Ka Makaainana, Volume V, Number 14, 6 April 1896 — Page 3

HONOLULU, OAHU, POAKAHI, APERILA 6, 1896. 3

KOKOOLUA UA KOKUA.

Hinape Paha na Poe i Lilo i ke
Alakai Lalau.

I na la mua o na lono i loaa mai ai no ke paonioni mawaena o na keiki o ka Puali Puhiohe Lahui, ua uluku ka lehulehu, a oiai hoi, ua hoi mai nei o Joseph Mekia A. Kealakai i o kakou nei, mamuli o ka lawe ana i ka hoohiki e kakoo i ke Aupuni oehaa imua o ke Kanikela Hawaii ma Kikako, ua loaa hou mai no he lohe a he kakoo ana no ko KA MAKAAINANA kahua o ka hilinai ana i ka mea i hoinoia, eia nae, aole makou e lawe mai ana i kana mau olelo o ka hoike ana mai, iaia i kipa mai ai i o makou nei, aka, o kana mau olelo no i palapala mai ai mai o mai ka makou e lawe.
                Ma kana palapala i kakauia ma Kalivilana, Ohio, Dekemaba 18, 1895, mahope koke iho no o kela uluaoa ana, ua olelo pokole mai oia i kona luaui i hala aku ma kela ao,----"Ma na ano a pau, ua pololei no o Wile, no ka mea, na ia la na ohe. I hele mai makou i keia aina malalo o ke aloha, aka, ua nui no ka ahiu o na hoa." A ma kana palapala hope loa hoi i kakau mai ai i kana wahine maanei mai Kikako, Ilinoi, i Febe ruari 28, 1896, ua olelo mai oia no kona mau hoa puhiohe i lilo aku i ke "au a ka hewahewa," penei:
                "No na keiki puhiohe e hele la, eia lakou ke hoi hou mai nei i hope nei, a aohe hoi e hiki i ko lakou mau kapuai wawae ke neeu aku imua, no ka mea, aole hilinaiia o ka haole e hele pu la me lakou, aole no hoi he mau pepa hoolaha me lakou e hiki ai ke hilinaiia mai. Eia ae no lakou i Penesilivania kahi i hana ai me ka manao e holo loa i Nu Ioka a me Wakinekona Ua palapala nui mai ia'u i ka nui o ko lakou laki, eia nae ka mea apiki, aia no lakou iloko o na hale keaka e moe ai iluna o na noho. He nui na manao hookano a hookiekie o ko'u poe hoa, a o ia ka'u e noi ae nei i ke aloha o ka Haku e nini mai Oiai Kona nani maluna o ko'u poe hoa i hoauwanaia ko lakou mau noonoo maikai. Ua olelo nui mai no ia'u aia pu ka Haku me lakou kahi i hele ai, aole ka me a'u. He mahalo wale aku no ka'u ia mau olelo, no ka mea, ua alakai no ka Haku ia'u ma ko'u wahi e pono ai. A aole no hoi au i hoolahaia e like me lakou i ka make i ka pololi.
                "O kahi kahunapule o makou, o S Kamakaia, ua olelo oia ia'u he Iuda au, he kuha i na maka o ka Moiwahine i aloha nui ia a me ka lahui He mea oiaio no paha ia a he mea-ehaeha no hoi i ko'u naau, aka, aole hiki ia'u ke pale ae. Ua ike au ua alakaiia lakou e na manao hookano o kela Paniolo maikai nui wale, a'u maoli no i imi ai i hanohano nona me ko'u kaniuhu ole. No Kamakaia, aole hiki ia'u ke hilinai iaia, no ka mea, oia kekahi o na kanaka i hoohilahila mua loa i ka inoa o ka lahui Hawaii a me ka Moiwahine, a he nui kana mau hana lapuwale i hana ai ma Kikako, e hele ai e ona pu me na wahine haole hookamakama o keia wahi me kona mau lole puhiohe no e hoikeike ai ma na alanui. A no ka ike i ka hewa o kana mea i hana ai, huli ae nei e bapakema i ka Moremana. He inu rama no ka hapanui o na hoa, aole nae i hana e like me Kamakaia. Aole a'u kanaka hilinai e ae o loko o ka bana, hookahi wale no o Wile, ke kanakamakua hookahi iwaena o makou. Aole hookahi kiko eleele ana i hana ai e like me makou a pau loa, oia hookahi wale no ke kanaka i ku kaawale mai o makou aku no ko makou pono, ka Moiwahine a me ka lahui Hawaii. Aole e like me ka lakou i kapa mai ai i ke kanaka pono he aihue, me ko lakou ike no aia ka aihue maopopo ke hele pu la me lakou.
                " 'Eia ka Haku ke hele pu nei me makou,' wahi a lakou, a he nui ke aloha o Karisto e alakai nei i kana poe kauwa hoopono. Na lakou no e i iho ua pono lakou. Manao au ua ano kuhihewa paha kuu mau hoa, aka, aole ia'u ia wahi. No'u iho, aole au he kanaka haipule e like me kuu hoa'loha maikai, S. Kamakaia, ka haipule ma ka lehelehe, aole me ka naau pu kekahi."

Ua oleloia o na poe ola loihi loa, o ia no na poe i hoolilo i ka manawa ai o ke kakahiaka i manawa ai maa mau no lakou i ka la. He oi aku ka ka ikaika o loko o ka opu i kakahiaka mamua ae o na manawa e ae.
                Eia o Rusia i keia wa ma ka papa 6 ona aupuni o ke ao nei ma ke kalepa waina, a e oi pakela loa aku ana paha oia ia Geremania. Aia ma kahi kauhale o Besarabia wale no he 260,000 eka i paa i ke kanuia me ka waina, aneane no e hapaha like ka aina momona.

Houpuupu no Kuhina Wilisi.

Mai ka mea kakau o ka nupepa Ahailono ma Wa sinetona, i hoopukaia ae ma Nu Ioka, Ma raki 17, keia mahope iho: "Mai hoohuoi kahi ke huli hoi hou ole aku o Misita Wilisi i Hawaii mahope iho o ka pau ana o kona wa hoomaha e hoea mai ana. Ua hawanawanaia ae ua mimihi loa na poo alakai aupuni nona no ke ano o kana mea i hana ai ma kona hoao ana e hoihoi hou ae i ka Moi ma kona nohoalii. Ina i loaa iaia ka wiwo ole a me ke ano noeau e akeakea aku ai i ka Moi, a heluhelu aku i ke kanawai pili i na hana hoohaunaele i kona wa i makemake ai e okiia na poo (?) o na poe i hoonele aku ai iaia i kona nohoalii, aole no hoi paha he wahi hoohuoi ana e haalele no oia ia manao ona. Ina i pau ia, ina ua hoonoho hou ia oia me ka ninau ole ia.
                "Mamuli o ka hana ole ana, ua hookuu aku o Wilisi i ke Aupuni Hawaii o keia wa e lohe i na manao o ke Aupuni mamua ae o ka loaa ana aku o kekahi pane i kana hoike. Ua hala ae la hoi ka wa no kekahi hana i upuia, a he pukalua hoi ka hopena. Mawaho ae hoi o keia, aole no i maikai loa kona launa ana me ke Aupuni Hawaii, nolaila, o kona waiho aku paha hoi kekahi o 'na mea e heluia ai iwaena o na mea e pahaia ai' o ke kau e hoea mai ana."

Ki Pu ia na Pahuhae.

No Samoa ae ka lono o Maraki iho nei, e olelo ana, ua huki ae na mokupuni elua o Raietoa, Samoa, i ka hae Beritania iluna o na pahuhae, me ka manao nui na Beritania e hoomalu ia lakou. I ka ike ana o ka mokukaua Farani e ku ana malaila i keia hana a na makaainana, ua ki pu koke ia ka pahuhae a hina ilalo. No ka mea, aia no kela mau mokupuni malalo o ka Farani hoomalu ana. Ua kukulu hou ae no na kanaka i ka pahuhae iluna a kau hou ae la no i ka hae Pelekane me ka nana ole i ka mokukaua Farani, aka, ua ki pu hou ia no. Aole i maopopo loa ka hopena o ia hana i keia wa.

I ka Poalua nei mahope iho o ke kaa ma'i ana no kekahi manawa loihi, ua make iho la o Walter Kamakau Napoliona, kekahi o na kaikunane o Misasa Hate Kawainui, ma Apua, a i ka auwina la Poakolu mai i nalo ai ma ka ilina o Kawaiahao. Ua piha iaia na makahiki he 20 a keu. Aloha no ia opio.

C. B. DWIGHT

[KALE KUAIKA.]

Mea Hana Pohaku Kaekae Alanui, na He Kupapau a me na Kia Hoomanao Mabala.
                E loaa no oia ma kona wahi noho ma Koiuiu, Honolulu nei. Telepona Helu 833.
feb 17-1mk

J. K. KAHOOKANO.
LOIO a he Kokua ma ke Kanawai.
KEENA HANA: Alanui Kaahumanu
Honolulu. ian 8, '94 1mk

E. M. NAKUINA.

KOMI SINA O NA ALA LIILII A ME
NA PONO WAI.

No tari Lehulehu, a he Agena Haawi Palapala Ae Mare no Honolulu nei.
                KEENA HANA: Helu 303, Alanui Kalepa.
                dk---1m.

F. J. TESTA, (Hoke).

MEA OHI A KOI AIE Mea Huli Moolelo Aina a Waiwai e ae paha.
                Mea Unuhi a Mahele Olelo Hawaii a Enelani paha.
                Mea Hana Palapala Kanawai o na Ano a pau.
                Mea Kuai Mikini Humuhumu Lole.
                Mea Hoolimalima a Hoolilo Aina
                Mea Kuai Waiwai no ka Uku Komisina Haahaa.
                Ua makaukau mau oia e lawelawe i na hana a pau e haawiia mai ana iaia. He kuike ka rula.

                E loaa no oia ma keia keena. apr 8-1mk

HELE HOOLUOLU.

O. R. L. Co.
MA NA POAONO A ME NA LA PULE.

E haalele mai no na Kaamahu i na hora 9:15 A.M. a me 1:45 P.M., a hoea hou mai i Honolulu nei ma na hora 3:11 a me 5:55 P.M.

Na Palapala Uku Puni.

Papa 1. Papa 2.
Manana - - - $ .75 $ .50
Mahiko o Ewa - - - 1 00 .75
Waianae - - - 1 50 1 25

F . C. Smith,
Agena Ohua a Palapala Nui
feb 10 tf

HALEKUAI LAHUI KALAHIKI.

Helu 405, Alanui Moi, ma Waikiki aku o Alanui Nuuanu, ma ka aoao mauka, ke keena mua o ka "Hawaii Holomua." Ma ia halekuai o na oiwi e loaa ai na anoi a me na paihi o na ano hou loa, e laa

Na Kalakoa, Na Keokeo,
Na Makalena, Na Kinamu,
Na Huluhulu, Na Lihilihi,

Na Kamaa o na Kane, Wahine me Keiki, a pela aku.
                Oluolu no ke kuai ana. Aohe hewa ke kipa mai e ikemaka, a aohe no hoi he kunukunuia no ka hoikeike ana i na mea kuai.
M. PALAU, Luna Nui.
ok 14-tf

HOOLAHA.

Ma keia a mahope aku o keia la ke kauoha a aku nei na poe a pau e paa ana i ko'u mau Aina iloko o keia Aupuni ma ka hoolimalima e uku koke mai i ko lakou auhau hoolimalima, ina ua hiki i ka manawa e hookaa ai, ia . Prince David Kawananakoa, ma Honuakaha, Honolulu, Oahu.
                                                                                KAPIOLANI.
Honolulu, Ianuari 23, 1896.
ian 27-3ml