Ka Makaainana, Volume IV, Number 20, 11 Nowemapa 1895 — Page 8

8 HONOLULU, OAHU, POAKAHI, NO VEMABA 11, 1895.

Piholo i ke Kai a Make.

I ka Poalima iho la, ua loaa aku la ke kino make o Harr y Welch, he haole i noho kalaiwa mamua no ka Hui Alahao Hawaii e lana mai ana iloko o ke kai iwaho o Waikiki. He mau minute mamua iho e kamailio pu ana no oia me kekahi haole okoa iho, a kaha aku la no hoi kona kokoolua hele e lawaia ma kahi okoa aku. O i noho oia o ka ike ole mai ia Hale, a pela me kekahi poe e iho, hoomaka nui e huli a loaa aku la e like me ia i hoikeia ae la. Auwina la Poaono nei i malamaia ai kona huakai hoolewa malalo o na hooponopono ana a ka Hui Alahao Hawaii, a kakuia ma ka ilina o Maemae.

Manaonao na Hana.

Mamua iki iho o ke awakea o nehinei, ua laweia ae la o Kaili (k) no ka Halewai no ka hewa hoeha i ka Pake me kekahi omole kele aohe io o loko, ma ka aoao ma Ewa iho o Kaumakapili, ma ka puka nui e komo aku ai iloko o kela hale hoomana o na Pake. I ka wa mamua iho o keia ulia ae la, ua hele aku o Kaili ma kauhale malalo aku o ua hale hoomana la a loaa aku la iaia ka omole, a hookomo iho la iloko o ke eke o kona kuka, a pela no kekahi popoki uuku, ua hookomo iho la no oia iloko o kona kuka. Pau hoi ia, hele aku la imua o kekahi Pake a kuai aku la i mau hua inisi (opiuma) nana a loaa mai la no hoi, a kipaku mai la ka Pake e hoi. Hoi mai la ia me ka namunamu ana, a ma ka puka pa i hoike mua ia ae nei, loaa iho la keia Pake i hoehaia a u nonoke iho la i ka hoopaapaa, a oia kona manawa i wehe ae ai i ka omole a paki i ka Pake a moku nui ma ka aoao akau o ka ihu a kahe awai mai la ke koko.
                A mawaena hoi o na hora 3 a me 4 o ia la no, ma Kikihale, ua houia iho la kekahi Pake opio e kona hoalahui no me kekahi pahi loihi he eono iniha ka loa ma ka opu a oili mai la ko loko iwaho. O ke kumu, pela ka mea i hoikeia mai ia makou, e u noho ana ka Pake i eha a me ka mea nana i hou e hookala i ua pahi la me ke apuapu, a ia laua paha e noho ana pela me ka nanea nui, ua ulu ae la ka manao kuko iloko o ka mea limakoko e hou i keia opio Pake, oiai, he kuonoono oia. Nolaila, ua hou koke aku la oia i ka pahi ma ka opu a pau pono ka maka o ka pahi iloko a hoomaka ae la e uneune, a i ka ike ana paha e pilikia ana keia opio, ua hoomaka aku la ka limakoko e holo a nalowale. Ua laweia ae ka mea i eha no ka Halewai a mai laila aku i hoihoi loa ia ai no ka Halemai Moiwahine.

He 80 ka nui o na ma'i e noho nei ma ka Halemai Moiwahine a hiki i keia la.

KELA A ME KEIA.

E ku mai ana ka Monowai mai na Panalaau Hema mai i ka Poaha iho.
                E huli hoi aku ana no Iapana o Shimi zu, ke Kanikela Iapana i pau iloko ae o ke kau hooilo.
                I ka Poakolu iho e hookuuia mai ai na limahana Pake e hoomaluia nei ma Kahakaaulana.
                E heluhelu iho me ke akahele i ka makou mau olelo hoolaha hou e oili aku la ma keia helu.
                Ua hele aku e ike i ke Kuhina o ko na Aina E hou ke Komi sina Beritania i kakahiaka Poalima iho la.
                Ua lilo ma ke kuai kudala i na keiki a Woka kela mokupea popopo i moe malie iho nei makai iho o Ulakoheo.
                Ua hoolakoia aku na makai me na palemai huluhulu i kakahiaka Poalima nei. A aeia aku lakou e aahu ia mau lole i ka po wale no
                Ua hoike ae o Kauka Wa yson o ka Papa Ola, he nui na poe i loaa i ke kunu kalea, anu a me ka ma'i ma ka opu ma ke kulanakauhale nei.
                Ua pinanaia e na huila o ke kaapio helu 150 he keiki Pake uuku i ka auwina la Poalima nei ma kahi kokoke i ka uwapo o Haaliliamanu, aole nae i eha.
                He $250 ka hoopai a ka Aha Apana i kau aku ai maluna o Wale Davi si no ka loaa ana aku o kekahi eke me na kini opiuma iloko o kela mau pule aku nei.
                I ka Poalima iho la i hoomaka mai ai ka pouli o na ao a helelei liilii mai na kulu pakaua a hiki i ka Poaono iho la. A i keia wa he keu a ka ukele o na alanui.
                Ua hoea mai ma ke Kopatika o ka Poalua iho la ke Kanikela Kenerala hou o Iapana ma Hawaii nei me kana wahine, a eia ke noho nei ma ka Hotele Hawaii.
                Ua hookohuia aku o Kauka I ga Mori, he Kepani, i kauka malalo o ka Papa Hoopae Limahana. I Iapana aku nei oia a o ka hoi ana mai no ia ma ke Kopatika.
                He eha poe haole mahuka i manao e loaa ka lakou hana maanei i hoihoiia aku no Kapalakiko maluna o ka mokupea Am y Turner i ka pule i hala iho la.
                He Lakeke Huluhulu Polu Wahine ka i loaa a eia i ke keena o ko makou Puuku e waiho nei. O ka mea nona ia waiwai e pono e kii mai me ka uku i na lilo.
                Ua ku mai i ka auwina la Poalua iho la ke Kopatika mai Kina a me Iapana, a i ka hora 10 ae o ke kakahiaka Poakolu mai i hoomau aku ai ia i kona alahele moana no Kapalakiko
                I ka wa e malama halawai ana ka Puali Hoola i ka po Poalua iho la alanui Nuuanu, ua hele aku la kekahi makai e papa ia lakou aole e hale hou malaila a e hookaawale loa lakou ma kahi e. Aole he ae o ke alakai i keia mau hana a ka makai, nolaila, ua laweia aku la lakou a pau loa no ka Halewai, a ilaila i haawiia mai ai ka pono no ka Puali Hoola. Ua hoomau aku lakou i ka lakou hana me ke keakea hou ole ia.
                O ka Auseteralia ke ku mai ana i keia Poalima iho mai Kapalakiko.
                Ua hiki aku i ka $7,888.83 ka aie o kela Hui Hoopukapuka Pakipika i ku iho nei ma alanui Papu, mauka mai o ka Hale Dute. Ua kohoia iho nei ka mea nana e hooponopono na koi ma ke kauoha a ka Aha Kaapuni.
                I ka auwina la Poakolu iho la i lawe ae ai o Lunakanawai Kaapuni Kupa i kona kulana hou, he Kuhina no ko na Aina E a Loio Kuhina no ka manawa, a me kona lawe pu ana i ka hoohiki imua o Alapaki Kauka. I nehinei iho la i malama ai na hoahanau o ka Ekalesia o Kawaiahao i ko lakou anaina pule hope loa maloko o ka hale papai mauka iho o ka halepule, a i keia La Pule iho e komo ai iloko o ka luakini, no ka mea, ua pau loa ae nei na hemahema.
                E noho iho ana i Honolulu nei a pau ke kau hooilo ke kauka Rukini i holo makaikai mai ai i o kakou nei, a e huli aku ana oia i mea nana e a'o kana mau keiki ehiku i ka olelo Enelani. A i keia makahiki ae paha e huli hoi aku ai no kona aina.
                I ka wa a ke kaa kaomi alanui e hana ana ma ka aoao mahope o Aliiolani Hale i ka Poalima iho la, ua noha ae la kekahi papaa lepo a hamama ae la kekahi lua nui o 3x6 kapuai ke akea a me ka loa a he 4 kapuai ka hohonu. Ua manaoia he ana paha, a i ole ia, he luakupapau paha. I ka auwina la no o ka Poakahi i hala i ku mai ai ka Warimu mai na Panalaau Hema. Ia po no i holo loa aku ai no ka Akau. Ua huli hoi aku maluna ona kela loio i noho iho nei i o kakou nei e hoomaopopo ai no na mea e pili ana i kela hihia koi poho i ka laina mokumahu.
                Aia ke hanaia la ma Kapalakiko he mokukuna mi sionari hou no ka holoholo ana ma na Paemoku Hema. E heaia ana kona inoa o Logana II., oiai, o ka moku mua ma ia inoa no, aole he mea i lohe hou ia mai nona. E hoea mai ana keia moku i o kakou nei ma neia mua koke iho.
                Ua ulaa pu ia o luna iho o ke kaa o Aberahama Fenana i ka auwina la Poalima nei ma ke alanui mawaena o ka Hale Mele Hou a me Aliiolani Hale ma o ke ku ana i kela laau e koo la ma ka aoao Waikiki o ka hale, aole nae he ola i poino. O ke kaikamahine wale no ko luna o ke kaa i kela manawa.
                Ua hoopauia aku i ka Poalima nei he eono poe kiai o ka Hale Dute no ko lakou hoohuoi wale ia eia ke hoao nei e hoopae malu mai i ka opiuma. Mamua aku nei, ua hooiliia aku maluna o Likelike kekahi mau pahu opiuma me ka ike ole ia, a me he la, na lakou i ae e hele aku kela mea me ka ike ole o ko lakou poo.
                Ma Soutahametona, Enelani, i make mai nei o J. W. Aukina, he loio kamaaina no kakou o nei mamua, i Okatoba 16. Lehuleha na apana aina waiwai e waiho nei ma keia kulanakauhale nona. Ke hoomanao nei no paha hoi kahi poe kahiko o kakou iaia a me kana mau hana maanei. O ka loaa o kona mau aina maanei kana i ohi mau ai ma o kona poe hope la.
                I ka po a ao ae ka Poaono nei, ua ulu ae he hakaka mawaena o kekahi mau kanaka makai o Kakaako, oiai e hoowali awa ana, a o ka hopena ua kaheawai mai ke koko mai na maka mai o kekahi kanaka ia Kamakaeha me ka moku o ka maka hema.
                O ka hihia o na Kepani i hopuia ai i ka po Poakahi i hala no ka hoohaunaele ma ke alanui Maunakea, ma ka noho ana imua o ka Aha Apana i ka Poaha iho la, ua hookuuia aku ka nui a koe elua wale no, na mea i manaoia o laua ka i komo kukonukonu loa ma ka hoao ana e hooulu hoohaunaele a me ke kue i ka makai.
                Mai Hanalei, Kauai, mai keia mau wahi mea hou malalo iho: "Nui ka inu uala o na kanaka o keia apana, a nui no hoi ka ona a me ka hakaka. Ua hoaoia ae ka Lunakanawai Apana e pepehi e kekahi o kana hunona, a ua pakele oia mamuli o ka nui o na lima kokua. Ua hopuia oia a laweia imua o ka Hope Makai Nui a hookuuia mai no."
                Ekolu mau kaa puiwa i ka Poaha iho la. Hookahi no kekahi

Pukiki, mai ka Hale Leta aku a holo maluna o alanui Kalepa. Aole i poino. O ka lua, ma alanui Moi nei, kokoke i ke alanui Maunakea, he mau kaa i piha i na i'a. Ua hookui aku kahi i kahi a pau na huila i ke okaoka. O ke kolu iuka o Kapalama. Ua holo aku ka lio me ke kaa a hookui me kekahi pou telepona a haki pu ka pou. Ua poino ke kaa a pakele aku ka lio.
                He hoopii ka Mele Poka i waiho aenei e kue ana ia Hanale Walakahauki no ke panikuia ana o kekahi auwai mai ke kahawai mai o Nuuanu e kokoke la i ka pa o Miki, ma alanui Nuuanu. A no Mole Poka hoi ua pono wai la. Na Wili Holo, Pi Ki Keoni, Hanale Walakahauki, a me kekahi poe e ae i pani ua auwai la ma ke kauoha a ka Papa Ola, oiai ke kau korela iho nei. Ua aeia nae e wehe hou ua auwai la i keia wa, aole nae he ae o na poe e noho koke la malaila. E hele loa aku ana paha i ka nui keia hana.

AINA PA-HALE NO KE KUAI.

Aia keia pa-hale ma Kapauhi, ma Waikiki iho o ka Hale Ahahui Opiopio Pake, he 3,120 kapuai-huinaha ka ili.
                No na mea a pau e pili ana, e ninau ia
F J TESTA,
nov 11-mp 327 Alanui Moi.

HOOLAHA WAA PAE.

Elua waa, hookahi waa maoli a hookahi waa papa, i pae mai ma ka mokupuni o Keolaloa, maloko o ke awa o Kou nei, a ke malamaia nei e a'u. O ka mea nona ia mau waa, e pono e kii mai me ka lawe pu mai no i na koina. R. W. DAVIS (Wale).
Honolulu, Nov. 5, 1895.
no v 11-1pl

Kamaa! Kamaa!

O KANE, WAHINE a me KEIKI,

Mai ke Kumukuai Haahaa Loa a ke Kiekie Loa. He mau WAIWAI HOU loa wale no o ke kulana Helu Ekahi.
                O na launa kalepa me na Hawaii ia e konoia aku nei.

D. B. KAMIKA,

Luna Nui o ka Hui Kamaa o na Poe Hana.
                Aia ma Alanui Papu, makai iho o ko N. S. Sachs' Halekuai.
iul 15 nov.11-mp