Ka Makaainana, Volume V, Number 20, 18 May 1896 — Page 8

8 HONOLULU, OAHU, POAKAHI, MEI 18, 1896.

[Mai ka aoao 5 mai.]

lele loa no hoi i na hoakaka maopopo loa o ke Kuikahi Panailike. Aloha wale ka hoi kana wahi bila. Ina paha aole kela kuikahi, ina no aohe e kala kahiko i kauia ai ia ano kanawai auhau a imi loaa nui no ka Waihona.

            Ina aole ka walawalaau mau o na Lunamakaainana Lopikana a me Kamauoha imua o ka Hale, ina la ua pamalo loa ia kahua. Ua hoomaopopoia o ka inoa mua ka ke alakai o ka aoao kue iloko o ka Hale. E ole nae paha hoi ka laua mau kikonikoni ana, akakuu iki mai ai na hana ma kahi mau mea, a nui nae hoi ka manawa i pau wale ma ke kualehelehe ana.

            Weliweli ana paha auanei hoi na poe holo makaikai mai i o kakou nei i kela Kanawai Hoopaa Inoa, no ka mea, he kue maopopo ia kanawai i ko ke kanaka kulana kuokoa iho. Oiai, ua kaunuiia ka pomaikai o kekahi mau oihana e lawelaweia nei i ke komo nui mai o na poe makaikai, eia nae hoi keia pula hou e kue aku ana i ko lakou kipa mai, i oi loa aku hoi ke ino i ko ke kanawai haawi palapala ae e holo mai nei aku a me ka hoouku ana hoi i na poe kipa mai no ka pomaikai o ka Halemai Moiwahine.

            Kaulana mai nei ka hoi o Moanalua i keia mau la, o ka La Pule aku ka hoi ka oi, a pololei ai no kahi mele o "Moanalua hai ke au," no ka mea, o ua au ia e haihaiia nei ilalo o laila, e kue ana hoi i ka maluhia o ko ka Haku La. O na lono ia e laweia mai nei i o makou nei i ka nui launa ole mai ka o na hana haihai kanawai ma ia kaha. Ma na la hoomalolo, he piha maoli no na kaa hali ohua nunui i na poe ake lealea, aole hoi no ka holo kaa hooluolu wale no, aka, no na hana uko ole ae hoi kahi, e laa ka inu bia, ka ona, a me na ukali aku o ia ano hana. Aia la ka hoi ihea na makai?

            O ka mea mua loa i hoopaa i kona inoa a i kau i ka hoailona kuni o kona manamana-lima nui, oia no o W. Tela, ka Luna Nui o ia Oihana hou, i ka la i hoomakaia ai o ka hooko ana i ke Kanawai Hoopaa Inoa.
            No ka hoomanao i ka piha ana o na makahiki he 34 o ko laua noho ana iloko o ka be rita o ka mare, ua haawi aku o Misita me Misasa Pi Ki Keoni no ka luakini Halepapu i kela wahi hale halawai hou e kukuluia nei ma ka aoao makai pono mai o Alanui Liliha i wahi halawai ke manaoia pela, no ka manawa o elima makahiki me ka uku ole.

KELA A ME KEIA.

                E ku mai ana ka Alameda mai na Panalaau Hema ma ka la 28.
            E hoomanao i ka paani kinipopo ma Makiki i keia Poaono iho.
            E wehe ana na Pukiki he halawai makaainana no ko lakou auna iho i keia ahiahi ma Halealii Kuea.
            Eia makou la ke hoohialaai nei me Io sepine, a o kahi poe hoi me na eueu o Kukaniloko. Tata gude, e!
            Ua ku mai ka Warimu i kakahiaka o ka Poalima nei mai na Panalaau Hema, a ia ahiahi no i haalele mai ai i keia awa no ka Akau.
            Ua hanau mai na ka wahine a J. Kapamawaho Prendergast i ka Poalima nei, he kaikamahine, mauka o Kapalama. I nui ke aho!
            He lono ka i wawaia ae e lilo aku ana o Misita Alatau A tkinson, Kahukula Nui mua i pau, i Kakauolelo ma kahi o Misita Scott i hookiekieia ae.
            Ma Kunawai, Honolulu nei, ua hanau mai he keikikane na Ioba (k) a me Kaheana (w) ma ka la 15 nei. O ka eha iho la ia o ka laua mau keiki e ola nei.
            O ka la 24 o keia mahina, o ia ka la hanau o ka Moiwahine Vitoria o Beritania Nui, a Emeperese o Inia. Ia la e piha ai iaia o ke 77 o kona mau makahiki.
            Ua hoohuiia ma ka ma re e Rev. H. H. Paleka ma ka po Poaono nei o E. W. Rothbura me Misi Sarah Naone, kaikamahine a D. K. Naone. He mea maikai ka mare.
            No ke omaimai a ano onawaliwali o Misita Burns, luna nui o ka hui keaka lio, aole i malamaia ka lealea keaka lio i ka po Poaono nei no ka pomaikai o ke kula hanalima ike o Ema Hale.
            O ka Pake puhi okolehao o Kalihi i hopuia ai e Kaapa mamua aku nei a i hoopaiia e ka Aha Apana a hoohalahala i ka Aha Kaapuni, ua hookuuia e ke kiu re i ka Poaono nei.
            Ahewaia o Iuno Davise e ke kiure i na la mua no o keia kau, no kona pue ana i ka wahine Pukiki a kekahi hoalahui ana o uka o Kalihi i ka La Kokohi. Ua hoopiia oia no elua makahiki e noho hana oolea ai ma Kawa.
            Poalima nei i loheia mai ai mai na pali hauliuli o na Koolau no ka pau o kekahi poe o laila i ka hopuhopuia no ka noho mamuoahi, he 24 paa ka ka nui. O kekahi ano iho la paha hoi keia o ka hooko ana i ke kana-hookamakama hou.
            Poaono nei i piha ai ka makahiki hookahi o Mohailani, ke keikikane makahiapo a hooilina hoi o E. No re, lunahooponopono o ke Kuokoa namu. Ua hoomanao ohana ia iho no ka la o ua kama nei. E loihi kona ola ana, o ka makou kalokalo ia i na aumakua.
            Ke kauohaia aku nei na poe a pau o na luna, ina he mau koena pepa kahi a lakou i koe o na helu 1, 13, 15 a me 17 o keia makahiki, e oluolu e hoihoi mai. A o na poe hoi he mau pepa ka lakou o ia mau helu e oluolu e hoihoi mai a e ukuia aku no e like me ka mea maa mau.
            Ua hoopauia ke kauka Aupuni o ka apana o Ewa, C. A. Pitasona, no ke kumu he hoahanau oia no A. P. Pitasona, i make.
            Piha na anaina haipule o Sana Anaru a me Malieokamalu i ka Poaha nei, no ka hoomanao ana i ka La o ka Pii Ana o ka Haku i ka Lani.
                Ma ka La Pule, Iune 6, e malamaia ai ka hoike hui o na Kula Sabati o ka Mokupuni o Oahu nei, o na Ekalesia Kalawina, ma ka luakini o Kawaiahao.
            Ma ka po Poalima a i ole, i ka po Poaono iho paha e holo aku ai na komite Ahaolelo no ke kahua ma'i lepera, a me kekahi poe i loaa ka aeia mai ka Papa Ola.
            O ka Poaha iho ka la e weheia ai o Pauahi Hale e ku nei ma ke kahua o ke kula o Punahou. Ia la i piha ai ke 55 o na makahiki o ka pae mua loa ana mai o Rev. Dan'l Dole, makuakane o ka Pe residena o ka Repubalika. Oia no hoi ke kumu mua loa o ke kula o Punahou.
            Ua lilo aku i ke kuai kudala ia kahi mokuku ia Henerieta no $974.15 a ua waihoia aku ma ka lima o ke Kakauolelo Nui o ka Aha Kiekie, a mai iaia aku a i ka Luna Dute Nui, ka mea nana e mahelehele pono aku i ua mau dala la. O T. W. Rawlins, kona ona i keia wa. Eia oia ke hoomaemae nei a lawe aku ka no Hilo e holoholo ai.
            O na hihia oki mare ka Lunakanawai Kaapuni Pere i hoolohe ae ai i ka Poaono nei. Ua aeia ke noi a Lily Nott kue ia James Nott, no ka malama ole i ke ola; Ah Fook kue ia L. Kealoha Kawai (w), no ka haalele mau iaia; a pela no hoi me Mary N. Ako mai ia Lewis Sigener. O ka hoopii a Kanani (w) e kue ana ia Wiliama Hakalaau, ua hoopau wale ia.
            I keia la mai no paha, a i ole, i ka la apopo e kapalulu mai ai ka mokumahu Derika mai Kapalakiko me na mea hou makamaka loa no ka kakou milimili. Iaia e haalele iho ai i keia awa a holo aku no Iokohama a me Honakona, e kau pu aku ana ka Loio Kuhina a me Kauka C. B. Wahie no ia mau awa no ka makaikai pono ana i ke ano o ka ma'i weliweli e laha mai la ma ia mau aina, o ia ka hebera.
            Ke lilo mai nei o Alanui Lehelehe i wahi hooluana no kekahi poe auwana ma na po Poaono a pau. Nui ka na hana lealea ma ia kahua hoomoana hou o kekahi o ko makou mau limahana, o ia ke keiki kau pepa a me ke keiki wili. O ka oi loa aku nae o ka hauoli, o ka inoa mua, no ka mea, ua muki aku oia i ka hai mea i minamina ai a haule ke kokoolua. Ola no ua kanaka! Ma ia wahi like aku no kahi lepo nui o Kapuukolo. Auwe kakou e!
            He Pake make ka i loaa aku iloko aenei o Kikihale i ka Poakolu nei i kekahi poe, a ua laweia aku no ka Halewai. I ka po Poalua aku ka make ana a na kekahi poe Pake elima i kaualako aku a waiho i Kikihale, a o lakou a pau ua paa nui i ka hopuia. Mahope o ka ninaninau pono ia ana, ua hookuuia mai lakou. Aole i maopopo ke kumu o ka make ana, aka, ua oleloia nae he kauka Pake ka nana i lapaau a make.
            E malamaia ana he aha hulahula ma ke ahiahi Poakolu, la 27 o keia mahina, maloko o ka Paka Kuokoa no ka hoomanao ana i ka la hanau o ka Moiwahine Vitoria o Beretania Nui.
            Ua bape tizoia a kaulimaia ke Aliiaimoku i keia kakahiaka e ka Haku Bihopa o Honolulu, maloko o ka Luakini o Sana Anaru, ma kekahi anaina pule kuikawa i ka hora 6:30. Ma ia mea, ua lilo aku la oia i hoahanau no ia Ekalesia. Ohuohu ke kiowai bapatema me na pua a me na lau uliuli.
            Mai Hilo mai nei ka lono no ka make ana o Kaua-i iloko o ka halepaahao, i hoao oia e pepehi i ka hope luna paahao, aka, loaa e i na kokua. Elua wa ona i kaia ai ilalo, hookahi, pa kona poo i kekahi poheoheo hao, a o ka lua, pa ke poo i ka papahele pohaku. Hoihoiia oia iloko o kona rumi, kauohaia a hiki mai ke kauka, ua make loa oia. No ke ahiahi keia o ka Poalua, la 5 nei. I keia pule ae e hoike pau pono ia aku ai.
            Poalua i hala i hoomakaia ai ka M. Puahi hoopii koi aie i ka Moiwahine Kanemake Kapiolani imua o kekahi kiure Hawaii. Ia ahiahi iho, mamua ae o ka hoopanee ana o ka Aha no ia la, ua unuhi mai ka loio o ka mea hoopii i ua hihia la, no ke ano nawaliwali maoli no hoi kahi o ka hihia. O ka ka wahine hoopii koe, ka L. Kainana Puahi, kue no ia mea hookahi. Kane no ka mea hoopii, Kakela no ka mea hoopiiia.

Halawai Makaainana Akea
—MA—
Halealii – Kuea

I Keia Poakahi, Mei 18, HORA 7:30 AHIAHI, — I KAHEAIA E KA — Ahahui Pukiki (UNIAO PORTUGUEZA). Ke kono ohaoha ia aku nei na poe hookaa auhau a pau e hiki ae. E HAIOLELO ANA KEKAHI POE ALAKAI IMUA O KA HALAWAI Ma na ninau ano nui loa e waiho nei imua o ka Ahaolelo. E Unuhiia ana no na Haiolelo. MA KE KAUOHA A KE Komite - Kuwaena O KA UNIAO PORTUGUEZA.