Ka Makaainana, Volume V, Number 2, 13 January 1896 — Page 1
| This text was transcribed by: | Kaulana Dameg |
| This work is dedicated to: | Awaiaulu |
Ka Makaainana.
Buke V----Ano Hou Honolulu, Oahu, Ianuari 13, 1896. Helu 2
OULI O KA PO.
Aia no ma ke Ala o ka Hoihoi Aupuni Moi.
Po Poalua, Dekemaba 3, 1895, i ko'u uhane e ku ana ma ke alanui Rikeke, lohe aku la au i ka uwaia a ia mai, haiia mai la he manuwa Pelekane, a lohe aku la au i ke kani ana mai o na pukuniahi no ke aloha i ka hae Hawaii a me ka aina, @ @@ @@ mea i kiia mai @i o na pukuni ahi he iwakalua-kumamakahi ka nui. A o ua moku manuwa la me na pea no oia, aole @@@ i komo iloko nei @ ke awa, a puoho ae la a@, eia ka he moeuhane. Heaha la ke ano o ka'u moe.
J. W. KEAWEAMAHI.
Na Wehewehe.
O "Alanui Rikeke." He mea pono ke huliia ka hana a ke kino o Rikeke i mea e loea ai ka haina. Nolaila, o Rikeke oia ka maheleolelo o ke kii ana e noi i ke kuokoa o Hawaii i Enelani A ina ia o ka haina o ko Rikeke inoa "he kii ana i ke kuokoa o Hawaii," alaila, ua loaa ka manao a me ka @@@@ i ku ai ka mea nana ka moe ma luna o ke alanui Rikeke, oia keia:
O Keaweamahi, he kanaka hawaii oia e ku ana ma ke alanui o ka hoihoiia mai o Hawaii. A oiai, o Rikeke, he kanaka Amerika oia, nolaila, ua loaa ka haina; ke ku nei ke kanaka Hawaii maluna o ke alanui o Amerika e hoihoi mai ai i ko ke kanaka Hawaii Aupuni. Nolaila, ma ka hoomaopopo ana, eia o Amerika ma ke alanui o ka hoihoi Aupuni Moi, aole ma ke koho balota.
O Rikeke no hoi ka i holo no Enelani no ke kii ana i ke kuokoa o Hawaii. Nolaila, o ke alanui i imiia no ka pono o Hawaii e Rikeke, ke hooia mai nei o Enelani ma o ka hiki ana mai o ka manawa Pelekane a haawi mai la i na ki pu aloha ana he 21 i ka hae Hawaii. Ua pau ka Enelani hana no Hawaii i ka hanaia, i hakalia wale no i ka Amerika.
Eia kekahi hoike no ka hiki ana mai o ka manuwa Pelekane; He hoike ka hiki ana mai o ka manuwa Pelekane no kekahi nu hou. A me he la, o ua nu hou la, he hoihoi Aupuni a Moi paha, a i ole ia, he mau malihini elele paha no ka hana hoihoi Moi a Aupuni, i kulike ai me ka hiki malihini ana mai o ka manuwa Pelekane a me ke kupono ana o ke alanui Rikeke i ka pa o ka Moiwahine Liliuokalani. O ke kani mai o na pu he 21 no ke aloha i ka hae Hawaii, me he la, he hoike ia no ke kukala ana mai, ua ikeia ke Alii ka Moi He nuhou ia!
O Rikeke no hoi, he kahunapule paha oia a mikanele no hoi, ua make. Nolaila, ma ka hoomaopopo ana, ua make ka hana mikanele a Rikeke ma o ka loli ana ae he hana okoa kana i hele ai i Enelani, he kii i ke kuokoa o Hawaii e hoihoi mai, aole he hele aku e hoohui.
O keia ka hoopunipuni a me ka p@lai a ke
KILOKILO DIMERATA.
Ua Kuu ka Luhi.
Ma ka la 17 o Dekemaba, 1895, ua oluolu i ka Makua Mana Loa ka lawe ana aku i ka hanu ola makamae o Mareka M@im@i ma kona wahi noho ma Pauoa. Hanauia oia ma Piihau, Hilo, Haawaii, na Kekuaihe (k) a me Meeui (w). Oia ke kaikua hine ponoi o Keliiheleole a me ka Rev. D. Keaweamahi e noho mai la i Iapana. Ua hoohalaia kekahi mau la o kona ola ana ma ke kula hanai holoholona o Kauka Berodi, ma Halemano, Waialua, me kona mau hoa'loha. Ua hooha mai oia he ewalu keiki, elima i make a ekolu e ola nei. O ka nui o kona mau la ma keia ola ana he 40 makahiki. Oia kekahi o na lala ikaika o ke Kula Sabati o Pauoa. Pau ka ike ana i kona mau helehelena, ua nalo loa hoi kona ikeia ana. Aloha wale ia makua, a e hoomakua wale aku ana paha hoi ia hai.
Eia ae nei i Wailuku ka hui keaka lio mai Hilo mai. A pau paha ka lakou hoikeike ana malaila, alaila, e au loa aku ana no ka aina o Manokalanipo.
He lono ka i loaa mai no ka make ana o kekahi paahana hana alanui Kepani, oiai oia e hana an ma ke alanui o Napoopoo, ma o ke pah@ ana o ke gia@a pauda ana i aihue ai a hoohana ma kekahi wahi okoa.
I ka Poakahi, Dekemaba 30, i @@ wa a ke kaamahu o ke alahao o Wailuku e pahu ana i kekahi mau kaa ukana ma kekahi kikee o ke alahao ma Waihee, ua huli aku la ke kaamahu a haule ma waho o ke alahao. I keia manawa i lele aku ai o Kanaana, ke pa@ahi, mai loko aku o ke kaa a haule i ke awawa a make loa. O kekahi wiliki hoi ua pau na au i ka hakihaki, a o kekahi iho hoi, ua pakele oia me ka poino ole
NA PALAPALA
Aole maluna iho o makou ke koikoi o na hala a me na hewa no na manao i hoopukaia malalo o keia poo, aka aia no maluna iho o na poe na lakou i kakau mai.
Aohe Pololei.
MR. LUNAHOOPONOPONO:
Maloko o na kolamu o na Nu Hou Hawaii o ka Nupepa Kuokoa o ka la 11 nei, i ike iho ai au i kona mau manao no ka Papa Alemanaka i hoomakaukauia e a'u, a i makanaia e KA MAKAAINANA i kona poe heluhelu, "ua hahaiia ka hoonohonoho inoa o na malama ma ka helu o ka Hale Na@a, pela no me ka helu la, ma na inoa la o na po." Ke hoole aku nei au i ka pololei o ia, oiai, ua okoa loa ka papa alemanaka i hoomakaukauia e a'u mai ka papa hoonohonoho inoa o na malam ma ka helu o ka Hale Naua.
Me ka mahalo,
J. LIWAI KUKAHI
Honolulu, Ian. 13, 1896.
Kanawai Mamalahoe.
MR. LUNAHOOPONOPONO:
Ke ninau nei o Thos. P. Spencer owai la o Paumakua? Eia ka pane, oia no o D. M. Puniniauakalani, Jr. Ma kou kukulu manao ana e ka hoa'loha, ua ike au ua pololei KA MAKAAINANA i olelo ai, o ko buke i hoopuka iho nei o ia kekahi waiwai o ka Moiwahine Kanemake Kapiolani e ola nei. O ia kou haule mua. Ke olelo hou nei oe, ua like o Paumakua me ke keko, a ua like no hoi ia me oe, oiai, o ke keko ka mea i lalau i na hua kulina iloko o ka omole, a i ka loaa ana, puili ae la kona lima a hoao ae la e huki, aole nae he hemo a hiki i ka loaa pono ana o ke kolohe i ka mea nana ia. O kou haule elua ana ia. Oiai hoi, ua puliki oe ia Mamalahoa, o ia ka pololei, a ke hoole nei ia Mamalahoe. "Ao ke koa, ao ka holo," wahi a Kamehameha i pane aku ai ia Kainiki. Pehea, ua hewa anei o Kainiki ia holo ana? Haule ekolu oe. Ke i he@ mai nei oe, o ka heiau o Puukohola i Kawaihae kahi i kaluaia ai o Keouapuahuula, o ia ka puni ana o ka aina ia Kamehameha a lilo wale mai o Kanai i ka leo alii. Lalau oe, aohe pololei. Pau na Ku.
Ma kahi hea o keia Paeaina kahi i kukalaia ai ke kanawai Mamalahoe, au e olelo nei he kanawai no ka make? E pane mai. (Olekukahi.) I ka heiau anei o Puukohola i Kawaihae kahi i kukalaia ai ke kanawai Mamalahoe? E pane mai oe, (Alua ole.) Oehaa oe e ke hoa, ina oe i hoike mua mai i kinohi he inoa o Mamalahoa no kekahi pualikoa, ina ua ae aku au. Aka, aole loa pela. (Akolu ole.) Heaha no hoi kou mea i olelo ole mai ai, i ke au o Kamehameha V., Lunalilo I., Kalakaua I., ka loaa ana o ka huaolelo Mamalahoa, ina la aole a'u olelo, aohe hoi he pane ana?
Ke ninau nei au ia oe, e ka hoa'loha i keia mau ninau, a nau ia e wehewehe pololei mai:
1. Heaha ka mea o Kamehameha i holo ole ai i Maui e hakaka ai me Kahekili, no ke koa anei, a i ole, no ka makau wale paha?
2. He oiaio anei i ka leo wale no o Kamehameha ka lilo wale ana mai o Kauai?
3. O Kamehameha anei ke noho ana i Ulukou, Waikiki, a hiki mai ai o Kalanipo?
Aole oe he enemi no'u, aka, he hoa'loha oe no'u, he okoa ka peni.
D. M. PUNINIAUAKALANI, JR.
O ka heihei lio i malamaia ma Kapiolani Paka i ka auwina la Poakolu iho la mawaena o na lio Salavatoa o Makapolena a me Iuda o Sumana, ua lilo ka eo ia Salavatoa, me kona ahai pu aku i ka makana he $500.
Ua loaa aku he wahi kaikamahine Pake e auwana hele ana ma na alanui i kakahiaka nui Poalima iho la, ua laweia aku no ka Halewai I ka ninauia ana aku ua hoike ae la oia aohe ohana a aohe ona wahi e noho ai. He keu ka a ke ake loa e hele i ke kula.
☛ O na Waina oiaio maoli a Makapolena Ma, aia wale no ke kuai ana ma ko lakou halekuai ma Alanui Kaahumanu, a ma na hale inu rama o Kaopuana a me ka Nekina.
Ma ke Kinau o ke kakahiaka Poalima nei, i kau aku ai o Jno. H. Wise, kekahi o na pio kalaiaina i huikalaia mai ma ka La Makahiki Hou iho nei, no ka Ua Kanilehua. E hala ana paha iaia he mau pule ma Hilo a huli mai no Kohala, no ka ike ana i kona ohana.
Auwina la Poaha, la 2 nei, mamuli o ke konoia, ua weheia ae ka Hale Hoikeike Bihopa o na mea kahiko ma ke kahua o ke Kula Kamehameha kane no ka makaikai ana i na mea kahiko i hoihoi hou ia mai nei mai Bosetona mai. Lehulehu na poe i hele aku, a i waena o ia poe ka Moiwahine Kanemake, i ukaliia eke Kama'lii Kawananakoa.