Ka Makaainana, Volume V, Number 10, 9 March 1896 — Page 7
HONOLULU, OAHU, POAKAHI, MARAKI 9, 1896. 7
HOI E HOOMAHA.
-
Imi i Kahi e Loaa ai o ka Maha Mau Loa.
J.T. WALAKAHAUKI.
Mahope iho o ka waiho ana me ka ma'i no kekahi manawa loihi, ua haalele mai la i keia ola ana o Keoni Kamaki Walakahauki i ka auwina la Poakahi i hala, keiki a Walakahauki makua i hala e aku, a kaikuaana hoi no Hanale Walakahauki e ola nei, a hoi aku la ma kela ao e hoomaha ai. Ua haalele iho oia kana wahine a me na keiki ewalu e kumakena aku nona ma keia ao, kona ohana a me na hoa'loha he nui wale. Ua hanauia oia ma Tasamauia i ka makahiki 1841, a ua piha iaia ke 55 makahiki a hele aku la i ka 1850 kona hiki mua ana mai i Hawaii nei, a mai ia manawa mai no hoi ka hoomaka ana mai e hookuonono pono iho i na kapuai wawae i ka lepo ou, e Hawaii, a hala aku la.
He lala oia no ka Papa Ola a ua noho Peresidema hoi no kekahi manawa. Ua noho lala no ka Ahakuka Malu o ka Repubalika, no na Papa Kahu Waiwai o ka Halemai Moiwahine a me ka Home Luina. Ua noho oia ma ia mau kulana a hiki i ka wa a ka make i kii mai ai a lawe aku iaia. He kokua nui oia i na hana pono iwaena o na ekalesia, a o ka oi loa aku no nae paha hoi, i ka halepule Halepapu.
Mahope iho o ka hala ana aku o Walakahauki makua, ua ili ili o la maluna ona ke koikoi o ka auamo ana i na hooponopono ana a pau o na halekuai elua e ku nei ma Alanui Moiwahine a me Alanui Papu a hele hoouhi wale aku la no ia.
Poalua, auwina la, i hoolewaia aku ai oia mai kona home mai ma Alanui Waile, Maemae, a waiho ma ka ilina o ka ohana ma Maemae, malalo o na lawelawe haipule ana a ka Rev. D.P. Bine. O na hapai pahu, Hale a me Alopeka Walakahauki, C.A. Laiki, W.W. Daimana, Wili Laiki, A.B. Wahie, D.W. Kobeta, a me E.W. Jordan.
Ua hoomaha ae na Hale Ahaolelo a elua i ka Poalua no ka hoomanao ana iaia, a ua komo pu ae kekahi mau hoa e ukali i kona huakai hope loa.
REV. W.B. KAPU.
Ma ka po Poakolu nei, ua oluolu i ke Akua Mana Loa ka lawe ana aku i ka hanu ola o Rev. W. B. Kapu, maloko o ka Halemai Moiwahine, a hookoe iho la i ke kino lepo na kana mau keiki, na moopuna a me ka ohana e paiauma aku O Laie, i Koolauloa, Oahu, kona wahi i hanauia ai i ka malama o Ianuari, la 24, 1834. Nolaila, ua piha ua makahiki he 63 a keu. Ma Lahainaluna kona wahi i hoonaauaoia ai, a puka mai laila mai, mare me Maria Okuu i ka la 20 o Aperila, 1861. He mau makahiki mahope mai o kona mare ana, ua hoounaia aku la laua no na Paeaina Kilipati e hai i ka olelo a ke Akua iwaena o na kanaka o ia mau paemoku. O Apaiana kahi ana i noho mua ai e lawelawe i ka hana a ka Haku, a mahope hoi no Tapiteuea, kahi ana me ka wahine i noho ai a nunui ka laua mau keiki, he elima ka nui. Lawe aku ka make i ka wahine a me elua keiki, he keikikane a me ke kaikamahine, a koe mai ekolu, a hoi mai la no Honolulu nei e hoomaha ai i ka 1876. I ka 1877, hoi hou oia no Kilipati e lawe lawe hou ai i ka hana a ka Haku, a hoi hou mai no no Hawaii nei mahope mai. Hoi hou ola i ka 1882 me ke kaikamahine a me ka hunona a noho hou malaila. I ka 1892, kipakuia mai e ka mokukaua Beritania a hookauia maluna o ka mokumahu Moneserata o Guatemala, a mai laila ae a Kapalakiko a hoohiki loa mai i Honolulu nei. Ua mare oia he wahine Kilipaki, a na laua mai hookahi wale no keiki, he kaikamahine, a ke ola nei no. He 30 a keu na makahiki o kona noho lawelawe ana i ka hana a ka Haku ma ia mau paemoku.
Mahope iho o ka lawe ana aku a ka make ia eha o kana mau keiki, ua koe iho ma keia aoao e kanikau aku iaia he elua wale no mau keiki, he keikikane, W. H. Kapu, ona a lunahooponopono o KA MAKAAINANA nei, a he kaikamahine o 12 makahiki a me na moopuna.
Mamuli o ke kahea a ka Ekalesia o Waioli, Kauai, iaia i kahu no lakou, ua hoi aku la oia a noho pu me lakou a hiki i ka make ana aku o kana wahine hou ilaila i ka 1895, i ka mahina o Feberuari. A na ka ma'i i waiho aku i ka hana a holo mai la i Honolulu nei e imi i ke ola, aole nae i loaa.
Auwina la Poaha nei i nalo aku ai oia ma ka ilina o Kawaiahao malalo o na lawelawe haipule ana a na Rev. Kauka Hai a me O.H Kulika. Hoi aku la no ka lepo i ka lepo. Aloha!
-
Pakele Mai Puhi ke Oka.
Hora 8 kakahiaka o ka la 23 o Feberuari i hookomo aku ai iloko o ke awa o Sana Diego ka mokukaua Beritania Comusa, me ke pailata ole, a haawi ae la he 21 mau kani pukuniahi aloha no ka hae me ke Aupuni o Amerika Huipuia. Eia nae, aole i panai mai na papu kaua a me na manuwa Amerika e ku ana iloko o ke awa i keia hoohanohano a ko ka Moiwahine mokukaua, oiai, aole i maopopo iki ia lakou keia mokukaua e hookomo aku nei. Nolaila, me ka pupuahulu i hoouna aku ai o Lutanela Ingersoll o ka Piladelapia i kekahi waapa iuka o na papu e ninau ai no ke ano o keia mau leo pukuniahi e kani nei, a ua like wale no hoi ko lakou maopopo ma keia mea. Aole hiki i ke aliikoa kiekie o ka papu ke haawi i kekahi panai no kela kani pukuniahi, no ka mea, aole i maopopo iaia.
He mau minute mahope iho, akahi no a maopopo he mokukaua Beritania ka, aole nae he leo panai ma ko Amerika Hui puia aoao no keia hana hoohanohano. I ka wa nae i maopopo ai he mokukaua Beritania ua moku la, ua wehe koke ia ae la na papa pu o kekahi aoao o ka Piladelepia, o ka hora 9 paha ia manawa, aole loa i kani hookahi pukuniahi.
I ka manawa i pau ai ke kani ana o ka leo hope loa o ka pukuniahi o ke Comusa, ua ili koko iho la oia ma ka lae o Balast a paa koke iho la me ka emoole loa. Ua hoouna koke ia mai la na waapa mai ka Piladelepia no ka haawi ana i na kokua ana iala me na luina o ka moku, a mamuli o ka Adimerala Biadeli kauoha, ua holo mai la ka mokukaua Alabatarosa e haawi i na kokua, o ka hora 5:30 ia o ke ahiahi, me ke kokua pu ia o na mokumahu kolo moku Sana Fe a me Hironadale.
Ua ano molehulehu loa no hoi, hemo ae la ke Comusa mai kahi ona i paa ai a hookomo loa aku la no ia po no loko o ke awa me ke pailata ole. Ua haawiia ae na ki pu aloha hou ana mawaena o na mokukaua a me na leo huro hauoli no ka hemo ana o ko ka Moiwahine mokukaua mai kahi pilikia.. O na kokua a Adimerala Biadeli me kona mau kanaka i ka moku pilikia, o ia ka ke kapena a me na alii o ke Comusa i haawi aku ai i na hoomaikai ana a nui.
-
Hoolaha Manao Hooko Moraki a me ke Kuai.
MAMULI O KA MANA KUAI I HOIKEIA maloko o kekahi Moraki i hanaia ma ka la 6 o Augate, M.H. 1892, ma ia JOHN K. HANUNA a me POIPE, kana wahine mare, o Hana, Maui, ia ISAAC TESTA, Kahu Waiwai, o Honolulu, Oahu, i kopeia ma ke Keena Kakau Kope Aupuni ma Honolulu, iloko o ka Buke 139, ma na aoao 175 a me 176; ke hoolahaia aku nei ma keia ke manao nei ka Mea Paa Moraki e paniku aku i ka Moraki i oleloia no ka uhakiia o ke kumu, oia hoi: ka uku ole ia o ke kumupaa a me ka ukupanee i ka wa e kupono ai no ka ukuia, a mamuli hoi o ia paniku ana e hoolilo aku i ka waiwai i hoakakaia maloko o ia palapala ma ka
POAKAHI, LA 30 O MARAKI, M.H. 1896,
ma ka hora 12 awakea, ma ke kuai kudala akea ma na Keena Kudala o W.S. Luce ma Honolulu.
ISSAC TESTA,
Kahu Waiwai, a Mea Paa MOraki.
Honolulu, Feberuari 27, 1896.
No na mea hou aku i koe, e ninau ia A. Rosa, Loio, Alanui Kaahumanu, Honolulu.
-
O ka waiwai i paa ma ka Moraki i oleloia e manaoia nei no ka hoolilo aku, o ia noi na Mahele he Umikumamawalu iloko o ke Kumu Waiwai o ka Hui Mahiko Panailike, o Hana, Maui, i hoakaka maopopo loa ia ma ka Helu 31 o ka Buke Kuleana Mahele no Umi Mahele; Helu 55, Ekolu Mahele; Helu 48, Elima Mahele.
Mar 2-5pl.
Kakahiaka Poaha nei i ku mai ai ka Alameda mai na Panalaau Hema, a ia ahiahi iho no i holo loa aku ai no Kapalaiko Holo ka hana.
Ua loaa aku i na makai i ka hora 1 a mahope iho paha o ka wanaao Poakahi i hala, he Pake ua paa i ka hikiikiiia iloko o kanahelehele ma ke Alanui Seridana. Na kekahi mau Pake no i hana i kela hana hoomainoino maluna ona, mamuli o ka ulu ana ae o kekahi hoopaapaa ma waena o lakou.
-
Hoolaha Manao Hooko Moraki a me ke Kuai.
MAMULI O KA MANA KUAI I hoakakaia maloko o kekahi Moraki i hanaia e GEORGE W. NAWAAKOA, o Honolulu, Mokupuni o Oahu, Paeaina Hawaii, ia Isaac Testa, i kakauia ma ka la 8 o Dekemaba, M.H. 1890, i kopeia ma ke Keena Kakau Kope Aupuni ma Honolulu i oleloia, iloko o ka Buke 129, ma na aoao 97, 98 a me 99;
Ke hoikeia aku nei ma keia ua manao ka Mea Paa Moraki e hooko aku i ka Moraki i oleloia no ka uku ole ia o ke kumupaa a me ka ukupanee i ka wa e kupono ai no ka hookaa ana, a mamuli hoi o ia hooko ana e hoolilo aku no ma ke kuai kudala akea ma na Keena Kudala o W.S. Luce, kihi komohana o na Alanui Papu me Moiwahine, ma Honolulu i oleloia, ma ka
POAKAHI, LA 30 O MARAKI, M.H. 1896.
ma ka hora 12 awakea, i na apana aina a pau loa i hoikeia maloko o ia palapala a i hoakaka piha loaia hoi malalo iho.
ISSAC TESTA,
Mea Paa Moraki.
No na mea hou aku i koe, e ninau ia A. Rosa, Loio, Alanui Kaahumanu, Honolulu.
-
O na aina i paa i ka Moraki i oleloia, aia ma Kaikahi, Pauoa, ma Honolulu i oleloia, kahi i waiho ai, oia hoi:
Akahi - O kela apana aina a pau loa nona ka ili o 1 69-100 eka, i hoakakaia ma ka Palapala Sila Nui 4453, Kuleana 1555, no Kealaau, a na Kealaau i oleloia i hoolilo, i ka Mea Hana Moraki ma o kekahi Palapala Kuai i hanaia i Maraki 25, 1863 i kopeia ma ke Keena Kakau Kope Aupuni iloko o ka Buke 18, ma na aoao 288 a me 289;
Alua - O kela apana aina a pau loa nona ka ili o 36-100 eka, o ia hoi ka aina i hoakakaia ma ka Apana 1 o ka Palapala Sila Nui 2638 [Aina Aupuni] ia Mele Nahakuelua no kana mau keiki, Kalaimia, Ema a me Ioane, a na lakou hoi i hoolilo aku i ka Mea Hana Moraki ma o kekahi Palapala Kuai i hanaia Aperila 20, 1885, i kopeia ma ke Keena kakau Kope i oleloia iloko o ka Buke 96, ma na aoao 223 a me 224.
He mau aina kalo a me kuai keia mau apana a elua me na pono wai, kokoke i ke kahawai o Pauoa makai mai o na aina o ka Peresidena, a aia hoi kekahi mahele malalo o ka hoolimalima i kekahi Pake ma ka uku hoolimalima o Hookahi Haneri Dala o ka makahiki. mar 2-5pl
-
C.E Williams me Keiki.
Ed. A. Williams, Luna Nui
Helu 611, Alanui Moi, ma Ewa iho o ka Pa o Aigupita.
-
He mau mea kuai lako hale o na ano a pau loa.
-
He mau mea Hana Pahu Kupapau a Hooponopono Hoolewa.
-
E hoolakoia no na Kaa Kupapau, na Kaapio a me na Kaa-ohana.
Ina no e ninau ia laua, e loaa no na Pohaku Kia Hoomanao no na He Kupapau.
-
O ka Ialoa kekahi hana hiki loa ia laua, aia ia malalo oka lawelawe ponoi ana a Ed. A Williams, F.D., he mea i puka pono mai ka Kalaka Kula o ka Ialoa Maikai ana iloko o Mei, 1894.
-NA TELEPONA-
Keena, Helu 179 - Kauhale a me Kahea Po,
Helu 815.
nov 2-mp. feb 3-mp.