Ka Makaainana, Volume IV, Number 18, 28 October 1895 — Page 5

HONOLULU, OAHU, POAKAHI, OKA TOBA 28, 1895. 5

Kupa wahi, ke lilo io aku hoi oia i Kuhina. E hoomanaoia he wahi kakauolelo wale no oia mamua no kekahi banako a mahope no ka Aha Hookolokolo Kiekie, a mai laila oia i holo ai i Amerika e ao kanawai ai no elua makahiki a keu hoi mai nei. Aohe nae hoi oia i hoike mua ae iaia iho he loio makaukau, eia nae hoi ke piikoi nei. Ina e akahele ole na poe e hooikaika nei i keia Ape (maneo), e loaa ana oia i ka mai—he nui o ke poo.

            Ua palapala mai nei ka Re v. Iosepa Kuke ia Rev. S. E. Bihoba, o ka Hoa'loha, e olelo mai ana aole ka no Alapaki Kauka ka hewa i pelu ai o kona alelo, iaia i haiolelo ai maanei i ka la 4 o Iulai, e hoino ana ia Peresidena Kalivilana imua o kona Kuhina maanei. Wahi no hoi a ua Kuke la i hoike mai nei ua kukakuka pu no ka laua me Alapaki, aole nae hoi nona ka hewa, a ua noi aku oia e kakau mai i haiolelo a nana hoi e hoopuka. Aia, loaa pono no ka nahesa la, eia nae, aole oia i hewa, aka, o ua o Kuke no.

            Ma ka halawai ana o ka Papa Ola i ka Poakahi i hala, a ma ke noi a Keoni Walakahauki, ua hooholoia e noiia aku ko Wailuku Kauka Aupuni e waiho mai i kana hana. O ke kumu ka, wahi a ka oleloia, no ko ke kauka kue ia Lunakanawai Kaapuni Kalua. E hookohuia aku ana ka o Kauka Remona ma kona wahi, he mea ka i lihi launa ia lakou. He nui no paha na hana apiki o keia au, a ia lakou iho no lakou nei ma ae e nana ai.

            Hoole ka ka Oihana Waiwai e ike mai i na kikoo dala a ka Papa Ola, i kakauinoaia hoi e kona Pe residena hou, e Keoni Walakahauki, ke pani o Wile Kamika, a ke hoi mai no oia mai Nu Kilani iloko o eono a ehiku paha pule, alaila, pau no o Keoni a noho hou ae no o Wile. Ua paneia mai ka aia a hoikeia aku ko Keoni kohoia ana i Peresidena a me ka hoolahaia ae no hoi, alaila, loaa mai ke dala o ia mau kikoo. Auwe no ka hoi e, i ke alo iho la no a o ka hoohokaia mai la no ka hoi ia.

            No ko Alapaki a me ko Kamika minamina loa paha ia Kalua, me kana ino no i hana ai, ua paa no oia ma ka oihana, a no ke kue ana hoi o ke kauka ia Kalua, e pau ana oia. O ka lapuwale loa nae hoi o keia hoopau ana, ua haawi mua ia ka kela kulana i kekahi hanaiahuhu a ka Papa Ola, a o ke kumu paha hoi ia o Keoni i aa loa ai e noi aku no kona waiho mai. Aole makou he hoa'loha no Kauka Amike, aka, o ka pono ka makou e nana nei.

            O kekahi poe kamalii e alakei nei ma na kulana oihana Aupuni, o ia na kauka kamalii o Amerika mai, i lawelawe mua olo paha hoi i ka oihana malaila a ikeia ko lakou kupono. Eia ianei kekahi o ia ano poe, a mamuli hoi o na hooikaika ana a kekahi poe e ae, ua loaa ka hilinaiia aku e ka Papa Ola a loaa kahi oihana. O ka makou hoi ia e olelo ae ai, ua kupono anei hoi lakou e hilinaiia me ka nana a malama pono ana i ke ola o ka lehulehu o na wahi o lakou e hoonohoia aku ai? Ma ko makou manao, ea, aole loa! He poe holona no lakou.

            Ina i kela au na hoolilo dala uko ole no na huakai waiwai ole, nui na waha o lakou nei ma ae i ka walaau a ukauka wale,— e mea ai a mea iho i ka alunu a puni dala. Aka, i ku iho la hoi ka hana ia lakou, mumule loa na nuku a kaia ana no i na waha ulaula o lakou. O keia au ka maopopo loa i ka alunu a puni dala, o ko lakou akua nui ia e hiolani nei o ka po a me ke ao. Aia wale no a na ke Aupuni e uku na lilo o ka hele hoomaha ana, alaila, hiki ke hele, a he hoopalaimaka wale no hoi ka hele ana no kekahi hana i manaoia, he mea hoopula mai ia i na maka o ka lehulehu.

Ahahui Hawaii Opio.

                I ka po Poaha nei i malama ai ka Ahahui Hawaii Opio i na hoomanao ana no ka piha ana o ka makahiki hookahi o ke ku ana o ia hui. He mau haiolelo me na himeni ka mahele mua o na hana, a pau ia, ua paholaia mai la na pa hau kilima a me na meaono i ke anaina. O kahi mea hilu loa, o ke pa hau kilima wale no ka kekahi poe e ai ana, aohe meaono. Pau ia, paholaia mai la na omole waimomona. Iloko no o keia wa e haawiia nei o na mea-ai mama, ua haawi mau himeni hoonanea mai la kekahi mau lala o ka hui. A ua hoomauia na hana a hiki i ke aumoe loa ana, hookuuia. Aole no i mahuahua loa na makaikai i hiki ae.

            He mau pule i hala ae i hoopau wale ia ai ka hihia hoeha o Ilai Crawford, i hoeha ai i kekahi Pake a haki ka wawae hema.
            Mawaho iho o kahi noho o Kamuela Paka, ma alanui Moi nei, i hookui ae ai na kaa hehiwawae o kekahi poe kamalii haole, oiai lakou e holo heihei like ana i ka Poalima nei, a pau nui ana i ka hina ilalo a eha. Aole nae hoi i ke kukonukonu loa, a ua nui ole no hoi ka poino o na kaa o lakou.

JOS. U. KAWAINUI.
Ua Hele Kohana, Ua Hala, Ua Pio ka Lamaku, a Nalo Loa.

"Kuu pae opua i Awalau,
Kualau ka ua koko i ka moana,
Pa uli hiwa ka Hoolua,
Pa ke kau, malie Kona, ua lai lua,
Haki kauhola kaheka nalu o Kapaelauhala,
Hoala i ke kaikoo o Maliu e— ,
Ko maliu ole mai i ka uwalo a—!"

            Ae, ua hala a ua pio ka lamaku o Io sepa Ulumaialii Kawainui i ka hora 4 o ka wanaao Poakolu iho la, ma kona wahi makai o Apua, i ke 54 o kona mau makahiki o ka hanu ana i na ea o keia ao inea. Me ka mai ole a me ka emoole loa oia i niau aku la ma ke ala polikua a Kane, he ma'i ka ma ka puuwai. Ua ala ae ka no ka hele aku e inu kope, aka, ua inu ole, a hoike ae la ka i ka wahine e haalele ana oia iaia a me na lei a laua. I ka makahiki 1841 kona hanauia ana ma Pueokahi, Hana, Maui, na Kawainui (k) a Keawekunane (w). He eha ko lakou nui mai ka puhaka mai o ko lakou mau makua, oia o J. U. Kawainui, Mailohi (w), Kahoona (k), a me Beniamina W. Kawainui. I ka 1856, hiki mai lakou i Waikiki-waena a ma kahi o Kuluwailehua i noho ai. Mai laila mai e hele ai i ke kula o Kamoiliili, a mahope i Kahehuna, a o ko makou makamaka o Kamoiliili, J. W. Mikasobe, kona hoa holoholo o ia mau la panoa o ka aina.
            Mahope iho o kona hemo ana mai ke kula Alii o Kahehuna, ua noho hana aku oia me H. M. Wini, ma ke ano he mea kakau manao no ke Kuokoa. I ka makahiki 1877, ua kuai lilo mai la oia me kona pokii i hala e aku i ka nupepa Hawaii Ponoi mai ia Kimo Olo a me Balaka, a i ka malama o Ianuari, 1878, ua hoopuka ae la laua i nupepa na laua ponoi iho, oia ka nupepa "Ko Hawaii Paeaina." I ka haalele ana mai o kona pokii, ua auamo hoomanawanui oia i na ehaeha a pau o ka hana maluna o kona hokua a hiki i 1892; ua hoolilo aku la oia i kana nupopa malalo o H. M. Wini, a i ka wa i hoohuiia ae ai o na nupepa Kuokoa a me ko Hawaii Paeaina, ua lilo ae la no iaia ka hanohano o ka noho lunahooponopono ana, a ma ia kulana no oia i noho ai a hala wale aku la no i ke ala hoi ole mai. Minamina wale!
            I ke au o ka Moi Kalakaua, o Simona K. Kaai ke Kuhina Waiwai, ua hookohuia oia i Luna Helu a Ohi Auhau no Koolaupoko. He mau kulana hanohano e ae no kekahi i loaa iaia, e laa ka noho hoa ana no ka Ahakuka Malu a me ka Papa Hoonaauao, aka, no kona hoino loa i ka Moi Kalakaua a me kona Aupuni ma ka laua nupepa Paeaina, i ke au o Kipikona ke Kuhina Nui, ua laweia aku ia mau hanohano mai iaia aku. A e ole kona huli ana ma ka Aoao Hoomaemae, kohoia ai oia i Lunamakaainana no Hana iloko o 1887, a mamuli no hoi o kana hookikina a hoopahele ana i kipakuia ai o Kamauoha, Kauhi a me Luhiau mai ka Ahaolelo aku no ke kipe. He koo oolea oia no keia Aupuni e ku nei, a i hoike hoi no ko lakou hilinai iaia, ua kohoia oia i lala no ka Ahakuka Malu Repubalika.
            Ia auwina la Poakolu no, hora 4:30 i hoolewaia aku ai oia no ka ilina o Kawaiahao malalo o na lawelawe haipule ana a Rev. H. H. Paleka. Ua alakaiia ka huakai e ka Puali Puhiohe a me ka Puali Makai. O na hapai pahu, o J. Nawahi, J. E. Bush, F. J. Testa, John Ena, J. L. Kaulukou, S. K. Kane, John Nota, E. K. Lilikalani, S. M. Kanakanui, a me W. R. Farinetona. Pau ka pule ana ma ka ilina, ua mele ae na kaikamahine o ke Kula Kaikamahine o Kawaiahao i kekahi himeni, a haule ana kona kino wailua koou puanuanu iloko o ka lua, a ma ka pa ilina o ka ohana o ka wahine i waihoia aku ai kona kino lepo iloko o ka opu ana ole o ka honua, "e hoomaha iloko o ka maluhia" no ke kali ana i ka la hookolokolo hope loa. Aloha wale!
            Lehulehu na poe koikoi o keia Aupuni i hoea ae a i komo i ka hoolewa, e laa o Pe residena Kole, na Kuhina Haki me Kini, Lunakanawai Kiekie Alapaki Kauka me ka wahine, H. E. Kupa, Porofesa Alekanedero, a me kahi poe e ae.
            O na hoohiwahiwa pua o kela a me keia ano, ua hoouluwehiwehiia maluna iho o kona pahu, a pela no hoi ma ka ilina, a ua nui a lehulehu na makamaka a me na hoa'loha i ukali aku i kana huakai hope loa, e hoike ae ana hoi he mea ole ke kulana kalaiaina o kahi, aka, o ka launa oluolu a me ka noho aloha ana ka mea oi loa aku.
            Ua haalele iho oia he wahine a me elua keiki mahope nei e u aku nona, a me lakou makou e kumakena pu aku nei iloko o ko lakou mau hora o ka luuluu.

            Ma ka hoopii iho nei a Kapena Kalune e kue ana i ka aeia o ka hale keaka Pake hou ma Aala e weheia, he mau pule i hala ae, ua laweia aku he puali puhiohe Pake imua o ka Aha Kiekie e puhi, ma ke kauoha a na loio o ka mea hoopii, Kakina a me Lopikana. Eia nae, aohe no i ko ka mea i makemakeia.
            Poakahi i hala, ma ka Au seteralia mai, i huli hoi mai ai o Porofesa H. Bega, kumu a alakai o ka puali puhiohe Aupuni, me ka maikai no o ke ola. Sepatemaba 20 oia i haalele ai ia Geremania a huli hoi mai a hoea mai la hoi. Ua eleu no, a ua nui no ka hoi ua mea ana i ike ai ma o, a ua hoi ae no hoi ma kana hana maa mau. Keko!