Ka Makaainana, Volume V, Number 5, 3 Pepeluali 1896 — Page 8

8 HONOLULU, OAHU, POAKAHI, FEBERUARI 3, 1895.

[Hoomauia mai ka aoao 5.]
-

wahi maa mau i ke kuai i na mea-ai lau uliuli. A mamuli pana hoi o kekahi mau hooponoponoia ana mahope iho nei, ua pau ae la ko lakou ano e, ai ka Poaono nei i ike hou ia ai na mea ai lau uliuli. Aka, i na la aku hoi mamua, he ole ka loaa, a ole loa no hoi ke hele aku i kahua, o ia like ana no ka nele a me ka hoka mai ia lakou la.

-

                    Aohe olelo ana i koe no na poe kalewa mauu, ua loaa ko lakou kahua hou, a mamuli hoi o ka ae oluolu ana o E.B. Tomasi, eia lakou ke kalewa nei ma Ewa iho o ke keena o ko makou Puuku. Aka, no na Pake hoi, aohe o lakou kahua alanui, ua kue loa ke Aupuni, nolaila, aia no iloko o na hale e kuai ai, a i ole ia, lawe ae i pakaukau makai o ka Makeke Aupuni. Maalea no ke Aupuni, o kahi hana ana paha hoi ia e pau ai o na pakaukau pii o kumukuai i ka laweia.

-

                    A no ka makeke hou hoi e makemakeia nei ma ka Huina-a-Kale, aohe i loheia mai, eia nae, he mea pono ole ia kakou ke hoopoina iho ia mea, oiai, o ke kahua hou e makemakeia nei, o ka oi maoli aku no ia mamua ae o kela wahi kakakii i kai loa, he mau lepo okoa no ia e iho ai a ke huli hoi, ua luhi maoli no. O ko makou ake loa e ku io ae keia makeke hou. Ina e ku, pau ka luhi o ke kakakii ana "i hikauhi a i hikalalau."

-

                    E mea ia mai paha hoi auanei mahope poino ko ke Aupuni makeke. Heaha ka hewa. Owai no ka i makemake ia makeke, o Kakina wale no, ka mea e noho Kuhina Kalaiaina ana i ka wa i hoomakaia ai o ke kukulu ana, a e ole no nae hoi ia, loaa ia kia hoomanao ona mawaho ae o ke alanui pali iluna o Puuowaina. Ma na kulanakauhale o na aina e i oi aku ka nunui ia Honolulu nei, ua elua, ekolu a oi aku paha makeke. Mamuli o ia lehulehu e pono ai ka lehulehu. Pela no hoi i keia a makou e paakiki nei.

-

                    Lapuwale ke Aupuni e hana hou nei ia Alanui Liliha. Waeleia ae la la o ka manu ma kae alanui, a o ka lepo hoi, ua kiolaia aku e hookiekie ae i ke ahua iwaena. He maikai no paha hoi ka hana i manaoia, i mea e holo ai o ka wai ma na auwai aoao; eia nae hoi ka hewa, i ka ua e noke nui, aohe ukele aku a koe mai.

-

                    Ke hoeueu nei ka ohua palemo alaula, ka Pi Ki Adavataisa, i ka ino hookamakama o na wahine Kepani, a ke koi nei e hookaawaleia i kahua ku kaokoa no ia poe lawelawe ma ia ano oihana, a i ole ia, e kipaku nui ia e hoi i ko lakou wahi i hele mai ai. Aole i na wahine Kepani wale keia hailuku ana, aka, ua pau pu no a me na wahine Hawaii, a hookoe nae hoi i na wahine haole. O ka oi loa aku nae hoi o ko lakou kue, no na wahine Kepani. A no keaha la hoi i hookoeia ai na wahine haole? Ua pau no a pau loa ma ia ano hana hookahi.

-

                    O na poe mikanele ke kue loa i ka manao e hookaawaleia i ka hua hookamakama kaokoa. Ma ia manao, o makou kahi e kokua aku. Ke hoomanao nei makou he kahawai ka J.H Waipuilani i waiho ae ai i ke kau Ahaolelo o 1890 e pili ana no o ia mea, aka, ua make aku ia ma muli o ke kue oolea loa ia e na mikanele. O ke kumu ka o ke kueia ana, aohe makemake e ikeia he hale ko ke Aupuni o ia ano, a ua lawa no hoi i ke kanawai kinai i na hana hookama kama Eia nae, i keia au hemolele, ke makemakeia nei e hoala ae ia ano kahua.

-

                    Ma ka aoao makee i ka lahui Hawaii opio, he mea pono loa ia. Ke ku ia ano kahua, alaila, maopopo no hoi ia ano poe holoholona e pakaukau hele ana i na pauku kino. O ka mea e makemake ana ia ano poe, o lakou no ke hele pololei aku a ia wahi, aole paha hoi o ka haukake ae iwaena o ka lehulehu e noho pono ana.

-

                    Lilo hou no ia Bile C ka eo o ka heihei o ka auwina la Poaono nei ma Kapiolani Paka.
                    Ua lilo aku i ke kuai kudala ia kela wahi apana aina Aupuni e waiho la ma ka aoao komohana o alanui Keeaumoku ia Misasa Mine H. Gilmau, no $360. He 88-100 eka ka nui.
                    Maloko o ka luakini o Kawaiahao i ke ahiahi Poaono nei, i hoohuiia ae ai ma ka mare e ka Rev. H.H. Paleka, o W.T. Ord way ia Misi Alice Lewis, he kaikuahine no kela Oliwa Aluli i ki pu iho nei iaia iho. Pau ka mare ana, ua hoi ee laua a kahi noho o ke kane mauka o Kapalama, a ilaila kahi i malamaia ai o kekahi papaaina mare.
                    He pomaikai nui ka ka Hui Alahao Oahu e haawi nei i na poe a pau e makemake ana e holo hooluolu a hoohala mana wa ilalo o Ewa me Waianae. Penei ka hoouku ana: Papa Ekahi, Manana, .75; Honouliuli , $1 00; Waianae, $1.50. No ka papa elua iho hoi, he hapaha ka emi iho mai na hoouku ana no na wahi maluna ae. Ola la!
                    Ma ke Kinau o ka Poalua iho la i kau mai ai o R. Wile Aileti mai Hilo mai a holo mai no Honolulu nei. Ua haalele aku oia ia Kapalakiko maluna o ka mokupea Aunie Johnson ma ka la 1 o Ianuari, a ku i Hilo i ka la 24, a kau mai la no ma ke Kinau no Houolulu nei. Ua oi hou ae kona nui momona i keia wa. Ua kipa mai oia i o makou nei e hoike ai i ka moolelo pololei o ke kuee ana o na keiki puhiohe.

KELA A ME KEIA.
-

                    E ninau mau no ka Makapolena Ma mau ano Waina, a e loaa no ia oe ka mea maikai loa.
                    I nehinei i huli hoi mai ai ka hana Aupuni mai Maui mai.
                    Ua hiki aku i ka $1,181.60 na lilo o ke kau kiure mai nei o Hilo.
                    Ke kanuia nei na mea kanu a puni ke kahua o ka makeke hou i keia wa.
                    O ka Poakolu, la 12 o keia mahina, o ia ka La Konohi o na Pake.
                    Ke kauohaia aku nei na luna a pau he mau koena pepa ka lakou o ka Helu 1 e hoihoi koke mai.
                    O ka la apopo ka la e ku mai ai ke Kopatika mai Kapalakiko mai, a holo loa aku no Kina me Iapana.
                    Ua hoolaunaia aku ke kapena a me na alii o ka mokukaua Bosetona imua o na Kuhina i ka Poalima nei.
                    I keia kakahiaka e wehe ai ke kau hookolokolo o ka Aha kaapuni ma ke kiure imua o Lunakanawai Kaaka.
                    Ua lilo i ka hoolimalimaia ia W.W. Daimana kela apana aina Aupuni ma alanui Kalepa ma o iho o Honolulu Hale.
                    Poaha iho la i haawi ae ai o Misasa Kini Maila, he paina hoomanao no ka piha makahiki ana o kekahi o kana mau kaikamahine, Finela Kahoihoilani.
                    Ma ka Mikahala o ke ahiahi Poaha nei i kau aku ai ka hui keaka lio a holo no Kauai. I Lihue lakou e wehe mua ai, a mai laila aku no Waimea i ka wai ula iliahi.
                    Ma ke kauoha a ka Aha Kiekie, ua kuai kudala ia i ka Poalima iho la na aina o Petero Kakoi i make, e Komisina Hanale Kamika, ma ke alo o Aliiolani Hale. A ua hiki ka nui o na loaa i ka $10,190.
                    O ia mau no ka enaena o ka wahine o Kilauea. A ke pii mau ia la e makaikai e ko Hawaii poe. I ka holo ana aku la o ke Kinau i ka Poalima iho la, ua lawe aku oia i kekahi heluna nui o na poe makaikai i ka Lua-o-Pele.
                    Ua hookauluaia ka hoopai maluna o Kalaluhi, ka mea i hopuia no ka loaa ana aku he mau pepa ki-pa ma kona poli i ka Poaha nei. O keia ke kanaka i hoolilo i ka Baibala i hoa hele pu nona, aia nae iloko o ka baibala he mau pepa ki-pa he lehulehu wale.
                    Ua wawa wale ia ae ua pae aku ma kekahi wahi o Ewa he 476 paona opiuma. A ke hakilo oa ia nei kahi moku kiakahi Ehukai i keia mau la, no ka mea, ua manao wale ia nana i hoopae malu ae ua kupuino la ilaila he mau po aenei i hala me ka ike ole o na owau o ka Hale Dute.
                    Ma ko Kinau o ka Poalima nei i kau aku ai o Keoki Ferene, i huli hoi aku nei i ka aina, ia Kohala, e hoike kino aku ai i ke kaikuaana no ka poino ana iho nei o ke keiki i ke alahao, a makou no hoi i hoike aku ai ma ka helu i hala. O keia Keoki no ka mea nana ka uwe naauaua kuwo mahope koke iho o kela ulia i poino ai kela keiki a kona kaikuaana, i ka nana aku no hoi a kahi poe iaia a uwe okoa, hiki ole ke uumi iho i ka waimaka hoonaoa puuwai.
                    I ka Poaono nei i huli hoi aku ai ka Auseteralia no ke awa ana i holo mai ai.
                    Iluna o ka mokukaua Bosetona i ka Poaono nei o Kuhina Wilisi a me Kanikela Mila, a ua haawiia mai na ki pu aloha ana ia laua i ka holo ana aku me ka hoi ana mai
                    Ua hoea mai ma ka Auseteralia kekahi haole akamai i ke pena kii no ka hele ana e kaha a pena i ke kii o ka Lua-o-Pele o Kilauea, mamuli o ke kauoha a ke keiki a ka ona miliona Sepekela
                    I ka Poalima nei i make ai ke kaikamahine o 6 makahiki a G. W. Kaaona, ma Puuhale, Kalihikai. I nehinei i maneleia ai a nalo no makai o laila. O Lucy Kaaona ka inoa. Aloha wale ia pua i ako koke ia!
                    Uuku loa ua Buke Mele Lanui i koe. E hoouna mai i ka hapaha ma na poo-leta, alaila, e loaa aku ho he buke. He makehewa ka palapala mai e ninau ana ina paha he buke koe, aka, hoouna mai i ka hapaha. Ke nele i ka buke ole, hoihoi hou ia aku no ke dala.
                    Pau aenei hoi ka wela o ka laka puehu o ka lepo, a me ka pa mai o ka makani makai, ua hoi hou mai ka makani kamaaina me ke ano pukiki, helelei na kulu pakaua a ukele hoi na alanui. E ole nae hoi nei, paleia ae kahi mau po aaki o ke anu i noke iho nei. Malia o hoi hou mai no hoi ke puanuanu. O ke koekoe hoi ko keia wa.
                    Ua hele aku i ka Halewai, i ka auwina la Poalua iho la, kekahi kanaka e hoopii ai no ka nalowale ana o kana moopuna a me na hanaino a ka makuakane ponoi o ua kaikamahine la. Ua hopu koke ia o Pahio, ka makuakane o ua kaikamahine la, a o ke kaikamahine hoi, ua loaa aku no iloko o ka hale kahi i hunaia ai. He 13 wale no makahiki o keia kaikamahine, a ua hoao pinepine paha keia makua e hooko i kona makemake, aole nae he ae iki o keia kaikamahine a hiki wale no i kona hoehaia ana. Na Kauka Emekona i lapaau iaia i ka hiki ana i ka Halewai. Ua hookolokoloia o Pahio i ka Poaono nei, a ua waihoia aku la e ka Aha Apana imua o ka Aha Kaapuni.

-
C.E Williams me Keiki.
Ed. A. Williams, Luna Nui
Helu 611, Alanui Moi, ma Ewa iho o ka Pa o Aigupita.
-
  He mau mea kuai lako hale o na ano a pau loa.
-

                    He mau mea Hana Pahu Kupapau a Hooponopono Hoolewa.

-

                    E hoolakoia no na Kaa Kupapau, na Kaapio a me na Kaa-ohana.
                    Ina no e ninau ia laua, e loaa no na Pohaku Kia Hoomanao no na He Kupapau.

-

                    O ka Ialoa kekahi hana hiki loa ia laua, aia ia malalo oka lawelawe ponoi ana a Ed. A Williams, F.D., he mea i puka pono mai ka Kalaka Kula o ka Ialoa Maikai ana iloko o Mei, 1894.

-NA TELEPONA-

Keena, Helu 179 - Kauhale a me Kahea Po,

Helu 815.

nov 2-mp. feb 3-mp.