Ka Makaainana, Volume V, Number 20, 18 May 1896 — Page 2

2 HONOLULU, OAHU, POAKAHI, MEI 18, 1896.

IO SEPINE
—KA—
EMEPE RESE PUUWAI OLU O FARANI.
MOKUNA II.
KA MA RE ANA O IOSEPINE.

                He umikumamaha wale no mau makahiki o Iosepine i ko laua wa i kaawale ae ai me Uilama mai ka pili aloha ana. Kaalo ae la he makahiki me na la keu, aole nae he wahi laina huaolelo i loaa mai iaia mai ia Uilama mai. Ke hele loa iho la kona mau noonoo maikai e haulehia iloko o ke kaumaha.
                "Auwe! ka ehaeha o kuu naau," i puana ae ai ua Io sepine la iloko o kona mau hora o ke kupilikii a me ka mokumokuahua i nei mea he aloha. O na hoomanao ana no Uilama, oia mau no ia iloko o Iosepine i kela a me keia manawa, pela no hoi me na pana ana a kona puuwai e pinapinai mau ana i kela a me keia minute.
            Iaia no e noho ana me na hoomanao ana ia Uilama, hoea mai la kekahi keonimana mai Farani mai e ike i kona makuakane hanauna malalo o kekahi hana pili oihana. He kanaka kulana maikai oia, ua kanakolu paha kona mau makahiki, a he kanaka hoi ua ike mau ia iwaena o ka pohai o na anaina maikai. He kulana kona iloko o ka pualikoa o Farani a ua nui hoi kana mau hana koa a wiwo ole i hana ai, a aia hoi oia maluna o ka hanohano o kana pahikaua kahi i ku ai ia mau la, nona ka inoa o Alekanedero de Bohane (Beauharnais).
            He lehulehu o na waiwai paa maluna o ua mokupuni la, e pili pu ana me ko Mona siua Renaudina mahinaai, i ili aku maluna o ua aliikoa opio la a me kona hoahanau, ka Makuisa o Bohane. A i hele hoi ua keonimana la ilaila e hoomaopopo i ka nui o kona kuleana maluna o na mokupuni la o Matiniku. E paa ana hoi o Renaudina i kekahi o ua mau waiwai la malalo o ka hoolimalima no kekahi manawa loihi. A oiai, ma kahi noho o Renaudina e lawelawe ai o Bohane i kana mau hana pili oihana, ua haule aku la ka ike o na maka o ua keonimana la maluna o na helehelena nani o Iosepine a hoomaka ae la kona manao e hoolauwiliia malalo o ke aloha no ua mau helehelena nani la.
            Ua piha hauoli hoi na makua o Io sepine i ka laua kaikamahine no kona lawe maoli ae i kona kulana maemae o ka noho'na home a me kona ohaoha imua o ka lakou malihini hanohano. Ua ume aku ke ano o kela keonimana opio i ka noonao maikai o na makua o Iosepine ma na ano a pau, ma na kulana like ole ana e paa ana iloko o kona mau la opiopio wale no, oia hoi, ke kulana aliikoa, ka noho'na waiwai, ka paa rula a me na mea like o ia ano. Na keia mau hiohiona like ole i kono mai ia Renaudina e ui aku ia Iosepine no kekahi kumuhana ana i manao mua ole ai e hoopa aku i kana kaikamahine, aka, iloko iho la no o ia manawa pokole wale no. O keia kumuhana a ua makuakane la i manao ai e hoopa aku i kana kaikamahine, o ia no ka hoohui mare me ke keiki opio ui e noho ana iluna o ka waiwai a me ka hanohano. A no ua kaikamahine la hoi ana, aole loa oia i hoopoina no Uilama iloko o keia loihi loa o ko laua kaawale ana, aka, ke mau la no ke aloha pilipaa iaia me he waikahe la.
            I kekahi kakahiaka e noho ana o Iosepine iloko o kona rumi heluhelu buke maluna o kona noho-paipai, ua komo aku la kona makuakane iloko o ua rumi la ana e noho ana no ka hoike ana aku imua ona no na mea e pili ana i ua kumuhana la o ka hoohui mare me ka Monasiua Bohane. Ia Renaudina i hoomaka aku ai e hoike i ua manao la imua o kana kaikamahine, ua noho mai la oia me ka hoolohe malie ana a ua like me kekahi puupuu ikaika i kuiia aku iaia ka hoonaueia o kona puuwai no ua mau olelo la. Hoolohe malie mai la nae oia a pau, alaila, pane mai la me ka helelei ana iho o kona mau waimaka,—
            "E kuu makua, e hoike aku au ia oe me ka pololei o ko'u mau noonoo ana a pau, aia ia maluna o Uilama. A ua haawi aku hoi au i ka'u mau hooia ana ma na ano a pau iaia."
                "He mea kupaianaha loa kela, e kuu keiki," wahi a ka makuakane. "Ua loli aenei ke au o ka manawa, e eia hoi ko maua mau manaolana ana maluna ou. Nolaila, e pono oe e hooko mai i ko maua manao."
            "A pehea," wahi a Io sepine, "ua hoololi anei oe i kou mau manao e pili ana ia Uilama?"
            Eia ka ka makuakane pane iaia iloko o kela mau minute o ke kupilikii:
            "Ua hoopoina paha o Uilama ia oe, no keia manawa loihi o ke kaawale ana. A no keia hoi, e loaa ana ia oe ko'u mau waiwai a pau. No ka Mona siua koi, ke noho nei oia maluna o ka waiwai a me ka hanohano. O kou hoohuiia ana, pela auanei e hui ae ai ko olua mau waiwai. Oia kau kane kupono loa iloko o ka noho'na maemae."
            Aole loa he pane no keia mau olelo mai ia Io sepine aku. Nana iho la kona mau maka ilalo me ka manao kaumaha. Ua oleloia ae no hoi, aia ma ka malu o kona makuakane na leta a pau a Uilama i kakau mai ai iaia, a maloko o ia mau palapala na olelo e hoike ana i ka pilipaa o kona aloha no Iosepine.
            Aka, pehea la e hiki ai iaia ke pale ae ia mau mea, oiai, oia ka momoku ah i o ka hoohui mare awiwi ke hele aku la imua ona. Aole loa e hiki i kela aloha ona ia Uilama ke hoopakele ae iaia mai na manao hookonokono o kona mau makua.
(E hoomauia aku ana.)

Nui no ke Kupaianaha.

                Aia ma Omaha, Mokuaina o Nebara saka, Amerika Huipuia, he keiki opio o umikumamalua wale no makahiki, e noho ana hoi maloko o kekahi halemai mamuli o ka eha i loaa iaia, a ua hiki ole ke hoopauia ae e ka ike o na kauka. O kahi moolelo pokole e pili ana i keia poino i loaa i ua keiki la, peneia iho: I kekahi la, e hele ana oia me kana pu raifela ua piha i ka poka, a ma kekahi wahi ua noho iho la oia e milikaa i ua pu la ana. Ia manawa no ua kani hewa ae la ka pu a komo aku la ka poka maloko aku o ka poho lima hema a paa loa iloko. Ua noke iho ka ike o na kauka a hiki ole.
            I kekahi la ua hoea aku o Porofesa Turner o ke Kulanui o Omaha me kana mea paikii hoonui ike a hoomaka aku la e noii i kahi o ua poka la i noho ai. No hookahi hora ka noii ana a ua ohe nana paikii la me ke akahele, aia hoi, loaa aku la kahi i waiho ai o ua poka la ua hunaia e kekahi mau aa elua ma kahi kokoke i ke ami o ke kuekue lima.
            I ke okiia ana e ke kauka i ka pahi, ua loaa io aku la no ma kahi i hoikeia mai e kela ohe nana kupaianaha.

            He mau pule ae nei i hala, ma Aiea, Ewa, ua nokeia iho la i ka hailuku i ka pohaku ka hale o E. Mikalemi e kekahi poe i maopopo ole ko lakou mau ano. Ua pau na pukaaniani i ka nahaha a hoopoinoia na mea o loko o ka hale. He ekolu poe kanaka i hoohuoi wale ia na lakou i hana kela hana lokoino, aole nae i paa.
            Ma ka hoopii a Rudope Sepekela ia W. M. Gifada, kakauolelo a puuku o ka Hui Mahiko o Paauhau, e papa ana iaia mai ka hoolilo a holoi ana ae i kekahi mau palapala kuleana a me ka hoopuka ana i mau palapala hookuleana hou ma kahi o na mea mua, ua haawi mai o Lunakanawai Pere i ka pono no ka mea hoopii.

Hui Papa a Kukulu-Hale Oahu.
(OAHU LUMBER & BUILDING CO.)

Leleo, Alanui Moi, kokoke i ke Kahua o ka Hui Alahao & Aina Oahu. Poe Kalepa Laau, Hana Aelike a me Kukulu Hale. Poe Hookomo Mai a Hoolilo aku i na Puka, Olepelepe, Kui, Pepa, Pena, Aila, Na Pono Kamana, A pela aku, a pela aku. Telepone 53. Pahu Leta 222. apl 20-tf

C. E. Williams me Keiki.

E d. A. Williams, Luna Nui. Helu 611, Alanui Moi, ma Ewa iho o ka Pa o Aigupita. He mau mea kuai lako hale o na ano a pau loa. He mau mea Hana Pahu Kupapau a Hooponopono Hoolewa. E hoolakoia no na Kaa Kupapau, na Kaa-pio a me na Kaa-ohana. Ina no e ninau ia laua, e loaa no na Pohaku Kia Hoomanao no na He Kupapau. O ka Ialoa kekahi hana hiki loa ia laua, aia ia malalo o ka lawelawe ponoi ana a Ed. A. Williams, F. D., he mea i puka pono mai ka Kalaka Kula o ka Ialoa Maikai ana iloko o Mei, 1894. —NA TELEPONA— Keena, Helu 179—Kauhale a me Kahea Po, Helu 815. nov 2-mp. feb 3-mp.

HALEKUAI LAHUI KALAHIKI.

Helu 405, Alanui Moi, ma Waikiki aku o Alanui Nuuanu, ma ka aoao mauka, ke keena mua o ka "Hawaii Holomua." Ma ia halekuai o na oiwi e loaa ai na anoi a me na paihi o na ano hou loa, e laa Na Kalakoa, Na Keokeo, Na Makalena, Na Kinamu, Na Huluhulu, Na Lihilihi, Na Kamaa o na Kane, Wahine me Keiki, a pela aku. Oluolu no ke kuai ana. Aohe hewa ke kipa mai e ikemaka, a aohe no hoi he kunukunuia no ka hoikeike ana i na mea kuai. M. PALAU, Luna Nui. ok 14-tf

Waihona Buke Hawaii.

E loaa no na buke ma ka olelo makuahine no ke kuai ma ke keena o ko makou Puuku. Penei iho kekahi o ia mau buke: Laieikawai - - - $1 00 Gaberiela Lenoa - - - 75 R. W. Wilikoki - - - - 50 Hookahuli Aupuni o 1895 - 50 a pela aku, a pela aku. O na buke e ae no hoi kekahi, e laa na buke kanawai, a me kahi mau ano e ae, ke ninau pololei ia mai ia F. J. TESTA (Hoke), 327 Alanui Moi. ko 28-tf