Ka Makaainana, Volume V, Number 11, 16 Malaki 1896 — Page 8

8 HONOLULU, OAHU, POAKAHI, MA RAKI 16, 1896.

[Hoomauia mai ka aoao 5.]

Kau Kanawai ke hoolilo aku i ka mea e hooholoia ai no ka uku ana i kona mau lilo ponoi iho, ka mana hoi nana i haawi aku i ke kuleana i ua Luna Hooia la a me ka mana hoi nana e hoolilo i ko ka lehulehu dala. Apiki no!

            O ka makemake paha hoi o ua Lu na Hooia la e loaa he mea e hoimiapa wale ai no, e like la me na oihana e ae, a mana ole iho la na Komite Buke Helu o na mahele a elua. Ua palapala aku ka Luna Hooia i ka Aha Senate a ua haawiia na ke Komite Hookolokolo e noonoo.

            Paumaele ka Hale Dute me ka hohono uwahi opiuma, maloko o ke keena o ka mea helu i na waiwai komo mai, a o na poe lima lawelawe Kepani ekolu ka i hopuia no ka lawelawe i ka opiuma. Oi noke iho na makai i ka huli, aohe mea ano nui i loaa. I Kauai aku nei hoi ka Ilamuku, a o ia like ana no.

Piano Loaa Wale.

                Ano ka wa e loaa ai o na lole me ka oluolu loa. Ua hoemi o L. B. Kerr i na kumukuai ma na waiwai a pau, a mawaho ae hoi o keia hoemi oiaio loa, e haawi no oia i na poe e kuai ana he $2.50 he kuleana e loaa ai o kekahi Piano nani, i hiki no ke ikeia ma kona halekuai ma Alanui Moiwahine.
            No kanakolu la wale no keia pomaikai e mau ai. Nolaila, na ka hiki mua no ka eo. Mai no a houlolohi, o haule auanei i ka hope waa.

            E holo aku ana no ka Mokupuni Laisana ka mokupea hao H. Hakafila e kii lepo manu ai. Aia maluna o kahi mokupuni he 50 poe Kepani hana a he haole Geremania me ka wahine, a ua piha ka eono mahina o ko lakou noho ana malaila me ke kipa kanaka ole ia aku.
            Ua hoopii iho nei o Emalina M. Ma guna, kaikamahine a C. Afona me Julia Afona, a wahine hoi a J. A. Maguna, imua o ka Aha Kaapuni e kue ana i ka makuahine mai ka hoolilo ana aku i kekahi waiwai ma ke kuai, a ua pau wale nae hoi ma ka waiho ana aku o ka makuahine he bona no $50,000 o W. F. Alani ka hope.
            Mamua o ke awakea Poalima nei i ku mai ai kahi mokumahu palanaiki Iwa mai Honoipu, Hawaii, iloko o 25 hora ka manawa holo. O keia no hoi kahi mokumahu a makou i hoike aku ai ma ka helu i hala e ku ae ana i Honoipu, Hawaii, a pela io no, he 18 la holo mai Kapalakiko. He pokole iho oia ia Waimanalo, a pela no hoi me ke akea o luna o ka moku. He oololi wale iho no. Eia oia ke pili nei ma ka uwapo makai mai o ka hale dute kahiko. Aole i maopopo i keia wa ka manawa e holo aku ai, o Honoipu no nae ke awa.

KELA A ME KEIA.

                Kumukuai o ke kopaa he 4 1/8 kenata no ka paona.
            Hohole samoka a pauakaaka Ka Leo o ka Lahui. Wasa mala nao?
            Apopo ka la hanau o ka Moi Kamehameha III, ka Lokomaikai.
                Ua oi ae ko Paalua D. Kellett oluolu i keia wa, koe nae hoi ka palekana.
            Iloko aenei paha o Sepatemaba e hoea mai ai ke Duke o Ioka i o kakou nei.
            Ho ra 4 o ke ahiahi Poaha iho la i huli hoi aku ai no Iapana ka mokumahu Chiyoda Maru.
            Ma ka Miowe ra i huli hoi mai ai o F. H. Redewada, kekahi o na poe kalaiaina i kipakuia mai nei aku.
            I keia la e kapalulu mai ai ka Auseteralia mai ka Ipuka Gula. A i keia Poaono iho no e huli hoi aku ai.
            He hotele hou ka mea e walaauia nei e kukuluia ae ana ma ka pa ma Ewa ae o ka luakini Katolika Roma.
            I keia la e noho ai ka Aha Kiekie e hoolohe i na hihia i koe mai o ke kau kiure iho nei a me na hoohalahala.
            Ma Kalia, Honolulu nei, i ka la 11 nei, mai ka puhaka mai o ka wahine a J. K. Kamanoulu, he kaikamahine.
            Ahiahi apopo e ma reia ai o Misi Mine Rose, he kaikamahine na Misasa Mele Akoni Rose, me W. H. Charlock.
            No kanakolu la wale no, mai ka la 7 nei, ke kuleana e loaa ai o ka piano nani a maikai ma ko L. B. Kerr halekuai.
            Ma kahi o 400 mau Kepani paahana no na mahiko e hoea mai ana i keia mua koke iho. Piha Kepani mai nei ka hoi kakou!
            Ua loaa i ka puupuu ulalii kekahi Pukiki mauka o Makiki, a ua make i ka Poaha iho la. E akahele e na makua mea keiki i ka oukou mau pulapula.
            Ma na lono i loaa mai ia makou, aia ka Puali Puhiohe Lahui ma ke kulanakauhale o Aka rona, Ohio, i keia manawa. Hookahi mea nawaliwali o lakou.
            Piha ke 86 makahiki o Pope Leo XIII. i ka la 2 nei. O ia no hoi ka la o Ioane Wesele i make ai iloko o 1791, ka mea nana i hookumu ka hoomana Weseleana, i heaia mahope ona.
            Ua huli hoi aku no Iapana ma ka mokumahu Chiyoda Maru ke Kakauolelo o ke keena Kanikela Iapana, Goro Narita, no kona aina hanau i ka Poaha iho la, me ka ukaliia e kana wahine.
            E hoomanao ko makou poe makamaka he $2 50 e lilo ai no na mea kuai o ko L. B. Kerr halekuai, loaa he kuleana e koho ai i ka nui o na anoano o kekahi ipu pu no kekahi piano Nu Enelani.
            O kekahi o na hihia a ke kau kiu re o Kauai i noho mai nei ma Lihue i hoolohe ai i keia noho ana mai nei, o ia no ka hihia aihue i ka waiwai i haawiia e malama o C. L. Birito. Ua hookuuia ka mea hoopiiia.
            Ke pii malie ae nei ko Paulo Numana oluolu, ua puka oia iwaho i keia mau la iho la i ka holoholo kaa.
            Ua pau ka hana ana o na poe hana ma ke kahawai o Nuuanu i keia wa, no ka mea, ua pau ka haawina dala i hookaawaleia no ia wahi.
            Ma ka Hale Oiwi, he hapalua wale no ko kukui hele po, i kuaiia ma na halekuai e ae no ka papalua iho o ke kumukuai a oi aku a emi mai.
            Ua loaa aku iuka o Tanatalusa i ka Poakahi iho la, i kekahi keiki Pukiki he kuka, he papale a me ka pahi ua hele a haukae i ke koko, e waiho ana iloko o ka nahelehele.
            Ma ka Monowai i huli hoi mai ai o Kimo Aileti a me Mekia Kealakai, kekahi mau keiki o ka Puali Puhiohe Lahui. He ekolu mau kaikamahine Hawaii i huli hoi pu mai nei.
            He anaina kaulima ke malamaia ana i keia La Pule ae, maloko o ka Luakini o Sana Anaru, i ka pule o ka hora 11 a. m., no ka hoolilo ana i kekahi poe i mau hoahanau.
            No kekahi o na hale iloko o ka pa o H. W. Simida ka pauahi o ke ahiahi Poaha iho la, ma alanui Beritania, a ua pio koke no nae i ka hoea ana aku o ke kaamahu aila.
            O na kapuahi, na lako pa, na pahi, a pela aku, aia no ma ka Hale Oiwi e loaa ai ma na ano kumukuai like ole. Ua hiki ke wae a ko ka makemake.
            O ka Poalua iho la ka po hope loa o ka hui keaka lio i haawi ae ai ma Honolulu nei, a i ke ahiahi Poaha nei i pau nui aku ai maluna o ka mokumahu Kepani no Iapana.
            Ua makeia i ka auwina la Poaha nei kela Pukiki elemakule e maau hele ana ma na alanui i ka la a po, i ke 65 o kona mau makahiki. O Manuela Pakoko kona inoa. Ma ka ilina o Koula i nalo ai oia malalo o na lawelawe ana a E. A. Wiliama i ka Poalima nei.
            Ua ku mai ka Monowai i ka auwina la Poaono nei mai Kapalakiko. Wanaao no hoi o nehinei i au loa aku ai no na Panalaau Hema. Hala aku no hoi ia, hookomo mai ana ka Warimu mai na Panalaau Hema mai, a i ka auwina la no o nehinei i haalele mai ai i keia awa no Vanekouwa, B. K.
            He huakai paoa ka kekahi poe makai i holo nui ai ilalo o Koolaupoko i kela pule aku nei no ke kiai ana i kekahi moku opiuma, i lohelohe wale ia ae e ku ae ana paha ma ia wahi, a na kekahi moku kiakahi e aoloolo ka opiuma iuka nei o ka aina. Luhi makehewa na kino i ka luaiele wale ia ma o a maanei me he poe keiki liilii la.
            Kakahiaka Poaha nei i lawe ae ai o Senatoa H. Linekona Holokene i kona noho iloko o ka Aha Senate, mahope iho o ka hoohikiia ana e ka Lunakanawai Kiekie Alapaki. Mahope iho, ua ikeia ua hoohiki hewa ia oia me ka hoohiki no na poe koho, nolaila, ua kii nou ia ka Lunakanawai Kiekie a ua hele mai a kala ae la i kana hewa i hana ai, a hoohiki i kupono no na Senatoa. Alua a Holokene hoohiki i nali ai i keia wa, ehia la mamua aku.
            He hale kipa ka Hale Oiwi no ka lahui, aohe kunukunu no ka hoikeike ana i na mea kuai o loko. E komo, e kipa a e ike no ia kakou oiwi.
            Ua mareia ma kahi noho o ke kumukula o ke Kula Kamehameha i ka po Poaha nei o David Laanui, hope kumu o Keoneula, me Mi si Leialoha Kaula e Rev. H. W. Peka. Maikai ka mare.
            He hohono uwahi wale no ia e pu a mai nei, e oili ae ana he nupepa puka la mai ka halepai ae o Ailuene Buki i keia mau la iho na kekahi poe elekule. Ea, mai punihei mai ia lakou, he pauaka!
            Auwina la Poalua i hala i hookomo mai ai a pili ma ka uwapo Pakipika ka mokumahu Miowera mai ka Akau mai. Ma ke awakea ae o ka Poakolu i haalele mai ai i keia awa no na Panalaau Beritania ma ka Hema.
            Ua mahukaia i ka Poakolu iho nei he elua mau keiki o ka hui keaka lio, no laua na inoa o Ka chiel a me Taki, a aole loa laua i loaa a hiki wale no i ka hala ana aku o ka puali keaka lio no Iapana i ka Poaha nei.
            E hoomanao ana na Pukiki i ka Poakolu iho no na lanakila i loaa mai nei i ko lakou Aupuni ma Aferika i Waena. He pule mesa ke malamaia ana me ka hoohiwahiwa a hoohihipeaia o loko o ka luakini o Malieokamalu.
                O ka Poalua, la 10 nei, he la hoomanao hanau ia no ke Za (Emeperoa) o Rusia, Nikolasa III. O ia kona la hanauia ai i ka 1845. Ia la like no hoi i mareia ai ke Keikiali o Wale me ke Kama'liiwahine Alekanadera o Denemaka i ka 1863.
            Ua hoikeia ae he $735 50 na loaa o ka po keaka iho nei no ka pomaikai o ka Home Makuahine Kapiolani a me ka Ahahui Hawaii Opio. Mahope iho o ka laweia ana ae o na hoolilo, ua koe iho no ka pomaikai o keia mau ahahui he $501.50. Nui kela!
            Ma ka hoopii a H. A. Wilimana ia E. B. Tomasi, e pili ana i na lako pai o ka Holomua a e hoohanaia nei e ka Buletina malalo o ka hoolimalima, ua haawiia ka pono no ka mea hoopii he $1,300, ka waiwai io o kela mau lako a pau i ka wa i kuaiia ai, a me $1 poho.
            Koikoi lua no hoi ke kuaua o ka auwina la Poalima nei, o ka hele ka ia a lana hakukele na alanui iloko o ka manawa pokole. He hoopoluluhi wale no i ke awakea o ke ano hakumakuma, a he haule hooma-u ko ka auwina la. Kohu kahawai na alanui. E ole nae hoi ia, pau ka lepo.
            Ekolu mau keiki liilii kuai nupepa i hopuia a laweia no ka Halewai e hoopaa ai i ke ahiahi Poaono nei, no ke kuai i na nupepa o Kaleponi mai maloko nei o ke kulanakauhale. Ua hele koke aku o Nikola o ka hui o Wall, Ni chols Ma e bela ia lakou, a pau nui i ka hookuuia mai, oiai, na lakou na nupepa o na aina e a kela poe keiki i lawe hele ai e kuai. Ua lono wale ia ae na Sopa ma i hoike i keia mea i ka oihana makai. Nolaila, ma ia hope iho, ua haawi wale ia na nupepa ma ke ano makana i na poe a pau e hele aku ana.