Ka Makaainana, Volume V, Number 14, 6 April 1896 — Page 1

Ka Makaainana.

BUKE V---Ano Hou Honolulu, Oahu, Aperila 6, 1896. HELU 14

HOOKUKU KI POLOLEI.

Mawaena o Kekahi Poe Wae o
na Koa a me na Makai.

Ua hoao ae kekahi poe laeula o ke Komopani G a me na Puali Makai Kumau i ko lakou ike ki pu pololei i ka auwina la Poaono nei, ma ke kahua ki pu hou o na makai makai o Iwilei. Eia iho na laeula iwaena o na makai: Na Kapena Waipa, Kanae a me Kahookano, Lutanela Nidamu, na Makai Kupihea, Kaimihau, Peahi, Pinehaka, Kalaikini a me Chamberlain. Ma ka aoao hoi o ke Komopani G o Kapena Kea, na Lutanela Wilikoki a me Morse, Kakiana Gus Rose, na Koa Kulike, J. Wallace, J. Mahoney, Keliipio, J. Kealoha a me E. Devouschelle. Hora 2 ka hoomaka nui ana a ua lilo ka eo i na makai me eono ka oi, penei, 258 kue ia 264
                Ke nana iho kakou i keia oi, aohe no i nui loa, he ola wale ana no ko na makai ma ka umi umi a ma ka apua. Aohe e kala lakou i hoomaamaa ai, a he keu paha o ka ike nui ole i ke ki pololei. Ua lohe mai makou ia Kapena Poo Waipa i ki ai a pau elima poka, ua hoomaemae oia i kana pu, no ia mea, ua koi aku o Kapena Kea ua eo ia lakou, oiai, he kue kela i na rula. Aka nae hoi, mamuli o na hookikina a kekahi poe haole malaila, ua haalele o Kea i kona manao koi a ae no e ki hou. Iaia nae i ae ai, o ko lakou haule ana ia, no ka mea, iaia no ka haule ana ma kekahi mau ki hala ana.
                No nei oi uuku paha hoi i loaa ai i na makai, ua hoi mai lakou maluna o kekahi kaa basa nui me ka himeni hanakuli ma na alanui. Makai hoi o ka Halewai, ua heleawai ka bia a me kahi mau mea inu oolea, a hooliloia ka maluhia o ia wahi i mea ole. Pela no ka hoi ma ke kahua ki pu, nui no na mea inu e kena ai ka puu o ka mea malohaha. Ua aa ae ke Komopani G i na makai no keia auwina la Poaono iho ma ko lakou kahua hooomaamaa mauka o Makiki. Ia wa paha e akaka lea loa ai na keikikane o ia mau puali auamo pu o ke Aupuni

Piha mau na anaina pule ma na luakini Katolika Roma a me Katolika Enelani i na la i hala iho la o ka Hebedoma Hemolele, o nehinei nae hoi ka oi loa.

No Abesinia, Aferika.

Ma ka Auseteralia aku nei i hoouna aku ai o R. W. Wilikoki he palapala noi i ke Aupuni o ltalia e aeia mai oia kekahi e holo aku no ka hele pu ana i ke kaua me na pualikoa o Italia ma Abesinia. Ua hoike mai oia ia makou he poe hoakula nona kekahi poe aliikoa lehulehu i pau mai nei i ka make i na paele o Abesinia, a no ia mea hoi i huluaa loa ai oia e hele aku ma ko lakou mau meheu, ina paha no ka make a me ke ola, a i ole ia no ke pio a no ka lanakila paha. E loihi ana no paha na la a loaa mai he pane iaia no kana noi, alaila, ia wa auanei e maopopo ai ka hele a me ka ole, a he keehina hoi e loaa ai kekahi hanohano ia Hawaii nei, ke loaa mai nae hoi ka aeia mai.

He Buke Pule Alakai.

Ua pau iho nei i ke paiia ma ka halepai o ko makou Puuku ka buke pule o ke anaina hoomana Hawaii o ka Ekalesia Anagalikana, a e loaa no ma ke kuai ma ke keena o ko makou Puuku no 40 keneta o ka buke hookahi. He wahi buke uuku no, ua maikai nae hoi ka hanaia ana, a "He Alakai i ke Anaina Hemolele" no ia Ekalesia.

Ua hoopaneeia ke kuai ana i na mahele mahiko o J. K. Hanuna a ke awakea Poakahi, la 20 ae. E nana ae no i ka hoolaha.
                Ua hoike akea ia ka hoopalau o Francis Gay o Makaweli, Kauai, me Misi Lile Hata, kaikamahine hiapo a Lunakanawai C. F. Hata o Kohala mamua. Pela no hoi o Misi Mole Atekinesona ia Samuela G. Waila, a o Ernest Mott-Smith ia Misi Ane Pete, kekahi kaikamahine a Keoni Pete.
                Mahope iho nei o ka hoopaneenee pinepine ia ana o ko Julien D. Hayne hihia no na mea ino wale, ma ka hoopuka ana i kekahi mea i manaoia he ino a he pelapela maloko o kana buke nupepa oili malama----Ka Hawaiiana, ua hoomakaia ka hoolohe ana imua o ka Aha Apana i ka Poaono nei, a ua hoomoeia mai a i keia la.
                He wahi nupepa namu uuku ka ko makou Puuku i hoopuka ae, malalo ponoi o kana hooponopono ana, e hoike ana i na moohelu waiwai mai na ano palapala a pau i kopeia ma ke Kokna Kakau Kope Aupuni, e hoomaka ana mai ka Poakahi i hala. Poakolu iho la i puka ai ka helu mua, a no elua wa o ka pule e puka ai, ma na Poakolu a me na Poaono. He pomaikai keia no na loio.

NA BONA NOHO.

Hopuia Kekahi Poe Pake no ka
Hoao e Kipe.

Ekolu poe Pake koikoi i hopuia i ka Poakahi i hala no ka hoao ana e kipe ia Luna Kiai Awa T. E. Kuke o ka Oihana Dute, no lakou na inoa malalo iho: Kat Poo, ona o ka halekuai waiona Pake makai iho o ka Nekina, Alanui Nuuanu, a luna nui hoi o ka hui kalepa o Wing Wo Chan Ma; Loo Chit Sam, he lala no no ia hui, a me Yee Chin, he lala no ka hui o Wo Sing Ma, ma Alanui Hotele penei. Ua hemo mai lakou malalo o $2,000 bela pakahi.
                Penei iho kahi moolelo pokole no ka lakou mea i hana ai: Mamua iki iho o ka holo ana o ka mokupea kalepa kiapa Orient no Kina i Maraki 24 aku nei, ua hele aku he Pake imua o Tome Kuke a olelo aku e ukuia no oia ko holoi ae oia i na inoa o kekahi poe Pake mai kana papainoa, e hoike ana hoi ia holoi ana ua hoi aku lakou no Kina, no ka mea, o ko lakou noho ana maanei, aia ia malalo o na bona noho no eono malama. O ko lakou moku kupono e huli hoi ai, o ka mokumahu Kulanakauhale o Pekina i hala mua aku, eia nae, aole lakou i hoi, ua hoomau mai no ka hoopupue ana e noho iho ianei.
                Ua uku koke ia aku ke dala ia Tome Kuke, a ua hoike koke ae hoi oia no ia mea i ka Luna Dute Nui a kukakuka koke aku hoi oia me ke Kuhina o ko na Aina E, oiai, no ia oihana ia hana. No kahi mau la loihi no ka waiho malie ana a hiki i ka loaa ana o na olelo ike e lawa pono ai o ka hihia ma ko ke Aupuni aoao, ua waihoia ae ka hana i ka Loio Kuhina a nana aku hoi i ka Ilamuku. O ka hopuia ana o kela poe no lakou na inoa i hoikeia mamua ae ka hua o keia noii ana a ke Aupuni. Ua hoopaneeia mai ka hookolokolo ana ia lakou imua o ka Aha Apana a i kahi o keia mau la iho.
                I ka Poaha iho e ku mai ai ka Alameda mai Kapalakiko.
                O na kuai hooko moraki o ka Poakahi i hala, ma ko Kibona Luika keena kudala, malalo o kekahi mau hoolaha a makou i hoopuka iho nei, ua lilo no na aina i ka mea paa moraki. Penei iho ka hoakaka: No na aina malalo o ka moraki a G. W. Nawaakoa he $1,000; o ka aina hoi malalo o ka moraki a G. W. Okuu he $200.

No ka Ino Mai ke Kumu.

Kakahiaka nui o ka Poakolu iho la i ku mai ai ke Kinau mai kona mau awa ma Hawaii me Maui. No ka nui mai o ka ino aole hiki ke hooili nui mai i na eke kopaa. O ke awa oi loa o ke ino oia no o Papaikou, kahi i poino ai he elua o kona mau waapa. Hookahi waapa i mahele hapalua like ia a o kahi ua okaoka liilii. I ke kakahiaka Poakahi aku no ka loaa ana i keia poino. O keia mau waapa me na luina e hooili kopaa ana iuka, a ua kau he 24 eke iluna o kekahi waapa, o ia no ka wa o kekahi nalu nui i pii mai ai a popoi maluna o lakou a opa pu ia i kumupali. O kekahi poe luina, i ka ike ana i ka pii mai o ka nalu me ka weliweli ua lele koke aku la iloko o ke kai, a pakele aku no lakou. O na poe i koe iho, o lakou ka i hoehaia, he ehiku ka nui. Elua i haki na wawae, a ua poholehole na papalima o kahi poe. Ua hoihoi loa ia aku no ka Halemai Moiwahine na mea i eha kukonukonu loa, a ke pii ae nei ko laua oluolu.

Na keia poe inoa malalo iho i lawe mai ka olelo hooholo hoike inaina a noi dala a ko Hilo poe: A. B. Loebenstein, ana-aina a hunona a kekahi Hikikoki, H C Aukina, Luna Auhau, D Kamai, he ohakulai pili wale, a me C. Notley, he ona mahiko.
                Auwina la Poakolu iho la, la 1 nei, i make ai o Leonada Mikila, paele, ma kona wahi i noho iho nei ma Puuowaina, Auwaiolimu, i ke 98 o na makahiki. Ua haalele iho oia he wahine me eha keiki (ekolu kaikamahine me hookahi keikikane) a me na moopuna lehulehu e u aku nona. Aloha no ka makua.

                Pahaohao no hoi paha ka Enelani hana no kona mau mokukaua. A hiki mai i keia wa, aohe mea i ikeia no na moku i manaoia e ku mai ana ianei. Maraki 15 nei i haalele aku ai laua ia o. Ua heo aku la paha no kahi wahi okoa ae, a me he la aole loa no i manaoia no nei, he mau lawe'na olelo wale no ia. Malia ua hala laua no Amerika Waena, a i ole ia, Hema aku paha.
                Poalua iho la i pau ai ka hooloheia ana o ka hihia lawe kipe o E. Helekunihi imua o na Lunakanawai o ka Aha Kiekie. Mai ka Poaono aku ka hoomakaia ana. O ka olelo hooholo koe a hoopukaia ae. Ianei iho nei na hoike, oia ke Ahi o Wailuku, kela manu pelehu poo ulaula, Keoni Likikini, a me ka mea i hoopiiia a me kana wahine, ke kumu mai paha hoi i ulu ai o keia hihia.