Ka Makaainana, Volume V, Number 18, 4 May 1896 — Page 2
2 HONOLULU, OAHU, POAKAHI, MEI 4, 1896.
IO SEPINE
---KA---
EMEPERESE PUUWAI OLU O FARANI.
MOKUNA I.
NA LA OPIO MA MATINUKU.
O na kaikamahine a na ne gero kauwa kuapaa o ua wahi mokupuni la, ua lilo i mea punahele imua ona. Ua nana mai hoi lakou iaia me he hoola la no lakou a he hoopakele no ka wa popilikia, ua piha pu hoi i ke aloha nona. I kekahi manawa e hoakoakoa ana o Iosepine ia lakou malalo o ka malumalu o kekahi kumulaau nui, a ao aku la ia lakou i ke ano o ka hula Europa e like me ka mea i aoia mai iaia, a lawe mai la no hoi oia i kekahi o lakou i kokoolua nana e wili poniuniu ai. He hauoli loa oia ke noho mai lakou imua ona a mele mai i na himeni paanaau o ko lakou aina hanau. He puni mele oia ma na ano a pau, a o kana mea makemake loa ia. E uwe pu no oia me lakou i kona wa e lohe ai i ko lakou moolelo o ka ehaeha. Ma kona aoao hoi, ma kahi o kela mau olelo ehaeha i puka mai mai na waha mai o kela poe kauwa kuapaa, e haawi aku ana oia he mau olelo hoolana e hoomamaia ai ko lakou mau luuluu. E hooikaika ana no hoi oia e noi i ko lakou mau haku e loaa he manawa nui no lakou e hoomaha ai, a ua loaa io no. Na keia mau hana ana i hoopii ae i na manao aloha iloko o na negero a lilo ae la oia he mea nui imua o lakou ma na ano a pau.
Aole i oi aku ko Iosepine mailaniia ma ka hale o kona mau makua hanai e like me ko na ne gero hoopunahele iaia. Ua like loa iho la ia me ka olelo ana ae----o Iosepine maluna o na poe ona mahiko a o Iosepine maluna o ke kalaunu---o Iosepine e hoopuniia ana e na kauwa o Matineku, a o Iosepine me kona kulana moiwahine ma ka halealii o Vaseila, me na poe hanohano o Europa e hoopuni ana iaia a e haawi ana hoi i na mahalo kiekie iaia no kona kulana kupaa a me ka nohea kaili puuwai maopopo.
I kekahi la ia Iosepine e holoholo hele ana malalo o ka malu o na laau, ua ike aku la oia he heluna nui o na kamalii paele e hoopuni ana i kekahi wahine i ano alu'a, he wahine hoi i hiki ke wehewehe i na mea pohihihi a me na mea e hoea mai ana. Nolaila, hookokoke aku la oia ma kahi a lakou e nonoho ana i hiki iaia ke lohe pono i ka lakou mau mea e kamailio ana. Aka nae, ua hoopuiwa koke ia lakou i ka ike ana mai iaia e hele aku ana, a no ia mea i ku ae ai ka wahine paele kilokilo iluna a holo mai la a apo i na lima o Iosepine a puili malie iho la me na manao hauoli, a ua hoike mai hoi o Iosepine i na minoaka wale no ma kona mau papalina me ke kamailio pu ana aku;----
"Ua maopopo mai la no anei ia oe ke kumu o ko'u hiki ana mai la ?"
"Ae!" wahi a ua paele kilokilo la me ke aheahe malie o kona leo.
"He noho'na hauoli anei ko'u, a i ole, he noho'na pakalaki paha?" wahi a Iosepine.
Nana pono mai la ua kilokilo wahine la me ka paa ana i na lima o Iosepine, alaila, kamailio mai la,
"He ulia pakalaki," alaila, hamau iho la oia me ka nana pono ana ia Iosepine, alaila, owaka hou ae la kona waha a i mai la, "he noho'na hauoli ka hope."
"E akahele ma kau kamailio ana," wahi a Iosepine i pane aku ai, "ua oi loa aku kau mau olelo maluna o ka mea kupono. Aohe ano o ka oiaio iloko o laila."
Nana ae la na maka o ka wahine paele iluna o ka lani me ka paa ana ae i kona mau lima ma kona umauma a i ae la:
"Aole au he mea ike i na mea pohihihi o ke ao nei, aka, o ka Mea ike ole ia wale no."
Ano kanahai mai la ko Iosepine mau lehelehe ma ka wikiwiki ana i ka hoopuka i kana mau olelo kikoola i kela manawa. No ia mea i ninau hou aku ai oia, "Heaha kau ike no na mea e pili ana i ko'u ano o nei mua aku? E hai mai i na mea a pau"
"Aole paha auanei oe e hilinai mai ana i ka'u mea e kamailio aku ai ia oe no ke ano o kou noho ana ma keia mua aku," i kamailio aku ai ua luahine paele la.
"Ae, me ka oiaio, e hilinai no au," wahi a Iosepine. "E hoike mai, e kuu makuahine maikai, heaha la ka'u mau mea e manaolana nei no keia mua aku, a heaha la na ulia laki e loaa ana ia'u?"
"Maluna iho o kou poo, ka'u mau olelo. E hoolohe mai. E mare aku ana oe. Aole oe e noho ana me ka hauoli iloko o ia mare ana. E noho ana oe he wahine kanemake mahope iho o ia wa, a i ka pau ana e lilo aku no oe i Moiwahine no Fa rani. He mau makahiki kou e noho ai me ka hauoli aka, mahope mai e make no oe maloko o ka halemai me na hoohiwahiwa ole."
Iloko o ia manawa i nalowale koke iho ai ua wahi luahine la. Lilo iho la ia manawa i wa no Iosepine e noonoo ai no ke ano o kela mau olelo, oiai oia e luakaha ana na kamalii paele. He kaula iho la oia, he mea hiki ke wanana i na mea e hoea mai ana.
No ia manawa wale iho la no nae ia ana i hoomaopopo iho ai a hiki i ka poina ana. Aohe ona manao hou aku no ia mau mea, a heaha iho la la ia mau olelo iaia. O na kamalii nae e hoopuni ana iaia, ke hoomaopopo la lakou ia mau olelo a ke hooiaio pu la no hoi. "E lilo ana ka oia i mea kiekie ae," wahi a ua poe kamalii la i kamailio ae ai.
[No kahi wa aku.]
Ikaika Lele o ka Poka.
O ka mamao o kahi a kekahi poka e lele ai i ka wa e kiia aku ai mai kekahi pu aku, aia no ia maluna aku o ka umikumamalima mile. O keia ka mamao o ka lele ana o kekahi poka nona ke kaumaha he 2,600 paona i kiia mai loko aku o ka Krupp pukuniahi pilikua o 130 tona, he kila ka pukuniahi ma na ano a pau. O ka ikaika lele hoi o ka poka o ka Limaikaika pukuniahi o 111 tona, nona ke kaumaha o ka poka he 1,800 paona, he umikumamaha mile, e hoohana ana hoi oia ia 960 paona pauda e hiki ai ke hoonee i kela poka iwaho. Me ka nui o ka lilo i hanaia ai keia mau pukuniahi e ko laua mau ona. O kekahi pukuniahi o 22 tona a Limaikaika ua hiki iaia ke kiola i kekahi poka no ka manao o umikumamalua mile, a aole loa hoi e loheia ke kani o ka pu ma kahi a ka poka e pa ai. Iloko nae o nei mau la e nee nei, mai ka 12 a ka 13 wale no mile ka ikaika lele o na poka pukuniahi e hanaia nei, a e aneane ana hoi e loaa ke kahua kiekie o 45 degere.
Mawaho ae hoi o ia, o na pu kani pinapinai ka oi loa aku o ka hilinai nui ia, e like paha me ka Makima, ka pu hiki ke ki ia 600 poka iloko o ka minute, a he pu mama loa hoi e hiki ai ke auamoia ma ke kua ke hiki mai ka wa kaua. O ka lilo no ka hana ana i kela pukuniahi pilikua a Krupp, he $195,000, a o ka lilo hoi no kela a me keia manawa ana e kiola ai i ka poka, he $4,750. Aole no i kana mai ka nui hewahewa.
HALE INU RAMA NEKINA.
Ke hoikeia aku nei ka lohe i na makamaka, oiai, he luna nui hou ka i hookohuia iho nei no keia hale hoolaulea o ka lehulehu, e loaa no na waiona maikai loa o na ano a pau. E kipa nui mai no ka pono i ikemaka.
apl 20-4 pl.
Akamai, Noeau, Mikioi.
I ka wa a ka mokukaua Beritania Roiala A ta e holo ana ma ka 12 mile moana i ka hora ma Comoka, Beritania Kolumebia, aia hoi kekahi o kona mau alii koa nona ka inoa o Rowd ma ka aoao o kekahi pukuniahi kahi i ku ai, o eono iniha ke anapuni a e kiki maka ana hoi oia ia wa. Ua ki aku oia ia manawa he 11 poka a ku pololei iloko o ka maka bipi bulu ma kahi mamao he 1,600 i-a iloko o elua minute wale no. O ke kaumaha o na poka ana i ki ai he 100 paona. Ma keia e ikeia ai ua eo iaia ka manawa o na poe akamai ki pololei o ka honua nei. Eueu no hoi la!
Hui Papa a Kukulu-Hale Oahu.
[OAHU LUMBER & BUILDING CO.)
Leleo, Alanui Moi, kokoke i ke Kahua
o ka Hui Alahao & Aina Oahu.
Poe Kalepa Laau, Hana Aelike
a me Kukulu Hale.
Poe Hookomo Mai a Hoolilo aku i na
Puka, Olepelepe, Kui,
Pepa, Pena, Aila,
Na Pono Kamana,
A pela aku, a pela aku
Telepone 52. Pahu Leta 222.
apl 20-tf
HELE HOOLUOLU.
O. R. L. Co.
MA NA POAONO A ME NA LA PULE.
E haalele mai no na Kaamahu i na hora 9:15 A.M. a me 1:45 P.M., a hoea hou mai i Honolulu nei ma na hora 3:11 a me 5:55 P.M.
Na Palapala Uku Puni.
Papa 1. Papa 2.
Manana - - - $ .75 $ .50
Mahiko o Ewa - - - 1 00 .75
Waianae - - - 1 50 1 25
F. C. Smith,
Agena Ohua a Palapala Nui
feb 10 tf
HALEKUAI LAHUI KALAHIKI.
Helu 405, Alanui Moi, ma Waikiki aku o Alanui Nuuanu, ma ka aoao mauka, ke keena mua o ka "Hawaii Holomua." Ma ia halekuai o na oiwi e loaa ai na anoi a me na paihi o na ano hou loa, e laa
Na Kalakoa, Na Keokeo,
Na Makalena, Na Kinamu,
Na Huluhulu, Na Lihilihi,
Na Kamaa o na Kane, Wahine, me Keiki, a pela aku.
Oluolu no ke kuai ana. Aohe hewa ke kipa mai e ikemaka, a aohe no hoi he kunukunuia no ka hoikeike ana i na mea kuai.
M. PALAU, Luna Nui.
ok 14-tf