Ka Makaainana, Volume V, Number 12, 23 Malaki 1896 — Page 1

Ka Makaainana.

BUKE V-Ano Hou     Honolulu, Oahu, Maraki 23, 1896.     HELU 12

 

He Mea Maikai ka Mare.

            Ua hoohui io’ia ae no ma ka materemonio maemae o ka mare i ka po Poakolu iho la, mauka o Kalihi, o Misita William Henry Charlock me Misi Minnie Elizabeth Rose, ma ka home noho o W.R.Sims, kane a ke kaikuaana o ka wahine.  Na ka Rev. A. Makinikoki i awaiaulu ia lana.  Na S.B. Rose, he makuakane hanauna, i haawi aku ka wahine i ke kane.  Mahope iho o ka pau ana o ka mare he papaaina ka i paholaia mai i na poe a pau i akoakoa aku.  Pau ia, he mau lealea hulahula mahope iho a hiki wale no i ka hookuu ana o na hana i na hora liilii o ka po.  Na ka hai himeni Kawaihau i haawi ae na leo mele.  O ka makou e kalokalo ae nei, e hoohua ae laua a hoolaupai i ka aina.

            I ka po Poaha mai no hoi, maloko o ka halepule Katolika, ua hoopaaia ae la o Wiliama Hakuole Silva me Misi Elikapeka Maile, kaikamahine hookama a Mr a me Mrs C.B. Maile, iloko o na hipuu kaula i polenaia o ka mare e ka Bihopa o Panopolisa.  Na C.B. Maile i haawi aku ka wahine i ke kane, a o ia ka wa o ka papa himeni i mele mai ai i kekahi o na mele hoanoano loa, a pau ia ua haawi mai la ka Epikopo i na huaolelo kahoahoa e hipuu paa loa ana ia laua.  Pau ka mare, ua hoi aku la na mea a pau no ka home o C.B. Maile, kahi i malamaia ai o kekahi papaaina i hele a luluu i na ono he nui, a ua ai iho a haalele.  Ke kalokalo ae nei makou e hahaiia ko laua mau la o nei mua aku me na hoopomaikai he nui.

 

Oluolu a Lai Hou ka Noho Ana.

            Ua hoi hou o Ale Kakalaika a noho pu me kana wahine ma Kapalakiko, Kaleponi, a ke u noho la laua i keia wa me ka maikai a me ka oluolu.  Mamua ua kaawale laua ma ke kanawai, koe nae hoi ka moku loa.  No ia mea, ua nei mai nei laua ma o ko laua loio, C.W. Akekopa, imua o ka Aha Kaapuni ma ke kaulike e hoopauia ka mana o kekahi palapala hoopaa waiwai malalo o Buluka Kakalaika no ka pono o ka wahine a me ka laua mai keiki, aka, me ka hoomauia nae o ka waiho ana i ka hoomaluia o ka waiwai i ke kaikuaana, he kahua-hale a me $15,000.  Ua hookohu ka Aha ia Paulo Numana i kahu kuikawa no na keiki ma ia hana.

            He mau mokukaua Kepani ia e upuia aku nei e ku mai ana i keia mau la iho.

 

Nee Mai Lakou la Ma no Nei.

            Me ka ike mua ole ia, ua loaa ae na kanoha i na mokukaua Beritania Comus a me Pheasant (Kamuso a me Manu-Kolohale) i ka La Pule, la 8 nei.  Aia ka inoa mua iluna o ka alahuki moku kahi i hoomaemaeia ai ma Vitoria, Kolumebia Berita nia, a ko hoawiwiia la ka hana i pau koke, mo ka mea, ua manaoia laua e haaleie i ka Poaono, la 14 mai, no Honolulu nei.  Aohe i akaka ke kumu o keia huakai, koe wale no paha i kaadimerala, ka mea i hoounaia mai ai o ka lono telegarapa i ka La Pule a kauohaia ai ka hana hoomakaukau koke.  Ua hoikeia ae nae hoi o ka hana i manaoia no na moku, no ka hoopakele wale ana no i na pono o na poe Beritania maanei ke ulu hou ae kekahi hoohaunaele kipi.  No ke Kai Berina ka ka Manu koloha la huakai i manaoia ai, aka, loaa e mai la hoi i nei kauoha awiwi.

            A hiki mai nae hoi i keia la, aohe mei i ikeia aku no keia mau mokukaua; a ina ua holo io mai laua no keia awa, he mea maopopo loa eia ae laua ma ke ala, a he mau la helu wale no paha hoi koe a u ku mai.  Ma ka Iwalani mai nae hoi o ka auwina la Poalima nei i loaa mai ai he lono aia he elua mau mokukaua Beritania ma Kahului, he moku nui a he moku uuku, kahi i uhao lanahu ai.  Ua hooiaioia mai nae keia lono ma ke Kinau o kakahiaka Poaono nei.  Pahaohao nae hoi ko laua holo ae no Mani e uhao lanahu ai, aohe hoohoa loa mai ianei, i kahi nui o ia mea e loaa ai.

 

Hihia Opiuma o ka Hale Dute.

            Hora 10 kakahiaka Poaha iho la i noho ai ka Aha Apana e hoolohe i ka hihia opiuma o Hosino a me Iwata, kekahi mau mea lawelawe hana maloko o ka Hale Dute.  Po ia la aole no i pau na oleloike a na hoike o ka aoao hoopii, a i ka Poalima mai i hoopau loa ai.  Mahope iho o ka pau ana o na oleloike, na noi ae ka loio pale, Lopikana, e hookuuia na mea i hoopiiia, aka, ua hooleia ke noi.  Ua kau mai ka Aha i ka hoopai maluna o Iwata he $500 me na koina a me hookahi mahina hoopaahao.  O Hosino, he $500 me na koina a me eono mahina hoopaahao.  Ua hoohalaia loa aku na mea hoopiiia i ka Aha maluna ae.

 

            Ua hookauluaia ka hihia o na kamalii kuai nupepa haole o Kaleponi me ka laikini ole a hiki a ka wa a ka aoao hoopii e lawe hou mai ai.

 

E Ike i ka Hale Oiwi.

            Ia makou no i hoomahui aku ai ma ka helu i bala no ke kumukuai o na ipukukui hele po, he hapalua wale no, ua nui ka heleia ae e kuai.  Auo, i keia helu hoi, e hoiai aku ana makou no ua kapuahi.  E loaa no ma ka Hale Oiwi na kapuahi uhao lanahu me wahie a me na kapuahi aila-mahu, mai ke nuui a ka liilii.  O kahi mea e makemake aua, ua hiki ke wae a ka mea ana e makemake ai.  No ua kapuahi uhao lanahu a wahie paha ka makou e hoike ae, ina e p@ino kekahi wahi, ua hiki no ke @ hou he pani e poho ai ma ia wahi, a ma ia ano e hoemiia mai ai ka lilo o kahi, a mamuli no hoi paha o ia ano e hooloihi aku ai i ka hoohana ana no ka papalua, a i ole ia, papakolu iho paha hoi i ka manawa o na kapuahi kahiko.

            E loaa no hoi malaila he ipukukui aniani no 35 keneta wale no Mawaho ae hoi o ia, o ua kaa hehi wawae no kahi e loaa ilaila.  Aia iloko o na pukaani ani mahoe o mua he pakaukau kamana me na lako hana a pau, he pomaikai hoi no na poe a pau ma ia oihana.  A ma kekahi pukaaniani ae hoi kekahi o na kapuahi a makou i kualehelehe aenei kahi i hoikeikeia ai.  He mea hewa ole ke kipa wale no e ike i kahi oiwi o kakou, ina no aole e kuai ana.  Ua hoihoiia ko kakou kipa aku a me ka hoikeikeia mai no hoi o na mea kuai, me ke kaniuhu ole ia he mea hooluhi ia.  O ka hana ia o ka hapai ana i halekuai, he hooluhiia aku.

 

La Hoomanao

            Aneane e piha ka 800 Pukiki i akoakoa ae ma Lusitana hale i ka hora 8:30 kakaniaka Poakolu iho la, a mai laila i maki nui mai ai no ka halepule Katolika malalo o ke alakai ana a ka puali puhiohe Pukiki Concordia.  Maloko o ka halepule i malamaia ai he pule mesa no ka hoa’lohaloha ana aku i ke Akua no ka loaa ana i na Pukiki ka lanakila ma kela kaua ana mai nei ma Aferika me na poe negero.  Pau ke anaina pule, ua puka mai la na poe a pau a maki hou ma Alanui Papu a hiki i Alanui Moi, pii maluna a hoi mai a hiki hou i Alanui Alapai i ka hale halawai no o na Pukiki.  He la hoomanao ia no na Pukiki a pau a puni ka honua, e like me ke kuahaua a ko lakou Aupuni.

            Ua makeia o Kahula (w) i ka Poalua iho la ma kona wahi ma Waikiki, a ua nalo no ia ahiahi malalo o na lawelawe ana a E.A. Williama.

            Ua hoi aku ma ka Auseterslia o ka Poaono nei o Porofesa Zamaloka, a pela pu no hoi me Kouna Adolofa Vona Makahofa a me kana kauwa.

 

Hala ia Kupa Kamaaina.

            No kahi wa loihi i hala ae ke ano omaimai ana o W. Jas Smith (kaimo Kamika), kakau olelo i pau o ka Papa Hoona auao, aka, mamua iki iho o ka hora 10 a.m. o nehinei i aili loa ae ai kona hanu, ma kona wahi noho ma Wakiki o ka luakini Halepapu a makai iho o Wasinetona Pa, ma Kuaihelani.  Ua kamaaina kahiko loa oia i o kakou nei.

            Ma Papoia, Kahiki, kona hanauia ana, Augate 24, 1839 a oia no hoi ka hiapo loa.  Iloko o 1845 i nee mai ai ka ohana a me ia pu ianei, a ma ke Kula Alii oia i hoonaauaoia ai.  No 30 makahiki a oi o kona noho ana ma ke kulana kakauolelo no ka Papa Hoonaauao, mai ka makahiki 1865 mai, a i keia au oehaa oia i hoopauia ai, he elua aenei makahiki i hala.  Mawaho ae o keia kulana ona, he hoa oia no ka Ahakuka Malu i ke au o na Moi i hala, a na ka Moi Kalakaua oia i hoohanohano me ka oihana hoohanohano Alii o Kalakaua, a pela no hoi mai ka Mikado mai o Iapana.  He kanaka oia i hilinaiia no kona hoopono.

            Ua haalele iho oia mahope nei he ekolu kaikuahine, o Misasa H. Turton o Kapalakiko, Misasa J.A. Hakinika a me G.J. Rose o Honolulu nei.  Mai kona hale mai e hoolewaia ai kona kino koou i ka hora 3 o keia auwina la, malalo o na lawelawe haipule ana a ka Rev. A. Makinikoki.

 

Kauohaia e Uku ina Poho

            Ma ka la 4 iho nei, ma Alanui Maunakeam i ka wa o J. Kanuha e peki hope ana i ko laua kaa me ka wahine no ka hoohuli ae a holo iuka nei, o ia no ka wa o ko S.H. Meekapu kaapio i holo aku ai mauka aku nei a hookui me kela kaa e peki hope la a haki iho la na huila hope.  Pau iho la ka pono o ko Kanuha kaa.  Ia manawa ua holo koke o Kanuha e hooponopono me Meekapu no ka uku ae i na lilo o kela wahi i poino, a ua hoole o Meekapu.  Ua hele aku no hoi kekahi mau hoa’loha e hooponopono me ua Meekapu la no ia pilikia, a ku no keia i ka ole a make a ola.  Imua nae o ka Aha Apaua i ka auwina la Poakahi i hala, ua kauohaia mai la o S.H. Meekapu e uku i ua poho a pau o ka mea @ ke kaa i @, ma kahi puka 0 $50.  Ua hoao aku o Meekapu e hoike i kona akamai kalaiwa kaa me kona mai.  @ hiki ana iaia ke komo me kela wahi haiki loa, eia nae, na pahua ia manao ona.

 

            Ua haalele aku ka mokukaua Amerika Conecoda ia Iapana he hookahi la mamua iho o ka holo ana mai nei o ka Lebanona, nolaila, he 17 ona la i ka moana i keia wa.  E hei ana oia no Kapalakiko, a e ku mua iho ana oia ianei mamua o ka hoi loa ana.