Ka Makaainana, Volume IV, Number 24, 9 Kekemapa 1895 — Page 7
HONOLULU, OAHU, POAKAHI, DEKEMABA 9, 1895. 7
PUANA A KA PO.
-
Hoike a ke Ao no na Ouli
Pohihihi.
[Hoomauia.]
He Pawale ka hua o ka laau. He laau hoola keia i na ma'i paaoao, a pela aku. Ina o ka haina keia o keia laau he hoola, alaila, aia no ua laau hoola la i Wasinetona, aia no ilaila na kauka lapaau paaoao i ka ma'i nui i waihoia aku ilaila. A me he la, he ola mai koe. Nolaila ke hoike mai nei ka inoa Pa wale i kana nana he hoola; a me he la, ke pa wale aku no ka ma'i, o ke ola mai no ia. Ea, he kupanaha ka hoi keia laau! O ka laau io paha keia e ola ai ka ma'i a ka lahui o ka hoihoi ae i ka Moiwahine. Ina o ka laau keia, alaila, ua ola ka lahui; no ka mea, aole e kala ka ma'i a ka lahui i waiho mua ai a ua ola mua no kekahi ma'i, o ia ka ma'i Hoohuiaina. He auhuhu me ka akia ka laau o ia ma'i i hanaia ai e na kahuna lapaau mua o Wasinetona, a he hookahi ma'i i koe o ko ka Moiwahine, oia keia. "E hooponopono o Amerika i kuu Aupuni a hoihoi mai." A oiai, aole he laau Pawale i loaa i na kahuna mua, a i keia wa ua loaa ka Pawale i na kahuna lapaau mai la o keia mau la. Nolaila, nanaia aku.
No kahi mauu nunu i manaoia e nou i ka pohaku. He hoike ka manu nunu no ka ahailono o ka lanakila no ke emi wale o na hokuku manao onou hou aku, a he hoike no ka maalahi me ka maluhia, a me he la, me ke aheahe malie wale no na hana e hanaia mai ai, a o ka pau no ia.
No ka wahine me kana mau olelo hooiloilo, "Aole e hoi hou ana ka Moiwahine!" Nana ana i keia olelo hooiloilo, me he la, e hoike mai ana keia wahine i ka hoihoiia o ka Moi, no ka mea, he hooiloilo ko ka po no ka nele, he hooia ko ke ao no ka loaa.
No na wahine haku kahili e hoonohonoho ana i ka hulu iluna o ke kahili. He hoike paha ka lakou hana no ka hoomakaukau, ka liuliu i na mea ku i ko ke alii kuleana.
O ka hana-hoonoho hulu, he 'hana kau aku ia i ka hulu ma luna o ke kahili, a me he la, o ka hulu i manaoia, o ke Ahi ia e kau aku ana. A o ua poe wahine la, me he la, o lakou no ka aha hooponopono i na mea ku i ke Alii, a i ole, o haku kahili, o ia no ka Haku a Alii o ke kahili. He mea pono no hoi ke imiia ka manao o ke kahili O kana hana he kipaku i na mea lele ae e hoouluhua, e like me ka nalo a makika paha. Ina ua pili ia hana kipaku i ka poe hoouluhua, oia iho la, o ia o lakou la.
O ke kahili no hoi, he mea hoohanohano Alii ia, ina no kona wa ola a make paha. Nolaila, laila, ke hana nei keia poe wahine i kahi hana hoomakaukau no ko ke Alii kulana, a me he la pela io no paha. A i ole, ke hanaia nei kekahi kumuhana no na mea pili i ke Aupuni e like me ka Liliu kauoha, "E hooponopono o Amerika i kuu Aupuni a hoihoi hou mai."
No ka loli o ka helehelena o ka wahine i ka wa o kana olelo e kamailio ai a loli pu ae me kona aahu. Ma ka nana ana aku i ke ano o keia wahine, me he la e hoike mai ana oia iaia iho he wahine kino Hee, pela i ano e ai. No ka mea, ke hoike mai nei na loli ana o kona hele helana i ke kulana o na aahu o ke Aupuni no na manawa ekolu.
Kona ano mua, he Aupuni Manawa, a o kona aahu o hoohui ana me Amerika. Kona ano elua; he Aupuni Repubalika, o kona aahu, "Aupuni Oligaresia." O keia ke Aupuni o na mikanele kakaikahi e noho mana nei, a e hoonuuia nei ke dala e na ilio pololi. Kona ano ekolu; ke Aupuni Akua, o kona aahu, Aupuni Teokarasia. Aka, ua loli ae i ka mau ke ano o kona helehelena a me kona aahu, a me he la, o keia kulana hope loa ka helehelena oiaio o ua wahine la, oia hoi, ke Aupuni Alii e hoea mai ana.
No ka olelo hooiloilo hoi a ka wahine, "E kali wale no oukou a ekolu a ana o ke kukui, aole loa oukou e ike iki ana i ka hoi ae o ka Moiwahine." He mea pono ke imiia ke ano o ka olelo a kela wahine ano e. Heaha ke ano o keia olelo, 'ekolu a ana o ke kukui, aole loa oukou e ike iki ana i ka hoihoiia o ka Moiwahine.'
Eia ka haina o kela mau olelo ae la: Ekolu mahina, alaila, ike kakou i ka hoihoiia o ka Moiwahine. Penei e maopopo ai ke ano o kela olelo maluna ae: O 3, ekolu no ia; ana o ke ku kui, o mahina ia; o ia ke kukui.
Eia ka hoakaka ana: O ke kukui, aole loa ona kohu iki no ka ho-a ana i ke ao, no ka mea, he nui loa ka malamalama o ke ao i ka la Nolaila, o ke kohu o ke kukui e a ai, i ka po wale no, aole i ke ao. Nolaila, ua loaa ae la ke ano o keia olelo, o ka mahina ke kukui kupono e a ai i ka po, a pela i loaa ai ka haina i hoikeia maluna. "E kolu mahina, alaila, hoihoiia ka Moiwahine."
(Aole i pau.)
-
Na Eleu e kolo mau nei he ekolu manawa i ka la o na kao lawe opala a kiola iwaho o ka moana.
Mahope iho o ka hora 10 o kakahiaka Poakahi i hala, i ku mai ai ka Miowera mai na Panalaau Hema. Ua lawe mai ia he hui keaka mai ka hema mai a ua noho i o kakou nei. Mahope iho o ka hora 5 o ia auwina la i au loa aku ai ia no ka Akau.
Puhi Kolohe ia i ke Ahi.
Ma ka Miowera o ka Poakahi i hala i loaa mai ai ka lono mai Kikane mai no ke puhi kolohe ia ana i ke ahi o ke kahua hale o ka misiona Katolika Roma ma Tapiteuea, Paeaina o Kilipati. Iloko wale no o ka manawa pokole ka hoomaka ana ae o ke ahi e hamu i ka hale i ke ahi a hiki i ka lilo ana i puu lehu. O na mea makamae o pau o loko o ka hale, ua lilo i lehu. O ke kahunapule ua hala aku oia no kekahi aoao o ka aina ma kaua hana hoohulihuli iwaena e na kanaka, e ao ana hoi i ka olelo maikai a ke Akua, a i kona huli hoi ana mai maluna o ka mokumahu Archer, aia hoi, aole ke kahua hale, ua pau i ke ahi. Ua noii aku ke Komisina Beritania i na kumu i puhiia ai ka hale i ke ahi a me ka mea i puhi kalohe, aole nae i loaa. E loaa aku ana no nae paha hoi ka mea nana i puhi i ke ahi.
-
Ma ka la 9 o Sepatemaba i hala, ua hopuia o Keoni Kalaukoa me Kahalehiwa no ka moekolohe. Imua o ka Aha Apana i ka Poakolu iho la, ua hoopau wale ia ko laua hihia e ka aoao Aupuni.
He mokukaua Italia ia e upuia aku nei e ku mai ana ma na la mua aenei o Ianuari mai Auseteralia mai, nona ka inoa o Cristofolo Colombo. Eia iwaena o na alii o keia mokukaua, o ke Duke o Aburuzi kekahi, keiki hanauna ka Moi Homebato, a keikikane hoi a ka Moi i pau o Sepania.
-
NO WAIANAE
O R. & L. CO.
MA NA POAONO A ME NA LA PULE.
E haalele no na Kaamahu ia Honolulu nei ma na hora 9:15 A.M. a me 1:45 P.M o na Poaono. Ke huli hoi mai, e hoea ana i Honolulu nei ma na hora 3:11 a me 5:26 P.M.
Ma na La Pule, e haalele ana ke Kaamahu ma ka hora 9:15 A.M. E hoea hou mai ana i ka hora 5:26 P.M.
NA PALAPALA UKU PUNI:
Papa Ekahi, - - - - - - - $1 75
Papa Elua, - - - - - - - - - 1 25
F.C. SMITH,
Agena Ohua a Palapala Nui.
ok 21-tf
-
Hoolaha Luna Waiwai Banekarupe.
Oiai, ua hookohuia na mea no laua na inoa malalo iho nei i keia la i mau lunahooponopono no ka Waiwai o TIN SANG WAI & CO., he poe i banekarupeia, ke kauohaia aku nei na poe a pau loa e hooia koke mai i ka lakou mau koi e kue ana i na mea i banekarupe i oleloia, a o na poe a pau e aie dala ana ia lakou ke hoolahaia aku nei e hookaa koke mai ia mau aie i na mea no laua na inoa malalo iho.
WONG CHONG,
NO GANG.
Hanaia Honolulu, Novemaba 22, 1895.
nov. 25-3pl.
-
J K KAHOOKANO
LOIO a he Kokua ma ke Kanawai.
KEENA HANA: Alanui Kaahumanu,
Honolulu. jan 8, '94-1mk
-
Waiwai Hou
Waiwai Hou!
Ma ka Halekuai o
SING LOY,
[SINI LOI.]
51 & 53 Alanui Moi, - Honolulu.
-
Na Lole o na Ano a Pau.
Na Palule Keokeo o na Kane o na Ano a Pau,
Na Palemai Huluhulu o na Kane a me ko na Keikikane,
A pela aku, a pela aku, a makena wale.
-
He nui wale aku o na waiwai like ole hiki ole ke helupapa aku. E naue mai a e ikemaka no oukou iho.
nov 25-mp
-
HALEKUAI LAHUI KALAHIKI.
Helu 405, Alanui Moi, ma Waikiki aku o Alanui Nuuanu, ma ka aoao mauka, ke keena mua o ka "Hawaii Holomua."
Ma ia halekuai o na oiwi e loaa ai na anoi a me na paihi o na ano hou loa, e laa
Na Kalakoa, Na Keokeo,
Na Makalena, Na Kinamu,
Na Huluhulu, Na Lihilihi,
Na Kamaa o na Kane, Wahine me Keiki, a pela aku.
Oluolu no ke kuai ana. Aohe hewa ke kipa mai e ikemaka, a aohe no hoi he kunukunuia no ka hoikeike ana i na mea kuai.
M. PALAU, Luna Nui.
ok 14-tf
-
C.E Williams me Keiki.
Ed. A. Williams, Luna Nui
Helu 611, Alanui Moi, ma Ewa iho o ka Pa o Aigupita.
-
He mau mea kuai lako hale o na ano a pau loa.
-
He mau mea Hana Pahu Kupapau a Hooponopono Hoolewa.
-
E hoolakoia no na Kaa Kupapau, na Kaapio a me na Kaa-ohana.
Ina no e ninau ia laua, e loaa no na Pohaku Kia Hoomanao no na He Kupapau.
-
O ka Ialoa kekahi hana hiki loa ia laua, aia ia malalo oka lawelawe ponoi ana a Ed. A Williams, F.D., he mea i puka pono mai ka Kalaka Kula o ka Ialoa Maikai ana iloko o Mei, 1894.
-NA TELEPONA-
Keena, Helu 179 - Kauhale a me Kahea Po,
Helu 815.
nov 2-mp.
-
Ua Makemakeia
Ma ka
HALE INU RAMA LUVERA
(o ka Hale Meli mamua,)
Helu 91, Alanui Nuuanu.
5,000 Kanaka i na La a pau, no ka inu ana i ka
BIA KAULANA O KEOMOLEWA,
Ua Hele a Huihui i ka Hau.
EDUADA & HARE.
Telepona 589. Pahu Leta 475.
okt 28-tf
-
AINA PA-HALE NO KE KUAI.
Aia keia pa-hale ma Kapauhi, ma Waikiki iho o ka Hale Ahahui Opiopio Pake, he 3,120 kapuai-huinaha ka ili.
No na mea a pau e pili ana, e ninau ia
F J TESTA,
nov 11-mp 327 Alanui Moi.
-
W.H. DANIELS,
[BILA DANIELA]
Agena Kuai, a Hooponopono Aina, Mea Hana Palapala Kanawai, Mea Ohi Aie a pela aku.
O na hana a pau e haawiia aku ana iaia, e lawelaweia no ia me ka eleu a me ka omoole.
Keena Hana a me Wahi Noho, aia ma Wailuku, Maui.
mei 6-mk.