Ka Makaainana, Volume V, Number 15, 13 April 1896 — Page 1

Ka Makaainana.

 

BUKE V - Ano Hou                              Honolulu, Oahu, Aperila 13, 1896.                              HELU 15

 

OILI KUPUINO HOU.

 

Nui ko Kakou Pilikia ke Laha ae keia Mai Ahulau.

     Auwina i o ka Poalima nei i kuu ai ka heleuiha o ka mokumahu Gelika iwaho o Mamala, mamuli o ka ikeia ana ua puka ae he ma'i iwaena o kona mau ohua, e like no hoi me ka hoike a ke kauka  ka moku.  A mahope iho o ko Kauka La, ke kauka o ka moku.  A mahope iho o ko Kauka La, ke kauka o ke awa, hana pono ana i na ohua Pake me Kepani, na kauohaia ka moku e ku iwaho a hiki i ka wa e lohe ai ka Papa Ola i kana hoike.  A oiai hoi, ua loaa mua mai he lono lelegarama maluna mai o ka Alameda, mai ke Kuhina Noho Hawaii ma Iapana i ke Keena o ko na Aina E maanei, e hoike ana no ka puka ana ae o ka ma'i hebera iwaena o na ohua Pake mawaena o Honokona a me Iokohama.    

     E hoike mai ana no hoi ia telegarama no ka mahuka malu ana o ka mea mai malaila i Maraki 30, a make i kahi la ae iloko o ka halemai Pake, a i Aperila 2 nei i loheia ai keia mea a awiwi ai ke Kuhina Noho e hoouna mai i kela lono.  Nolaila, mamua o ke ku ana mai o ke Gelika, ua maopopo mua ka ke Aupuni mea e hana aku ai nona.

     Ua noho koke ae no ka halawai a ka Papa Ola i ke ahiahi no o ia la a hooholo iho la e ae aku no i ka moku e hookomo mai me ka hoomaluia nae malalo o na rula o ka Papa Ola, a e hoolele i kona mau ohua makai o Kahakaaulana he 900 paha ka nui me 700 pahu ukana.

     Nolaila, ma ke kakahiaka Poaono nei ua hookomo mai la ka moku a hoolele i kona mau ohua iluna o na kao nunui o Hakafila Ma, a mai laila aku i aolooloia ai na ohua no ka uwapo pao o Kahakaaulana me ke kiaiia.  O ka Pake ma'i ka i hoolele mua ia ma kekahi waapa okoa a hookaawale ia ma ka halemai Mauliola, a mahope iho i puhi hoomaemae ia ai ka waapa a me na kanaka hoe.  A i ka halawai hou ana o ka Papa Ola ia kakahiaka, ua aeia ka moku e hoopili mai i ka uwapo Pakipika e hoolele ai i kona mau ukana.

     Ua hoounaia aku na koa e kiai i ka uwapo, aole hoi he aieia o ko uka nei e hele aku a kokoke i ka hale ukana, a pela no hoi ko loko poe, aohe aeia e hele iwaho nei.  O  na poe hana e hoomaluia ana lakou no kekahi mau la.  O na ukana, e puhi hoomaemae ia ana mamua o ka hoopukaia ana iwaho nei.

     Auwina la o nehinei i holo loa aku ai ka moku no Kapalakiko me ka lawe pu aku i na eke leta a me na ukana kakaikahi.  Aohe ana mau ohua i lawe aku mai keia awa.

 

Poe Pukiki Hoohaunaele.

     ua hooloheia ae imua o ka Aha Apana i ka Poalima nei ka hihia hoohaunaele o kela poe Pukiki mauka o alanui Ema.  A ma ke noi a ka loio o ka aoao pale, ua hoomoeia mai ka hihia a ka la apopo.  Iloko o ia manawa pu ua waiho aku ka loio pale, Kale Kalaitona, imua o ka Hope Ilamuku he elua mau palapala hopu like ole no Hanale Esepina no ka hoeha, no kona hoapono mai.  Aka, ua hoole mai la ka Hope Ilamuku, me ka olelo pu mai aole hiki ke hopuia kekahi makai no kona hooko ana i kana hana.  No ka Lunakanawai Apana hoi, ua kakau inoa oia i ua mau palapala la, a ua hookoia aku hoi mahope iho, ua hoopau wale ia nae hoi i ka Poaono nei, pela no me kahi mea okoa iho, o kekahi o na haole makai kaulio.

 

"Po Lea o Halaili."

     Ua wehe hou ae no ka hui keaka paela o ke Komopani D, o na koa pualu o ka Repubalika, i aha hoolaulea maloko o ka hale paikau hao ma Haimoeipo.  Piha no o loko i na poe makaikai, aole nae hoi i like aku me ko ka po mua ka piha oi loa aku me ka hookeke.  Maikai no na mea a pau i hanaia, a komo mai la no ka hoomanao no na keiki oiwi o na la i hala ae, a i ko makou manao, o lakou aku no ka oi.  Aka, no lakou nei hoi a me keia wa nele i na mea hoolealea e hoohala manawa ai, ua maikai no a ua nui no hoi ka lealea o ua poe puni lealea.  Pokeokeo no ke Komopani D nona keia puali, oiai, no ia Komopani ponoi iho no nei pomaikai.  Ua ola no!

     E haawi ana ka Bihopa o Panopolisa he ahaaina hauoli i na wahine a pau o kona Ekalesia, i luhi pu ma ka hoomaemae a me ka hoohiwahiwa ana ia loko o ka halepule mamua o ka La Pakoa iho nei, malalo o Manana i keia la.  Nolaila, ma ke kaamahu aku nei o keia kakahiaka i pau nui aku ai lakou ilalo o laila me na mea-ai no, a me ko lakou mau Makua o ka pono.  He 40 a keu ko lakou nui, E hoi nui mai ana no i keia ahiahi.

 

HAULE I MULIWAA

 

Na Makai i na Koa o kela Puali G Nui.

     Ua hoao hou ae no na poe puni ki pu pololei iwaena o na makai a me na koa pualu e ulele i na ai a ka ui i ka auwina la Poaono nei, ma ke kahua hoomaamaa kiki pu o ke Komopani G iuka o Makiki.  O ka hopena keia mai ka ulele ana i kela Poaono aku i kai o Iwilei a hopu ai na koa i ka huelo o ka bipi, me ka oleloia iho ka ua hana hoomanamana kahuna ia kela kahua o kai, o ke kumu ia o na koa i haule ai i Milu.  Hoomakeaka no hoi paha.

     Ma kekahi kaa basa nui na makai i kau ai (o na poe mua no, a pela no hoi me na koa), aole nae hoi na hanakuli o kela Poaono aku ia lakou i hoi mai ai.  O ke kumu o keia hanakuli ole ma ka himeni ana, ua nele i ka olioli, oia hoi, ua halawai lakou me ko lakou laau lapaau, he 18 ka haule mahope.  Ua papakolu keia haule o lakou i ko na koa haule ana.  He 360 ka huina helu nui i loaa i na koa a he 342 o na makai.  Mau no ka nele.

     Aia ka olioli a me ka hauoli ana i nei hana ana ma ko na koa aoao.  Ua hiki no, ua imi loa nui.

 

Heluia na Hua o ka Ipu Pu.

     Hora 7 o ke ahiahi Poaonbo nei i heluia ai na hua o kaapupu ma ko L. B. Ka halekuai, i akaka ai hoi ka mea e lilo ai o kela piano Nu Enelani leo olu nani a maikai.  Ekolu lala o ke komite helu i hiki ae, oia ko makou Puuku ma ka aoao o KA MAKAAINANA nei, A. V. Gia no ka nupepa Buletina Ahbiahi, a me F. L. Huga no ka nupepa Hoku Hawaii.  Hookahi lala i moewaa loa, oia ko ke Kuokoa namu.

     Na ke komite i oke ke pu, a mahope iho o ka wae ana i na hua a pau, ua hoomakaia ka helu ana a ua loaa he 650 ka huina nui o na hua.  A ma ka hoomaopopoia ana o na koho, he eiwa poe i koho pololei i kela helu, no lakou na inoa mahope iho:  Douglas Collins, C. J. Day, Chang Tim, na Misasa R. W. Aylett, T. A. Simpson, Ganzel, J. W. Pratt, S. C. Dwight a me C. J. Ludwigsen.  Aohe i akaka ka mea e lilo ai o kela makana hiwahiwa, a na lakou no hoi paha e hooholo i keia la i ka hana e hiki ai ke hoomaopopoia o ka mea oi iwaena o lakou.  He 1355 ka heluna nui o na palapala koho i hoopukaia a i waihoia aku.

 

Anaina Bapetizo Hemolele.

     Ma ke anainba pule Hawaii ahiahi i ka auwina la o nehinei, ma ka luakini o Sana Anaru, elua mau keiki liilii i bapetizoia e ka Rev. V. H. Kiticata.  Hookahi, o ke kaikamahine hou a Kimo Kamabela a me Kuaihelani, kana wahine.  O na inoa i heaia ai o ia opuu hou ma ka bapetizo ana, o Mary Beatrie Umiulaikaahumanu, a o ke Aliiaimoku a me Misasa Kaili Freeth na makuahine bapatema a o P. Keoni ka makuakane bapatema.  O ka lua iho o na keiki, o ka Kimo Holo o lalo o Makaha, Waianae, a ua heaia o James Robinson.  Piha ia anaina pule i na hoahanau a me ka lehulehu i hele aku.

 

Hale Halawai Hou.

     ua loheia ae ua lilo mai ia Pi Ki Keoni no ke kumukuai o $1,725 kekahi lii o ka aina o Keene Kapu, i make, e waiho nei mauka aenei o Leleo.  O kahi ka i lilo, o ia ke kihi ma Ewa loa e ku nei o kekahi halekuai poi no ka Pake, makai pono ae o Alanui Liliha a maluna pono ae hoi o kela lua nui a ke Aupuni i eli kahiko loa ai no ka pohaku papaakea.  Ke manao nei ua o Keoni e kukulu i hale halawai ma ia kahua, no ka pomaikai o ka lehulehu o uka o Kapalama a me na wahi e pili kokoke mai ana.  I kahi paha o keia mau la koke iho e hoomakaia ai o ka hana ana.  Ua lohe mai no hoi makou ua hoao oia e kuai mai i ke alanui e holo la i na pa mahope, aka, ua hooleia mai e ka mea nona ia kuleana.

 

Lono Puali Puhiohe Lahui.

     He palapala ka i hoikeia mai ia makou e kekahi makamaka, i loaa mai nei hoi ma ka Alameda, e hoike ana no ke ike ana o kekahi mea ia lakou me Inidianapolisa ua hele ka na wahi aahu a ekaeka a ano apulu no hoi.  Aloha wale!

     Aole no hoi o ia wale, aka, ua lilo ka inoa hanohano o Hawaii nei a lakou i lawe ai me ka haaheo ma ia aina nui i mea ole ma neia mua aku.  O ke kumu o keia, na paa aku la lakou malalo o kekahi aelike no eono malama e puhi no kekahi hui keaka lio.  Mamuli o ia mea, ua hooliloia ko lakou kulana puali puhiohe haawi aha hoolaulea kiekie a alakai i mea ole ma ka lilo ana i puali puhiohe no kekahi hui keaka lio.  Minamina ino!

     Malia nae paha hoi aohe a lakou nana ana i koa ia hope nei, aia no ka pono o ka loaa o kahi mea no na ekeeke a no ka waihona, ke loaa a ke koe iho.