Ka Makaainana, Volume IV, Number 19, 4 Nowemapa 1895 — Page 6
6 HONOLULU, OAHU, POAKAHI, NOVEMABA 4, 1895.
PUALI PUHIOHE LAHUI
-
Nui ke Ohohiaia ma na Wahi
a Pau a Lakou e Hele la.
[Hoopau ana.]
Eia na olelo a kekahi mau haole i kaapuni hoolohe mea kani. "Owai la o keia poe bana Gilimoa, Sousa, Marine (oia ka bana o Wasinetona), a me ka bana Hawaii ka oi? Ua oleloia o kela mau hana ekolu maluna ae o lakou na helu ekahi, aka, i ka hiki ana mai nei o ka Hawaiian Band, ua komo oia ma ka papa helu ekahi a ua ike makou i ko lakou maikai. Aka, i keia manawa a makou e kamailio nei, me he mea la, your band ka oi aku mamua o lakou." "A ninau mai oukou," wahi a lakou, "pehea i oi ai oukou? Eia: Aole i loheia ko lakou himeni ana maloko o na anaina puhiohe e like me ka oukou e hana nei i ka mea oiaio maloko o ka oukou mau pepa (music), nolaila, o oukou ka helu ekahi, pela ka makou ike oiaio maoli. Ua makepono ko makou hele ana mai nei, oiai, he mau haneri mile me ka nui o na lilo ma keia wahi." A ua like me ka Liberati olelo, aia makou ma ka papa ekahi o na mea kani, ka haole kaulana o ke ao nei ma ke puhi ohe koneta. E komo mai ana oia me makou ke hiki aku i Tekasa, Nolaila, o ka himeni oia kekahi laau hana aloha i ko onei poe, a puni paha ananei ke ao no ia mea, oia no o Hawaii Imiloa ko lawe nei i ka hanohano o ko kakou aina makuahine a na ko Akua e kokua mai ia kakou. Ke hooikaika nei no e nui na oi ana mamua o na aina puni ole o ka honua nei, ke ole na kuia.
He maikai no makou a pau loa, a elua mea omaimai, oia o Dan Kaleikoa, o kona mai mau no he rumatika ma ke kuli, a ua oluolu iki i keia mau la, o John Aiu, oia ko makou mea i papaia o ke kauka, oiai makou i Kikako a hiki mai la ianei nei, ua like me hookahi mahina a oi kona noho wale ana no ke kupono ole ka ke noho i keia aina. O makou a pau loa, oia mau no. Eia no makou i ka Paka nei, ua like me 7 a oi mile ke kaawale mai ke kulanakauhale mai, maluna wale no makou o ke kaa uwila e iho mai ai a me ka hoi ana, me ka aeia o makou e holo me ka uku ole ma ke kauoha a na poo nui o ke alahao o Kanasasa nei.
Ke hoomaka mai nei ka helelei o ka lau o na laau a me ka uhukiia o na mea kanu a hoihoi iloko o na hale aniani, a ke hoomaka mai nei ke anu ke ala ae o kakahiaka.
Eia no makou iloko o ko makou kaa ahi kahi e noho ai, ai ana, na mea no a pau. He kaa nui maoli no keia. He 40 ko makou nui e noho nei iloko o keia kaa a oi aku.
Ke hana nei makou i keia mau po i ka Fire Work (hoolele ahi). Alima po o makou ilaila, nui na mea a na maka e nana ai i na hana kaua o ka wa kahiko, oiai o Amerika Akau a me Amerika Hema e kaua ana, me na hoolele kao ahi o kela a me keia ano i hiki ole ke hoomaopopo, a pela aku.
Ua laki makou i ka loaa ana o na kapa mahana manoanoa, mau paleili manoanoa, mikilima no ka hele ana aku o keia mua aku, no ka mea, ke hoomaka mai nei ke anu. O ka lilo no keia mau mea a makou i kuai ai, he $661 35, o ka averiga lilo o kela a me keia pule kokoke e $200 a oi. He nui no ka loaa, aka, nui no ka lilo. He $40 o ia ko makou lilo i kela a me keia pule no ke kaa o makou e noho nei, me elua kuke paele $12 50 no ka pule, me na lilo liilii e ae, oia hoi, kamaa, a pela aku. He $5 a oi aku no na pooleta e hoounaia nei i Honolulu i keia la aku la. O kau leta a'u e kakau nei, o ia ka hope loa. Malia o loaa hou he manawa, e kakau hou aku no au i leta nau.
Pehea la ke ola kino o ka Lani a kaua? E haawi i ke aloha nui loa ma na wawae o ka Lani Alii, a na ke Akua e kokua mai a e wehe mai i kona mau pilikia a na poe manao ino, lapuwale, hao wale, a pela aku. E haawi i ke aloha i na poe a pau loa o Wasinetona Hale a me Makipine Hale, a o oukou no a pau loa, koe hookahi ole.
J. AEA.
Kulanakauhale o Kanasasa, Misouri, Ok. 8, 1895.
-
I kuu KA MAKAAINANA;
Welina pu kaua: Ua loaa pono mai na helu a pau o kuu milimili o ka mahina o Iulai, a ua ike no hoi i na anoai o kuu aina hanau. He oiaio, ma kela leta mua aku nei a'u ia oe, e kuu MAKAAINANA, ua hoike aku au e waihoohaaluluia ana e makou na kanaka o Kikako a me ka Bana Olelo E o onei. He oiaio, pela io no. A e like hoi me ka'u mea i olelo aku ai ia oe, he laau hana aloha ka makou mau himeni Hawaii i na kanaka o keia kulanakauhale, pela io no. Aole wale hoi i nei kulanakauhale, aka, i na wahi no a pau a makou i kipa aku ai. Nolaila, e kuu MAKAAINANA aloha, ke hoike aku nei au ia oe i na mea e pili ana i ka makou hana ma keia kulanakauhale.
He elua pule a makou i paani ai ma Linekona Paka Aekai, mai Iulai 20 a hiki i Augate 2, a mamuli o ka makeolai wale mai no o kekahi o na keiki lalawai o keia kulanakauhale i ka makou paani ana, ua hoopaa e mai la oia ia makou e paani ma kona paka, mamua o ko makou lilo e ana aku i lokahi poe waiwai e ae, mahope iho o ka pau ana o na pule elua.
Oiai makou e paani ana ma ka Linekona Paka i ke ahiahi o ka Poakahi, Iulai 29, a mahope iho o ka pau ana o na leo mele o ka mahele mua, ua lohe koke aku la makou i kekahi leo me na huaolelo Hawaii, i ka i ana mai - "Heaha la ia i na keiki Hawaii!" E kuu KA MAKAAINANA, he oiaio, ua hokahahaia makou i ko makou lohe ana i kekahi mapuna leo Hawaii i oili mai, mai loko mai o ke anaina o na haole e nonoho ana iluna o na noho, a oiai makou e kaulono pono ana ma kahi o ka leo i pa-e mai ai, ua hoohakuiia mai ko makou puu wai me ka hauoli i ka ike ana aku ia W.W. Holo e hele mai ana me kona kokoolua o Mr. Kalaka, keiki a Rev. Clark, ka hunapule o Kawaiahao i na la i hala Ua lulu lima pu iho la makou a pau me ke ohohia nui no ia oiwi ou e Hawaii. A e like me kela lei gula i kiponaia iloko o kou puuwaii, e Hawaii, o ke "aloha," pela i hekau iho ai ia haawina maluna o makou a pau. Ua pale ae makou i na manao pili kalaiaina mai ko makou mau puuwai ae, a noho alii iho la ke aloha o ke Akua iloko o makou ia mau minute o ka lualai pu ana, a hiki i ka pau ana o na hana o ia po. Ua lulu lima pu iho la makou, hoi no hoi kela, a hoi mai la makou no ko makou home.
Ua hoomau aku la makou i ka makou paani ana maloko o keia paka, a i kukuluia hoi ma kae o ka Loko o Mikikana, me ka piha mau i na la a pau a makou e paani ai, koe na la ua. A oiai, he elua manawa o makou o paani ai o ka la, i ka hora 3 p.m. a pau i ka hora 6 p.m., a mai ka hora 8 p.m. a pau i ka hora 11 pm. Pela iho la makou i hana ai iloko o na pule ma kela paka, me ke ohohia nui ia e na kanaka.
A, e kuu KA MAKAAINANA, o kela bana Olelo E o 32 ka nui, a i kaulana hoi ma Kikako nei he helu 1, ua kauia lakou ma ka ole o Ladana, a he kakaiapola lupe ia nou e Hawaii ponoi, a'u e kaena iho ai, o "Hawaii no e ka oi." Ke kakau nei au iloko ponoi o Sunny Side Paka nei, a malalo hoi o ka malumalu o kona mau lau laau, kahi hoi a makou e paani nei i keia manawa no elua pule.
Ua hoomaka ko makou paani ana ma keia paka i ka la 3 o Augate a hiki i ka la 9, a oiai he hookahi pule o makou i makemakeia ai e paani maanei, a ma ka la 10 ae ua kau ae la makou ma ke kaa-ahi no ke kulanakauhale o Miliwauki, he 80 mile ka loa mai Kikako aku nei. Haalele ia Kikako nei hora 8:15 a.m. o ka Poakahi, hiki i Miliwauki i ka hora 11 15 o ia la no. He hookahi pule a makou i noho ai ilaila, a hoaumoe no iluna o ke kaa ahi iloko o ia pule holookoa, oiai, he kaa moe no ko makou o ka papa ekahi, na makou no i hoolimalima, he rumi kuke, he rumi ai, a he mau keena moe i hookaawaleia no kela a me keia, he kohu home maoli no no ka oiwi ka lako i na mea a pau e oluolu ai ke kino. A ma kahi hoolulu o na kaa ahi i noho iho ai makou iloko o ko makou kaa.
O keia kulanakauhale, he nani ka waiho ana mai o a o, a he nani no hoi na alanui me na uwapo uwai, a he ano oluolu maikai no ka noho ana o keia wahi ia Kikako. E holo ana na kaa uwila maluna o na uwapo uwai, oiai ka muliwai iloko loa o ke kulanakauhale, a eia no hoi iloko o keia kulanakauhale he mau hale hana bia nunui a i noho opaia e Schlitz, Pabst, a me Blatz. A mai a nei aku na omole bia e hoounaia nei i Hawaii nona kela inoa mawaho o ka omole - Milwaukee Beer. Ua makaikai makou ia loko o keia mau hale, a ua ike i ke ano o kahi e hanaia ai o ka bia me na lima hana he mau haneri ko lakou heluna. He okoa na poe hana i ka bia a awaawa, he okoa hoi na poe hana i ka omole, a he okoa ua poe hoopiha, pela hoi me ka heloi ana a ke pani ana i ka umoki o ka omole, he okoa na poe kapili iho i ka pepa mawaho o ka omole, a he okoa hoi na poe nana holoi omole.
He mau wahine kekahi iloko o kekahi o keia mau hana like ole, e laa me ke kapili pepa ana mawaho o ka omole, pani ana i ka omole me ka umoki, ka uhi ana i kela waha o ka omole me ka piula hinuhinu, a he nui wale aku o na kane me na wahine e hana pu ana iloko o keia mau hale hana bia. Ua hookipa ia makou o ka Luna Nui me ka maikai a ua hoomakaikaiia no hoi ma kela a me keia keena like ole, kahi e hanaia ai ka bia. Ua haawi wale ia mai no hoi ia makou e inu e like me ko makou makemake, aka, mamuli no o ko makou makee i ka hanohano o ka oihana a me ka inoa aala ou, e Hawaii, ua lawe ae la makou malalo o ua rula keonimana no ka hanohano o Hawaii aloha. Ua hana makou i ka hana me ke ohohia nui ia ma keia kulanakauhale a hiki i ko makou haalele ana aku i ka la 16 o Augate no Kikako nei, a eia makou ke paani nei maloko o Sunny Side Park, i keia mau la, e hoopau ana hoi i ke koena o ka makou hana maloko o keia Pa-ka, e pau ana i ka la 15 o Sepatemaba, a mai nei aku makou e holo hou aku ai no ke kulanakauhale o Kanasasa, e like me ka pau ole o ko lakou ohohia ia makou, pela lakou i kono hou mai ai ia makou e holo hou aku ilaila no elua pule, ke ole he mau kuia.
A e kuu KA MAKAAINANA, ke