Ka Makaainana, Volume IV, Number 26, 23 Kekemapa 1895 — Page 1

Ka Makaainana.

BUKE IV---Ano Hou. Honolulu, Oahu, Dekemaba 23, 1895. HELU 26
LOAA UA KOLOHE!
Hopuia he Mokukuna Opiuma a
Ulu Mai paha he Ninau Nui.

Nui ka wawalo ae o ka lono ma ke kelepona i kakahiaka o nehinei, a pela no hoi i ka po aku, no ka paa o ka mokukuna e hookalakupua nei i ka hopuia ilalo o Waianae. Ua ikeia ka oiaio o keia lono i ka hookomo ana mai o ka Eleu a kani ana ekolu oeoe, i ka hora 9:30 a. m. paha, me ke kolo ana i ka mokukuna Beritania Henerieta. Penei iho kahi moolelo i loaa mai ia makou ma ka noii ana a me ka hoolohelohe aku i na kamailioia:
                Hora 11 a. m. ka o ka Poaono nei i ike mua ia ai ua wahi moku la mawaho ae o Keaau, malalo aku o Makua, ma Waianae, a ua mo ku ae malaila. Ua holo ae he waapa no kula a ua lele aku he haole. Ua hele aku oia, wahi a kana olelo mahope iho, e imi i wai no luna o ka moku, ua nele a ua pilikia lakou, a ua halawai aku ka oia me kekahi makai, wahi nae hoi a kahi oleloia, me ka Hope Makai Nui o lalo o laila, me Wile Kelekona. Nui ka ko laua hoohele kamailio ana a hiki wale i ka wa o ua haole la i hoike ai i ka ukana o luna o ka moku, he opiuma, a kamailio ka no ke kuai. Pela ka i komo ai ka hoohuoi iloko o ka makai, o ka moku paha hoi keia a ke Aupuni e ake nei e loaa, a hopu okoa ia ai ua haole la.
                Hora 5 paha i loaa mai ai ka lono iluna nei a hoounaia aku ka Eleu me ka Ilamuku, na makai a me na poe o ka Oihana Dute, e alualu a e hopu i keia moku hoohaehae. Aumoe loa no hoi ka Eleu i hiki aku ai, a me he la, ua pauhia loa na poe o kahi moku i ka hiamoe, no ka mea, ma ka waapa ka Ilamuku i holo aku ai a pili ma ka aoao a kanea ana, aohe i pane koke ia mai, aia a ua liuliu wale ka ma ia hopo iho. Ua hopu koke ia na poe a pau o luna o ka moku, me ka hoohakalia ole, a loaa mai hoi ka haole i hopu mua ia ai i ke ao, me ke kiai a hoomalu ia o na poe a pau, elima haole a me hookahi Pake, ua koloia mai ka moku a hoea mai ianei ma ka manawa i hoike mua ia aenei, a ma ka uwapo Osianika ka hoopiliia ana mai.
                He wahi moku peleleu ano kao apulu kahiko no nei i ka nana aku, me he la he palahalaha o lalo ae, no ka mea, he kila ume kona. Ua loaa aku no he palapala hoike pili oihana mai ka Oihana Dute o kona awa hope loa i holo mai ai, ua hoikeia no ka nui o ka opiuma o luna, a e holo ana ka no La Paza, Mekiko. Wahi a ko makou lohe a hoikeia mai, ua kanalima paha a keu aku na pahu o luna, i hiki aku paha hoi i ka huina o 1500 paona a oi. Pili i ka uwapo, ua pau i ka hueia a laweia no ka Hale Dute e hoomalu ai. Ua ikeia iho no nae o na pahu opiuma no nei i hoounaia ai a hoolilo poho ia e ka Hope Luna Dute ma Vitoria mamua aku nei, no ka mea, e paa ana no ke kuni a hoailona Aupuni. O na pio hoi keia, ua lawe nui ia mai a ka Halewai, aka, o ka haole i paa mua ai, ua lawe loa ia i Kawa e hoopaa ai me ka ike ole o kona mau hoa. Ke hauoli nei ke Aupuni a me na poe manaoio no nei niuhi i paa mai la. O ka hopena aku, aohe i akaka.

Kokua no na Poe Ma'i Lepera.

Ua hoikeia mai ia makou mahope iho o ka uku ana i na lilo, ua koe iho he $200 mai na loaa mai o ka ahamele i haawiia ai ma Kaumakapili. He mau mea paani koloke, besebolo, mau pahu wai-momona, a pela aku, ka i kuaiia iho nei a ma ka Lehua o keia la e hoounaia aku ai no Molokai. He mau dala no kahi i ka Makuahine Poo o na Virigine a me Hoahanau Dutona. Aole i hoopoinaia ko Kalihi aenei poe, ua loaa no kahi ia lakou.
                Ma neia huakai mai nei a ka Monowai, ua haawiia he ahamele iluna ona i ka po hope loa ma ka moana a ku mai ai ianei. Ua koi na ohua ia Ovide Musini, he mea hookani vaiolina kaulana i hiki mua no ianei, a ua ae oia ina e haawiia na loaa no kekahi hana kokua aloha. Ma ka luluia ana, ua loaa he $100, a ua hooholoia hoi e haawiia no na poe ma'i lepera. Nui no ka hoomanao aloha ia o ia poe iloko o ka noho'na ehaeha.
                I keia po hoi, maloko o ka halepea o ka hui keaka lio e paani nei, ua oluolu ka ona e haawi i ka huina o na loaa a pau no na lepera. Nolaila, he po lea nei no Halalii, a e pono hoi e lu ao i na dala ilaila no ke kokua ana i kela poe popilikia o kakou.
                E ninau mau no ka Makapolena Ma mau ano Waina, a e loaa no ia oe ka mea maikai loa.

PAUAHI KE ALII.

Na Hana Hoomanao La Hanau o ka Mea Hookumu,

Poaha iho la ka la hanau o ke Alii B. Pauahi Bihopa i make, a he la nui hoi ia no na Kula Kamehameaha. Ua malamaia ka la o na haumana ma ka iho ana mai ma na kaa basa nunui a ke kihi aenei o na Alanui Moi me Nuuanu, ua lele nui ilalo a pii wawae iuka o Maunaala, Maemae, malalo o ke alakai ana a ko lakou puali puhiohe ponoi.
                O kamaliiwahine hoi ua hoomau loa aku no lakou mahope o ke kaoo o na kamaliikane maluna o na kaa nunui. Hiki i ka ilina, ua hoohiwahiwaia ka he o ke Aliiwahine i make me na pua o na ano like ole mai na haumana aku, a puhi leo mele kanikau hoi ka bana. Pau nui ilaila, hoi nui mai me ka walaau a me ka uwauwa, a pihakuli ke alahele. O ke Aliiaimoku kekahi i hiki aku iuka o Maunaala a hoohiwahiwa aku la hoi oia i ka pahu o kona kaikuaana ma ka hanai pu ia ana e Paki ma laua me Konia, aole no hoi ia pahu wale, aka, i kahi mau pahu e ae no hoi kahi.
                Ia auwina la iho hoi, ma ke kahua ae o ke kula o na keikikane i malamaia ai na hana haipule a me na haiolelo keha a hookelakela. Ua kuu akea ia na wahi a pau o ia kula, a ua weheia ae hoi ke kii pauku kino o C. R. Bihopa, i hana noeau ia hoi e A. Hakinikona, a aia iloko o ka hale hoikeike kahi i waiho ia ai.
                Lehulehu na himeni i meleia mai e na haumana. He wahi hana ano keaka hoi kekahi i malamaia, o ia ka hele ana aku o na haumana wahine a kukuli poaipuni mamua o ke kii o ka mea hookumu a waiho a hookau aku hoi i na pua a me na lei mamua iho, me he la e hoomana ana i kahi akua. Mai oi loa aku ina i haaleleia neia wahi o na hana, oiai, aole hoi i kupono me na 'aahu a me na waihooluu e hoomanao ai i ka mea ua make. Aole no hoi ia he ao kupono ana i na opio. A ma ia hope iho hoi na hana lealea a hooikaika kino. Ilaila na haumana o ke kula o Punahou kahi i hoao ai i ko lakou eleu, a ua lilo mai no kahi mau eo ana ia lakou. (Ua hiki ole hoi ia makou ke hoike pakahi aku i na lealea i malama ia) O ka panina hope loa o na hana, o ia ka papaaina i hele a luluu me na mea ai ma ko na kaikamahine hale. Na lakou ponoi no i hana a o lakou no hoi na kuene. Nui a lehulehu na poe i hiki aku, mai ke kiekie a ka haahaa, a ua nui no hoi ka mahaloia.

He bedoma Karisimasa.

Ahiahi apopo, ho ra 7:30, he anaina pule me na himeni hoohauoli Ka risimasa ko ka luakini o Sana Anaru. A i ka Poakolu aku hoi, La Karisimasa, ka la o ko kakou Haku a Hoola i hanau ai ma ke kino mai ka puhaka mai o kona makuahine, Malie ka Virigine, he mau anaina pule ko i a la e like no me ko na La Pule e malamaia nei ma na luakini o Sana Anaru a me Malieokamalu.
                He mau la hoano hoi na la mahope koke iho o ke Karisimasa, penei: Poaha, Sana Setepano, ka mea mua loa i make no ka Haku; Poalima, Sana Ioane ka Evanegelica, ka Iesu haumana i aloha loa ai; Poaono, no na Keiki Haumia Ole, i luku nui ia ai ma Betelehema ma ke kauoha a Herode, me ka manao e make ko kakou Haku. E malamaia ana he mau anaina haipule hoomanao ma ia mau la, ma na luakini no i hoike mua ia ae nei. Ua noa keia mau anaina pule i na poe a pau loa e makemake ana e hele ae.

Moku Mikanele Piha Baibala.

I ka Poakahi i hala, ua loaa mai la he lono telepona mai Waialua mai, e hoike ana, he wahi mokukuna pahaohao ka ko laila poe i ike aku e lula ana na pea i ka makani ole, aole i maopopo ka inoa. Ua hoouna awiwi ia aku la ka Eleu, e alualu aku i ua wahi moku pahaohao la, a loaa aku la e olokaa hele ia ana iwaena o na ale, a koloia mai la a komo iloko nei ia po. I ka wa wa ka i ninauia aku ai na ukana o luna o ka moku, hoikeia mai la he mau buke Baibala wale no no na paemoku Ka roline, a he poe mikanele kahi, elua kane a hookahi wahine. O keia no paha kahi moku hoopahaohao i ikeia mamua aku nei malalo aku o Lanai me Kahoolawe, a i kahi manawa ikeia malalo o Kauai, a ma Oahu nei no hoi. Wahi a ka oleloia, no ka nui o ka ino, ua puhi hele ia ka moku i o a ianei a hiki ole i ko ke kapena ike ke hookele mai i Honolulu nei. I kinohi o ka loaa ana mai o ka lono, he moku hoopae opiuma, pioloke ko nei poe, e oloio ana i o a ianei me na pu, aka i ke ku ana mai, ua loaa nui i ka hoka. He keu no paha nei ano hana a ka hoakaaka. O ka Robata W. Logana kona inoa, a ua noho hookeleia e Kapena Bray, o ka Hoku Ao mamua.