Ka Makaainana, Volume IV, Number 24, 9 December 1895 — Page 1
Ka Makaainana.
BUKE IV - Ano Hou. Honolulu, Oahu, Dekemaba 9, 1895. HELU 24
KAAWE O II KAIA.
-
Komo ka Poka ma ka Waha a
Hu ka Lolo.
He mea e ka hoohikileleia ana o ke kulanakauhale i ke awakea Poaono nei, mamuli o ka lono ua make o Hanale Kaia, kekahi o na kakauolelo o ka Hale Leta Nui, i ki okoa no iaia iho i ka pu. I ka hooiaia ana aku me ka manao aole e oiaio ana, auwe! he mea e ka weliweli i ka maopopo ana ua oiaio loa a ua waiho me ka manaonao. Mamua iki iho paha o ka hora 11 i ki ai oia iaia iho me ka pu raifela, ua noho ma ka aoao o ka moe ma kona aahu a me ke kamaa, ua hikii he apana lole i kona wawae a ke kiko, a hookomo i ka waha o ka pu iloko o nona waha, a pela oia i ki ai iaia iho, a me he la ua haule a waiho ma ka aoao o ka moe, iluna no ke alo. Ua puka pu kona poo a hele loa ka poka a puka maluna pono ae o kaupoku o kona hale i noho ai, he wahi hale uuku mahope iho o ko Bila Balaki wahi noho, ma Kawa, makai aku o ka pa kaa me lio o ka Halepaahao.
Ua lilo keia hana ana i mea hoopahaohao i kona poe hoa'loha lehulehu no ke kumu o kona hana ana pela. He ma'i kona kumu o ka noho ana i kau hale, mai ka Poakahi mai, aole oia i hele iki i ka hana, eia nae, ua ikeia no oia e kahi poe i ka Poalima nei, a pela no hoi i kakahiaka Poaono nei. Ma na alanui Nuuanu, Kula me Liliha oia i ike hope loa ia ai e kahi poe, iaia i hoi mai ai mai kahi mai o kana kumu, ka Rev. A. Makinikoki, i hele ka e noi aie dala no kekahi pilikia. Nui na kumu i oleloia no kona hana manaonao ana iaia pela, he aloha wahine hoi ka kahi, he hoopii oki paha hoi na ka wahine ka kahi, he lohe paha e hoopauia ana mai ka hana mai kahi, a he apuka i kekahi huina dala mahuahua hoi ka kahi, o ka mea lohe nui loa ia ia, no ka waihona o ka pualikoa pualu, Komopani G, ana e noho Kapena ana. Aohe mea hookahi i akaka pono i ke kumu, oiai, aole oia i waiho i kahi mea e hoike ana, a ua nalo aku la no ke kumu me ia.
No kahi wa loihi i hala ae kona kaawale ana mai kana wahine, a aole paha hoi nona ke kumu. Ina he wahine io ke kumu, he wahine okoa aku no paha hoi ia mai kana wahine mare aku. I ko ka wahine lohe ana ka ua ma'iia oia, ua telepona mai oia, i ka Poalima nei keia, a ua pane aku ka e iho ae oia i kai o ka Hale Leta i kakahiaka ae, malia o hiki aku no oia i ka hana. Ua hooko ka wahine i keia kauoha, a i kona iho ana i kai o ka Hale Leta i ka hora 10 paha o ka Poaono, aole i hiki aku ke kane, nolaila, ua kamoe loa aku no ka hale o ke kane. Aia ma ka hale mauka iho ko Hanale Kaia kaikuahine, a ilaila i komo ae ai o Misasa Kaia e ike i ke kaikoeke a me ka bepe hou, a oiai malaila, lohe ana i ke kani o ka pu. Aole i manaoia he mea ano e ia mea ia manawa, no ka mea, ua kiki pu no ka ia i ka la mamua iho, a pela no hoi ia kakahiaka, a puka pu ke alo ka hale.
Mahope iho nae hoi o ka hala ana o kahi wa, ua hoohele loa aku ka wahine e ike, a iaia i komo aku ai i ka puka o mua, e waiho ana kela ilalo o ka papahele, o ke poo mahope o ka puka, e waiho ana ka pu a e kahe ana ke koko, a noonoo koke ae la ua pau ke aho o ke kane a hoomaka ae la e kuemi hope iwaho me ka makau a me ka leo nui. Ia manawa no i hoomaopopoia ai nona no kela pu i kani ai, a i ke komo hou ia ana aku, ua oiaio loa, ua ki oia iaia iho e like me na hoakaka ana mamua ae O ka wa no ia i hoouna koke ia ai o ka lohe i ka Halewai a ua hiki koke aku ka Hope Ilamuku a me ke Kapena Poo a me kekahi poe makai, a hoonoho koke ia he makai kiai malaila a noho ka aha koronero. Ma kona wahi i waiho ai, malaila no oia kahi i waiho ai a hiki aku na kiure koronero mahope iho o ka hora 1 o ia auwina la Poaono. Aohe mau alina pauda mawaho o kona waha, eia nae, o loko ka i hele a weluwelu a me ka paumaele i ka pauda. O kahi alina nae, ua uli pu ka aoao akau o kona nanaina, me he la i ka haule ana ilalo mahope o ke ki ana iaia iho.
Mai kekahi poe mai i iho ilaila i lohe mai ai makou no kona manaonao, kaheawai ke koko a me ka lolo a waiho iwaho. Mahope iho o ko na poe kiure koronero ike ana i kona kino, ua hoopanee lakou a noho hou ia po, a ua hooholoia i make no oia iaia iho, i ki me kekahi pu raifela, oiai oia ua ano e ka noonoo no ka manawa.
He hoa'loha oia no makou, aka, no kana hana hoi, ua lilo ke aloha nona mai ia makou aku, ua hele a makona, a pela aku. A he opio Hawaii no hoi oia i nui ka mahaloia no kona oluolu, iike, heahea a lokomaikai, a ua nui a lehulehu no hoi na hoa'loha. Ua piha paha iaia ke 34 makahiki.
Hookahi mea aloha, o kona makuahine nana oia i hanai a nui. Ilalo oia o Mokapu, Koolaupoko, a i ke aumoe ka hoounaia ana o ke kii ma ke telepone, a ua hoea mai iluna nei he hora paha mamua iho o ka hoolewa ana. Nui kona makena a naauaua i ke aloha ole o ke keiki.
Ua kaa koke ka hoomaluia ana o kona kiuo make malalo o ka oihana koa o ka Repubalika, a na kona mau hoa no o kona puali i ku kiai nona i ka po a ao a hiki i ka wa i hoolewa ai, i ka hora 2 o ka auwina la o nehinei. O na lala no hoi kahi o ka ahahui Hawaii Opio i kokua pu ma ke kiai ana. Ia manawa i hookoia ai na hana hope loa maluna o kona kino a manele aku la iaia no kana huakai hope loa, malalo o ka hoohanohano kaokao ana o ka oihana koa.
Peneia iho ka hoonohonoho ana: E.A. Wiliama, luna nui o C E. Wiliama & Keiki, mea hana pahu, he mahele o na makai malalo o Lutanela Haka; puali puhiohe o ke Aupuni; ko na pualikoa Komopani G, malalo o Lutanela Kea; Rev. J.. Waiamau, kahunapule, no ka hoole ana o kana kumu, ka Rev. A. Makinikoki, a pela no hoi me ua kahunapule e ae o ka hoomana Enelani, kona Ekalesia i noho hoahanau ai, no ka mea, he kue loa ke ano o kona make ana i na ao ana o ia hoomaua, kaa kupapau me na aliikoa me na aahu piha ua hapai pahu; na aliikoa a pau o na puali e ae, e helewawae nui ana me na aahu piha, kaa me ka wahine a me ka makuahine; na lala o ka hui malu Forester a me ka Ahahui Hawaii Opio malalo; a mahope aku ka ohana a me na hoa'loha maluna o na kaa. Ua uhiia kona pahu me ka hae Hawaii.
Mai kai mai o Kawa ka moe ana o kaoo o ka huakai a ma alanui Moi nei a pii ma alanui Nuuanu, a nalo oia maloko o ka apana ilina o ka wahine ma ka pa ilina ma Ewa o uka o Maemae, a waiho ana ma ka aoao o kana keiki kamakahi i hala mua a me kona luaui. Kani ka bana a hapaiia mai kona pahu mai ke kaa a ka lua, me ka haawi o kona puali i kealoha hope nona, a pau ke mele ana o na hoa'loha i ke mele "E pili i Ou la wau." ua pule hookuu ae ke kahunapule kuuia ka olowaa, ki pu aloha kona puali no ekolu manawa a uhiia ka lepo, a haaleleia aku oia "e hoomaha iloko o ka maluhia" ma ka hopena ana i imi koke ai nona iho Aloha!
-
Hoonaue Ke Olai.
Hora 11:04 o ka po nei, ua hoonaue ae la he olai weliweli i ke kulanakauhale nei i kinohi, aole nae hoi i ke oolea loa, aole nae i liuliu iho ua naue hou ae la me ka ikaika a hoonaueueia na hale a pau na mea o loko i ka helelei ma kahi mau wahi. Ua wanaao loa iho nei no hoi, hora 3 paha a mahope iki mai, ua naue hou ae la no me ke oolea, a ua hoalaia ka hiamoe o na poe e moe ana. O keia kekahi o na olai ikaika i ikeia iloko o na makahiki loihi i hala ae. A o kahi oi loa aku o ka ikaika aia ma Waikiki, a ma ia aoao mai ka nee ana a komo iloko nei. Ua 25 sekona o na nane ana i kinohi.
-
Ke haawi aku nei o Makapoelua Ma i na Waina Kaleponi ma na kumukuai haahaa. Ua maemae loa hoi ka lakou mau ano waina a aole hoi i paipaiia e like me na ano waina lehulehu e ae e kuaiia nei ma keia makeke.
-
Kuai Hoopau - Waiwai Kepani.
Ina e nana ae ana ko makou poe heluhelu ma ka aoao ewalu, e ikeia iho ana no na hoolaha hou, a iwaena o lakou e hoomaopopoia iho ka hoolaha a H.W. Kamika a me na Keiki. No nei kau kulaia, e kuai hoemi loa ia aku ana na waiwai o na ano a pau, i loaa ai hoi he kowa no na waiwai e hiki mai ana. E pono no i ka lehulehu e kipa nui ae malaila, i ikemaka hoi paha i ka emi io mamua ae o ka lohe pepeiao mai.
Ma na waiwai Kepani hoi, aia ka oi o ka halekuai Dai Nipona, ma Waikiki aku o ke kihi o Monikahaae, ma Alanui Hotele. Ua like no, a i ole ia, ua emi iho no paha ko laila mau kumukuai i ko na hale Kepani e ae. O ka makou nae hoi e hoike aku, ma na silika a me na lole e ae, ua oi aku ka maikai o ko laila i ko na wahi e ae. E kipa aku no ka pono loa.
-
O na Waina oiaio maoli a Makapolena Ma, aia wale no ke kuai ana ma ko lakou halekuai ma Alanui Kaahumanu, a ma na hale inu rama o Kaopuaua a me ka Nekina.