Ka Makaainana, Volume IV, Number 25, 16 December 1895 — Page 7

HONOLULU, OAHU, POAKAHI, DEKEMABA 16, 1895. 7

NA AINA MAMAO
-
Na Lonolono Like Ole mai kela
a me keia Wahi o na Aina E.
-
Ka Ninau o Europa Hikina

                    Ma ka nana aku i nei wa me he la ua lokahi loa na Mana e kakooia ka maluhia ma na ano a pau, wahi a kekahi lono mai Konakinopela o ka la 2 nei, a ke hoopaakiki nui la hoi no ona mau kiai hou. Ke mau la no nae ka paakiki o ke Suletana e hooko ole i ka mea i makemakeia. Aia nae ke laulaha la ka manao iwaena o ka lehulehu ua loaa he lanakila nui i ke Suletana. Na keia mea ke kumu e hooi loa ia ai o ke ano kupilikii o kulana a na lilo paha hoi i mea pohihihi ke lawelawe aku, no ka mea, ina e hoaoia ae ana e hoomaikeike aku aole i oiaio ia mea, he kumu paha hoi ia e ulu ae ai o kekahi haunaele oi loa aku o ke kupilikii mamua ae o ke koi no ona mau kiai hou.
                    Wahi a ka olelo a kekahi luna oihana Tureke ua kue na Mana a pau i ka lawe ae o kekahi Mana hookahi i ke alakai ma kekahi hana e pili ana ia Tureke. Oia hoi, ma kahi olelo ana, ina he hana kahi e hookoia aku ana, e lawelaweia no ia ma ke ano hui mai ka aoao mai o na Mana a pau. Nolaila, wahi a kahi hoopuai olelo ana ae, ina e komoia aku ke alawai ololi o ke Dadanele me ka ikaika, e hanaia no ia e na mokukaua o na Mana a pau i kuleana. O keia ka manao mua i hoomaopopoia, eia nae, aole loa o Beritania Nui i makemake e houlolohi iho.
                    A o ka olelo hoi a kahi loea kalaiaina e ae, me he la ua ko ka Beritania Nui mea i manao ai, o ia hoi ka hoike ana aku i ke Suletana, a pela no hoi i na Mana, oiai hoi e ake ana e hana like aku me na Mana e ae, ua makaukau no ke Aupuni o Beritania Nui e hana hookahi aku, ina hoi e ala io ae ana he kumu kupono, a ina hoi na makemake na Mana e hana like lakou, e pono e hana koke me ke kaukaulua ole iho, a i ole ia, o Beritania Nui hookahi no ke-hooko aku ana i ke keehina mua.
                    Mamuli hoi o ko ke Suletana noi maoli ana aku i ke Za o Rusia, ua pale ae ke Za i ka Rusia koi no ka hookomo aku i kokoolua no kona moku kiai ma ke Dadanele.
                    A no Viena ae hoi ka lono i loaa i Ladana no ka noho mau o ke Suletana me na hopohopo no kona hoopauia. Ke ao la kona poe iaia ua hooholo na Mana i keia keehina, a ua makemake no hoi lakou e aeia ke komo ana aku o ka lua o na moku kiai, i mea hoi e hiki ai ke loaa he ikaika kupono e hooko aku ai ia manao.

Wehe Ahaolelo o Amerika Huipuia.

                    Hora 12 ponoi o ke awakea Poakahi, la 2 nei, i weheia ai ke kau Ahaolelo 54 o Amerika Huipuia. Na Hope-Peresidena Kiwinikona i hoomalo ka Aha Senate, a na ke kakauolelo hoi o ke kau i pau i hoomalu ka Hale o na Lunamakaainana, a ua haule like na hamare hoomalu o na hale a elua i ka wa hookahi i ke kani ana o ka hora 12 ponoi. He 15 poe Sanatoa hou, a ua eono a ewalu paha o ia heluna iloko o ka Hale. O kekahi o na mea ano nui loa i hoomaopopoia no keia kau o ka Hale, he lehulehu loa na hele helena hou a he poe opiopio ka hapanui. Ma ka heluna hoi o na makahiki, o keia kau ka opiopio loa i ikeia ma ka moolelo o Amerika Huipuia. Ua kaa ka eo o ke koho ana i ka lunahoomalu i ka aoao Repubalika, a o Ridi (Reed) o Maine ka i kohoia ma ko Karisepi (Crisp) wahi.

Wahi Ano Pioloke ma Geremania.

                    Ma ka hoike hoi a na nupepa o Berelina, ua aeia o Barona vona Koela, Kuhina Kalaiaina Perusia, e hele hoomaha me ke kaupalena ole ia o ka manawa, a malia o hoopau loa ia aku no. Ua manaoia o Zoulisa, hoa o ka Ahakuka Malu a o ka mea hoi nana ka bila kanawai kue kipi i haule mai ka hooholoia ana e ka Ahaolelo, oiai nae hoi, ua nui ko ke Aupuni hooikaika ana, ke pani ma ko ka Barona makalua.
                    No kahi wa i hala ae, ua kau aku maluna o ka Barona ka hoowahawahaia o ka Aha Kuhina, a ua oleloia no hoi ua hoihoi ole ka Emeperoa iaia mamuli o kana mau hana hoopuukahua wale ma ka hoopii ana i na poe Socialisa no na hana a olelo hoohaahaa i ke alii. O keia hana i ka Barona ka mea i hooi loa ae i na lono i lauahea mua ia no kekahi ano pioloke pili i ka Aha Kuhina.

Puiwa Kipi a Lanakila ke Aupuni.

                    Ua hoea aku kekahi mahele o na koa Sepania malalo o na alakai ana a na Generala Munozo a me Gasaco, he 2,000 ka nui me na ano lako kaua a pau, a hoopuoho aku la me ka ike mua ole ia o kekahi wahi ikaika loa o na kipi ma ka apana o Siera Maesetera, iloko o ka okana o Sanatiago de Cuba. Ua lilo pio mai i na koa Sepania ua wahi ikaika a pau loa o na kipi, a ua lilo pu mai me ko lakou kahua, halemai, wahi hana a me na wahi a pau e hanaia ai o na lako no na kipi. He 37 poe kipi i make a he lehulehu hoi na poe i eha. Elima koa a me hookahi mekia Sepania i make, a he hookahi lutanela a me 31 poe koa i eha.

Piena Hou ma Seoula, Korea.

                    Novemaba 28 i puka hou ae ai he oehu hoohaunaele ana ma Seoula, a ma ia hana ana hoi ua ko ole ka manao o na koa kiai alii e komo aku iloko o ka halealii me ka ikaika. Ua oleloia ae hoi he poe Amerika ka kekahi i komo pu aku iloko o nei ohumu kipi ana. Ma ka aoao hoi o na Kepani, ua hoole loa ae lakou aohe lakou i lihi launa aku me nei ohumu kipi hou ana ma Korea, eia nae, ua manao hoi lakou o ka unuhiia aku o na pualikoa Kepani mai laila aku ka mea o ulu hou ae ai o na hana hoohaunaele e like me ko ka wa i hala.

Hoao e Lawe i ke Ola o ke Za.

                    Na kekahi mea kakau nupepa ma Viena, Auseturia, i hoike ae ua lauahea ka lono malaila no kekahi hoaoia ana e powa i ke ola o ke Za o Rusia ma Sana Peterobuga. Mamuli hoi o keia lono, ua nouia aku kahi mea i ke Za. Ua hala lihi ae nae hoi mai ka pa pono aku iaia, ua pa lihi aku nae hoi i kona uhi ko loka a haule i ka honua me ka popilikia ole. Aohe mea i eha, eia nae, ua nui ka pioloke no kekahi manawa. He umikumamaha poe i hopuia mamuli o keia mea.

Mau lonolono e ae no Cuba

                    He Generala no Venezuela, o Alavareze, a me eha poe hoahele, ka i hopuia ma Akuaderese, kokoke ia Sanatiago de Cuba. Ma kona ninaninauia ana e na luna oihana Sepaia, ua ae aku oia he poe kokua kipi lakou, oia a me kona poe hoa eemoku, he 42 ka huina pau.
                    Ke makaukau la ke Aupuni e hoopuka i $20,000,000 ma na bila kikoo banako.

-
Pau i ka Hopuhopuia.

                    Ua aui ka la o ka Poaha, la 5 nei, i pau nui ai he 32 poe kane, wahine, a me kamalii i ka hopuia no ka hele ana e laweia ma ke kahawai o Nuuanu, a laweia no kahalewai me na kini i piha i na i'a. I ke ku nui ana ae imua o ka Aha Apana i ka Poalima, ua aoia mai la lakou aole e hele hou o lawaia ma ia mau wahi i papaia a hookuu nui ia mai la e hoi. Ua kuhihewa lakou i ka wa ka i pau ai ke kiai ana o na koa ua pau la a ua noa ke kahawai, no ia mea, ua hele koke aku la lakou e lawaia a ua piha na eke a me na kini nunui i na ano i'a like ole.

-

                    O na ohua o Honolulu nei ma ka Alameda o ka Poaha iho nei, oia no ka Loio Kuhina Kamika, G N. Wilikoki. Mele Kuke, ka puukani ma ka himeni, a me kekahi poe e iho.
                    La 24 e ku mai ai ka Warimu mai Beritania Kolumebia a me Vitoria.
                    Ma ka hora 10 p.m. o ka la 10 o Novemaba i hoi aku ai iloko o ka opu o ka honua ka wahine a J.M. Kauwila o Kaimu, Puna, Hawaii.

-
LEO KONO AKEA.

"Owau mai kau e hea mai ai,
E hea ke kanaka e komo maloko,
E hanai ai a hewa e ka waha,
Eia no ka uku - o ka leo!"
Aloha Oukou:
                    Ke kona a ke poloai akea aku nei au i na Hawaii e kipa mai ma ko'u halekuai a e kuai i na lole nani o na ano hou loa loaa mai nei ia'u mai Enelani, Farani, a me kahi mau aina e ae. e loaa no na
Papale Mauu Laiki, Na Lipine,
Na Lihilihi, Na Hulu,
Na Keokeo Lilina a ano e ae,
Na Kawele, Na Khei
A me na waiwai e ae he nui loa ke helupapa aku, ma na kumukuai haahaa loa.
                    He kuleana ke loaa ana i kela a me keia e

Kuai ana a Piha ka $5.00

E lilo mai ai o kekahi piano o $350 ka waiwai io ma ke koho ana i ka nui o na hua o loko o kekahi ipu pu, a i Dekemaba 31 e okiia ai imua o kekahi komite.
Owau no me ka mahalo.
L.B. Kerr,
                    Alanui Moiwahine, e pili pu ana me ko Kimo Mogana keena kudala.

dek 2-4 mnw.
-
NO WAIANAE
O R. & L. CO.
MA NA POAONO A ME NA LA PULE.

                    E haalele no na Kaamahu ia Honolulu nei ma na hora 9:15 A.M. a me 1:45 P.M o na Poaono. Ke huli hoi mai, e hoea ana i Honolulu nei ma na hora 3:11 a me 5:26 P.M.
                    Ma na La Pule, e haalele ana ke Kaamahu ma ka hora 9:15 A.M. E hoea hou mai ana i ka hora 5:26 P.M.

NA PALAPALA UKU PUNI:

Papa Ekahi, - - - - - - - $1 75
Papa Elua, - - - - - - - - - 1 25
F.C. SMITH,
Agena Ohua a Palapala Nui.
jul 21-tf

-
C.E Williams me Keiki.
Ed. A. Williams, Luna Nui

Helu 611, Alanui Moi, ma Ewa iho o ka Pa o Aigupita.

-
He mau mea kuai lako hale o na ano a pau loa.
-

                    He mau mea Hana Pahu Kupapau a Hooponopono Hoolewa.

-

                    E hoolakoia no na Kaa Kupapau, na Kaapio a me na Kaa-ohana.
                    Ina no e ninau ia laua, e loaa no na Pohaku Kia Hoomanao no na He Kupapau.

-

                    O ka Ialoa kekahi hana hiki loa ia laua, aia ia malalo oka lawelawe ponoi ana a Ed. A Williams, F.D., he mea i puka pono mai ka Kalaka Kula o ka Ialoa Maikai ana iloko o Mei, 1894.

-NA TELEPONA-
Keena, Helu 179 - Kauhale a me Kahea Po,
Helu 815.

nov 2-mp.

-
Ua Makemakeia
Ma ka
HALE INU RAMA LUVERA
(o ka Hale Meli mamua,)
Helu 91, Alanui Nuuanu.

5,000 Kanaka i na La a pau, no ka inu ana i ka

BIA KAULANA O KEOMOLEWA,

Ua Hele a Huihui i ka Hau.
EDUADA & HARE.
Telepona 589. Pahu Leta 475.

okt 28-tf
-
J K KAHOOKANO

                    LOIO a he Kokua ma ke Kanawai.
                    KEENA HANA: Alanui Kaahumanu,
Honolulu. jan 8, '94-1mk