Ka Makaainana, Volume V, Number 5, 3 February 1896 — Page 1
Ka Makaainana.
BUKE V - Ano Hou. Honolulu, Oahu, Feberuari 3, 1896. HELU 5
"O KAKELA AU!"
-
Kauohuluhuluia mai Wasinetona aka Halawai.
I ka po Poaha iho la, i ka wa a ka mahina e pii malie ae ana a hohola iho i kona malamalama maluna o ke kulanakauhale o Honolulu nei, a ahuwale pono ae na poe e hoao ana e hehihehi kulana iho ia Hawaii nei, aia hoi, loheia aku la ka leo o ka makai kaulio Horace Lui (Lewis) e kahea ana me ka leo nui, oiai kona lio e kuupau ana i ka holo e loaa aku kana mea i makemake ai, - "E ku iho, e kela kaa!" Ia manawa i loheia aku ai kekahi leo i ka pa e ana mai maloko o ua kaa la me keia mau olelo o ka nape malie, - "Owau, o Kakela!"
"E ku iho!" wahi a ka makai hooko kauoha malalo o ka hanohano o kana oihana i pane aku ai. Ia manawa i ninau aku ai ka makai, - "Auhea kou kukui?" Ua pane kalakala mai la nae hoi o mania "kaupoku o Hanalei" ia Kakela, - "Aohe kukui." Nolaila, komo iho la ka manao iloko o ka makai e hooko aku oia i kana hana, a o ia koko no hoi ka manawa i hawiia aku ai ke kauoha iaia e hoohuli ae i ke noo o kona lio a holo pololei no ka Halewai. Ma kahi hoi o ka hoohuli awiwi ae a holo no ka Halewai, he kiei mai mawaho o ke kaa ma ia wahi a pane mai la me ka leo piha haakei, "Owau, o Kakela!" aole nae i hooloheia aku ia mau olelo. Ua panai koke ia aku kana mau olelo e ka makai me keia mau olelo oolea, - "Aole au i ike i kau mea e kamailio mai nei, ina no o oe o Peresidena Kole, he mea ole loa ia ia'u."
Huli koke ae la ke kaa a kamoe pololei aku la no ka Halewai, kahi a Kakela, ke Kuhina Noho i pau o Hawaii nei ma Wasinetona, i hoolele aku ai he ekolu dala i wahi nona e hoaumoe ole ai maloko o na paia koou o ua kakela la.
E hoomanaoia, o ko ua Kuhina hoopau koalaala la hewa i hopuia ai, no ka holo ana maluna o kona kaa me ke kukui ole Hu ka aka!
-
Haule ka Hae Hawaii.
Mahope iho o ke ki pu ana o ka Bosetona i ka hae Hawaii i ka Poaha iho la, ua haawiia aku la ke kauoha ia Kapena Kamara e Konela Makalena e holo iluna o ka manuwa e panai i ke aloha pumehana. Ia manawa i lino hau mai ai ua kapena ia iaia iho me kona kahiko piha o ka oihana koa, a o kana pahikaua e lewalewa ana ia ma kona aoao.
Iho aku la ia a kau ma ka waapa hueloboti o na makai, a hoeia aku la no ka manuwa. O ka hae Hawaii hoi, e pulelo ana ia mahope o kona waapa. I ke kaalo ana o ka waapa ma ka ihu o kekahi moku kalepa, hihia ae la ua hae Hawaii la a haule iloko o ke kai, a e ole kekahi waapa i holo aku mahope loaa hou ka hae a pulelo hou ae la mahope o ka waapa o ka elele o na pualikoa o ka Repubalika.
O kahi mea ake loa, o ia no ka hele ana a puluelo na pilali o ua kapena la i ka hiki ana i kai, ma o ke kiiepalepa mau ana o kela hae pulu kai maluna ona. Pau ka hinuhinu o kona pilali, mimino ae la hoi ka aikala ku. Pau ka hie o kona kulana kapena.
-
Paa Mare i Hoohuiia.
Poaha, Ianuari 23, ua hoohuiia ae la o Newton Kameekua me Misi Maria G. Kekipi ma ka materemonio maemae o ka mare ma Kamalo, Molokai, e Abela Kukamana ko makou Lunakanawai Apana. Pau ka mare, ua konoia na mea a pau e naue ae ma ka lanai i hoomakaukauia ai o na mea-ai. Malaila ae ka Luna Auhau J.H. Mahoe, Pilipo Pali, A. Kukamana, a me ko makou bolo hede. Ma kahi o na makua o ke kane i hoomakaukauia ai ka paina. Maluhia ka papaaina, a ke haawi aku nei au i ko'u mahalo i na paa mare a me ke kaikamahine uwehe uha o Kalaiakamanu, a me ke kaikamahine kuai ka-anai iho no hoi o Kamalo. S.K. WILIAMA
-
I ka Poakahi i hala i hoomanao ai na poe Geremania a pau maanei i ka la hanau o ko lakou Emeperoa me ka maluhia. Ua hoowehiwehi ae na moku o loko nei o ke awa i ko lakou mau kia me na hae like ole, a pela no me na pahuhae o na luna Aupuni o na aina e maanei. He ki pu ko ka manuwa i ke awakea.
Pakele o A.T. Atekinesona, Kahukula Nui i pau, mai pau ke aho, i hookuiia kona kaa hehiwawae e ke kaa lio o kekahi wahine haole i kakahiaka Poakolu iho la ma Alanui Kalepa, mawaho iho o ko Paulo Numana keena loio. Ua palahuli kona alo iluna a holo loa no ke kaa o kela wahine haole, aohe i ku iho e nana pono. Na kekahi poe oia i hele ae e kokua. He ouli keia no kona poino loa aku paha.
NAI NO IMUA.
-
Hoike mai Kekahi Lala o ka
Puali Puhiohe Lahui.
Mamuli o ka ae oluolu ia mai e ka ohana o ka mea nana ka palapala malalo iho, ua hauoli makou i ka hoopuka aku i kahi hoike pokole no ka lakou huakai e hele la no mua. Ua kakauia ka palapala malalo iho ma Youngstown, Ohio, i Ianuari 14 aku nei. Eia iho ua hoike la:
"Eia no makou ke kaahele nei me ke ola kino maikai, aohe pilikia e like aku nei paha me ka oukou ike ma na nupepa Ua hiki aku nei paha o Wile i Honolulu, a o Kimo Aileti, Mekia me J. Wilisona, aia nui no i Kikako, aohe wahi e noho ai, ua nui ko lakou pilikia. O Kimo ka i kauohaia aku nei e hoi hou mai me makou, no ka mea, aole ana mau hanaino ia makou.
"I keia manawa aole o makou pilikia, he mau kaa hou ko makou i haawi wale ia mai e ka Hui Kaamahu, o ka huki wale no ka ke kaamahu a malaila no hoi ko makou lilo.
"E holo ana makou i Peniselevania ma ka la 16 o keia mahina no.
"Ua haalele iho nei makou ia H.B. Thearle, no kona huli mahope o Wile ma.
"Eia no ke helelei nei ka hau maluna o ka aina. He kaona maikai no o Youngstown nei, aole no nae he nui. Ua nui ae o Honolulu ia nei."
-
Malama Opiuma ka Hewa.
I ka po Poakahi i hala, ua hopuia iho la o Bonani, kekahi mea e noho nei ma na hale hoolimalima o Kapamoo, no ka loaa ana aku maloko o kona hale he 63 mau tini opiuma. Ua huliia kona poli i ka Halewai a ua loaa aku he $55 ma kekahi pakeke o kona lolewawae. Ua hoole ae ka mea i hopuia aole oiai ike i kela opiuma, a aole i maopopo iaia ka mea nana i waiho malaila. Imua o ka Aha Apana i ka Poaha nei ua hoopaiia oia e noho ma Kawa no 6 mahina a me $200 me na koina. Ua hoohalahala aku ka mea hoopiiia imua o ka Aha Kaapuni. He mau wahine ka na mea na laua kela opiuma, pela ka oleloia, maluna mai o ka Ausetaralia. Ua hopuia ua mau wahine la a hoopaaia ma ka Halewai, o i ka hookolokoloia ana imua o ka Aha Apana i ka Poalima nei, ua hoopaiia ua mau wahine la he hookahi mahina hoopaahao me $700 hoopai pakahi me na koina. Ua hoohalahala loa aku laua i ka Aha Kaapuni. He mau wahine Mekiko laua, a ua oleloia iloko o na lolewawae o laua kahi o na kini opiuma i hunaia ai a pae ai iuka nei, no ka mea, ua loaa aku ua mau lolewawae la iloko o kela keena. Ua hana ekeeke ia na lolewawae a puni, a ua kupono hoi kela a me keia kowa no ke kini. He wahi keiki Pukiki kahi umiumi ko laua hoa o ka lele pu ana mai iuka nei, nona ka inoa o J. Fernandes, a aia kona keena hana ma alanui Hotele Maemae no ke kai i ua mau kaikamahine la, ua palahuli mua no nae hoi na pahua a laua i o, e kala kahiko paha.
-
No kai o Kawa ka pauahi hoopuoho o ka wanaao o nehinei. Aole nae he nui. Ua hiki aku no na kaawai malaila me ka hoohana ole ia.
O na Pake he umi i pau nui ai i ka hopuhopuia no ka lawaia ana iloko nei o ke awa i ka Poakolu iho la, ua pau nui i ka hookuuia o ka Lunakanawai Apana i ka Poaha nei ma ke noi a ka Loio Kuhina.
Eia ka manao o ka Papa Kahu Waiwai o Kaumakapili e moraki aku i ka luakini no $7,000, pela ko makou lohe mai. He lilo aku koe o ia hale i wahi hoahu aila-mahu.
He lono ka i loheia ae, ua hoopae malu ia aku i Waialua mai luna aku o kekehi mokukuna i ka Poalima nei he heluna nui o na tini opiuma. Ua hoounala aku he mau makai me na palapala huli i ka Poaono nei ilalo, no ka noii ana aku i kahi i hoohuoi wale ia aia ilaila ka opiuma.
Mai kekahi mai o ko makou hoaloha o noho la ma Koloa, Kauai, keia mau wahi lalani ma lalo iho: "Ua hopuia iho nei ko makou Hope Luna Helu Auhau, H. Blake, no ke kapapa hewa i kuauna a Julia Doiron (Alohikea), a ua hookuuia no me ke ku ole imua o ka Aha."
Poaono, Ianuari 25 i hala, ka la hoano ia o ko Sana Paulo hoohuliia ana mai ka aoao kue a i ka aoao kokua i ka pono o Iesu Karisto. O nehinei hoi ka la hoano o ko Marie, ka Virigine i hoopomaikaiia, hoomaemaeia ana, o ia hoi ka piha ana o na la he kanaha mahope iho o kona hanau ana i ko kakou Hoola, a ma kekahi oleloia, o ia ka la o ko Iesu hoike mua ia ana iloko o ka heiau o kona Makua ma Ierusalema. Ua hoomanaoia keia mau la ma na luakini o Sana Anaru a me Malieokamalu.