Ka Makaainana, Volume V, Number 18, 4 Mei 1896 — Page 3
HONOLULU, OAHU, POAKAHI, MEI 4, 1896 3
NA AINA MAMAO.
Mau Lono Huikau mai kela a
me keia Wahi Like Ole.
Ka Mailuku Ahulau Eleele.
He palapala no Iokohama o Aperila 4 ka i hoike ae ua puka ka mailuku eleele malaila.
Ua loaa ae hoi i ka Oihana Kaua Moana ma Wasinetona he hoike pili oihana no ka laulaha ae o ka mailuku eleele ma Honakona, a ke hunaia la nae hoi ia mea no ka pono o na oihana kalepa.
Hoauheeia na Poe Derevise.
O na lono hou mai na poe mai e hele la imua i ke kaua, pela ka lono mai Masowa o Aperila 13, e hoike ana o ke kuemi hope ana o na poe Derevise, mahope iho o kekahi mau hakaka koke ana, ua like loa me ko lakou hoauhee loa ia. Ua pau ko lakou mau wahi hoomoana a hoohalua i ke puhi ahi ia e Konela Kiwini. Nui ka poino a me ka pilikia i hookauia aku maluna o na poe Soana e na poe Derevise e kuemi hope ana.
Olelo Oolea Rusia no Amerika.
Hahana loa na olelo a ka nupepa Novo seti, ka wahaolelo hapa pili oihana o Sana Peterobuga, i ka Ahaolelo Amerika no ko lakou kulana e oili ana ia Sepania ma ka ninau o Kuba. Eia kana mau olelo: "Mai pau kahiko loa no ke kipi ina aole i kokua aku o Amerika. Ina e nanaia ana mai ka aoao o na aupuni naauao, aole loa e hiki i ko na Amerika kulana ke ku ae imua me ka nele ole i ka nemaia aku. Ua loaa mai keia ano mamuli o kekahi manao anunu launa ole mai no ka hoakeaia aku o Amerika Huipuia. Ua haule ka Sepania hana, no ka mea, aole oia me Ku ba e hana nei, aka, me Amerika."
Aelike Hou no Eono Makahiki.
No Venice, Italia, aku ka lono i loaa ma Parisa, Aperila 13, e olelo ana ma kekahi kukakuka ana mawaena o Emeperoa Uilama a me ka Moi Humebeta i ka Poaono aku, ua hooholoia e hooloihi hou aku i ka aelike makee maluhia (ke Dareibuna) mawaena o na Mana ekolu o Europa Waena a ka 1902, oiai, o ka aelike hou e ku nei, ua paa ma ia he mahele no ke kokua a kue like aku o kahi i kahi ke hoaoia mai e kue i kahi o lakou malalo o ia aelike. Ua kamailioia no ke kulana ma Aferika, a ua hooholoia e hoomaka aku me na kukai ana no ka maluhia, a ina hoi e ko ole ia mea, alaila, e hoouna hou ia aku he pualikaua malalo o ke alakai ana a ke Duke o Aoseta, kaikaina o ka Moi Humebeta, no ka hele aku e kue i na poe Abesinia iloko ae o Sepatemaba.
Kaua Weliweli ma Kuba.
Ua hakakaia iho nei ke kaua oi loa aku o ka hahana a me ka weliweli, pela ka lono mai Havana o Aperila 15. Ua lanakila na poe o Kuba. He 5,000 ka nui o na kipi i ka 1,500 o na Sepania, a ua pakele lakou mai pau loa i ka lukuia. Mamuli wale no ka o ko Generala Anatonio Maceo makau he mau pahele keia e alako aku ana iaia iloko o ka upoiia, o ka mea ia nana i kaohi aku iaia mai ka anai pau loa ana i ka bataliona Ala fonoso XIII, o ka hapanui o lakou na poe laeula loa iwaena o na puali Sepania ma Kuba.
Koi Poho a Kanikela Wala.
Ua hoea aku o Kanikela Wala i pau o Ame rika Huipuia ma Madegasaka i Wasinetona, Aperila 15, mai kona wahi aku ma Balatimoa, a i kahi la ae oia e hele pu ai me kana keiki kolea, o Paul Bray, no ka hui a kukai kamailio pu me Kuhina Nui Olone. O keia Bray ka i kipakuia mai Madegasaka a Zaniziba i ka wa like o Wala i hoopaahaoia ai, a e koi poho aku ana no hoi oia no ia kipakuia ana me ke kue kanawai maopopo loa o na hana a ua luna Farani. E hooikaika pu ia aku ana no hoi me ka Wala mau koi.
Na Hana ma ke Soudana.
No Wede Halafa, Aigupita, ka lono i loaa ae ma Nu Ioka, Aperila 14, e hoike ana ua hooikaika loa ia na papu-kaua ma Sarasa a me Akasehe. Ke onouia la ka hoomoe awiwi ana i ke alahao imua. Eha mile alahao i moe ma ke ala i hoolalaia ai iloko o 1884, i hiki ai ke a'e aku maluna o na wailele o na muliwai. No ka hoopakele ana i ke alahao, ua kukuluia he mau kahua koa kiai ma kekahi mau wahi ma kae o ka Muliwai Nile, a ua hoolako pakahi ia keia mau kahua me na poe kokua ma kahi aoao mai, i hiki ai ke kue aku i na De revise mai ka hoopoino ana i ke alahao. O na Derevise hoi keia ma Suada, no lakou ka heluna o 3,000, ua uwai aku i ko lakou kahua a Mogorake, he 15 mile mai Akasehe aku, me ka noho aku no nae o ka mahele Derevise nui ma Donogola. E ole nae hoi ka lono no ka hoounaia aku o na pualikaua hou, ano maluhia iki ai ke Soudana, a he mea kokua nui loa hoi keia i na Italia ma Kasala.
A no Kai ro mai no hoi ka lono aia ka Emiri o Donogola ke nee la no ka akau me kekahi puali nui. Ua hoike ae na kiu no kona kaalo ana ae ia Ahu Fatene, he 70 mile ma ka hema aku o Suada, no ka hui aku me na Derevise, e hoopuuluulu nui la ma kahi hope, he 45 mile mai ke kahua Aigupita o Akasahe. Ua manaoia ma ke kahuapoo o na Aigupita o na pono ai ana no ka pilikia o ia poe, a mamuli paha hoi o ia e hiki ole ai lakou ke nee ikaika aku ma ka akau aku o Suada. Ke emi pu la ka mana o Osemana Digina, a e haule loa aku ana paha hoi oia mamuli o kona hoauheeia ana e na poe Araba hoa'loha ma kahi kokoke ia Tamai. Aia na poe holo mahuka mai kona mau puali aku ke hoea la i Suakima. Ua hilinaiia e nui ana no ka hakaka ma keia mua koke aku.
Na Hunahuna Laulaha.
Ua hoikeia ae he kuikahi ka i hooholoia mawaena o Enelani a me Sepania.
Ke mau la no ke kaua kipi kuloko ma Nicaragua me ke akaka ole o ka hopena, a me he la, ua maluhiluhi na aoao a elua i ka hakaka.
E hooponopono maikai a makamakaia aku ana no kela ninau hoopaapaa palena aina mawaena o Beritania Nui a me Venezuela, o ka mea ia i maopopo loa i keia wa.
Mamuli o ka ike noeau o kekahi kupa o Kana da, ua loaa iaia he pu i hiki ke kiia me ka hanakuli ole a me ka uwahi ole, a i hiki loa hoi ke ki he 260,000 poka iloko o ka minute hookahi.
Ke upuupuia la ma Parisa, Farani, ke kokoke loa la ka Aha Kuhina hou e hiolo. O kona mau ano kipikipi a me na paewaewa kalaiaina kuwaho, ua halawai me na ahewa ana a Rusia.
Aia he lono telegarapa i loaa ae ma Nu Ioka mai Havana, Kuba, e hoike ana ua pepehiia o Kanikela-Generala Wiliama o Amerika Huipuia malaila a ua kaualakoia ae kona kino ma na alanui.
Ua lonoia ma Ladana, Aperila 13, ua kauohaia kekahi o na pualikoa laeula o Enelani (Ninth Lan cers) e ku me ka makaukau no ka hele aku no Aigupita a e komo aku ma na hoohana kaua ana ma ke Sudana.
He mokukuna Beritania ka i hopuia mai nei e na luna oihana o Venezuela no ke kue i na kanawai dute. Ua hoole ae nae hoi ka luna nui o ka hui Amerika i hoolimalima ai i ua wahi moku la. Aohe ae o ke Kuhina Waiwai e hookuu i ka moku, oiai nae hoi, ua ao aku ke Kuhina Amerika ma Caracasa e hookuuia. Ina e hoea aku ana he mokukaua Beritania a komo a pii i ka Muliwai Orinoco, he mea maopopo loa e ulu mai ana he mau hoohihia ano kukonukonu loa.
Ua hoike akea maoli ae o Moi Milana i pau o Serevia i kona manao e holo no Nu Ioka, Amerika Huipuia, ma keia mua koke iho (iloko paha o Mei nei) no ka huli ana i wahine Amerika nui o ka waiwai no kana keiki, ka Moi Alekanedero o Serevia.
Nui ka walaauia ma ko Italia aloalii no ka aihueia ana o kekahi leia-i o £ 4,000 ka waiwai io, no Kama'liiwahine Letitia, he makana iaia mai ka Moi Humebata aku. Lehulehu na poe koikoi o ke aloalii i hopuhopuia, eia nae, ua hoomaopopoia ua hooliloia ua lei la ma Farani.
E ku mai ana ka Miowera mai Vitoria mai ma ka la 12 o keia mahina, aole hoi ma ka la 8.
Hora 3:45 P.M. o ka La Pule, Aperila 19, ua make iho la o Misasa Mele Kahakauila ma Kalawao, Molokai.
Ua lilo hou ae nei no ia Pate Kutisa kela wahi moku kiakahi hookalakupua, o Lelehune, a ke hoomaemaeia nei no ke kakelekele hou ana aku ma nei mua iho.
Elua kolamu o na manao i hoopukaia e Ka Leo i ka Poakahi i hala, o ia no na manao i hoopukaia ma ka pepa o ka Poalua mai. Pehea mai keia e Ka Leo? Poluea loa no paha no kahi kanaka o ke ganuwe!
Robert Napunako Boyd
(ITALIA)
He Ana-aina a he kokua no hoi ma ka hooponopono ana i na waiwai paa, huli ana paha i na Buke o ke Aupuni, a pela aku. Keena Hana: Mauka iho o ka Hale Leta, maluna ae o ka haleaina Pake, Alanui Betela. apl 13-mp
C. B. DWIGHT
[KALE KUAIKA.]
Mea Hana Pohaku Kaekae Alanui, na He Kupapau a me na Kia Hoomanao Mabala.
E loaa no oia ma kona wahi noho ma Koiuiu, Honolulu, nei. Telepona Helu
833. feb 17-1mk
J. K. KAHOOKANO.
LOIO a he Kokua ma ke Kanawai.
KEENA HANA: Alanui Kaahumanu Honolulu. ian 8, '94 1mk
HALEKUAI LAHUI KALAHIKI.
Helu 405, Alanui Moi, ma Waikiki aku o Alanui Nuuanu, ma ka aoao mauka, ke keena mua o ka "Hawaii Holomua." Ma ia halekuai o na oiwi e loaa ai na anoi a me na paihi o na ano hou loa, e laa
Na Kalakoa, Na Keokeo,
Na Makalena, Na Kinamu,
Na Huluhulu, Na Lihilihi,
Na Kamaa o na Kane, Wahine, me Keiki, a pela aku.
Oluolu no ke kuai ana. Aohe hewa ke kipa mai e ikemaka, a aohe no hoi he kunukunuia no ka hoikeike ana i na mea kuai.
M. PALAU, Luna Nui.
ok 14-tf