Ka Makaainana, Volume IV, Number 26, 23 December 1895 — Page 5

HONOLULU, OAHU, POAKAHI, DEKEMABA 23, 1895. 5

Kawaiahao, ia kahua hoonaauao a na mikanele, ka i ike i ka pomaikai, a ua hiki ole loa hoi ke hooleia mai.
                Ke ola nei no oia a ua hooko hoi i kana mau hana maikai i hoala ai malalo no o kana lawelawe lunahooko ponoi ana no nona iho, aole hoi na hai aku e like la me Pauahi i make. Eia nae, aole loa he hoomanao iki ae o keia poe mikanele hoopalaimaka i kona la no kana mau hana hiwahiwa, e hoike mai ana hoi ia mau hana ana i kona aloha oiaio i kona lahui oiai no e ola ana, aole hoi mahope aku o kona make ana. Ae eia no oia ke ola nei a ke ike nei i ka hua o kana mau hana maikai, me kona hilinai kuhihewa paha hoi mahope o kona lahui oiwi nawaliwali ana i aloha nui ai a haule ai oia mai ke kiekie mai, a ke ike nei no hoi oia me ka maopopo loa i na poe kupaa mahope ona a me na poe kumakaia, hoino a hapala lepo aku iaia.
                O na mikanele no na hoike oiaio no kana mau hana maikai. Aohe hoi he olelo ana no Pauahi, ua ike mua ia hoi kana. Ke hele lakou e noi dala iaia, aole i haawi mailuilu ia mai, aka, ua haawi nui ia mai no. Eia nae, aole loa ia poe i hoomanao iaia, a i ole ia, hoomaikai aku paha hoi, he ole loa no, koe o ka hoino aku a me ka hailuku a hapala aku i ka ino no ka maikai i hanaia, haawiia a i loaa mai. He wa no la hoi e peloia ai, paiia ai, noi ku ai, makilo ai, hoino ai, hailiili ai, kuamuamu ai, a pela wale aku e helupapa ai i ano a pau a manuunuu wale a piha molowa.

"MALOO NA IWI I KA LA."

E ole o Lunakanawai Hata, i noho Lunakanawai Kaapuni ai no Hawaii ma Kohala mamua, ike maopopo loa ia ko S. E. Bihopa hoopunipuni ma kana mau olelo ponoi no. Ua nema a ua pane ae o Lunakanawai Hata i na hoike lalau a pakeekee piha hoopunipuni a ka nupepa Pi Ki Adavataisa, maloko o ka nupepa Hoku, a ua puka ae kahi mea e pili ana no ke kulike ole o ka Bihopa mau olelo no ke Aliiaimoku mamua aku a mahope mai o kona haulehia ana.

No nei pane hou pololei a ia hoa'loha oiaio o Hawaii nei, no ka like ole o kana mau olelo me ka ka Re v. Makaata a Alapaki Kauka i hoopihapiha ai, ua piena ae o Bihopa poohina ma ka ohua palemo alaula o ka Poalua iho la a olelo mai la aole paha i manaoia e hoano e ae i na olelo a kahi. Aka hoi, no ka mea e pili ana i ke Aliimoku, i pai ka oia iaia mamua me ka manao e lilo oia i mea pono a maikai, a e haalele loa hoi i na hana pegana o ke au pouli loa. Eia nae, aole kana mau olelo i haule ma kahi kupono, no ka mea, ua hoomau aku no ka ke Aliiaimoku i na hana pegana a kona kaikunane i hana a i hoolaulea ai me ka hoolakalaka ana.

Mamuli o keia pane a Bihopa i hoike okoa ae ai no i kona hoopunipuni a hookamani, ua hoouna pane hou mai la ka Lunakanawai i ka nupepa i hoopukaia ai o ko ke poohina manao, aka, ua hooleia mai e ka lunahooponopono Kahukula Nui i pau a e pau aku ana. No ia mea, ua hoouna loa ia ae ia pane i ka ohua palemo liula, a ua hoopukaia ae. Ua lawe hoohalike mai oia i kela wahine hewa i laweia aku ai imua o Iesu, a pane mai ai ka Haku, "na ka mea hala ole o oukou e pehi iaia i ka pohaku mua." No na hoopuka manao hailiili hilahila ole keia e kue ana i ke Alii, oiai, ua haule hoi oia mai kona kulana kiekie mai, e pono e waiho malie aku iaia, aia a na ka mea hala ole e pehi aku.

Aole nae hoi pela o Bihopa a me Alapaki ma i hana ai, a he keu no hoi a ka hilahila ole. A wahi no hoi a ua hoa'loha oiaio la, ina e koho oia mawaena o na hana pegana i oleloia e ka mea i hoolaa iaia iho no ke Akua a me ke kulana Karistiano o keia poe hoino nui wale, e kokua ana hoi i keia ano hana haahaa lapuwale loa, e koho no oia i ke kulana pegana o ka mua i ke kulana Karistiano (?) o ka hope. Alaa la, pa pono no ke poo o ua kolohe. Hilahila ole no paha hoi!

He moku piha Bai bala a me kekahi poe mikanele o luna ka lawehala mua loa i paa i ka hopuia e kekahi o na mokukaua o ke Aupuni. Hu no paha hoi e ka aka. Me he la ka hoi ua lilo ka opiuma e alualu hoomanoia nei iloko o na buke baibala. Makepono no na dala o ka lu wale ana. A ano iho nei hoi, mahope iho o kela ae la, ua paa he lawehala hou, i nei wa hoi, he moku piha opiuma. O kahi lea nae hoi, o na pahu opiuma no nei a ke Aupuni i piepiele aku ai i Vitoria a hooliloia e ka Hope Luna Dute no ke kumukuai emi loa, a makou no hoi i hoike aku ai mamua. Owai la o ko kakou poe hemolele ka i kuleana i ua opiuma la i nei wa? Ina paha hoi e hoikeia ae ana auwe! "maloo na iwi o Hua i ka la."

O ka la keia i hoolahaia no ka hoolilo ana aku i na lako pa a me dala o na Moi Hawaii mai ia Kamehameha III. mai, ma ke kauoha hoi a ke Aupuni oehaa o keia au o na kuewa. Eia nae, ua hoololiia ae a ua hoopaneeia aku ka wa e kuai kudala ia ai, aia ka a ka Poakahi, Feberuari 26, 1896. Kupaianaha no paha hoi na hana, a he keu no hoi a ka hilahila ole. Mai ka pakaha ana i ke Aupuni a me ka aina, eia no ke mau nei na hana pakaha, mahope iho nei nae paha hoi o ka waeia ana a pau loa aku o na mea maikai a hoolawaia aku paha hoi i kela a me keia o ka poai hemolele.

Nui ko makou minamina no ka hiki ole ia makou ke unuhi a hoopuka aku i ka mahele o ka Peresidena Kalivilana palapala i ka Ahaolelo e pili ana ia Hawaii nei. No kela oili ana aku ia. A pela no hoi me na haiolelo no ko Haki ikeia ana mai nei ma ke ano Kuhina noho ma ka la 4 nei, a me ko Kakela waiho ana aku hoi ia kulana like ia Haki. He lea okoa no hoi la ke paka pono ia iho na kike olelo ana Ke halawai ole me na kuia, e huoi pau ia aku no ia i keia helu ae.

Pii ke kai o ka ohua palemo alaula i ka manao alakai o ka nupepa Ekalesia oili hapaha a ka Bihopa o Honolulu, o ka puka ana ae i kahi mau la o ka pule i hala iho la, no ka olelo ana ae i kekahi mau olelo oiaio a maikai e pili ana no ke kupono a kupono ole paha o keia lahuikanaka e hoomau i ko lakou noho kuokoa ana. Ua olelo mai ua ohua palemo la he poai uuku wale no ka ke hoolohe nei i ka ka Bihopa mau olelo, eia nae, ua eha lakou, ke oehu mai la hoi. Ia makou aku hoi, akea loa aku, a nui ka ikeia o ia manao. E hoao no makou e unuhi aku no keia helu ae, ke halawai ole me na kuia.

Hoolilo Ana i Mau Diakona.

Oiai, o nehinei ke Dominika Eha o ke au o ka Hikiana Mai, o ia nae hoi kekahi o na la eha i hookaawaleia ai iloko o ka makahiki Karistiano, ma na Ekale sia Anagalikana a me Katolika Roma, no ka poni ana i na kahunapule. Nolaila, elua mau anaina poni i malama like ia ma na luakini o na hoomana i hoikeia maluna ae no ka hoolilo ana i kekahi mau moho i hoomakaukauia i mau Diakona.
                Ma ke anaina pule mesa ma ka luakini o Malieokamalu, hora 10:30 a.m., ua hooliloia o Hoahanau Aloisio (Brother Aloysius) i Diakona e ka Bihopa o Panopolisa. Oia kekahi o na poe hou i hoi pu mai nei me ka Epikopo. A ma ke anaina pule hoi o ka hora 11 a.m., ma ka luakini o Sana Anaru, ua hooliloia hoi o Kong Yin Tet i Diakona e ka Bihopa o Honolulu. He haumana Pake oia no ke Kulanui Iolani. Mai kona hiki ana mai Kina mai, he elima aenei paha makahiki i hala, aohe ona ike olelo Enelani, a i keia wa hoi, ua makaukau kupono oia ma ia olelo a me ka olelo Helene.
                Piha keia mau anaina pule a elua o keia mau luakini Katolika. Ma Sana Anaru hoi, ua hele ae ke Komisina Beritania, ke kapena, na alii, na koa malina a me na luina o ka mokukaua Beritania Nene Ahiu e ku nei. A pela no ka hoi ma Malieokamalu, he mahele okoa no ia o na koa a me na luina Pelekane.

Ahamele Pomaikai Kula.

Po Poaono nei i haawi ae ai na haumana o ke kula Virigine o Sana Anaru i kekahi aha hoolaulea, malalo o ke alakai ana a na kumu Virigine, i mea imi pomaikai no ia kula. O ke kumu o keia imi pomaikai ana, ua nui ka lilo o na kumu i ka wa kolera iho nei ma ka malama ana i na haumana, oiai, aohe kula iloko o ia wa a ua hoomaha no hoi, ua hiki ole nae hoi ia lakou ke kipaku aku i na haumana mai ko lakou malumalu aku. Mamuli o ia i konoia ai na kumu e hana i keia aha hoolaulea imi pomaikai, a he hapalua wale no ka ukukomo. Ua mahaloia no na mea i hanaia ma ia po, a ua nui no hoi na poe i hele aku ilaila, oiai hoi, ua nui no na lealea e ao o ia po.
                He hana maikai keia a ua kupono hoi e kokua nui ia e ka lehulehu. E haawi hou ia ana no keia aha hoolaulea i keia auwina la, hora 2:30, a o na poe e hiki ana ke kokua aku, e pono e hele nui, oiai, he hapalua wale no ka uku. Aole ia he dala poho, aka, ua makepono loa, no ka mea, he maikai ka hana i manaoia ai. Ina e manao ana kekahi e hele, aia ma ka ipuka ma Ema Kuea e komo ai, aole hoi maloko aku o ka pa luakini.

Poakolu ka LA KA RISIMAKA.

I keia la, hora 10 a. m., e hooloheia ai ka hihia ohumu kipi o na haole elua i hopuia iho nei imua o ka Aha Apana. Ua hiki mai nei hoi o Kikaha mai Lanai, ka hoike nui ka ia a ke Aupuni e hilinai nei. Ke wawaia nei o Paulo Numana ka kekahi hoike kue ia laua, a he poe e iho no kahi, aia ka ike nui ia a ku pono ae ka hana imua o ka Aha.
                Ma ke Kalaudine mai o ka pule i hala i hoea mai ai o Lunakanawai Helekunihi o Wailuku, no kona hokolokoloia hoi maanei no ka lawe i ke kipe. Poaha iho la, akahi no ka Loio Kuhina a waiho ae i ka palapala hoopii, no kona lawe ana he $24 mai kekahi Pake mai ma ke ano kipe. Ua waihoia ka hoolohe ana a piha pono ae ka Aha Hookolokolo Kiekie.