Ka Makaainana, Volume IV, Number 22, 25 November 1895 — Page 3

HONOLULU, OAHU, POAKAHI, NO VEMABA 25, 1895. 3

NA AINA MAMAO.

Mau Lono Huikau ma kela a me keia Wahi Like Ole.

Na Koi Poho o ke Kai Berina.

Ua apono o Haku Saulebure i ke kulana o ka Amabasedoa Beritania ma Wasinetona, e pili ana no ka Beritania Nui koi poho no Kanada ma ka ninau o ke Kai Berina. O keia koi, no ka manawa ia mai Mei, 1894, a Augate, 1895. Ua manao ke Kuhina Nui o Enelani he mau hoolauwili a hoo oloiahili wale no nei hana na Senatoa J. T. Mogana o Alabama, lunahoomalu o ke Komite o ko na Aina E o ka Aha Senate. A ua hopohopo ole nae hoi ko Enelani Aupuni ina e waiho pono ia ana na kumu oiaio imua o ka lehulehu, e ikeia ana no ua kupono no i ke Aupuni o Amerika Huipuia ke uku i keia mau koi, pau pu maloko a mawaho o ka Ahaolelo.

No Venezuela a me Beritania Nui.

Ano moe malie loa hoi na olelo hoonuinui a na nupepa Amerika no ke kaua ae mawaena o Beritania Nui me Amerika Huipuia e pili ana i ka hoopaapaa palena aina mawaena o Giana Beritania a me Venezuela. Eia nae, aole loa e hiki ke ole loia ua moe malie ka Liona, no ka wiwo i ka Aeto. Aia kona poe koa maluna o ka aina i hoopaapaaia, a i hakalia wale no i ka manawa e hooko ai i ka hana. Ma ko Venezuela aoao hoi, ua ku ae kaena ana ke puka ke kauoha ma ka uwea telegarapa, pau na poe Pelekane i kipakuia a hoopuehu liilii ia. Na nei mua aku no paha hoi e hoike mai i ka panina o keia mau paonioni ana, me ka hopohopo ole o Beritania Nui no ke ko ana.

Nui ka Pioloke ma Tureke.

Ke hoao la ko Tureke Kuhina Nui e hoomaikeike aku imua o na elele o na Mana Europa e ae, e waiho koke ia aku ana na kumuhana a Tureke i manao ai no ke kinai ana i na ala oehuehu kipi e holopapa la ma Asia Uuku, imua o ua poe elele la me ka hakalia ole. Ua ano like no hoi ka pane i loaa aku i ka ninau a ka elele o Amerika Huipuia, oia hoi, e hana no o Tureke i na hana a pau e hoopakele ai i na poe misionari Amerika a pau malaila.
                Nui na pilikia e hoohihipea la i ke Suletana, a o kahi kumu paha hoi ia e ulolohi ai, no ka mea, ke ano kulanalana la no ka Aha Kuhina hou a o ka loli hou ae paha koe. Eha poe kahuna pule Katolika o ka Ahahui o Iesu, malalo o ka malu o Farani, i pephiia ma Malitia, me kekahi poe lehulehu e ae. Ua holo aku he elima mokukaua Farani no na aekai o Tureke a e hookahi aku ana ka lualai pu ana me na aumoku Beritania.
                Ua olelo ae kekahi palapala i kekahi nupepa Geremania ua kalahea ae ka elele Rukini ma Konakinopela aole loa o Rusia e ae ana i ke kauoha a na Mana e hoomalielie ia Amenia.

Sepania a me na Kipi o Cuba.

Holapu mau no ke kaua kipi e noke la ia Cuba, me ke akaka ole o ka hopena. Ma kekahi hoouka kaua ana, ua nui ka poino i loaa i na Sepania, a pela no ka hoi me na kipi ma kahi mau hoouka ana. A mamuli hoi o na lanakila hiwahiwa i oleloia ua loaa i na kipi maluna o na Sepania, i manaoia ai e ike koke ia aku ana lakou e Amerika Huipuia, a i hakalia wale no ka ike mai o na Repubalika o Amerika Hema me Waena i ko Amerika Huipuia ike ole ae.
                Ma kekahi aoao ae hoi, ua manaoia e pau koke ana keia kaua. I mea hoi e paleia ae ai ke paonioni loihi ana o ka Aha Kuhina o Sepania, ua ae ke Kuhina Kanawai, oia o Senora Romero, i ka manao o ke Kuhina Nui, oia o Senora Canovasa Casatilo a me kona poe hoa kokua i ka manao o Generala Camapaso, ma Cuba, e hooko koke ia ka manao hooponopono kuloko i hooholoia ai e ka Ahaolelo i pau. Ke ko io kela manao, o ka loaa no ia o ka hooponopono aupuni kuloko ia Cuba e like la me na panalaau o Beritania Nui, alaila, pio ke kaua a pio pu me ka manao hoohuiaina.

Na Hunahuna Laulaha.

Ua hoole ka Ahaolelo o Auseteralia Hema i ke kuikahi i manaoia me Nu Kilani.
                Aole i ulele hakaka kuikui puupuu ae o Cobeta, ka moho o ke ao nei me Fitizimona.
                Ua ike pili oihana aku ka Moi o Potugala no kekahi manawa pokole i ka Moiwahine Vitoria.
                Ma ka la 6 nei i hipuu polena ia ai ke Duke o Malaboro me Misi Conosuelo Vanabila ma Nu Ioka.
                Ua hoohanohano aku ka Emeperoa o Kina i na poe alakai o ka Rusia Oihana o ko na Aina E .
                He umikumamaha lala o ko ke Suletana o Tureke ohana i make iloko o hookahi la. Ua hoohuoiia lakou no ke kipi.
                Ua pau mai nei i ka ikeia kekahi mau hana hoohalua a na kipi no ka pepehi ana ia Peresidena Alafaro o Ekuadoa.
                Ua pau i ka hoauheeia na nika e na Pukiki ma Aferi ca Hikina mahope iho o ke kaua ana no 40 wale no minute me ka nui o na ola i make.
                Ua aa aku nei o Gaudaur, ko Amerika moho heihei waapa pukahi, i ko Enelani kaeaea ma ia hana e hoe ma Enelani a ma Amerika paha.
                He Aha Kuhina hou ko Farani. I pau ka Aha Kuhina mua i ke kue ana i kekahi ninaninauia o na hana ekaeka o na hui alahao o ka Hema.
                Ma ka Farani kuikahi hou i nana mai nei me Madegasaka, ua hoole loa o Farani i na kuikahi mua a pau i hanaia ai e na aupuni e ae me na poe Hova.
                He paele ka i puhi ahi ia mai nei me ke ola no ma Taila, Tekasa, imua o ke alo o na tausani kanaka, i hoopai no kona pue a lawe ana i ke ola o kekahi wahine.
                Ua pau mai nei i ka pepehiia he ewalu mau Pake i komo pu ma kela hana hoomainoino i na misionari ma Kina, oiai na mokukaua Beritania e ku ana iwaho o Futao.
                Ua hoopaiia no 90 la hoopaahao o C. C. Moreno ma Wasinetona no ka laibila ana ia Barona Fava, ko Italia Kuhina ma Amerika. Aia oia ke auamo la i na ehaeha o kana hana.
                Ua hoole o Potugala i kekahi noi a Beritania Nui no ka hoouna aku i mau pualikoa Inia i Goa e kokua ai i ke kinai ana i ke ala haunaele malaila, oiai hoi e kakaliia ana no ka hiki aku o na poe kokua.
                Ua olelo ae o Pohakuhauoli ma kekahi palapala ua haawi mai ke Akua i ke Suletana o Tureke i ponalo iwaena o kanaka a ua manaolana oia e kinai koke aku ana ke Akua iaia iloko o kona aloha palena ole.
                Ua hoike aku ko Ru sia luna aupuni e noho ana ma Seoula i ke Kuhina Iapana malaila, ina aole e hoihoiia ka Moi o Korea maluna o kona mau pono pilipaa e Iapana, alaila, e lawelawe koke ana o Rusia i kekahi keehina.
                He lono ka i loaa ae ma Ladana, Novemaba 13, e olelo ana, aia he elima mau mokukaua Geremania e mo-ku la iwaho o Amoe, a ua manao wale ia e hoao ana paha lakou e lawe limanui i ka mokupuni o Kuimoe (Quemoy), ma ke ano i wahi hoahu lahahu no na aumoku kaua.
                Lilo ka mana o ke kanawai ma na lima o kahi poe o Hametona, Carolina Hema. Eha poe i ahewaia no ka pepehikanaka, ekolu o lakou e liia, a hookahi hoi, he hapauea, ua waihoia aku e ke kiure i ka manao aloha o ka aha, a nolaila, ua hoopaiia mai oia e hoopaahaoia a pau ke ola. Ua laweia mai ka hapauea e kekahi aluka mai loko mai o ka malu o na lima o ka makai nui a liia oia iloko o ka ululaau.

Ua Hala a Ua Nalo.

M R. LUNAHOOPONOPONO:
                Aloha oe:---E oluolu oe e hookomo iho ma kahi kaawale o na kolamu o kau pepa i nei wahi ukana luuluu a'u e hooili aku nei, a nau e lawe a pahola aku i ka lono kaukaha, i ike mai ai ka ohana a me na hoa'loha o J. W. Kalawakua, ua hala, a ua haalele mai i keia ola ana ma ke ahiahi o ka la 1 o keia mahina, ma kahi noho o kona kaikuahine. Mrs. Kealoha Kalaehao, ma Kapalama, Honolulu. Ua hanauia oia ma Makalawena, Kona Akau, Hawaii, a ua piha iaia na makahiki he 50 a oi aku. Oia ka elima o na keiki a Kekahiwa me Kahaialii. He eono ko lakou nui, ua pau aku i ka make a koe hookahi e ola nei He hoa'loha maikai oia ma ka launa ana, he kanaka heahea, a he makua maikai no hoi. S. MAHAULU.
Kapalama, Nov. 18, 1895.

Ia Kamana e lawe mai ana i kela Pake hou pahi no ka hookolokoloia i ka Poalima nei, a ma alanui Konia ua pelu hopo mai la ua Pake la a hoomaka e holo me ka mama nui me ka paa no o na lima i na kupee hao. Ia manawa i alualu aku ai kekahi o ko makou mau keiki oniu hua kepau a paa ma ka lauoho a huki mai la, oiai hoi o Kamana e hoao ana me kona ikaika a pau e eo iaia ka makani puahiohio, aka nae, aole hiki. Ua pane ae ka Pake i kona wa i paa ai, "wau makemake make no!" A haawiia aku la ma ka lima o Kamana ka lawehala me ka pakele mai nalowale.

Hulu Hipa! Hulu Hipa!!

E loaa no na eke Hulu Hipa maikai, e lawa pono ai o elua kapa apana, makai o Koholaloa, no ke kumukuai oluolu, ke ninau ae hoi no ia mea
L M TOUSSAINT (Lui Palani).
nov 18-4pl

C. E. Williams me Keiki.

E d. A. Williams, Luna Nui.
Helu 611, Alanui Moi, ma Ewa iho o ka Pa o Aigupita.

He mau mea kuai lako hale o na ano a pau loa.

He mau mea Hana Pahu Kupapau a Hooponopono Hoolewa.

E hoolakoia no na Kaa Kupapau, na Kaapio a me na Kaa-ohana.
                Ina no e ninau ia laua, e loaa no na Pohaku Kia Hoomanao no na He Kupapau.

O ka Ialoa kekahi hana hiki loa ia laua, aia ia malalo o ka lawelawe ponoi ana a Ed. A. Williams, F. D., he mea i puka pono mai ka Kalaka Kula o ka Ialoa Maikai ana iloko o Mei, 1894.

-----NA TELEPONA--------

Keena, Helu 179---Kauhale a me Kahea, Po,
Helu 815.
nov 2-mp.

E. M. NAKUINA.

KOMI SINA O NA ALA LIILII A ME
NA PONO WAI.

No tari Lehulehu, a he Agena Haawi Palapala Ae Mare no Honolulu nei.
                KEENA HANA: Helu 208, Alanui
Kalepa. dk 3--1m