Ka Makaainana, Volume V, Number 11, 16 March 1896 — Page 3

HONOLULU, OAHU, POAKAHI, MA RAKI 16, 1896. 3

KUPAIANAHA UA MOE.

Hoike mai ka Po i na Mea Hoopahaohao he Nui.

                I ko'u uhane e nana ana i kekahi pali, ike aku la au i kekahi bea nui i kona lele ana a kiekie mai ka honua ae, a ike aku la au i kona haule ana iho mawaena o kekahi puulu ilio e akoakoa ana, puhee ae la lakou i o a ianei me ka uluaoa nui. A ike aku la au i ua bea nei e ai mai ana i kekahi ilio, a mahope ai hou aku la no a hiki wale no i kona ana ana paha, a ku iho la oia me kona lanakila nui. Ia wa, ike aku la au i ka hoea ana mai o kekahi liona, a ai aku la no i na ilio me ka ai ana aku i ka bea, a lanakila iho la oia.
            Mahope iho, ike aku la au i ke kai e pii mai ana me he kanaka la, a hiki mai la i kahi o ka liona e ku ana a me na koena holoholona i koe aku a onou aku la ke kai i ka liona a me na holoholona ola a pau a nalowale aku la lakou a pau malalo o kekahi umalu pali, a pau aku la lakou i ka nalowale me ka ike hou ole ia aku.
            A mahope iho, ike aku la au i kekahi elemakule, a lohe aku la au i kona leo i ke kah ea ana mai me ka leo nui, e kukala hele ana, a penei ka'u lohe ana aku i kona kukala ana:
            "E ala, e Hawaii! E ala, e Maui!! E ala, e Lanai!!! E ala, Molokai!!!! E ala, e Kauai!!!!!" a koe iho la o Oahu aohe i kaheaia, a puoho ae la au, eia ka he moe.
MAHOE.
            Dekema ba 26, 1895.

Wehewehe Kaao Moeuhane.

                Ekolu ano holoholona i ikeia ma ka moe: 1— Bea, he hoike ia no kekahi enemi; 2— Ilio, he hoike ia no kekahi manao awahua; 3— Liona, he hoike ia no kekahi mea ano nui e hoea mai ana me ka pono ole a pupule paha, a i ole ia, he uluaoa haunaele. Ina paha i ka mea nana ka moe keia enemiia, a i ole, he lawe menemene ole no kahi mea i kona ola iho.
            No ka ai ana o ka bea i na ilio, he hoike ia o ka powa aku ia hai, o ia paha ka hiki mua o na hana powa, ina no ka powa aku ia hai, a i ole, iaia iho no paha.
            No ka liona, he hoike kona ano a me kana hana no ke koa me ka wiwo ole, a ua ai aku la ka liona i ka bea. Mamuli o kona ai ana i ka bea, ua hoike mai ia no ka powa aku ia hai, a i ole, no ka powa ana o kahi mea iaia iho me kona manao liona. A i ka nana ana i ke ano o na holoholona i hoikeia mai, ua like lakou ma ke ano he poe ai-kanaka a ai io lakou a me ke nahu kanaka.
            I ka hoohalike ana ae i na hana a na holoholona me ke kulana o na mea kaua i malamaia e ke kanaka, e loaa ana ka mea like, o ia iho keia: O bea a me liona, he mau pu kuniahi laua; he mau holoholona ai-kanaka a ai io no hoi. O ka ilio a me na ilio liilii iho, o ia na pu raifela a me na pu panapana, he mau holoholona ai-kanaka keia me ka ai io, a he mau kahu ko keia mau holoholona a pau. O keia mau holoholona ke kukuluia mai ana ma kela wahi keia wahi, ma kela alanui keia alanui no ke nahu mai i na kanaka. A i ka nana ana i keia mau holoholona, he mau helehelena weliweli ko lakou, aka, ke hoike nei ka moe ua onou aku ke kai ia lakou a ua pau aku i ka nalowale, me he la e i aku ke kai nana e onou keia mau holoholona a pau ke nee mai la.
            A ina ua pili ka hoakaka o na holoholona i ka mea nana ka moe no kona enemiia mai e kona mau hoa'loha, alaila, o ia iho la paha. Aka nae, ma ke kahea a ka elemakule ia Hawaii, Maui, a pela aku, o ia ka mea nana i hoike mai i ka pili ole nona. A pela i manao ai ka mea wehewehe ua pili aupuni ka moe.
            A mahope pii mai la ke kai a onou aku la i ka liona a me ke koena o na ilio malalo o kekahi umalu pali, a nalowale aku la me ka ike hou ole ia aku.
            Ma ka nana ana i keia mahele o ka moe, me he la, ua hoopaeia mai kekahi mau lako kaua a ua hunaia ma kahi i manaoia e nalo. A i ole ia, he mea kaua paha i manaoia e hoopae malu mai. A ke ole pela, alaila, he enemi no eia iloko nei o ka aina kahi i pee ai, a he kinaiia paha no ka enemi e kekahi enemi mai waho mai.
            He mea pono ke nana hou ia ka hana a ke kai. No ka mea, ke hoike nei ua onouia aku ka liona a me na ilio malalo o ka umalu pali. Ina o keia onou ana a ke kai a he hoailona ia o ke kinai ana i ke kupuino e hoea mai ana, alaila, ua loaa ka haina a ke kai, he hoomaemae kana hana. A e hoomanaoia, o ke kai, he paakai oia, he miko me li'u iloko ona. Nolaila, e loaa he elua haina iloko ona, he "kala" a he "hoopai." O ke "kai," ua laweia mai ia ma ke ano "pikai," oia hoi, ke "kaikala," a pela aku. A ma ia ano, ua pili ia hana a ke kai i ka hoomaemae ana i ka mea i lawehala. A ma kekahi ano no hoi, he "hoopai" i ka mea i hana hewa. Oia keia, ua hoomakaukauia he mau kaula hili no ke kanaka kue rula a aihue paha, a ua hookomoia iloko o ke kai paakai, a i ka wa e loaa ai o kekahi kanaka kue rula a aihue paha oia, e laweia mai ana ua kaula hili la i miko ai i ke kai paakai a hili aku ma ke kino o ke kanaka aihue, a pela iho la i loaa ai kekahi haina o ka ke kai hana he "hoopai." A ina o ke ano iho la keia o ka ke kai hana, alaila, e ike ana paha kakou. A o ke ano o ua hoopai la aole kakou i ike i keia wa. Ua hiki no hoi ke oleloia, he mea "hoomaemae" a "hoola" ke kai no ke kanaka; no ka mea, o ke kai ka mea nana e hoomaemae i na ino a pau o ka opu o ke kanaka, a o ka hope o ia kanaka he ola mai. A ina o ke ano ia o ka ke kai hana o ka holoi i na ekaeka o ka opu o ke kanaka, malia no hoi pela no hoi e holoiia ai na ekaeka iloko o ka opu o Hawaii, alaila, e ola ana o Hawaii. Ua maopopo no nae ka ke kai hana ano nui, o ka hoomaemae a me ka ulupa i na mea a pau ma kona alahele i kona wa e pii ai a me kona wa e emi ai. Ina e pii ke kai, he ulupa ana ia i na mea mamua ona, a ina emi mai ke kai, he kaili ana mai ia i na mea maikai a me na pelapela maluna o ka aina, a o ia hana ana a ke kai, he hoomaemae ana ia me ka hooneoneo ana, a o ko ke kanaka hope he minamina, ina he mau lako kona ma kahi a ke kai i pii ai a emi aku. A ina o ke ano ia o ka ke kai hana e hoea mai ana, o ka hapuku aku i ka waiwai o ka mea waiwai, he ilihune ka hope.
            A mahope iho, ua hoea mai la kekahi elemakule a kahea ae la me ka leo nui, "E ala, e Hawaii! E ala, e Maui! E ala, e Lanai! E ala, e Molokai! E ala, e Kauai!!"
            Ma ka hoomaopopo ana i keia "leo kahea," he kuahaua ia no ka po, aka, o ka mea e hoea mai ana, me he kukala kaua la kona ano, a i ole, he kauoha e ku kiai. A ina o keia leo kahea o ka po, a he hoailona ia o ke ala ana mai o kekahi haunaele, a i ole, o kekahi kukala kanawai koa paha, alaila, o ia iho la. A o ka hope, he huli paha i na lako kaua me na poe ohumu kipi, me ka hoohuoiia o kela a me keia. A o ka hope o ia huli ana o ka hookomoia aku iloko o kela umalu pali. Alaila, he halepaahao ke ano, ke pii ole mai ke kai nui.
            Ma ka nana hou ana aku no kela "leo kahea," ua loaa he mau hoohuoi ana ae no ke kaheaia ana o Hawaii, Maui, a pela aku. Me he la, no ke Aupuni ua leo kahea la, e kauoha aku ana paha i ka poe e noho ana i Hawaii, Maui, Lanai, Molokai, a me Kauai, e liuliu a e hoomakaukau i ka lakou mau ilio hae no kekahi hana e hoea mai ana i Oahu nei, no ka mea, ua hunaia o Oahu. Nolaila, he kuahaua ko ka po, he hana weliweli paha ko ke ao; ina he powa, ua powa iho la; ina he lawe i ke ola, ua lawe ae la; ina he hopuhopu, ua hopuhopu iho la; ina he ku kiai no na koa, ua kiai iho la; a pela aku.
            Ma ka nana ana hoi i ka nui o na mokupuni i heaia e ka elemakule, ua loaa ko lakou huina i ka elima. A ina o keia huina elima o na mokupuni, a he hoike ia no ka manawa, alaila, he mea pono no hoi ke hoopunipuni ae ma keia wahi.
            Eia kona alapahi ana: O elima mokupuni, ua like paha ia me elima pule, elima anahulu, a pela aku. O keia mau mahele elima e hoomaka ana kona helu ana mai ka la 26 mai o Dekema ba i hala, e pau ana paha i ka la 15 o Feberuari, 1896. Mawaena o keia mau manawa i hoikeia ae la, e nana ai i na mea i hoikeia o keia moe. Nolaila, aohe hoopunipuni mai a koe aku, ea?
            O ka hope keia o keia kaao, a no kahi wa hou aku ua kaao hou.
KILOKILO DIMERATA.

            I ka wa a kekahi o ko makou kiu i maalo ae ai ma ka ipuka o kekahi hale, ua ike aku la oia i kekahi lede e kani ana ka mu ka i ka uku o ke poo o kekahi kaikamahine ana e nauke ana. Ta ha ha, ono ea.

Hoolaha Manao Hooko Mo raki a me ke Kuai

                MAMULI O KA MANA KUAI I hoikeia maloko o kekahi Mo raki mai ia PAU (k) o ke Awawa o Nuuanu, Honolulu, Mokupuni o Oahu, Paeaina Hawaii, ia Levi Drew, o ia wahi like no, i hanaia i ka la 3 o Aperila, M. H. 1888, i kopeia ma ke Keena Kakau Kope Aupuni ma Honolulu i oleloia iloko o ka Buke 107 ma na aoao 361, 362 a me 363, a ua hooliloia ua Moraki la ia A. Rosa, Kahu Waiwai
                Ke hoolahaia aku nei ma keia ua manao o A. Rosa i oleloia, ka mea i lilo ai mai ka Mea Paa Moraki aku i oleloia, e paniku aku i ka Moraki i oleloia no ka uhakiia o kekahi kumu, oia keia: ka hookaa ole ia o ka ukupanee ame ke kumupaa i ka wa i kupono ai no ka uku ana, a mamuli hoi o ia hooko ana e hoolilo aku no i kahi i hoakakaia maloko o laila a me na hana hou a pau maluna iho, ma ke kuai kudala akea, ma na Keena Kudala o James F. Morgan, ma Alanui Moiwahine, ma Honolulu i oleloia, ma ka POAONO, LA 28 O MARAKI, M. H. 1896, MA KA HORA 12 AWAKEA.
                A, ROSA, Mea a ka Mea Paa Moraki i Hoolilo aku ai.
            No na mea hou aku i koe, e ninau ia A. Rosa, Loio, Alanui Kaahumanu, Honolulu.
            O kahi i paa ma ka Moraki i oleloia a e hooliloia aku ana, o ia "kela apana aina a pau loa e waiho la ma Kapouhuluhulu, ma ke Awawa o Nuuanu i oleloia, a i hoakakaia ma ka Palapala Sila Nui 2433 (A na Aupuni) no Popoki, nona ka ili o 900 eka, a i lilo mai hoi i ka Mea Hana Moraki ma o ka Palapala Kuai, i hanaia i Aperila 3, 1888, i kopeia ma ke Keena Kakau Kope i oleloia iloko o ka Buke 110, aoao 175.
            He Pa-hale a he aina Kalo ko keia apana aina, ma ka huli ma Ewa o Alanui Nuuanu e pii la iuka, ma kekahi aoao ae o na Loi Kalo a Haalelea, me kekahi alahele a hoea iwaho o Alanui Nuuanu. Ua paa i ke kalo i keia wa a ua hoolimalimaia mahope mai o ka hanaia ana o ka Moraki. He mau pono wai no hoi kahi o ka aina. mar 2-4pl

C. E. Williams me Keiki.
E d. A. Williams, Luna Nui.

Helu 611, Alanui Moi, ma Ewa iho o ka Pa o Aigupita. He mau mea kuai lako hale o na ano a pau loa. He mau mea Hana Pahu Kupapau a Hooponopono Hoolewa. E hoolakoia no na Kaa Kupapau, na Kaapio a me na Kaa-ohana. Ina no e ninau ia laua, e loaa no na Pohaku Kia Hoomanao no na He Kupapau. O ka Ialoa kekahi hana hiki loa ia laua, aia ia malalo o ka lawelawe ponoi ana a Ed. A. Williams, F. D., he mea i puka pono mai ka Kalaka Kula o ka Ialoa Maikai ana iloko o Mei, 1894. —NA TELEPONA— Keena, Helu 179 — Kauhale a me Kahea Po, Helu 815. nov 2-mp. feb 3-mp.