Ka Makaainana, Volume IV, Number 24, 9 December 1895 — Page 3
HONOLULU, OAHU, POAKAHI, DEKEMABA 9, 1895. 3
HOOMANA KATOLIKA
-
He Kuhikuhi no ke Ao ana i na
Hoahanau o ka Ekalesia
Anagalikana.
-
APANA ELUA - MAHELE IV.
NA HAILOAA O KA HOOHULI HOOMAEMAE.
[Hoomauia mai ka Helu 23, Buke IV.]
Ano, ua noa kakou i keia wa e loaa he ike hou ana aku e pili ana no ka Hoohuli Hoomaemae, a me kana mau hana hoi i loaa mai ai maluna o ka Ekalesia a me ka hoomana o ka aina. O ke ano o ka huaolelo reformation (i unuhiia hoi e ka mea unuhi ma keia manao o ka hoohuli hoomaemae), o ia ka hooponopono hou ana ae, oia hoi, ka hooponopono ana ae i kahi mea i kupono ole a kupono e like me kona ano maoli. Aole o ka reformation (hoohuli hoomaemae) ke kinai ana i kekahi mea kahiko, a me ka hana ana i kekahi mea hou e lawe i kona wahi, aka, o ka hooi ana ae hoi i ka maikai o ka mea kahiko, i ola mau aku ai hoi oia malalo o na kulana i haawi hou ia aku. Nolaila, ua ano like loa no ka reformation (hoohuli hoomaemae) me ka restoration (hoihoi hou). He mea ano nui nae hoi e hoomaopopoia aole ka Hoohuli Hoomaemae i hoololi ae i ka Ekalesia kahiko o Enelani no kekahi Ekalesia hou, aole no hoi i hoololi ae i ka hoomana kahiko no kahi hoomana hou. Aka, o kana i hana ai, eia iho ia, - ua hoolanakilaia ka Ekalesia kahiko e ia mai kekahi mau hana ino kukonukonu, a hoomaemaeia ae la hoi ka hoomana kahiko mai kekahi mau hana hoomanamana hoopilikia lehulehu, a iloko hoi o ia mau au kuwaena, ua hoopipili loa ia lakou iho i ka Ekalesia. I kekani o keia mau hana, ua hoike e aenei no hoi makou ma ka mahele i hala. Aka, aole loa he wahi e hiki ai ke oleloia, 'maanei e pau ai ka mea kahiko, a hoomaka aku hoi ka mea hou.'
He mea pono loa nae hoi e ae aku ua kaha loa aku na mea i hanaia a oi aku mamua ae o kahi hookani, e like iho hoi me nei; ka hooleia ana mai o na ao hewa ana e pili ana i ke kulana o na poe make, o ka mea ia nana i alako aku ma kekahi manaoio lawa pono ole no ka waiwai o na pule ana no na poe i hala; a i ole, ma kahi o ke ao haanui ana a oi ae mamua o ka oiaio e pili ana i ka Mohai Eukarita, ua loaa mai ka hopena o ia ma kekahi ike hemahema ia o keia oiaio nui; a i ole ia, ma kahi hou aku hoi o ka ukaliia ana o ke kaihi mana ana a ka pope e ka hookaumaha ana a ka mai O keia mau mea ae la wale no na hopena maoli o kekahi hoi hope nui ana. A he mea pono loa nae hoi ke olelo ae, oiai, ua hoomauia mai no ia kakou na kumu nui kupono loa o ka manaoio a me ka lawelawe hana ana, he mau poino ana no hoi kekahi ma na mea liilii ano nui ole, a o ka kakou hana hoi ia o ka hooikaika aku e hooponopono ae ma ke ano o ia kekahi mahele o ko kakou hooilina. Katolika.
O na hoololi i hanaia i ke au noho alii o Heneri VIII, ua hoakakaia ae hoi ia ma ke ano "aole i oi aku a emi mai paha mamua ae o kekahi ala hoohaunaele kipi ana malalo oke ano o ke kanawai." Ua lawelaweia na keehina mua ma ke ano i ku i ke kumukanawai. Iloko o 1530, ua hooholoia he Kanawai e ka Ahaolelo e papa ana hoi i ke noi ana aku i Roma no ka hooluoluia ae mai kekahi mau kanawai mai o Enelani. O keia mau hookuu ana, e like me ko lakou heaia ana, ka i hoopilikia nui loa ae i ka Ekalesia, a aohe kuleana o na pope e haawi mai ai ia mau palapala hookuu. Iloko o 1531 i papa loa ia ai ka hoomau ana aku i ka uku ana i na hoouku dala ana i koiia e ka noho Roma. Ua hiki aku ka huina o keia mau auhau ma ka averige e ane ane e £3,500 o ka makahiki, he huina dala hoi i like me ka paha ana o ia huina me ko kakou dala o keia wa. Iloko o 1533 i hooholoia ai he kolu o na kanawai e papa ana i kahi hoohalahala ana aku i Roma mai na aha hookolokolo Enelani. I ka Ahahui Ekalesia, ka ahaolelo o ka Ekalesia, o kahi makahiki ae, i hoohuli nui ia hoi ka manao ma o ka hooikaika ana o ka moi, ua hooholoia aole loa he kuleana i koe i na pope i haawiia aku ia lakou e ke Akua maluna o ke aupuni mamua ae o kekahi bihopa o na aina e. Oiai nae hoi, e menemene ana no ke ano o ka hanaia ana i loaa mai ai o keia, e ikeia iho ana no nae hoi he mau hana wale no nei e hoihoi hou mai ana i ke kulana kuokoa kahiko o ke Aupuni Enelani, a me ka Ekalesia Enelani.
[Aole i pau.]
-
Ua hoopauia ke kapu o ka ouau ana maloko nei o ke awa.
Ua hoopaiia o Kanaana no kela hewa hoeha ona i hou ai me ka pahi ia Kaleibeana mamua aku nei ma Kamoiliili, he $50 me na koina imua o ka Alia Apana i ka Poaha iho la.
Lauhue o kai o ka uwapo o Dilinahama Ma i na kanaka lawaia i ka Poaha nei, wahi mai a ko makou mea kakau, Kauka Bila Auwana, a pela pu no ka hoi me ka uwapo a Kamika, a pakele mai oia mai owili pu ia e kekahi lede iloko o kana upena lawaia.
NO WAHO MAI.
-
Mau Hunahuna Kuwaho Like
Ole o na Aina E.
E ohi dute aku ana o Kanada ma kona palena e pili la me Alasaka.
Ua lono wale ia mai nei no ua ala ke kaua kipi ma Kina, koe nae hoi ke akaka loa. Aia ka ke hahana la ma na apana kuaaina o loko, a ma na wahi hoi ma ka aekai, ua upoi koke ia ka e ke Aupuni.
Nui ka pioloke pili i ke kulana dala ma Parisa, Farani. Ua oleloia e ole ke komo akeakea ana aku o Barona Alaponesa de Rokekaila, akele ai kekahi poe. Lehulehu na poe i poho ma na miliona mamuli o ke akenui i ka waiwai loaa hikiwawe me ka luhi nui ole ma ka piepiele ana me na kuleana iloko o na hui eli dala (mone)
Ua ulu ae he ano e mawaena o Enelani a me Iapana, mamuli o ka huliia ana o kekahi mokumahu Beritania e kekahi mokukaua Iapana no ke alakai o na poe Hae Eleele i holo mahuka ai mai Foamosa aku. Aole iaia wale, aka, i na poe alakai Pake e ae no kahi. E hoopalalaha wale ana paha o Haku Saulebure i keia hana a Iapana e like la me Haku Rosebere? Na ke au o ka manawa ia e hoike mai.
O ke kuikahi malu i oleloia ai ua hanaia mawaena o Kina me Rusia, wahi a kahi lonoia mai, ua oiaio loa no ka, oiai nae hoi, ua hoole pili oihana ia e Rusia. He oehu mai paha koe o ka Liona me ka Bea Keokeo, a nawai la auanei hoi ka ai a laua. Ke ala ia kaua, e alakoia mai ana na Mana nui e ae o ke ao nei, alaila, e lilo aku ana paha hoi o ia ke kaua nui a weliweli loa o na la hope o keia keneturia.
Aia ke liuliuia la no ka poni ana i ke Za o Rusia. He $8,000,000 i hookaawaleia me ke Kuhina o ke Aloalii no na li o, a mamua paha hoi o ka pau ana o na hana, e palua a oi aku ana paha hoi na lilo no na hoohiwa ana. Nui ka pii o na hale hoolimalima. He $10,000 o ka pule a Beritania Nui e uku ai no kahi o kona Elele e noho ai, ua pii ae hoi ko Farani, a ua nele hoi o Geremania i nei wa. I ka wa no i ola honua, hoomaopopo e no kahi e noho ai, o hoka auanei ke hiki mai i ka wa.
Ma kekahi haiolelo ana mai nei a Haku Saulebure, imua o kekahi anaina hoolualea, ua hoike ae oia aohe manawa e aku i ikeia ai o ka lokahi o na aupuni o Euorpa e malamaia ka maluhia ma ka Hikina, e pili ana hoi ia Tureke ma Asia Uuku a me na hana hiena e nokeia la e na poe Kuda iwaena o ua poe Amenia. Ua lokahi na aupuni a pau e hooko o Tureke i ka malama ana i ka maluhia a e hoopakele hoi i kona poe Karistiano mai ka luku wale ia. No nei hana, ua hooholo na Mana e waiho aku i ko lakou mau amokukaua ma ia mau kaiaulu no nei wa a loaa io ae ka maluhia a maha hoi na hana hiena.
-
He Pake ka i hopuia i ka Poakolu nei no ka hoouna ole i kana keiki i ke kula.
Ua hooleia ke noi a kekahi poe o Waimea, Kauai, no ka ae a aku ona laikini kuai rama ma ia apana.
Nui ka lealea o ka Manu o ke Kuokoa namua, aole hiamoeia o ka po ma Kunawai, hui pu me kekahi o ko makou mau luina. Manao ke ola o ka auwana ana.
Eia hou aku no ua mokumahu e ku mai ana ma ka la 18 ae o nei mahina mai Iokohama, Iapana, i noho agena ia e ka Hui o T.H. Davisi Ma, nona ka inoa o "Rhosina".
Ua hoopaiia o Kipona Luse $10 me na koina imua o ka Aha Apana i ka Poakolu iho la ma o ka hoopii ana la a Keoni Kalaukoa, no ka hanai ana me ka laaumake i kana ilio. Ua hoohalahala aku oia i ka Aha maluna ae. Ua olelo oia ua hana oia pela mamuli o ke ao a ka Ilamuku iaia.
-
Hulu Hipa! Hulu Hipa!!
E loaa no na eke Hulu Hipa maikai, e lawa pono ai o elua kapa apana, makai o Koholaloa, no ke kumukuai oluolu, ke ninau ae hoi no ia mea ia
L M TOUSSAINT (Lui Palani).
nov 18-4pl
-
LEO KONO AKEA.
"Owau mai kau e hea mai ai,
E hea ke kanaka e komo maloko,
E hanai ai a hewa e ka waha,
Eia no ka uku - o ka leo!"
Aloha Oukou:
Ke kona a ke poloai akea aku nei au i na Hawaii e kipa mai ma ko'u halekuai a e kuai i na lole nani o na ano hou loa loaa mai nei ia'u mai Enelani, Farani, a me kahi mau aina e ae. e loaa no na
Papale Mauu Laiki,
Na Lipine,
Na Lihilihi,
Na Hulu,
Na Keokeo Lilina a ano e ae,
Na Kawele, Na K hei
A me na waiwai e ae he nui loa ke helupapa aku, ma na kumukuai haahaa loa.
He kuleana ke loaa ana i kela a me keia e
Kuai ana a Piha ka $5.00
E lilo mai ai o kekahi piano o $350 ka waiwai io ma ke koho ana i ka nui o na hua o loko o kekahi ipu pu, a i Dekemaba 31 e okiia ai imua o kekahi komite.
Owau no me ka mahalo.
L.B. Kerr,
Alanui Moiwahine, e pili pu ana me ko Kimo Mogana keena kudala.
dek 2-4 mnw.
-
Hoolaha Luna Waiwai Banekarupe.
Oiai, ua hookohuia na mea no laua na inoa malalo iho nei i keia la i mau lunahooponopono no ka Waiwai o TIN SANG WAI & CO., he poe i banekarupeia, ke kauohaia aku nei na poe a pau loa e hooia koke mai i ka lakou mau koi e kue ana i na mea i banekarupe i oleloia, a o na poe a pau e aie dala ana ia lakou ke hoolahaia aku nei e hookaa koke mai ia mau aie i na mea no laua na inoa malalo iho.
WONG CHONG,
NO GANG.
Hanaia Honolulu, Novemaba 22, 1895.
nov. 25-3pl.