Ka Makaainana, Volume IV, Number 18, 28 October 1895 — Page 2

2 HONOLULU, OAHU, POAKAHI, OKA TOBA 28, 1895.

PUALI PUHIOHE LAHUI

Nui ke Ohohiaia ma na Wahi a Pau a Lakou e Hele la.

I kuu KA MAKAAINANA;
            O ka mea hou a'u e hai aku ai ia oe, o ia no kekahi haole kaulana o Ame rika nei, a i kamaainaia kona inoa a puni, o Porofesa Leberati, a he "cornet" kana ohe alakai. He kumu puhiohe oia no na haumana he 60 a oi, a mamuli o kona lohe mau aku i ka makou paani ana a me ke kaulana mau hoi maloko o na nupepa, nolaila, ua komo iloko ona ka manao uluhua, e ake ana e ike kumaka ia makou. A oiai hoi, he aelike kana i hoopaa ai me na haole keaka lio no eono mahina (ua poina ia'u ka inoa), a i ka pau ana o kela aelike, ua imi hele ae la oia ia makou i Kikako. A oiai hoi, ua haalele aku makou ia Kikako no Kanasasa nei, nolaila, ua imi loa mai la no oia ia makou ianei. A oiai hoi, ua lohe mahuihui iho la makou i ko makou luna hoohana nui, e hele mai ana oia e lohe i ka makou paani ana, nolaila, e like me ka houpo i lalapaia e ka wiwo ole, pela iho la makou i kali hoomanawanui ai no ka manawa e hooiliia ai ke kaua hahana o na leo mele. Oiai ke sekona hope loa o ka uwati i ka hora 8 p.m. o ka la 25 o Sepatemaba nei, ua liuliu ae la makou me ka makaukau nui no ka hoouka ana aku i ka makou mau poka mua loa o na leo mele i na pahu kani o na poe makaikai, a oiai hoi, o ua kaeaea la kekahi iloko o ia pohai ia manawa, ua koha pono aku la i kona mau pepeiao ka makou mau poka mua loa o na leo mele, oia hoi, "Liliuokalani March." Na keia hooili kaua mua loa i hoohaalulu aku i kona kino mailuna a lalo e hooponopono ana hoi i kona puuwai kapalili i ka lana malie.
            Mahope iho o ka hoomaha ana o nei hooili kaua, ua pii koke mai la oia me ko makou lunahoohana nui ma kahi a makou e puhi ana, a hoolauna mai la ia makou. A penei kana mau olelo: "I na keonimana hanohano, hano,—aloha oukou. Mamuli o ko'u lohe mau ana i ka oukou bana mai kekahi poe ae i lohe i ka oukou paani ana, ua olelo ae kekahi he bana maikai oukou, a o kekahi hoi aohe he maikai loa. Nolaila, ua nui ko'u uluhua no ia mau lono, a oiai hoi au e ike mau ana iloko o na nupepa no ko oukou mahaloia, nolaila, ua imi hele ae nei au ia oukou, a ano ke ike nei au ia oukou, a me ko oukou paani ana, a'u e olelo ae ai, ua kauia oukou ma ka papa helu 1 o na bana o Amerika nei. A pehea la ka hiki ia'u ke kamailio hou ae no oukou, oiai ka oukou mau himeni nahenahe e hoomaloohaha mai ana i ka holo puni ana o ke koko i ko'u puuwai. Nolaila, ke haawi aku nei au i ko'u mahalo nui a me ko'u aloha ia oukou."
            O keia maluna ae i Kanasasa nei ko makou loaa ana iaia, a iloko hoi o ka Paka a makou e paani nei—Wasinetona Paka.
S. K. KAMAKAIA.
            Kikako, Ilinoi, Sept. 3, 1895.

J. HELELUHE;
            Aloha kaua— Eia makou i ke kulanakauhale o Kanasasa nei. Ua haalele aku makou ia Kikako i ka la 18 o Sepatemaba, a ua hiki mai i kahi a makou i noho mua ai, oia o Wasinetona Paka, a e haalele ana makou i keia wahi ma ka la 19 o Okatoba nei no Tekasa. No elua pule e noho ai ilaila a hoi hou mai no i Kikako, ke ole na kuia.
            He nui ke ohohiaia o ka bana Hawaii mai ko makou hiki ana mai ianei a hiki i keia la, a ke lulu dala la ko Kikako poe waiwai no ko makou hoi hou aku ilaila. Ua kaa ka hanohano i ka bana Hawaii ma ka la hookahakaha o na poe "Kansas Karni val Krew." Aole i kana mai ka nui o keia huakai o ke ano hana o ka wa kahiko, o na kii o kela a me keia ano e kauoia ana e na paa lio, a me ka huakai mai mahope me na puali puhiohe, a me na pualikoa. Ua like me elua hora a oi e ku ai oe e nana i keia huakai. O makou ka hope loa o ka huakai me ka moi o na hana o ka la a me na poo o ke alahao o Kanasasa a me Wasinetona Paka nei. O makou mamua pono o ke kahua o keia huakai e nana ana i ka hele ana o kela a me keia puali puhiohe, ua 20 a oi aku ka nui, aohe wahi mea a huroia aku. Aka, i ka wa o makou i haalele ai i keia kulana me na poo o na hui, ua kaa ia makou na huroia ana mai kela a me keia aoao o ke alanui, kahi a ka huakai e hele nei, oiai, o ke mele mua a makou i puhi ai, o ia o "Liliuokalani Maki." Mau miliona o na miliona ka nui o na kanaka, hiki ole ke hoomaopopo aku.
            He paa lole keokeo ko makou me ka papale kapu eleele me ke kalaunu. O ka like o ka lole, ka papale, a me ka malama ana

i ka manawa o na wawae a me ke kulana o kela a me keia keiki, o ia kekahi mea mahaloia e na mea a pau, a e lohe aku no oe i ko lakou olelo mai, "Hawaii, Hawaii, Hawaiian the better music." O ka kekahi poe hoi,—Kalivilana bana, a o Kirima bana hoi ka kekahi, kohu "moa uakea" ke alawa aku oe mahope e nana ai.
            O ko makou ikaika puhi no ka hele ana iloko o 4 mile a oi a hoi mai, aia wale no ma na mele paanaau ia makou, o ia o Liliuokalani maki, Kaiulani, Sweet Lei Lehua (me ka himeni pu), Sunny Side Park Maki, Adimerala Balaunu Maki Helu 1, a me Amerika. O ia iho la ka nui o ka makou mau mele e puhi ai me ka pepa ole. Ua like makou me he akua lapu la, wahi a lakou i ka puhi aohe pepa i ke alo. O kekahi poe bana ina makou e kaalo iho mamua o lakou, e pau ana ko lakou puhi ana a e nana pololei mai ana ia makou, he ike aku no oe i ka huhu o ke alakai (oia ka Drum Major), a me ka hewa o ka hele ana. O ka himeni ka lakou mea makemake loa, aole hiki ke hoopauia ko lakou paipai ana a hiki i ko makou kaawale loa ana aku. A pela iho la na hiohiona o ia la 3, o ia ka Poaha, ka la i weheia ai o keia huakai ma na alanui o Kanasasa nei.
            Ma ka La Pule, la 6 nei, ua puhi makou ma ka paka nei a ua nui na poe i hele mai e hoolohe. A oiai, ke hoomaka mai nei ke anu, aole makou i puhi ia mau auwina la no ke puanuanu. A no ka hoolaha hoi o ka Poaono nei ma na nupepa e pili ana i ko makou puhi ianei i ke Sabati, nolaila, ua hele mai kekahi poe mai kahi loihi mai he mau haneri mile ka mamao, no ka makemake e ike pono ia makou, oiai, ua ike wale iho no lakou ma na nupepa a ua ikemaka iho la nae i ka "Nani o Aipo."
            O na poe i ikemaka i ko makou kai ana i ka huakai, ua hele mai lakou e hoomaikai imua o makou a me na mahalo ana. He nui ko lakou hauoli ma ia la. O na poe i hele mai mai kahi loihi mai, ua hoopuka mai lakou o makou ka i komo iloko o ka papa ekahi o na mea kani a me na himeni, a pela aku. No ka nui o ka lakou makemake e lohe pono, aole o lakou manao no ke anuanu. O na mahalo ana a nui maluna wale iho no ia o na keiki "ai pohaku," a aole no kekahi poe e ae.
            Ke pipili nei ko lakou hoolauna ana me makou a ke noi mai nei i ko makou oluolu e ae aku, e hauoli pu me lakou ma kekahi papaaina mamua o ko makou hele ana a haalele ia lakou no Tekasa, a ke hooikaika nei lakou e hele e noi i ko makou agena e noho hou i hookahi mahina, eia nae, ua hoopaa mua ia ko makou aelike no Tekasa no elua pule.
(E hoomauia aku ana.)

            Ua ku mai a holo no i ka auwina la Poaha iho la no na Panalaau Hema ka mokumahu Alameda.
            Eia no na pualikoa o ke aupuni ke maki hele nei ma na huina alanui i keia mau kakahiaka nui.
            I ke ku ana mai o ka Auseteralia i ka Poakahi i hala, ua huli koke aku la na kiai o ka Hale Dute i na wahi poopoo a pau o luna o ka moku ina paha he opiuma kahi ana i lawe mai nei, aole nae he mea i loaa aku.

HOALOHALOHA ALII.

No ka Make Ana o ia Alii Hanau o ka Aina Nei.
Na ka Hui Lei Mamo.

                I ka Moiwahine Kanemake KAPIOLANI, a me na Mea Kiekie na Keikialii DAVID KAWANANAKOA a me JONAH KALANIANAOLE.
                Aloha oukou a pau me ka malu mai ke Akua mai.
            Oiai, ua oluolu i ke Akua Mana Loa, ke kii ana mai a lawe aku i ke aho o ka Mea Kiekie ke Kama'liiwahine VIRGINIA POOMAIKELANI ma ke ahiahi liula o ka Poakolu, Okatoba 2, M. H. 1895, mauka o Kalihi, Honolulu nei, a ua haalele mai oia ia oe, e ka Moiwahine, a me na Keikialii, no ke ala hoi hou ole mai;
                Nolaila, ke waiho aku nei makou i keia Olelo Hooholo Hoalohaloha malalo iho nei:
            E HOOHOLOIA, ke komo pu aku nei makou, na Lala a pau o ka Hui Lei Mamo, e kumakena, a e kanikau pu me oe, e ke Alii ka Moiwahine Kanemake, a me na Keikialii. A ke pule nei makou i ke Akua Mana Loa Nana no e hoomama mai, i ke kaumaha a me ka luuluu no kou pokii alii i hala e aku, e kauhola nei maluna iho ou, a me na Keikialii i hoonele ia i ka makua ole.
                E HOOHOLOIA, i hookahi kope o keia Olelo Hooholo Hoalohaloha i ka Moiwahine Kanemake, a me na Keikialii, a i hookahi kope e hoopukaia ma na nupepa o keia kulanakauhale.
            Me ka mahalo, ma o ko makou komite la, MISS MALIE KALEIKOA, MRS. KAUAHOA KALOLII, MISS KELIINOHOPONO, MISS KAPUNI KALOLII, MISS MARY HALIILEHUA,
            Hanaia ma Honolulu nei, Okatoba 15, 1895.

Mai na Ohua ma Honuakaha.

                I ka Moiwahine Kanemake KAPIOLANI, a me na Keikialii DAVID KAWANANAKOA, a me JONAH KALANIANAOLE.
            Welina: Oiai, ua oluolu i ke Akua Mana Loa, ka lawe ana aku i ka Mea Kiekie ke Kama'liiwahine VIRGINIA POOMAIKELANI, kou pokii Alii, a o kekahi o ko makou mau haku ma ke kino, ma ke ahiahi liula o ka Poakolu, Okatoba 2, 1895, a lawe loa aku la iaia ma kela ao, a ua haalele mai oia ia oe, a me na Keikialii, e noho u aku nona ma keia aoao, a me makou pu hoi kau poe kauwa haahaa o kou aloi alii nei;
            Nolaila, ke waiho aku nei i keia Olelo Hooholo Hoalohaloha malalo iho:
            E HOOHOLOIA, ke komo pu aku nei makou a pau, na ohua kane, na ohua wahine, a me na keiki a pau, e noho ana ma Honua-