Ka Makaainana, Volume IV, Number 16, 14 October 1895 — Page 5

HONOLULU, OAHU, POAKAHI, OKA TOBA 14, 1895 5

nele a ilihune oia, aohe nae he haawi hana ia mai nana, i pono ai hoi oia a me na keiki makuahine ole.

                He mau mea e ae no kahi ana i hoike mai, ua manao nae hoi makou na na poe no o kona ili e hana aku nona. Ina hoi ua oiaio kana mau mea i hoike mai ai, alaila, aohe io aku no he makaia a koe mai. Oiai hoi, ua pau aku na pono i ke puhi ahi ia, aohe loaa mai he panai kupono no ia mau mea. Apiki io no?

                Ua hookohuia ae o L. D. Keliipio, kekahi lala o ka Papa Ola, i luna nana i'a no ka makeke hou, no $15 ka uku o ka pule. O kekahi keia o na hana kupaianaha o ke ano hou o keia au, o ka hoonoho ana aku o kekahi oihana, oiai ia mea i hoonohoia aku, e noho ana he lala no ia oihana. Me kona hilinai ole ia mawaho ae o ia poai, hookohuia aku no nae i mea e laoa ai o na hoa oiwi ma ka oihana pakaukau i'a. Eia nae, ua hilinaiia oia e ia ponoi iho a me lakou ma iho, pau ae la no, a aole loa hoi mawaho aku.

                Like loa keia hiki ole ona ke hilinaiia me ka hilinai ole ia o na palapala ae e hele ma o a maanei o na wahi i hoomaluia a i kiaiia, ana hoi i kakauinoa ai ma ke ano he agena no ka Papa Ola no ia hana. Na na poe koa no a lakou i hoole ia mau palapala ana, aole na hai ae, a hoolaha okoa ai ka Papa Ola ma ia hope i na poe i kuleana e hoopuka ia ano palapala. O ko lakou nei ma ae mau no ia, aia no a halawai me ke kuia, wikiwiki e hooponopono ae. A me he la, pela aku ana no paha hoi me nei, oiai, aole oia he kamaaina no ke kai.

                Mai na huina dala mai a ka Ahakuka Malu Repubalika i hooholo ai no ka Papa Ola, no ka uku ana hoi i na lilo mamuli o ke kolera, ua pau aku ma kahi o $27,500. I kakahiaka Poaono nei i noi hou aku ai ke Kuhina Waiwai i $25,000 hou a ua hooholo lokahi ia me ke kunukunu ole. Ma ko makou manao nae hoi he mau hoolilo dala kupono loa kela ke pau pu aku hoi na poho e ae i ka ukuia, e laa na hale i puhi ahi ia a me na loi kalo i hoopoinoia, mamua ae o na dala e lilo nei no na koa.

                Auwina la Poaono nei i haawiia mai ai i ko makou puuku he palapala noi dala na ke Komite Kukulu Hale o ka luakini o Kawaiahao no keia La Pule ae, la 20. Minamina loa makou i ka loaa mua ole ana mai o ia palapala i ka wa pono mamua ae, aia a ano haiki, alaila, haawiia mai. Ua lawa aku la no hoi paha i ke Kuokoa hookahi, a he makehewa hoi ia makou ke pakui aku.

                Eia nae hoi, e nema aku ana makou i ua uwalo noi dala la. Ua oleloia ae,—"Ua paa a ua lanakila ka hana a oukou, iloko o keia makahiki piha i hala ae nei me ka aie ole." Ina ua paa a ua aie ole, no keaha mai la hoi keia noi hou i ko ka lehulehu kokua aku. A ina no hoi "ua oi aku ka paa, ka ikaika, ka maikai a me ka nani i kona mua," alaila, no hea mai hoi keia uwalo hou ana.

                No ka mea, wahi no a ua komite nei, "no ke Akua ka Hale." Auhea oukou, like ole hou no kakou malaila. I ka makou hoomaopopo iho, me he la ka hoi no ke kanaka no ua hale. Ina paha hoi no ke Akua, aole loa e hanaia na hana a kanaka malaila, a hooliloia hoi ua wahi la i hale hoahu no na mea make a i wahi ohumu hoi no na powa. O ka makou hoomaopopo ana keia no ia hale, a pololei ole ai hoi ka olelo ana he hale no ke Akua.

                Aka, eia makou ke kaha loa aku nei mawaho ae o ka manao nui o ua palapala la. O "na wahi hipuu lau oliva a ke aloha" ka i makemakeia, "e pupu like me ka lokahi, i hookahi puuwai, i hookahi umauma, i hookahi pana ana, a i hookahi ka manao ma keia hana maikai." Ke waiho aku nei no makou aia no ia i ko ka lehulehu manao, ina paha he hana maikai io, kokua aku, a ina aole, mai no a kokua iki aku.

                Ke liuliu nei na hoohana ana a ke Aupuni no ka hoohohonu ae i ka nuku o kahawai aenei ma ka uwapo a Haaliliamanu, a ma ke kahua akulikuli mauka iho o ke alanui a ma ke alo iho o na hale holoi lole e luia ai ka lepo pilopilo. He keu no a ko ke Aupuni apiki, he weli hoi i ka ma'i, eia no nae hoi ke hana aku nei, i ka mea e ma'i ai. Aia a pa iho ka la i kela lepo e omoia ai a lu aku malaila, alaila, pii ae na ea o ka ma'i, a e noke wale no na laau hoomaemae, aole loa ia e pau. Ina o ke ola o ka lehulehu ka i makeeia, aole o ia hana ka mea e pono ai, aka, e hooki koke.

                Ua pii ae ke kai o kekahi o na nupepa Iapana, o ia ka Volokano, no ka hooleleia ana mai o elua ohua mai ka mokumahu Kina, i nei ku ana mai nei. He mau ohua helu ekahi laua, he haole a he Kepani, a mai Iokohama mai, eia nae, ua hoike ae ka Peresidena o ka Papa Ola aohe ia moku i ku i kekahi awa o Iapana. Loaa pono paha hoi nei kolohe. O keaha la ka mea pololei? Aole kela mau ohua i hoomaluia, aka, ua hoomaemae mua ia laua a me ko laua mau pono, a aeia mai la nae hoi e pae mai i ke aumoe loa. Kupaianaha no na hana la. Pono loa no keia piena ana o ia nupepa, a o makou pu aku hoi kahi me ia.

                He kunihi kapakahi maopopo loa keia i ka nana aku; a no keaha la? No keaha no la hoi i hoohalike ole ia ai e like la me kahi poe e ae. A pela no hoi me kahi poe kalepa o kakou nei, aohe a lakou nana ana aia a aeia na palapala a lakou e laweia e kela moku, a ina e lawe ole ia, alaila, aole e aeia na eemoku Pake e hoolele ae i Kahakaaulana. Ua hanaia ia mau mea, ua hala na palapala, a ua olu nui hoi, a lilo ka hoi ke ola o ka hapanui i mea ole. Pela mau no kakou e hanaia ai, a o kakou ana no ka hapanui e poino ana.

                Ke hiki no la hoi i kahi o na ekeeke, ilaila no la, pokole ko lakou nei ma ae aho. Aka, ina i manao na ona o kela moku e lu mai i ka lakou poe unu ianei, e pono no hoi lakou e ae mai e lawe aku i kahi mea mai nei aku. A ua hanaia e like me ia, nolaila, aohe olelo ana i koe, ua pahua ka moku, a ua ko ka manao o ko nei poe kalepa. Pai a pai!

                Ole loa na mea i hanaia ae no kela poe hapala ka o keia au oehaa. A no na pio kalaiaina hoi e paa nei, o ka makou no ia e kaunui aku nei o ko lakou huikalaia mai. Wahi mai nae hoi a ka lono, i keia malama ae ka, i ka La Hoomaikai Akua, o ia paha ka la 28 o Novemaba ae. Ina no hoi ha pela, pono loa. Aka, aohe no he wa oi aku o ka maikai mamua ae o keia wa ano.

                Ua hoopa hou mai ka Peresidena i ko makou puuku i ka Poaono nei e kakau i manao a mau manao paha e hoakaka ana i ke kanawai aina i hooholoia iho nei e ke kau kuikawa. E loaa ana no ia. Ina no hoi paha e hoolaha mai i ua kanawai la, a i ole ia, uku ae no ia hoounauna ana i KA MAKAAINANA nei, alaila, kamailio aku makou, aole ma ke ano hoopili wale, aka, ma ke ano akea a kuokoa e ahewa ana a e apono ana paha, e like hoi me ka mea e ulu ae ana ma ke kilohi ana ia kanawai a mea heluhelu pamalo.

                Ua luia me ka laaumake na loko i'a elua o lalo o Aala i ka Poaha nei, a ua pau na i'a ulaula a me na oopu i ka make.

Ai Wahi I'a Hou!

                E like me na lono i wawa wale ia ae no ka aeia o na i'a hou e kuaiia ma ka makeke hou, pela no ka mea i ikeia i kakahiaka nui wale o ka Poaono nei. Aole i lele ae ka nalo, aia hoi, ua hoea aku la ma ka makeke na poe puni ai i'a hou no ke ake e loaa mai ona mea omamaka hou, no ka mea, ua hele a hae ka puu i ka ai wahi i'a hou ole i ka ua mea o ka hoomalu a ke kolera.
                O ka amaama a me ke awa no na i'a nui o ia kakahiaka. Aole no hoi i loli ae ke ano o ke kuai ana, aka, ua like no me ko na la mamua aku o ke kolera e holapu ana. He mea ole ka elua i'a i ka hapaha, aia ka nana no ka ono i ka i'a hou. A ua piha mau aku ka makeke mai ia kakahiaka a hiki wale no i ka hora 5 o ke ahiahi.
                O ka Luna Nana, e makaala mau ana oia i ka nana ana i na i'a ano pelapela a pau loa, a he kiola wale no ka hopena o ia ano i'a. O na mea maikai wale no ke waihoia mai iluna o ke pakaukau.

Haunaele ma Kahakaaulana.

                I ka po Poakolu iho la, makai o Kahakaaulana, ua ulu ae la ka hakaka iwaena o na Pake e hoomaluia la malaila a ke Kina i lawe mai ai. Mamua o ka hiki ana aku o na poe kiai e hookaawale, ua kanakolu poe i pau i ka eha a e kaheawai ana ke koko ma ko lakou mau helehelena.
                O ka hora 8 paha ia o ka po nei, ua hoikeia mai la ka lono i ka Halewai, ua ulu ae he haunaele mawaena o na Pake limahana e hoomaluia la ma ka pa hoomalu o Kahakaaulana a me na luna. Ua ohi pupuahulu koke ia ae la na makai a hoounaia aku la maluna o na waapa no kai o laila me Kapena Paka. O na makai me na pu a o ke kapena hoi me kana pahikaua hookalakupua. I ka hiki ana aku o lakou, ua aneane e wawahiia ka aoao mauka nei, a ua hoomalielieia aku lakou a hiki i ka pau wale ana o ko lakou mau manao inaina.
                O ke kumu i ala mai ai o keia haunaele, mamuli no ia o ka lawa pono ole o ka haawina ai o na Pake. Ua haawi uuku loa ia e na poe na lakou e malama ana ka ai, no ka manaoia paha e pau aku ana lakou i ka hookuuia i keia la, nolaila, hanaia ai pela.
                Ua hoonohoia aku na makai i kai o laila e kiai ai a hiki i keia kakahiaka, a aole i ulu hou ae he haunaele mawaena o na Pake a me na kanaka o ke Aupuni.

                I ka wa e hukiia ana ka mokupea Matilda iluna o ke alahukimoku i ka Poakolu iho la, ua paapaaina ae la na mea paahana o ke alahukimoku, a no ia mea, ua hookuu hou ia iho la ka moku iloko o ke kai. Ua hana hou ia a paa kahi i poino a huki hou ia ana ua moku la a kau iluna i ka Poaha mai.