Ka Makaainana, Volume V, Number 20, 18 Mei 1896 — Page 3

HONOLULU, OAHU, POAKAHI, MEI 18, 1896. 3

NA AINA MAMAO.
Mau Lono Huikau mai kela a me keia Wahi Like Ole.

Pepehiia ke Sa o Peresia.

                Ho ra 2:40 o ka auwina la o Mei 1 nei i loaa ae ai he telegarama ia Kuhina Nui Olone ma Wasinetona mai ia Kuhina Makonala ma Teherana, Peresia, penei: "Ua hele aku ke Sa i kahi hoomana ma kahi kokoke i ke kulanakauhale nei i keia la no ka haipule ana, a iaia i komo aku ai iloko loa ua ki pu ia mai oia e kekahi powa i hoaahu iaia iho me he wahine la, ua komo aku ka poka ma kahi o ka puuwai. Elua minute mahope iho i make loa ai oia. He hiena kipi ka mea powa. Nui ke kaumaha, maluhia nae ke kulanakauhale."
                Mahope koke iho o ka loaa ana mai o keia lono, ua hoouna pane telegarama aku ke Kuhina Nui i ke Kuhina Noho ma o, e kauoha ana iaia e hoike aku i ke Kuhina Nui o Peresia i ko ka Peresidena manao aloha a kaumaha no keia haawina luuluu, a me kona hoowahawaha loa hoi i ke ano o ka hana hiena i hookoia maluna o ka Moi. Ua hopuia ka powa mahope koke iho no o kona hana ana i kela hana.
            Ua kukala koke ia ae o Maufee de-Dini, ka hooilina alii, i Sa (Moi) ma kahi o kona luaui i powaia. Iloko o 1858 i ike ai o Rusia a me Beritania Nui iaia ma ke ano he hooilina no ka leialii. O ke Kuhina Nui no ke hoomalu ana a hoea aku ke Sa hou i Teherana mai Tabereza aku.
            Aohe hoohewahewa ana i koe o Mola Re za ka hiena nana i lawe ke ola o ke Sa i make. Nazaraede-Dini, he ukali no kekahi mea hoeueu kamaaina, oia o Seika Jeme Aledina, i kipakuia hoi iloko o 1894 mahope iho o kona ahewaia ana no ke kipi kiekie loa. Mai ka hopuia ana o keia powa, ua ninaninau akahele loa ia oia e na luna o ka mana hookolokolo. I kinohi ua olelo ae oia nana ponoi iho no ka manao e hana e like me kana i hooko ai no ka pomaikai o kona lahui, no ka loaa ole ka o kekahi mau hooponopono ana a lakou i manao ai he kuleana pilipaa loa no lakou. Mahope iho nae hoi, ua mihi ae la oia a olelo ae la o ka hopena keia o kekahi hoolala ana i noonoo loihi ia me ke akahele loa, a oia ka mea i kohoia nana e hooko aku keia hana awahua. No elua ka malama, wahi no o kana hoike hou ae, o kona kakali ana i wa kupono nona e ki ai i ke Sa, a na ia mea i hoopaa aku i ka manaoio iloko o na luna aupuni ma Konakinopela kahi i hoopunanaia ai a kiko keia ohumu kipi, no ka mea, ua alua paha mahina mai kona haalele ana aku ia kulanakauhale no Teherana. Ua ae ae no hoi ua powa la ua lehulehu loa na wa ona i hoea ai imua o ka Moi malalo o na ano like ole o ka hoano e ana iaia iho, eia nae, aole loa i loaa iki iaia ka wa kupono a i kela Poalima wale no, akahi no oia a lihi kokoke aku e hiki ai ke ki pono aku i ka poka e make ai o kona enemi.

Na Hana Kaua ma ke Soudana.

                Ua hooauheeia e kekahi pualikoa Geremania he mahele nui loa o na poe Hotenetota kipi ma Damarana i Aperila 5, he 46 o lakou i make. He uuku ka poino ma ko na Geremania aoao.
            O na lono hope loa no Osemana Digina, ua hoike ae ua haalele aku oia i ke kahua o kahi o kona hakaka a hoauhee koke ia ana mai nei a ke hele la ma ke komohana, eia nae, aole i maopopo aia paha oia ke hele la no Toka a no kona wahi paha ma ka Alabara.
            He manawa wale no paha a laweia ae o Fi rikata, ma kahi o 15 mile ma ka hema aku o Akasihe ma kae o ka Nile, i kahua hoomoana hou aku no na pualikoa Beritania no mua aku. Ua paholaia ae he lono e waiho aku aku ana o Sirdar Kitchener no ka hoohaikiia aku o kona mana. O na kahua hoomoana hoi o mua aku o na poe Derevise, mai Dogorasiki aku a Fereke, ua piha he 4,000 kanaka malalo aku o Hamuda. Ua oi loa aku ka pupupu a pipili loa o ka moe kaoo ana o na Derevise mai Donogola a Mogorakia, a malia e hookuene pono iho ana ka enemi ma Donogola no ke kue aku i na poe kue mai ia lakou.

Na Lono no A ferika Waena.

                Ua piipiikai loa o Bane Banato, ka Moi Kafiri, no na hoopai i hookauia aku maluna o Roke, Hamona a me kahi poe e ae ma Peretoria, a ke hoike la oiai kona inaina ma ke pani ana i kona mau lua (mine) eli daimana a ke hoolilo la i kona mau aina a pau ma ka Rana. Pioloke a kunana ka lehulehu no nei hana, no ka mea, ke paniia na mine a Banato, ua like ia me ka hoonele ana i kekahi mau tausani kanaka i ka hana, me ka hoomahuahua loa aku hoi i ka pohai na poe mua no i nele i ka hana i hele no a mahuahua.
            No Buluweio ka lono o Ape rila 27 i loaa ae ma Ladana i kahi la ae, a e hoike ana: He hoouka kaua nui ko nei i keia kakahiaka. Ekolu puali (regimana) i hoopuni ae ia makou. Ua hoauhee a hoopuehuia lakou e makou me ka nui o ka poino.

Hoomainoinoia Iloko o Kakela Mo ro.

                Aperila 29 i hoea ae ai o Walte r S. Whitcomb (Witicoma), ka ona mahiai Amerika opio i hoike mua ia ai ua hookoia ka hoopai make maluna ona ma ke kauoha a na luna oihana Sepania, a me he la hoi, e lilo aku ana kona hihia i mea e ulu ae ai o kekahi paonioni e kukaiia ai mawaena o na aupuni a elua. I pakele oia no kona mahuka ana mai Kakela Moro ma Havana mamuli o kekahi kaula, a nana hoi i hoike ae i kekahi mau hana hoomainoino a na poe Sepania ma Kuba.
            Oiai no oia ma kona kihapai, ua hopu pio ia iho la oia, a me ka hookolokolo ole ia a aeia paha hoi e kukai pu aku me kona aupuni, ua lawe loa ia oia no Kakela Moro e hoopaahao ai, no ka hoohuoi wale ia no ua kokua oia i ka aoao o na kipi. A hoea i ka halepaahao, ua hukiiia kona mau lima me na wawae, oia a me kekahi poe Kuba lehulehu. Kakahiaka ae, ua hele mai la ka mea hooko hoopai, a hele aku la i kela a me keia Kuba a ki aku la a make.
            Ua hookuuia o Wi ticoma e ola, aka, ua hoopaaia aku iloko e kekahi wahi paa okaoka. Mahope o ka noho ana no hookahi pule, ua aeia oia e puka holoholo iloko o ka pa o ka halepaahao, a ia mau wa oia i kipe ai i kekahi kiai e haawi aku i kaula iaia, a me ia oia i hookuukuu ai iaia iho a pakele. Wahi no o kana hoike, ua maopopo iaia he 12 poe Amerika e paa la iloko o ua wahi la iaia i haalele aku ai, me ka nui o ka hoomanawanui ana i ko lakou hoopilikiaia me ke ku maoli no i ka mainoino, mamuli wale no o ka oleloia ua kokua lakou i na kipi. E hiki ae ana oia i na la mua o Mei nei a hoike aku i kona ike imua o ke Keena o ko na Aina E ma Wasinetona, no ka pono o kela poe Amerika e hoopaahaoia la.

Na Hunahuna Laulaha.

                Ua oleloia aia o Generala Redeva Bula a me Haku Wuluse ke hoopaapaa la no ke ano o ka lawelawe ana i ke kaua ma ke Soudana a e haalele aku ana ka inoa mua.
            I ka hooluolu ma Farani ka Moi Vitoria o Beritania Nui, a ua paa a me kahi poe alii a poe hanohano e ae iloko o ka helu kanaka ana mai nei malaila. La 2 nei oia i huli hoi ae ai no Kakela Winisoa.
            Ua lilo pio mai ke kahua-poo o na kipi ma La Pe za, Nicaragua, ia Generala Zelaia. Lehulehu na poe i hopu pio ia. Pela no hoi me Momotomobo, ua lilo mai no iloko o na lima o na pualikoa aupuni malalo o Generala Reise. Aia wale no ka enemi ma Leone i keia wa.
            Ma ka aoao o ka Emepe roa o Kina, o Li Hana Kana kona elele ma ka poni ana ke Za o Rusia (i keia la, a i ole ia, i ka Poakolu iho ma ko kakou helu). Aia oia i Sana Peterobuga i keia wa a ua lawe pu aku he heluna nui o na makana makamae loa.

Auwai Hookahekahe Wai.

                Ke haulani nei ke ana auwai a ka olohe o ke Kula o Kamaomao ma ke kii ana i auwai hou makai o ke alanui hele loa ma Koolau, mai ke kahawai aku o Nailiilihaele a hiki loa aku i ke kahawai o Honomanu, he aina pali. He okoa no ka auwai kahiko aia ia mauka o ke alanui hele. O ka huina iho la nae keia o na auwai elua o Nailiilihaele, a hookahi ka inu ana o Maui i ka wai poholo iloko o ka luapao. Ke hoomakaukau pu ia nei me ke pani ana i ke kahawai o Kailua, Huelo, a hamo iho i ka puna a paa a lilo i luawai hookio. A mai laila mai e komo ai iloko o ka lua i paoia a puka a hui me ka auwai kahiko.
            He mau la ua keia o Huelo nei.
                O kahi mea hou ia o kuaaina nei.
Kou Oiaio,
MO SES PAPAIAKEA, JR.
            Huelo, Mei 8, 1896.

            O ke akule ka i'a nui o ka makeke o keia mau la, no Waianae mai.
            He 11 ka nui o na heihei like ole e malamaia ana ma Kapiolani Paka ma ka la 11 aenei o Iune. Eia ke kakele mai nei na lio e komo ana iloko o na lealea o ia la i keia mau kakahiaka.
            Mahope iho o ka noonooia ana o kekahi mau kumuhana ano nui ma ka halawai ana o ka Ahahui Hooulu Lahui i ka Poakolu, la 6 nei, ua hapaiia ae la ka noonoo ana no ka hoomahuahua ana ae i ka uku o ka mea nana e malama nei ia wahi, oia o Mrs. Lemona a ua hooholo lokahi ia ka hoopii hou ana ae i kona uku i $50 no ka mahina.

Robert Napunako Boyd
(I TALIA)

He Ana-aina a he kokua no hoi ma ka hooponopono ana i na waiwai paa, huli ana paha i na Buke o ke Aupuni, a pela aku.Keena Hana: Mauka iho o ka Hale Leta, maluna ae o ka haleaina Pake, Alanui Betela. apl 13-mp

C. B. DWIGHT
[KALE KUAIKA.]

Mea Hana Pohaku Kaekae Alanui, na He Kupapau a me na Kia Hoomanao Mabala. E loaa no oia ma kona wahi noho ma Koiuiu, Honolulu nei. Telepona Helu 833. 17-1mk

E. M. NAKUINA.

KOMI SINA O NA ALA LIILII A ME NA PONO WAI. Notari Lehulehu, a he Agena Haawi Palapala Ae Mare no Honolulu nei. KEENA HANA: Helu 303, Alanui Kalepa. dk—1m

J. K. KAHOOKANO.

LOIO a he Kokua ma ke Kanawai. KEENA HANA: Alanui Kaahumanu Honolulu. ian 8, '94 1mk