Ka Makaainana, Volume IV, Number 15, 7 October 1895 — Page 2
2 HONOLULU, OAHU, POAKAHI, OKATOBA 7, 1895.
PUALI PUHIOHE LAHUI.
-
Na Lono Hooniua Puuwai no ka
Huakai o na Oiwi.
F.J. TESTA,
Aloha - Eia no makou i Kikako nei i keia mau la, he oia mau no na keiki, aohe ona, he mau keonimana lakou i keia manawa. He nui ka mahaloia o ka bana, he oi loa aku hoi ma na himeni Hawaii. No ia mea, ua piha u ka Sunny Side Paku i na po a pau e noho nei. I Miliwauki makou i kela pule aku nei a hoi mai nei, a ua lawe mai no na keiki i ka hanohano mai laila mai.
I ka la 15 aenei o Sepatemaba e haalele ai makou ia nei no ke ala e hui kino aku ai me ka Peresidena o Amerika, ilaila ka pahu hopu o ka huakai a na kiai naue ole o Hawaii. Alaila paha manao aku ka ike hou i ka aina hanau, e hala ana paha eono o makou mahina ma keia huakai, alaila, manao aku o hope.
Aohe mea hou ano nui o keia wahi, he nui nae na ulua olala e kapapa mau nei.
E oluolu e hoouna mau mai i mau nupepa na makou, a e hai aku oe i ka lehulehu ke lawe mau nei na keiki o ka Bana Lahui i ka hanohano mai ko makou haalele ana ia Hawaii a hiki i keia la a'u e kakau nei. Ma ka po La Pule, la 25 nei, he 1,600 a oi aku ka nui o na kanaka ma ke Sunny Side Paka no ka hoolohe i ka leo o na keiki. Owau no,
L.J. AYLETT
Kikako, Aug. 26, 1895.
-
J. HELELUHE;
Aloha kaua - Ua malama iho nei makou i ka la hanau o ka Haku o kaua, o ia ka Poakahi nei, la 2 o Sepatemaba, oia hoi, Hanau, Ha-na-u-ke-Alii. E like no me ka kakou hana imua ona ka paa ae i ke kiaha a hoopuka aku mamua o ka inu ana, "Hana-u, ha-na-u-ke-Alii," a pela aku.
Mamua iho o ka la i hemo ai o ka inaina (La Pule), he ahiahi malie ia a he po piha loa hoi i na haole, a he mea kamahao loa i na poe a pau ka ike ana no keia mau hoohiwahiwa ia ahiahi, oia hoi, ua kauia ka hae Hawaii a me kekahi hae Maleka maluna o kekahi kumulaau a me ka pou o ke kukui uwila o kahi a makou e puhi nei i na po a pau, me ka hoolewalewaia mamua pono. O na kumulaau e pili kokoke mai ana, ua kauia me na hae hoku o Amerika, aka, he nui ka mahaloia o ko kakou hae Hawaii, oia ka oi iwaena o ka nui hae e kau hoolai ana.
Mamua o ko makou puhi ana, o la ka hora 8 p.m., ua haule iho he mau kulupakaua, a o ia ka makou, i hoopuka ae ai ia manawa, "ke ehu wawae keia o Kalani." He mea kamahao loa keia iloko o ke kalae a malie maikai, a he po huihui no hoi ia. O makou a pau ua hoolawaia me na lei rose o kela a me keia ano, a ua punonohu ka a-i ke nana iho, me ka paa lole hou o makou a me na papale i hoopaaia me ke kalaunu pu. Me he mea la aia no makou i ka aina hanau kahi i kilohi ai iloko o na la kulaia Aupuni o na alii aimoku, me ka nui no o na hoomanao ana. Ua weheia ma ke puhi ana o Hawaii Ponoi, a mahope aku na mele Hawaii wale no. Nui ka hauoli o ka ona nona ua Paka nei. He keiki opiopio oia o 18 wale no makahiki, a ua ae oia i ko makou lealea iloko nei o ka Paka e hana e like me ka mea hiki.
O na mea-ai i hoomakaukauia, o ia no ka poi palaoa, puaa, kamano, akaakai, a me na hua ohia i lomiia iloko o ke pa. Mahope iho o ka pau ana o ka makou puhiohe ana i ka hora 10:30, ua laweia na mea hana a makou a hookaawaleia ma kahi e, a haliiia iho la kahi a makou e puhi ana me na lau laau a hoonohoia iho la na mea ai me ka nohopaa mai no o ke anaina a puni, a hookokoke mai la e nana i ko makou ai ana. Mamua ae o ka ai ana, na kalokalo mua ia ae la e ko makou kahunapule, S.K. Kamakaia, na hua pule a ainama, ua noa. O ka bia mua ka ke kahunapule i kahoahoa ae a wala mai ana, a mahope na hoa e ae. Ua haiolelo kela a me keia e like ae ka hiki, a ua inuia ke ola o ka Moiwahine a me ka Hooilina Moi a me ka ohana alii a me na makaainana, a me ka Peresidena o Amerika Huipuia i noho poo maluna o na miliona kanaka, me ke komo pu mai o kekahi poe haole iloko o ko makou. hauoli ana no ka la hanau o ke Alii Liliuokalani, Moiwahine o ko Hawaii Paeaina. A e ike no oe i na hana o na mele i puhiia ma ia po, a me ke mele i pili i kela ipu (hula) makani a Laamaonao, a me na himeni maloko o ka papakuhikuhi a'u e hoouna aku nei ia oe. Pela pu no hoi me ke mele a J. Libonio i haku iho nei, oia o "Sunny Side Park" maki, a me "Aloha ia Hawaii," he himeni maoli ia. Hora 3 o ka wanaao Poakahi i pau ai na lealea a na opuu rose o Hawaii, ma ia la nui hanau, "ha-na u-ke-Alii," a ua malamaia ka ina hanohano o Hawaii. A ua hala ia la a ke nana aku nei i na mea o mua. O na mea a pau i hanaia ma ia la he mau mea makanaia mai ka ona nona ka Paka nei, oia o Wiliama Masona, a me ka 20 galani bia a me na mea e ae. A he poe lede na poe na lakou na lei rose o kela a me keia ano, o ia na ponimoi, tuberose, koniaka, a me kela ano keia ano i hana po-ke ia.
He nui ka lokomaikai o na haole o keia wahi ia makou i keia mau la e hele nei, aole hoi e like me na la a makou i hiki mai ai ka lohe aku no i ka olelo mai, he poe Ilikini ahiu, he Kepani, he Paniolo, a he poe ai-kanaka, a pela aku, aole nae ia he mea no makou e kanalua ai no ia mau hoino ana. Nolaila, i keia manawa , ke kapaia mai nei makou he poe keonimana, a ke hoea mai nei na hoomaikai a me na mahalo ana ia makou a me ko kakou aina, a me ko lakou mahalo i ka malama i ka hana i na la a pau a ua lilo makou he mau hoa'loha no keia poe, a ua pelu ko lakou mau alelo. He mea mahaloia e lakou ko makou malama ana i ka la hanau o ko kakou Moiwahine, a he la nui no hoi ia ma Kikako nei. Ua hele makou e nana i na kai huakai nui ma ia la, aole no hoi i kana mai ka nui o na kanaka e nana ana i ka hele ana o ka huakai me na haha, mai ke kanaona a kanawalu tausani. Ma ko makou nana ana aole no i komo ia mau puali puhiohe i ka helu. A maia po iho hoi he hauoli nui ma ke Sunny Side Paka mai ka Puali Puhiohe Lahui Hawaii. O ia iho la na hiohiona ilihia i loaa ia makou, me ka pau ole o na hoomanao ana i ka aina hanau o kaua a me kakou a pau, me ka malu mai ke Akua mai.
A ka la 18 o Sepatemaba nei e pau ai ko makou aelike no keia wahi, a e holo hou aku ana makou, i ke kulanakauhale o Kanasasa no hookahi mahina ka aelike. Ilaila no makou i kela mau mahina aku nei i noho mua ai, a ua kauoha hou ia mai e hoi aku ilaila e komo pu iloko o na hana hookahakaha, a he 20 ka nui o na puali puhiohe e hiki ae ana ilaila. Ua lilo ia makou ke alakai ana o ia he luna nui o na puali puhiohe ma o ka hooholo like ana a na luna nui o na alahao o Kanasasa, a o ka bana helu ekahi hoi o Amerika nei, oia ka puali puhiohe Souza, mahope mai ia o makou, a mahope mai ka nui o na bana. Nolaila, he hiki ia Hawaii ke kaena, o "Hawaii uuku no ka oi." Ola ka olelo kaulana a ko kakou Moi i hala, a ke mau nei no a hiki i keia manawa. O na himeni, he laau hana aloha ia na makou e hiki ai ke hoolakalaka i na poe a pau loa. Nolaila, ua pau au maanei.
E haawi i ko kaua aloha ma na wawae o ka Lani Alii e noho hoomanawanui la i ka inea mahope o na makaainana, a pela no hoi me keia mau heluna kanaka e noho nei ma ka aina malihini, me ka pau ole o na manao no na mea e hoea koke mai ana. Me ka mahalo i na Mana Lani.
Owau iho no, kou oiaio,
J. AEA.
Kikako, Ilinoi, Sepatemaba 3, 1895.
NEE KOKUA IMUA.
-
Pauaho Ole ka Hoomanawanui
o na Wahine Oiwi.
Mai ka makou i hoike mua aku ai, eia no ka Ahahui Manawalea Hawaii ke oni a ke hoomau nei ma kana hana maikai i kukuluia ai. Aohe ia he mea hewa, o ka hoomau aku no ka pono loa a hala ae na la poluluhi a makaponiuniu mai ka hoomaluia ana e ka holapu ana a ke ino a weliweli nui o keia au. Ke hala ae keia mau la, "pau ka oe hana," ua pio ka pilihua, ua hala ae ka hune a me ka nele, ua aui ka wi, a ua make loa hoi ka ma'i kolera ahulau.
I mea e akaka pono ai ke kulana o ka hui ma o kona waihona la, eia iho no ka
Hoike Piha Ekolu a ka Puuku:
NA HOOLILO.
Ukuia na bila a -
Metropolitan Meat Co..............$319 93
W L Wilcox..............................457 50
T H Davies & Co .....................76 73
H Mav & Co..............................44 74
H E McIntyre & Bros................5 63
C E Williams & Son..................16 50
Honolulu Steam Rice Mill..........48 00
Hawaiian Hardwar Co................20 00
Union Feed Co., Kaupalenaia.....3 60
McGuire's Express.......................5 50
Kong Hop Kee............................. 12 00
Union Feeu Co. Kaupalenaia.......3 60
Uku hana o 8 poe hana i ke kahua poo ............40 00
Kela a me keia lilo no elua pule ma ke kahua-poo a sept. 28......3 50
Huina lilo no elua pule e pau ana i Sept. 28................................$1188 40
Koena dala ma ka Banako...........................................................5936 31
$7124 71
NA LOAA.
Huina dala i ohiia............................$2530 65
No ka poi i hooliloia........................11 10
No ke gula i hooliloia $665, ma ka 1 pa-keneta.......................................6 65
Koena dala mai ka hoike mua mai. 4576 31
-
Huina.............. $7121 71
EMILIE MACFARLANE,
Puuku Ahahui Manawalea Hawaii.
Honolulu, Sept. 28, 1895.
Huina nui i luluia............................$9996 70
Huina i ohiia a keia la ....................$9996 70
Huina i ohi ole ia.............................7 50
$10,004 20
HUINA O NA POE I KOKUAIA.
Eia iho ka huina o na poe i kokuaia o na kane, wahine, a me na keiki no ka pule e pau ana i Sept. 21, 1895;
Mai ke Kahua-poo (na Apana 4, 5, 6, 7, 11, 12, 19,) alanui Betela.........4999
Apana 1......................1980
" 2...............................1239
" 3...............................1154
" 8...............................2637
" 9...............................852
10...............................1272
10 1/2...........................1008
" 13...............................969
" 14...............................552
" 15...............................1056
" 16...............................1176
" 16 1/2..........................504
" 17...............................558
" 18...............................1204
" 20...............................1254
-
22,414
-
He wahine ano aoo ka i kaalo ae ma alanui Moi nei i ka Poakahi i hala, me kekahi apana lole olenalena e kau ana maluna ona, e like me na apana lole e ike mau ia nei ma na wahi hoomalu. I kona wa i ninaula aku ai no ke kumu o kona hana ana pela, ua hoike ae la oia, malia he mea ia e pale aku ai i ka pili ana mai o ke kolera iaia, no ka mea he welu lenalena hoi ia.
I kakahiaka Poaha iho la, ua holo mahuka iho la kekahi o na luina o ka mokupea John McLeod, ma ka lele ana iloko o ke kai a au mai la iuka nei a nalowale aku la iloko o ka huikau o Honolulu nei. I kela mau la aku ua pepehiia oia e ke kapena me ka hoopaaia i ke kaula, a no ia mea paha i kupu ae ai ka manao iloko ona e haalele i ka moku. Ua holo aku ua moku la i ka Poalima nei.