolu nei, ma Alanui Hotele, a holo pololei ilalo a hookui me kela hale e ku nei ma ke kihi o ia alanui a me Alanui Kekaulike a ulaa pu ka paehumu o mua o ka lanai a me ka pa makai iho. O ke kaa ua hele a okaoka, a o ke kalaiwa ka i pakele mai ke ola.
ILOKO O KA MALUHIA.
Na Huaolelo Hope a na Poe Kaulana.
[Hoopau ana.]
Sa Walter Scott—E Lockhart, he mau minute pokole wale no ko'u e kamailio pu ai me oe. E lilo oe i kanaka maikai. E maemae kou noho ana—a e lilo hoi i mea hoopono. Aole e loaa ia oe mawaho ae o na mea e ae, na kokua ana ke hiki mai ka make e like me a'u nei ano.
Edwa rd VI.—E ka Haku, e lawe aku i kuu uhane.
Ka Ela o Derb y—E hoopihaia ka honua me Kona nani.
Phillip Sydney—Aole au e hoololi ae i ko'u hauoli no kekahi emepaea o ka honua.
Cicero—Ea, e ka mea noonoo, ina ike oe i ka mea pono, e hahau iho.
Emepe rese Iosepine — Ke make nei au me ka ehaeha o ko'u noonoo. Eia mau iloko o'u na hoomanao ana no ko Farani noho'na hauoli. Ke hoike nei au me ka oiaio, o ka wahine mua a Napoliona aole loa e kahe kona waimaka.
Hood—Ke make nei au mawaho o ke aloha o ka mea hana pahu.
Rosseau—E hapai ae i ka ipukaaniani iluna i hiki ai ia'u ke ike i na mea nani he nui no ka wa hope loa.
Gainsborough—E pau loa ana kakou i ka hele i ka lani, a o Van Dyke pu kekahi.
H. Hammond—O ka Haku ka mea nana i hana i ka mea holo mama.
Ho race Manu—E like me ke kanaka make, ke kamailio nei au e like me kela a me keia e hana ana nona iho, a e like no hoi me ka ke Akua i hana ai.
Haku Thurlow—Ua ku au i ka poka, aole nae au i manaolana e make ana au.
Ma rtin Luther—O ka Makua ma ka lani ke kumu i pau ai keia kino mai ia'u aku, a e haalele ana au i keia ola ana, aka, ua ike no au aole loa e hiki i kekahi mea ke lawe ae ia'u mai Kona lima ae.
William Hunter—Ina he wahi ikaika iki ko'u e hiki ke paa i ka peni, ua hiki loa ia'u ke kakau i kekahi mea e pili ana no ka mama maoli o ka hele ana i ka make.
F rancis Marion—E hoomaikaiia ke Akua, ua hiki ia'u ke kau iho i ko'u lima maluna o ko'u puuwai a olelo ae mai ka manawa mua loa o ko'u noho ana maluna o ka waiwai aole loa au i hana hewa aku i kekahi mea.
Mar cos Bozzaris—Aole he ehaeha, aka, he hauoli ke make iloko o ke kuokoa.
Kenerala Wool— O keia ka manawa hope loa o ke kukui o ke kino e a ai.
Sa Thos. More, (oiai oia iluna o ka ahamaka)—Ke hoike nei au e ike no oe i ko'u pii ana iluna, a me ka hoi hou ana mai.
Julius Caesar (Iulia Kaisara), —mahope iho o kona houia ana e Brutus i ka pahi, ua hoopuka ae la oia i keia mau olelo)—Ua hoomakaukau au i na mea a pau no ko'u ola ana a koe ka make, aka, ano, e make ana au me ka makaukau mua ole.
Patri ck Henry—Eia ka buke (ka Baibala) i oi aku mamua o na buke a pau i paiia, aka, na'u no ka hewa o ka hoao ole ana e loaa he manawa e heluhelu ai. Aka nae, ke hilinai nei au ma o ka lima aloha la o ke Akua, koe wale no paha ua ulolohi loa ka manawa.
Haku Nelekona—Ke hoomaikai nei au i ke Akua ua pau ka'u hana.
John Wesley—O ka oi aku o ka maikai, o ke Akua pu me kakou.
John Locke—Ua loaa ia'u he ola loihi ana a ke mahalo nei au no ka loaa ana he noho'na hauoli, aole nae i oi aku i ko kela ao.
John Keats—Makemake loa au i na pua daise (pua ui) e ulu nui maluna o'u.
Robert Napunako Boyd
(I TALIA)
He Ana-aina a he kokua no hoi ma ka hooponopono ana i na waiwai paa, huli ana paha i na Buke o ke Aupuni, a pela aku. Keena Hana: Mauka iho o ka Hale Leta, maluna ae o ka haleaina Pake, Alanui Betela. apl 13-mp
C. B. DWIGHT
[KALE KUAIKA.]
Mea Hana Pohaku Kaekae Alanui, na He Kupapau a me na Kia Hoomanao Mabala. E loaa no oia ma kona wahi noho ma Koiuiu, Honolulu nei. Telepona Helu 833. 17-1mk
E. M. NAKUINA.
KOMI SINA O NA ALA LIILII A ME NA PONO WAI.
No tari Lehulehu, a he Agena Haawi Palapala Ae Mare no Honolulu nei. KEENA HANA: Helu 303, Alanui Kalepa. dk—1m
F. J. TESTA, (Hoke).
MEA OHI A KOI AIE Mea Huli Moolelo Aina a Waiwai e ae paha. Mea Unuhi a Mahele Olelo Hawaii a Enelani paha. Mea Hana Palapala Kanawai o na Ano a pau. Mea Kuai Mikini Humuhumu Lole. Mea Hoolimalima a Hoolilo Aina. Mea Kuai Waiwai no ka Uku Komisina Haahaa. Ua makaukau mau oia e lawelawe i na hana a pau e haawiia mai ana iaia. He kuike ka rula. E loaa no oia ma keia Keena. apr 8-1mk