Ka Makaainana, Volume V, Number 5, 3 Pepeluali 1896 — Page 3
HONOLULU, OAHU, POAKAHI, FEBERUARI 3, 1896.
HOOMANA KATOLIKA
-
He Kuhikuhi no ke Ao ana i na
Hoahanau o ka Ekalesia
Anagalikana.
-
APANA ELUA - MAHELE V.
NA OIHANA ANAGALIKANA.
[Hoomauia mai ka Helu 4, Buke V.]
-v.-
Ma ka huli hoomaopopo ana i hope i na kumu hoahewa i laweia mai e Roma e kue ana i na Oihana Anagalikana, ua maopopo loa ua hooholo e ia no ka hihia mamua mai mua loa mai no. E like hoi me ka emoole o ka hooiaia ana o ka wahahee a haaleleia hoi kahi kumu hoahewa hookahi, ua ukaliia aku no ia e kekahi kumu hoahewa hou; - ua hiki ole nae hoi i kahi ke pale ae i ka hooholo ana, o ke kahua alakai hana a na poe kokua o Roma, o ia no, "E hoole loa ia na Oihana Anagalikana ma kahi ano a kumu e ae paha, me ka hoomaopopo ole ae hoi i na kumu oiaio o ka hana."
E hooki no kakou i keia mahele ma ka lawe ana mai i na olelo koikoi i hoopukaia e kekahi o na loea huli Akua a kakau moolelo Katolika kaulana o keia keneturia. Ma ka ahaku kakuka Hoohui-hou i malamaia ma Bona (Bonn) iloko o 1874, ua olelo ae o Kauka Doliniga (Dr. Dollinger), iaia hoi i kamailio ai no na Oihana Anagalikana, - "Aia ke kalele kaokoa ana no ka maopopo o ka ninau ma kekahi nana ana i na olelo hoike pili moolelo, a e haawi ae hoi au i ka hailoaa o ka'u mau noii ana, aole loa he ano o ka hoohuoi loko iho o'u e pili ana i ka pono o ke kuuna epikopo iloko o ka Ekalesia Enelani.
"Ua kue mua ia mai ka puniia ana o na bihopa Enelani mahope iho o ka Hoohuli Hoomaemae ana e kekahi moolelo i poha ae a lilo i mea ole i nei wa (ke kaao o ke Poo Lio), alaila, e na kue lehulehu mai, ua ku hoi kahi mamuli o na manao wale i nele haalele loa i ke kahua ole, oiai hoi, o kekahi ae, ua ano like aku no ka pili, a i ole no hoi ia, ua oi loa aku no, ina paha he hilinai ano nui ana hoi kahi e hoopiliia aku ana ia lakou, i ka poniia ana o na bihopa a me na kahuna Katolika Roma. Ma keia mea, aia ka aui ana maluna o ka ninau ina paha o Akibihopa Paka a me kona mea hoolaa Bihopa Balo, ua hoolaa pono ia laua. Ua hoohuoi mua ia ka hoolaaia ana o ka inoa hope he kanawalu makahiki mahope mai, iloko o 1616; eia nae, ua hooiaio piha loa ia e like la me kekahi kumu hoike pili moolelo oiaio i hiki ole loa ke hoikeia ae kekahi hoopaa pili oihana ana.
"Ua hoike hooia ia ae ko Paka hoolaaia ana, aole wale no e na poe a pau e ola like ana me ia, aka, e na palapala i oiaio loa, i hiki ole loa ai hoi ia Linigada ke hoomamalu iho i kekahi hoohuoi ana maluna o lakou. He mau mea nae hoi kahi i ulu ae iloko o ka Ekalesia Komohana mamua aku o ka Hoohuli Hoomaemae ana e hoeu ae ai i na hoohuoi oi loa aku o ke koikoi e pili ana i ke kuuna haki ole a me ka pono hoi o kekahi mau poni lehulehu ana mamua ae o kekahi mea i haiia aenei e kue ana i na Oihana Enelani."
-
(Ma keia wahi, ke hoike aku nei ka mea unuhi ua waihoia aku e ia na Mahele VI. a me VII., no ka mea, ua manao oia aohe waiwai nui loa o ka unuhi ana aku, oiai, he mau mahele ano kuauhau ia, a ua kupono ole hoi no ka hoopuka ana aku ma ka nupepa Aia wale no ka pono o ia mau mahele a hoopukaia ma kekahi buke ma nei mua aku, ke manaoia hoi pela e hanaia aku ai)
(Aole i pau.)
-
Ohonia loa ia ka Buke Mele Lahui Na ka hiki mua no ke eo, a na ka hiki hope hoi ka nele a me ka hoka.
Ua pau aku i ke kuai kudala ia na pono a pau o luna o kahi moku hoopahaohao nui wale i na luna o ka hale dute, ka Henerieta.
O Kepano, ka mea nana i lawe kolohe aku he $3.50 mai kekahi o kona hoa'loha mamua aku nei, ua hoopaiia he 6 mahina e noho ai i Kawa, i ka Poakolu iho la.
He Kepani opulepule ka i hoounaia aku i ka Halemai Pupule i ka Poalua iho la, mamuli o ka haawi ana a kana wahine, no ka hanaino mau i na mea liilii o loko o ka hale.
Ke haawi aku nei o Makapolena Ma i na Waina Kaleponi ma na kumukuai haahaa. Ua maemae loa hoi ka lakou mau ano waina a aole hoi i paipaiia e like me na ano waina lehulehu e ae e kuaiia nei ma keia makeke.
I ka po Poakahi i hala, ua ulu ae la he hakaka mawaena o na luina o ke kalepa Seringa, he Pelekane me na lanui e. Ua kaena aku kahi Pelekane i kona ikaika, a ia manawa no i lele aku ai e kui i kekahi haole okoa, o kona wa no ia i houia mai ai i ka pahi a moku ka lima. Kahea ae la oia i poe kokua, a ia manawa i holo mai ai kekahi poe luina no luna o kekahi moku okoa aku a uwao ae la ia lakou Moi poino kahi Pelekane.
Ma ka la 19 o Ianuari iho la i haalele aku ai ka Bosetona ia Kapalakiko a holo no Iapana a me Kina. I ka Poaha nei i ku mai ai oia i Kou nei no ka uhao lanahu ana, a mai nei aku e hoomau mau ai i kona alahele moana e hoea aku ai i na kai o Iapana Ua haawi mai oia i na ki pu aloha ana no ka hae Hawaii. Aohe poe o luna ona i keia wa ianei mamua, i kokua ai i na hana kipi ma kela la poina ole o Ianuari 17, 1893.
O na Waina oiaio maoli a Makapolena Ma, aia wale no ke kuai ana ma ko lakou halekuai ma Alanui Kaahumanu, a ma na hale inu rama o Kaopuaua a me ka Nekina.
Ke pii mai nei ka waiwai nui o ke kope o kakou nei ma na aina e. A eia hoi ko kakou poe kanu kope ke hooikaika nei e loaa ia lakou ka holomua ma na ano a pau
Ua hala aku no Kilauea, Kauai, ka Bihopa o Honolulu ma ke Kimo Maki o ka Poalima iho la. I ka la apopo no oia e hoi mai ai. He anaina pule kana i malama ai i nehinei malaila, o ia ke kumu o keia huakai ana.
Ma kela huakai mua a ka Auseteralia i hoi ai no Kapalakiko mai nei aku, ua halawai iho la oia me kekahi ino nui i ike ole ia mai mua mai. Ua pa mai kekahi makani me ka ikaika a hoomakamaka ale e popoi me ke ana ole iluna o ka moku a hiki i ka lilo ana o kekahi mau waapa elua i ke kai. Ua like me kekahi apana pepa ka Ausetaralia i ke kiola hele ia e na ale a hiki i ka ikeia ana o na kapakai o Kaleponi. Aohe mau poino i loaa, koe wale no ka lilo ana aku o kekahi mau waapa ona i ke kai.
-
HOOLAHA.
Ma keia a mahope aku o keia la ke kauohaia aku nei na poe a pau e paa ana i ko'u mau Aina iloko o keia Aupuni ma ka hoolimalima e uku koke mai i ko lakou auhau hoolimalima, ina ua hiki i ka manawa e hookaa ai, ia Prince David Kawananakoa, ma Honuakaha, Honolulu, Oahu.
KAPIOLANI.
Honolulu, Ianuari 23, 1896.
ian 27-3ml
-
Opu Bipi! Opu Bipi!!
Aole ko'u pakaukau kuai opu bipi makai o ka Makeke Hou, aka, aia no ia i nei wa ma Alanui Maunakea, makai aku o ka Huina-a-Kale, ma kekahi keena ma ka aoao ma Ewa e kokoke ana i ke Alanui Moiwahine, i ke kikee ana maluna ae e huli aku ai i Ulakoheo.
G.W. KUALAKU.
ian 20-4pl.
-
Hale Inu Rama o Kaopuaua
(COMMERCIAL SALOON)
Kihi Hikina o na Alanui Beritania me Nuuanu.
WAINA KALEPONI EMI LOA,
Kanakolu Keneta no ka Omole, a
Hookahi Dala no ke Galani,
aia malaila e loaa ai, a o ia no hoi ke ano Waina maikai loa a Van Bergen & Kohler, he hale i kamaainaia no ka maikai o ka lakou Waina, a o Makapoena Ma na agena. Ina o ka mea maikai ka i makemakeia, e pono e hele ilaila, i loaa ai hoi ka mea maikai.
dek 23-mhp.
-
NO WAIANAE
O R. & L. CO.
MA NA POAONO A ME NA LA PULE.
E haalele no na Kaamahu ia Honolulu nei ma na hora 9:15 A.M. a me 1:45 P.M o na Poaono. Ke huli hoi mai, e hoea ana i Honolulu nei ma na hora 3:11 a me 5:26 P.M.
Ma na La Pule, e haalele ana ke Kaamahu ma ka hora 9:15 A.M. E hoea hou mai ana i ka hora 5:26 P.M.
NA PALAPALA UKU PUNI:
Papa Ekahi, - - - - - - - $1 75
Papa Elua, - - - - - - - - - 1 25
F.C. SMITH,
Agena Ohua a Palapala Nui.
ok 21-tf
Na Waina Kaleponi
HOEMIIA KUMUKUAI
-MA KAHI O-
MAKAPOLENA MA,
Alanui Kaahumanu.
-
Ke hoolilo aku nei makou i na WAINA MADEIRA, POTA, ANAGELICA a me TOKE, ma na
Kumukuai Emi Loa,
A no ka Maemae a me ka Mikomiko, o keia ae la na Waina maikai loa i haawiia ma keia mau Paemoku.
Ano no hoi o Mr. E.C. Makapolena i huli hoi mai nei mai Kaleponi a ua loaa aku nei hoi na launa a me na kukai ana me ka Halekuai Waina i ike lea ia o KOHLER & VAN BERGEN, no laua hoi na inoa i ikeia a puni o Amerika Huipuia no ka laua mau
Waina Maemae Maoli No.
Eia wale no ke kuai ana o keia mau waina ma keia Paeaina ma ko makou halekuai ma Alanui Kaahumanu, a ma ka HALE INU WAIONA O KAOPUAUA, kihi hikina o na Alanui Beritania me Nuuanu, a ma ka NEKINA, kihi hema o na Alanui Hotele me Nuuanu.
E HOOMANAO O NA
WAINA MAEMAE WALE NO
Ka makou e kuai nei a me ka haawi aku i ke ana piha.
Macfarlane & Co.,
Alanui Kaahumanu, makai iho o ko Bihopa ma Banako.
dek 9-mp
-
Mau Lio Nalowale a Hele
Auwana Paha.
Elua mau Lio i nalowale a ua hele auwana wale aku no paha mai ko'u kula aku, Hookahi Lio Lokia kane, ua kuniia m ka a-i, lae keokeo; Hookahi Lio Eleele wahine, ua kuniia ma ka uha hema hope, he kiko keokeo ma ka lae. O ka mea e loaa ai a hoihoi ae ma ko'u wahi, e loaa no he uku makana kupono, a ina hoi ma Honolulu, e lawe ae ia Mr. Ho Fona, o ka Hale Nupepa Pake, Helu 341, Alanui Moi.
WONG YOU.
Waiahole, Koolau, Ianuari 13, 1896.
ian 20-4pl.
-
KU KIMA
Helu 411, Alanui Nuuanu. Helu 59 maluna.
Oiai, ua pau ka wa kuai hoemi ma ko'u halekuai, eia nae, e hoomauia aku ana no ke kuai emi ana o na waiwai iloko o keia mau la e nee nei a pau ae na la kulaia.
O na Kalakoa, na Lole Huluhulu, na Kinamu, na Keokeo Halua, na Lole Alapia, a pela aku.
Pela no hoi me na aahu o Kane me Keiki.
Heluna nui o na Kamaa no na poe a pau.
ok 14-2mh dek 9
Kuai Hoemi
Aia ma ko'u Halekuai ma Alanui Moiwahine he Pakaukau Kaokoa, a aia malaila he mau Waiwai i hookaawaleia, aole i inoino a popopo, aka, me ia mau no o ka maikai. O ia mau waiwai a pau, e kuai hoemi ia aku ana me ka emi, he haule loa malalo iho o ke kumulilo o kinohi.
Mai hoopoina, aka, e hele nui mai no e ike no oukou iho.
J.T. WATERHOUSE
(KEONI WALAKAHAUKI),
Alanui Moiwahine.
ian 27-4mnw