Ka Makaainana, Volume V, Number 18, 4 May 1896 — Page 6
6 HONOLULU, OAHU, POAKAHI, MEI 4, 1896.
MOOKUAUHAU ALII.
Na Iwikuamoo o Hawaii Nei
mai Kahiko Loa.
[Hoomauia mai ka helu 17]
Mamua o ke komo ana aku ma ka Mahele II o keia mookuauhau alii, he mea pono e hookohoia maanei he mau hoakaka ana no na mea i puka ma na helu i hala, a he mau hoopololei ana me ona mau hooponopono ana i na mea e molaelae pono ai. He mau pakui pu no hoi kahi.
HOOPOLOLEI: Ma ka helu 17 o ka la 27 o Aperila, a ma ka Wa III , malalo o ke poo "Na Kane," helu 76, o ka pololei, o Kukohou, aole o Kukohoa. Ma ia Wa no, malalo o ke poo "Na Keiki," helu 61 o ka pololei o Huanuiikalalailai, aole o Huanuiikalailai. Ma ka Wa I V. iho, malalo o ke poo "Na Keiki" helu 116, o ka pololei, Pauli Kaoleioku, aole o Pauli Kaoleiku.
HOAKAKA: O na helu i kauia mamua o kela inoa keia inoa o na kane, na wahine, a me na keiki, he mea ia e hoomaopopo ai i ke kane, ka wahine a me ka laua keiki a mau keiki paha; a pela no hoi, ina hookahi kane a he lehulehu kana mau wahine, a pela pu me ka wahine he lehulehu na kane. Penei: O Kumuhonua ke kane, o Haloiho ka wahine, o Ahukai ka laua keiki, he helu 1 pakahi like lakou; pela no hoi o Ahukai, o Holehana kana wahine a o Kapili ka laua keiki, he helu 2 pakahi like ko lakou. O Wakea hoi he helu 21 kona , a o ia no hoi ka helu o kana mau wahine, oia o Papa me Hoohokukalani, a pela no hoi me ka lakou mau keiki, oia keia, na Papa (w) o Hoohokukalani (w), a o keia Hoohokukalani (w) no noho me ka makuakane me Wakea, loaa o Haloa (k). Ma ka helu 43 mai hoi, o Akalana (k) kii ia Hinakawea (w) loaa keia mau keiki, o Mauimua, Mauihope, Mauikiikii a me Mauiakalana.
Malalo o ka Wa III, ma ka helu 78 mai o na kane, o Kanipahu ka inoa, a ma ia helu no ma kahi o na wahine, o Hualani kana wahine mua nana keia mau keiki, o Kanaloa, Kumuokalani, Laaikiahualani a me Kalahumoku; a me ka wahine elua mai hoi me Alaikauakoko, loaa o Huanuimakanalenale. Ma ia Wa no, helu 91, o Liloa ke kane a o Pinea I. ka wahine mua, o Hakau ke keiki; a me Akahiakuleana hoi, loaa o Umi.
Hooponopono me pakui mai---Ma ka aoao 113 o ka Buke II. a Aberahama Fonana, ua hoikeia malaila na wahine me na keiki a Keawenuiaumi, penei: O Keawenuiaumi ka i noho ia Koihalawai (w) loaa keia mau keiki: o Kanaloakuaana (k), Kanaloakuakawaiea (k), Kanaloakapulehu (k) a me Keakalaulani (w); a me Haokalani (w) hoi loaa o Lonoikamakahiki (k); a me Hoopiliahae (w) loaa o Umiokalani (k) me Kamolanui-a-Umi (w) loaa o Kapohelemai (w); me Hakaukalalapuakea (w) loaa o Iliilikikuahine (w). No keia ae, ua kueia mai na mea e pili ana i ka makuahine o Lonoikamakahiki e ka hanauna o ia lalani alii e ola nei. Ua haiia mai i ka mea kakau o Hoopiliahae no kona makuahine laua hoi o Umiokalani. Ua kue pu ia mai no hoi na mea a Aberahama Fonana i hoike ai ma kana Buke II, ma ka aoao 114, a pela no ma ka aoao 125. O ka Lonoikamakahiki wahine nana keia mau keiki, Keawehanauikawalu k a me Kaihikapumahana w, o Kaikilani, Aliiwahine o Puna no, aole hoi o Kaikilanimaipanio w.
E haawi no ka mea kakau i kana olelo hooholo maluna o na mea o keia ano e kue ana i na mea i kakauia e Fonana, aia wale no nae a waihoia mai kahi buke kakaulima paha i hoonohonohoia e na alii i hala, a i ole, o na mamo o na hanauna no o ia lalani alii e ola nei, ke waiho mai i kana mau hooponopono ana no na inoa o kona mau kupuna alii i kakau hewa ia e na buke a na kakaolelo e waiho nei, a me ke kau pu mai i kona inoa ponoi. Aole e hiki i ka mea kakau ke olelo, ua oi aku ka pololei o ko na buke e waiho nei mamua o ka mea i kakauia e na hanauna lehulehu o ia lalani e ola nei; aka nae, e pono no me na kakoo e waihoia mai ai na hoopololei ana, i hiki ai ke lilo i mea paa.
[E hoomauia aku ana.]
Ola a Kani Moopuna.
Ua make ma Irelani i ka makahiki 1892 o Denni s Koorolee, nana mai na keiki he 48. He ehiku ana wahine i mare ai. A hiki i kona la i make ai, e ola ana he 41 o kana mau keiki, 336 poe moopuna a me 944 poe moopuna kualua. Maluna aku hoi o 1,000 ka nui o kona mau pilikana i ukali aku i kona huakai hoolewa hope loa. Ulu ka lahui la!
Aia ma Mo sekao, Rusia, ka bele nui hookahi ma ke ao nei nona ke kaumaha he 432,000 paona.
O ke kaumaha o ka pahi okipoo he 120 paona, he 9 kapuai ke kiekie o kahi e kau ai, a i ka wa e hookuu iho ai e mahele pu ia no ka iwi a me ka io me ka hikiwawe loa. Ua like no ke oki ana me ko ke kanaka oki ana i ka auka kopa me kekahi pahi oi lua. He ekolu-hapaha sekona wale no ka manawa e haule iho ai ua ano pahi la maluna o ka a-i o ke kanaka a make loa.
Laweia e ke Au a Haalele.
Aia ke moe malie la maluna o na lae aa o na paemoku Makala, ma ka Pakipika Hema, kekahi moku kalepa i maopopo ole ka inoa i lawe hele ia aku e ke au a me ka makani, mai kekahi wahi mai o Kaleponi Lalo. Aole i maopopo kona ona, ka manawa i poino ai, a pela aku. Ma ka hoike a ka malamamoku o Hokuao, ua nana akahele oia i ka inoa o ka moku aole nae he loaa o ka mea pololei, eia wale no na huaolelo anai hoomaopopo, "Transfer" a me "Cal." He 150 kapuai kona loa. Ua koho wale ia no mai kekahi wahi mai o Kaleponi Lalo i laweia aku ai kela moku e ke au a me ka makani no eha tausani mile a hoopaeia ilaila. Ua pau ke keleawe o lalo i ka weheweheia e na kanaka o laila, a ua hoaoia ka moku e wawahi aole nae he manuheu iho. O kekahi mau wahi o ka moku he o ia mau no ka maikai.
Elua-Hapakolu Sekona Wale no.
Ua loaa mai nei i kekahi kanaka Farani kekahi mau lawelawe hana ana e hiki ai ke hoopaaia ka holo paukiki ana o kekahi enegini a mau enegini paha iloko o ka manawa pokole loa. I ka wa ka e hoopa aku ai maluna o kekahi pihi, e pau koke no ka niniu ana o na mikini, a na ka peleki no hoi e hoopaa i ka huila nui (fly wheel). O kekahi enegini he iwakalua lio ka ikaika hoohana o kona mea paahana a e kaa ana ma ke 90 niniu ana i ke sekona, ua hiki loa ke hoopaaia iloko o elua-hapakolu sekona wale no.
He 1,160 ka nui o na poe luna e hana ana maloko o ka Banako o Enelani, a me 1,000 poe kakauolelo. A ke ukuia nei lakou ma kahi o ka £500,000 i ka makahiki a oi aku no paha. Ina e hiki ole ae kekahi o na kakau olelo iloko o ka manawa hana, oia hoi, ulolohi loa mahope o ka wa hana no ekolu a eha manawa, e hoopauia no oia.
Ano e mai nei ka hoi Ke Aloha Aina, i elua ka hoopuka ana o kela manao e pili ana i ke kahua ma'i lepera o Kalawao. Puka no i ka pepa o ka Poakolu nei a oili hou no i ka Poaha mai. I ke ao no kahi la i ka nema ia makou, a laa ko loaa pono la ia makou. Hamau, mai walaau hou!
Ma keia holo ana mai nei o ka Miowera a holo loa aku la no ka Akau, ua kaa kona hookeleia ana malalo o ka malamamoku ekahi, C. W. Hay, a oia aku la kona kapena. O Kapena Stott, ua waiho aku oia i kona kulana oiai ka moku ma Kikane. I kona wa e noho kapena ana elua manawa o ka Miowera i ili ai, hookahi ma Puuiki a hookahi ma na lae kahakai o No rewai.
Popopo na mea paahana o loko o na enegini o ka mokukaua Amerika Kaletona e moku la ma na kai o Iapana, a ua manaoia e hoi ana oia i ka home no ke pahonohono hou ana. I ka makaukau ana e holo mai, ua puka ae la ka ma'i hebera iwaena o kona mau kanaka a ua hoomalu koke ia ka moku ma Nagasaki O ka mea ma'i ua laweia no ka halema'i e lapaau ai, a ua puhi hoomaemaeia na poe a pau o ka moku. E i aku paha oia ke au mai la no keia awa.
Huina
Waiwai
Nui!
Hoemi Nui Loa Ia!!
Pomaikai Nui ma na Mahele
a pau ma ko L. B.
Kerr Halekuai,
---Alanui Moiwahine.---
30 i-a Kalakoa no $1.
Papale Mauu Laiki no 25 keneta pakahi.
12 i-a Kalakoa Huluhulu no $1,
18 i-a Lipine no 25 keneta,
15 i-a Makalena Keokeo no $1.
Na Hainaka Silika, 10 keneta pakahi.
Na Pua a me na Hulu Papale, aneane e haawi wale ia.
Ua makemakeia e lilo pau loa aku na waiwai, aohe hookoe ana iho i kahi mea. O ka emi oiaio keia i ike ole ia mamua. E hele koke mai, i loaa koke no na mea e anoiia ana. Na ka hiki mua no ka wae mua.
L. B. Kerr,
apl 27-tf Alanui Moiwahine.
Waihona Buke Hawaii.
E loaa no na buke ma ka olelo makuahine no ke kuai ma ke keena o ko makou Puuku. Penei iho kekahi o ia mau buke:
Laieikawai - - - $ 1 00
Gaberiela Lenoa - - - 75
R. W. Wilikoki - - - 50
Hookahuli Aupuni o 1895 - - - 50
a pela aku, a pela aku.
O na buke e ae no hoi kekahi, e laa na buke kanawai, a me kahi mau ano e ae, ke ninau pololei ia mai ia
F. J. TESTA (Hoke),
ko 28-tf 327 Alanui Moi.
E. M. NAKUINA.
KOMISINA O NA ALA LIILII A ME
NA PONO WAI.
Notari Lehulehu, a he Agena Haawi Palapala Ae Mare no Honolulu nei.
KEENA HANA: Helu 303, Alanui Kalepa. dk--1m
F. J. TESTA, (Hoke).
MEA OHI A KOI AIE
Mea Huli Moolelo Aina a Waiwai e ae paha.
Mea Unuhi a Mahele Olelo Hawaii a Enelani paha.
Mea Hana Palapala Kanawai o na Ano a pau.
Mea Kuai Mikini Humuhumu Lole.
Mea Hoolimalima a Hoolilo Aina
Mea Kuai Waiwai no ka Uku Komisina Haahaa.
Ua makaukau mau oia e lawelawe i na hana a pau e haawiia mai ana iaia. He kuike ka rula.
E loaa no oia ma keia keena. apr 8-1mk