Ka Makaainana, Volume V, Number 20, 18 May 1896 — Page 7
HONOLULU, OAHU, POAKAHI, MEI 18, 1896 7
NA PALAPALA
[Aole maluna iho o makou ke koikoi o na hala a me na hewa no na manao i hoopukaia malalo o keia poo, aka, aia no maluna iho o na poe na lakou i kakau mai.]
Aole i Akakuu Iho.
M R. LUNAHOOPONOPONO:
E ae mai ia'u e kamailio hou no na mea i hoolahaia ma ka nupepa KA MAKAAINANA o ka la 4 o Mei, oia hoi, "He Maunu Ekaeka." No ka hiki ole ia'u ke hoomanawanui i kela mau olelo kikoola, pupule, hookano, a naaupo i ku i ke ano o na kanaka i hoonaauao ole ia, nolaila, ua kukulu au i ko'u manao malalo o keia kahua hou. E kala mai nae hoi ia'u, e ka lahui oiwi, malia ua hala loa ka'u mau kamailio ana mawaho o ka palena kupono.
O kakou ka lahui Hawai, he lahui kupaianaha loa kakou ma ko'u noonoo ana. Penei paha e maopopo ai: (1) He wikiwiki ma ke kamailio ana ma kekahi mea; (2) he hoakamai ma ke kamailio ana a he hoopuka hikiwawe i na huaolelo hooiloilo, he hookohukohu, me he mea la oia ka oioi o ka wini a me ka mahaoi a kohu hiena na helehelena ke nana aku.
Nolaila, o ka'u wale no i makemake ai, a o ia maoli no paha ka mea iini nui ia iwaena o kakou a pau loa, oia keia, o ka lokahi. Ina e loaa ia kakou ka manao lokahi, o ia auanei ke kahua e pale ae ai ia kulana o ka noho'na ilihune a i ke kahua o ka noho'na kuonoono, oia keia, ina e manao kekahi o kakou e hana i kekahi hana o kela a me keia ano, ua pono e haawi kela a me keia i kona ikaika a pau e kipa i ona la i loaa ka ikaika i ua hoa la, aole hoi o ke kipa aku a me na huaolelo i ku ole i ke ano o ke kanaka, o ia kana makana i kona hoa o ka pupuu hookahi. E waiho i na manao pilikino, aka, e haawi i na manao e hoolana ai i kona ikaika ma kana hana e pono ai. Ina e manao kakou (ka lahui Hawaii) e hoonee ia Puowaina ma kahi e, aole e hiki, no ka mea, he umi wale no kanaka Hawaii e manao ana e hoonee ae. Aka, ina lokahi kakou, ua hiki no.
Pela no, oiai ka Halekuai Kalahiki e ku ana iwaenakonu o ke kapitala o ke Aupuni Hawaii, aole no i nui loa na Hawaii i kipa aku e ike. Aka, ma ko'u hoomanao ana, ua oi aku ke kipa mai o na lahui e mamua o na Hawaii, a wahi no hoi a na haole i pane ae ai, "Ua oi aku ko makou iini e kipa mai e ike ia oe, mamua o ko makou kuai ana i na Pake a me na Kepani, oiai, nui loa ko makou hauoli i ka ike ana i kekahi o na kanaka Hawaii maoli e kukulu ana i halekuai. No ka mea, ina lokahi na kanaka Hawaii e kokua ia olua, alaila, e loaa no ia olua ka holomua. Pela no makou na haole, kokua kekahi i kekahi; pela no na Pake me na Kepani, he kokua ia lakou iho. Aka, o oukou, o na kanaka Hawaii, na poe e hoowaiwai nei i na lahui e, aohe o oukou kokua ia oukou iho. A no ia mea i pipili mau ai na haawina o ka noho'na ilihune maluna o keia lahui."
O keia ae la na huaolelo e loaa mai ana mai na haole i na wa a pau. A oiai, he mau huaolelo hoolana ka na lahui e, a ia kakou Hawaii hoi he awahua a kohu pupule, oiai na maka ua lilo mahope o ke kua. Nolaila, ua lilo i na lahui o na aina e ka mahalo, a ia kakou hoi he mau olelo hoemi hope i ka manaolana.
Nolaila, e o'u mau hoa, mai hoohalike me na kanaka o keia ano, aka, e haawi i ko kakou ikaika ma ka lokahi, aole ma kekahi alanui e ae.
Ma ka helu mua, ua hoike aku au i na kumu i emi ai na hana i hope, oia keia, (1) o ka ae aku i ka aieia mai, (2) o ka lawe ae a uku ole iho, (3) o ka aie aku a uku ole aku, a o ke kipa ole ia mai e kuai, a o ka maa ole i ka lawelawe ana a hui pu mai me ka ona a malama ole i ka hanohano o ka hana a me kona mau loina, aka, i makaala oe nou iho, alaila, he mea ole na kamailio waiwai ole o na ano a pau.
E o'u mau hoa o ka aina kulaiwi, e haawi i kou lima akau no ka onou ana ia oe iho imua, a i kou lima hema hoi, e huki ae i kou hoalauna imua, aole hoi ke ku a nana wale mai no me he kii la a haalele iho ia kakou i ka hope waa.
I kulike ai me keia mau hoakaka, ua manao au ua lawa ma keia na hoakaka ana i na kumu e kaohi mai ai i na kuia o ke alanui e hele aku ai imua.
KALAHIKI.
Honolulu, Mei 13, 1896.
Leo Pane i ka Hoa'loha.
M R. LUNAHOOPONOPONO:
Ua kukala leo nui ae o Mi sita Kanehe me ka hoopunipuni ma Wainiha a me Haena, ua lilo ka aina o kuu wahine Misasa H. Kanealii, i ka morakiia ia J. A. Akina o Waimea, Kauai. Auhea oe, e ka makamaka, he makemake au e hoike aku i keia ninau ia oe, ua loaa ane he kuleana ia'u i ke kane mare ke hoolilo ma ka moraki i ka aina o kuu wahine ke ole oia e hooia pu mai? E ao aku au ia oe ma ke akea. O kau mau olelo a pau he hoopunipuni. O ka uku hoolimalima, o ia ka'u i moraki ia J. A. Akina, aole nae i hooiaio pu kuu wahine ma ia hoolilo ana, aka, o na aie ana a'u, ua ae pono au a ma o'u iho ia mau koi ana, aole hoi maluna o ka'u wahine (Haili). O ka lohe ia ou, e Kanehe. Aole au i like me oe, i ka lawe hele i kau wahine i Koolau ma ka hale o J. H. Kahilina. Pau kauna o kou hele ana me ka hooleia mai aole e loaa ke dala aia a kakauinoa kau wahine. O ka'u wahine, aole i kakauinoa e like me kau hoopunipuni.
Nolaila, mai hoonui i ka olelo hoopunipuni a puni o Wainiha a me Haena, oiai, he pula nui ka i loko o kou maka i ole ai e lilo kou inoa ma Hawaii nei i mea kueia e ke kanawai. E olelo oe i ka mea pololei, aole i ka hoonui olelo me ka alapahi wale aku, e like me kau e hele lapaau laikini ole nei ma Haena.
Owau iho no,
D. KANEALII.
Wainiha, Kauai.
Ua Hala me ka Walohia.
Ma Alanui Ema, ua haalele mai la i keia ola ana o Mi sasa Kamealoha M. Kamakani i ka hora 6 a. m. o ka la 30 o Aperila, 1896. He fiva kona ma'i i make ai, a he ekolu pule wale no o ke kaa mai ana, a pauaho mai la i keia ao mauleule. Ua kiiia ke kauka aohe nae i loaa ka oluolu a hala wale no.
Ua hanauia o Kamealoha M. Kamakani mai na puhaka mai o Uku (k) a me Haui (w) i ka la 19 o Sepatemaba, 1871. Ua piha iaia na makahiki he 24 me 7 mahina a me 11 la o ka hanu ana i na ea huihui o keia ao mauleule.
Ua hoonaauaoia oia e Mi sasa Akeneki a ua holomua oia ma na mea i aoia ma na ano a pau. Ua mare i ke kane, ia M. Kamakani, ma ka la 1 o Ianuari, 1888, a ua hanau mai na laua he eha mau keiki, elua i hala e aku mamua ona a elua e ola nei. He oluolu a heahea oia i ka mea e kipa aku ana ma ko laua home. Malama pono oia i ka maemae o ka berita mare a hele aku la ma kela home ma o.
Aia maluna o ke kane i hooneleia i ka wahine ole, a me na keiki i hooneleia i ka makuahine ole ke kumakena, ke kaumaha a me ka luuluu. Nolaila, ke komo pu aku nei na makamaka a me na hoa'loha me lakou ma ka u pu ana. Nolaila, "e hoomaikaiia ka inoa o Iehova Sabaota, Nana no i haawi mai a Nana no i lawe aku."
J. W. MAHELONA.
Honolulu, Mei 2, 1896.
MAU OLELO HOOHOLO HOALOHALOHA.
Ia M R. M. KAMAKANI a me na keiki;
O makou, o na lala o ka Hui Hookuonoono Puuwailokahi o Honolulu, a ma ka inoa o ka hui au e noho kakauolelo nei, oiai, ua ili iho maluna ou a me na keiki i hooneleia i ka makuahine ole, ke kaumaha nui makolukolu me ka ehaeha a me ka walohia; oiai, ua oluolu i ka Makua Mana Loa iloko o Kona mana kupainaha, ka lawe ana aku i ke ola o kau wahine i aloha nui ia, a makuahine hoi o na keiki i hooneleia i ka makua ole;
A no ka mea, o Mi sasa Kamealoha M. Kamakani, i hala aku la ma ke ala mau o na mea a pau, na hoomaha oia i kona luhi, a o kana mau hana maikai a pau e lilo ana ia i kia hoomanao na ko ke ao nei e nana aku ai. A ke hooiaio aku nei makou i kona ano kulana maemae io me ke aloha, oiai kana mau hana maikai e waiho nei iwaena o ko olua home; Nolaila, e
HOOHOLOIA — Ke komo pu aku nei makou, na lala o ka Hui Hookuonoono Puuwailokahi o Honolulu me oe, iloko o ke kumakena a me ke kanikau pu ana me ke aloha, a me na keiki pu hoi i hooneleia i ka makua ole;
HOOHOLOIA — Ke pule nei makou i ke Akua Kahikolu Hemolele loa, e hoomama mai i kou kaumaha a me na ehaeha o keia mau la, a me na keiki i hooneleia i ka makua ole, no ka mea, o kakou ke hele aku ana i ona la, aole ia e hoi hou mai;
HOOHOLOIA — E hookomoia keia olelo hooholo hoalohaloha ma na nupepa KA MAKAAINANA a me ke Kuokoa.
O makou iho no me ka walohia, ma o ko makou komite la,
John W. Mahelona, John Nawai, N. Niheu, L. W. Hinai, a me W. B. Opulauoho.
Hale Hana Hao o Honolulu, Mei 2, 1896.
HELE HOOLUOLU.
O. R. L. Co.
MA NA POAONO A ME NA LA PULE.
E haalele mai no na Kaamahu i na hora 9:15 A.M. a me 1:45 P.M., a hoea hou mai i Honolulu nei ma na hora 3:11 a me 5:55 P.M. Na Palapala Uku Puni. Papa 1. Papa 2. Manana - - $ 75 $ 50 Mahiko o Ewa - - 1 00 75 Waianae - - - 1 50 1 25 F. C. Smith, Agena Ohua a Palapala Nui. feb 10-tf
KE PAHAOHAO LIMA OLE
Ma rian Moreires,
HANAUIA ME NA LIMA OLE.
Ua hiki loa i keia kaikamahine Pukiki uuku ke AI, KAKAU, HUMUHUMU, a me kahi mau hana e ae ke hana me na manamana o kona mau wawae. Ke Hoikeike nei i na La a pau, ma Alanui Nuuanu, Helu 420, mauka aku o Alanui Hotele a ma Waikiki ae o ko Love Hale Puhi Palaoa. Hemo mai ka hora 10 A.M. a ka hora 12 M., hora 2 a 5 P.M., a mai ka hora 7 a 9 P.M. Uku-komo, 25 ken.; Keiki, 10 ken. mei 4-mhp