Ka Makaainana, Volume IV, Number 26, 23 December 1895 — Page 4

4 HONOLULU, OAHU, POAKAHI, DEKEMABA 23, 1895.

KA MAKAAINANA,
HE NUPEPA OILI PULE.

W. H. KAPU,
Ona, Luna Nui a Lunahooponopono.
Wahi noho, ma Honolulu.
F. J. TESTA (Hoke),
Puuku. KEENA: Helu 327, Alanui Moi, ma
Waialeale, kokoke i Alanui Konia.

POAKAHI, DEKEMABA 23, 1895

Ke haawi aku nei makou i ko makou poe heluhelu a pau i ke ALOHA KARISIMASA, me ka manaolana a hilinai hoi e loaa mai ana no ia kakou kela haawina Akua,---"he malu ma ka honua, he aloha i kanaka," iloko o keia makahiki hou e nee aku ai imua.

AOHE maikai aku a koe mai ina e hala loa aku ana ka Puali Puhiohe Lahui no Enelani a me Europa. O ke ala ia e hooi loa aku ai ia Hawaii Imiloa nei, a he imi ola ana aku no hoi ia o lakou i oi loa ae i ka paaua ana ma Amerika Huipuia. Ina, e hoohoa aku nei?

PEHEA ana hoi na poe pio kalaiaina i koe? Eia ke kokoke mai nei hoi ka la hoomanao no ka hanau ana o ke Kalahala o ke ao nei. He manaolana nui nae hoi ko makou e loaa ana he "malu ma ka honua" o Hawaii nei, ke hoike olalau ole mai hoi na ouli a me na kahoaka i haloiloi mai imua o ko makou alo. Aia a hemo mai lakou, loaa ka "hoonaniia" ma "na lani kiekie."

ILOKO o keia pule a me nei pule ae e kupono ai e komo mai na kauoha ana no KA MAKAAINANA nei. Ke nele no, e nele ana i ka nupepa, oiai, aole makou e pai nui wale aku ana no i ka pepa. Aia no a kauoha okoa ia mai, alaila, loaa aku a ke ole no, aohe e hoouna wale ia aku ana. Ina e kauoha mai, mai no a hoopoina i ka hoouna ukali mai, no ka mea, o kahi aho no ia o nei hana nui.

I MEA hoi e akaka io ai o ka hilinaiia o KA MAKAAINANA nei ma ke ano he nupepa alakai iwaena o ka lahui, e like me ka makou hoaiai pokole ma ka helu i hala, eia na hoolaha o kekahi mau hale oihana kalepa a me kekahi mau oihana Aupuni ke komo mai nei me ko makou noi a alualu ole aku. Aole keia he kaena wale, aka, he mea oiaio loa e ikeia iho ai e kela a me keia. Eia nae, aole ia o ka makou i makemake ai. Ke hilinai nei makou ma o ka lahui la, a o ka lahui hoi koe a hoike ae ma ka lawe nui ana aku i ka pepa o keia makahiki ae me ka hookaa mua mai i ke ola. Aia a nui ka laweia o keia nupepa, a piha he mau tausani, alaila, lilo ia i hoike oiaio loa no ka mau o ka hilinaiia, a he wahaolelo alakai hoi ka olelo ana. Oia, ina kakou, hoike ae!

E HOOHUIIA ANEI KAKOU?

O ka makou pane no nei ninau,----AOLE! A pehea la hoi ko ka lahui manao?
                Ma ko makou noonoo ana, he ninau kupono loa keia e waihoia aku ai i keia wa imua o ka lahui he ukali hoi no ka makou mau hoaiai ana ma ka helu i hala. He nui na mea o ka poai e makemake nei e hoohui aku ia Hawaii nei me Amerika Huipuia e walaau nei no na pomaikai e loaa mai ana ia kakou, eia nae hoi, i ka nana a hoomaopopo aku ia mau olelo, ua nele loa i ke kahua o ka oiaio. O ke ake wale no o ia poe, a o ka oiaio maoli no ia, o ke ko o ko lakou manao lapuwale Ke ko ia manao, e hoomanao ka lahui kumu, e hoohalikeia aku ana kakou me na poe Ilikini o Amerika Huipuia, koe wale no paha, ina mamuli o ia hoohui ana, e loaa mai ana ia kakou ke kuleana koho balota a me ka hooponopono Aupuni kuloko ma ke ano he Mokuaina. Mawaho ae hoi o ia, he makehewa ka hoonahoa ana aku.
                Wahi a ka Pi Ki Adavatai sa o kakahiaka Poakahi i hala, "e hoea maopopo loa mai ana no ka ka hoohuiaina e like la me ko ka honua nee ana a puni ka la." Ae paha, aia no hoi kakou a ike aku. Eia nae, ua hauoli hoi makou i ka hoike aku i ka pane a ke Kuokoa namu i kela mau olelo piha haakei a ka wahaolelo alaula o ka poai mikanele alunu ia Hawaii nei. Malalo iho e ike ai ko makou poe heluhelu i kekahi mau pauku o ia pane oolea a ka wahaolelo namu hookahi e kakoo nei i ka lahui, a ko makou Puuku hoi e noho luna nui nei, i unuhiia mai hoi e makou, penei:
                "O ka manao Amerika no keia mea, he mea emi mai hoi ia o ka hoihooiia e na Hawaii. E pono e loheia na Hawaii, na poe haku hoi o ka lepo mamuli o ka pono, imua o ka Ahaolelo Amerika, a ua hiki no hoi i ka Peresidena ke hoomana aku i kekahi keehina, e hiki ai hoi ke manaoia aku o ia wale no ka hoopio limaikaika ana mai i keia mau Paemoku. O na Hawaii, i aeia ae paha hoi ua like ka naauao a me makaukau e hooko aku i kekahi mana koho balota a e hooholo iho i ke ano hooponopono aupuni a ko lakou aina i makemake ai, e like la hoi me na poe kupa i "hanau kuokoa ia" o Amerika Huipuia i hookomoia mai ianei, ua hoole lakou a koe ole iho kahi kanaka hookahi e haawi pio i ke kuokoa o ko lakou aina a me ka hukiia iho hoi o ko lakou hae ilalo, ke lilo aku hoi i mahele a i apana no Amerika Huipuia.
                "Aole loa he mau mea e hiki ai ke hanaia ma ka noonoo ana, aole loa he hoohana ana i kahi hoohuli manao ana e hiki ai ke koi aku i na Hawaii e kokua i ka hoohuiaina. Ua oiaio----mamuli no paha hoi o ko lakou hewa ponoi iho, mamuli hoi o ko lakou hilinai paulele a kuhihewa i ko lakou mau alakai, a mamuli no hoi o ke kumakaia o na elele o Amerika Huipuia--eia lakou i keia la malalo o ka manamanalima-nui o kekahi oli garesaia i alakaiia e kekahi poe Amerika waiwai nui kakaikahi a e kakooia nei hoi e kekahi aluka huikau o na poe kuewa mai. Ua hoike ae paha hoi na Hawaii i ko lakou nawaliwali ma ka ae ana i kekahi hana o ia ano e hoea mai. Eia nae, aole loa lakou i hoike iki i ko lakou makemake e haawi pio aku i ke kuokoa o ko lakou aina. E hiki no paha hoi i na poe i kapaia o ko lakou poe alakai ia ke hele mai imua i ka la apopo a ao aku ia lakou e ae i ka manao e hoohuiia aku. Iloko o iwakalua-kumamaha hora ma ia hope iho, e kapaia no ia poe alakai he poe kipi, a e hoino akea nui ia hoi ua kuaiia lakou me ke gula a ka poai hoohuiaina.
                "Aole loa e hiki i ko Hawaii Paeaina ke hoohuiia e kekahi koho ana a ka Ahaolelo Amerika. E hiki ole loa no hoi i ke ao nei ke ku malie ae a nana mai i kahi keehina powa o ia ano me kekahi kue paakiki maopopo ole mai. Ina ua makemake ka aoao kalaiaina o Amerika Huipuia e noho mana ana ia Hawaii nei, e pono e kukalaia ae ke kaua, alaila, e haawi pio maalahi aku no keia aina uuku me kona poe makaainana kumu o 40,000. Aka, ina he hanohano kahi i na kanaka e kaena ana i ko lakou makee no ke kuokoa, ka lanakila a me ke kaulike, e kakali iho hoi lakou i ke kamailio ana e pili ana i ka hoonele ana ae i kekahi lahuikanaka nawaliwali, eia nae, he lahui hoa'loha, i kona kuokoa aia a hiki ia lakou ke hoomaopopo lea iho ia lakou iho ua hanaia ia haawi pio ana mamuli o ka apono ana o ia lahui. Ina e hiki ana ia Hawaii ke hele aku i o Amerika Huipuia la ma ke ano he makana mai na Hawaii aku, lawe aku, ke manao nae hoi ka loina hooko hana Amerika he mea naauao ke hana pela. Aia a hiki mai ia wa, e pono i ko Amerika poe loea kalaiaina ke hookomo poopoo aku i na haawi ana aku a Mr. Dole a me kona poe hoa launa-pu o Hawaii nei e hana ai. Ua like ke ku i ka hewa a me ka hoowahawahaia o ka mea lawe aku e like la me ka mea nana i aihue."
                Ua like loa ko makou manao me keia ae la. A o ka makou pane hoi no ka ninau maluna ae, i hoopukaia e makou ma ka hoomaka ana o keia kukulumanao, ke kuhihewa ole makou, o ia no ka ka lahui pane mai ma ko lakou aoao. Ua hiki ole loa ia kakou ke hoohewahewa i nei manao o ka lahui, no ka mea, eia no ka hapanui ke noho kupaa mau nei iloko o na hoaeia ana ma na ano a pau, a na ke au o ka manawa e hoike mai---owai ana la ke lanakila ana---o na poe hoohuiaina paha, a i ole ia, o ka lahui kumu a oiwi paha e noho kupaa mau nei me ka onipaa iloko o ko lakou hapanui a mailuilu ole hoi e like la me lakou nei ma ae poe oehaa.
                Ua aui ka la o ka Poalima iho la, o ka ho ra 1 paha ia a keu i hookomo mai ai ka Monowai mai Kapalakiko mai, he hookahi la mahope o kona la ku mau Mahope iho o ka hora 1 o ka wanaao Poaono i au aku ai oia no na Panalaau Hema.

HOOMANAO HOOKAMAEMAE.

O ka malama a hoomanao ana i ka la hanau o kahi mea, aole ia he mea ino a he mea e hewa ai. A pela no hoi ina ua make ka mea nona ka la hanau e hoomanaoia ana, he hana pono no ia, ina hoi he hana kaulana a he hana nui paha hoi ka ia mea i waiho iho ai mahope nei a na kona poe lunahooko-kauoha e hooko aku, e like la me ke Alii Pauahi-a-Paki.
                Aohe a makou kue ana i na hana hoomanao a kona mau kahu waiwai a me na kumupoo o na Kula Kamehameha, e like la hoi me ia i hanaia ai i ka Poaha iho la, ka la hanau hoi o ia Alii o ka aina nei i hoike ae ai i kona aloha oiaio i kona lahui ma ka waiho ana mai i kona waiwai nui no ka pono a pomaikai o ka hanauna hou o kona lahui oiwi, i mea e pono ai ka noonoo o ke poo a me ka lawelawe hana ana o na lima. Eia nae, aia hoi ko makou kue a ahewa ana ma na hana hoao hoomanamana, a ua aneane loa na mikanele a me na kumuao o ia mau kahua hoonaauao e hoolilo aku iaia, i ke Alii i make, i ahua e hoomanaia ai. Iwaena o na hana hoomaikeike ma ka la i oleloia, ua hoikeike ae na kaikamahine, imua o ke anaina nui o na poe like ole i hiki aku, i ko lakou hele nui ana a kukuli hoopuni imua o ke kii o ke Alii, a ia wa iho no hoi lakou i hookau aku ai i na lei a me na pua iluna o ia kii. Aole keia he ao pono ana i na opio.
                Ua make, ua hala, a ua nalo loa aku o Pauahi ma ke kino, aka, eia oia ke ola nei ma kana hana hiwahiwa, ka oi loa paha hoi iwaena o na Alii Hawaii i hala aku ma ke "Ala Polikua-a-Kane." Na kona poe kahu a mau hope paha ana i hoomana ai ma kana palapala kauoha hope loa, a ka Aha Kiekie hoi e hoopiha ai ke loaa he hakahaka iwaena o ia poe, e lawelawe nei i keia mau hana hoomanao me kona ike ole ae hoi i na mea e hanaia ana, a o ka makou hoi keia e kapa aenei---he hoomanao hookamaemae.
                No ka mea, eia no ke Aliiaimoku ke ola nei, aohe hoohiwahiwaia ae e ua poe mikanele nei no kana mau hana maikai a ku i ke kilakila no kona lahui, mamua aku a mahope mai o kona kau ana ae i ka Nohoalii. Ua hapai oia i ka Ahahui Hoonaauao Liliuokalani, he elua mahele, a ua kokua nui i ka waihona o ka ahahui mai kona loaa a waihona ponoi aku. Lehulehu na kaikamahine i hoohaahaaia e ia ahahui, a o ke kula kaikamahine o