Ka Makaainana, Volume IV, Number 10, 2 Kepakemapa 1895 — Page 8
8 HONOLULU, OAHU, POAKAHI, SEPATEMABA 2, 1895.
[Hoomauia mai ka aoao 1.]
Ke Kolera e Laha Nei.
i mahalo no kona hoopono a me ka makaala ma ka hana.
Misasa Makakoa Kamika, wahine a Alika Kamika, no Kapuukolo; hoikeia i ka hora 8:30 A.M. a make makai o Kakaako i ka hora 6:30 A.M. o ka Poaono nei i ke 40 paha o na makahiki Hookahi ae la no pule o ka hemo ana mai o ke kane mai Kawa, kekahi o na pio kalaiaina, a halawai hou no me nei poina oi loa aku. Pilihua wale!
Mele Kaleiwohi, wahine a kela Kaleiwohi i make mua, i okiia ai ka opu e ka haole iloko o ka hale inu rama Nekina, no Kapuukolo, iloko o kekahi keena o o ka hale loihi o Limaikaika, ma alanui Moi nei. Iaia, paa na puka komo o na keena kuai a pau o ia hale i ke paniia a hoomaluia ia la, a me na poe a pau e noho ana malaila, mai ko lalo a me ko luna poe. Hora 1 o ia auwina la iho no i make ai oia, a haalele iho i na keiki lehulehu mahope nei.
Paiaina, he kanaka hana puna kamaaina, hookahi maka uleule, no Kamanuwai. Hora 6 A.M. i hoikeia ae ai a make no ma kauhale i ka hora 3 P.M. o ia la i ke 50 paha a keu o na makahiki. No nei mai paha ke kumu i papa loa ia ai e ka Papa Ola ka auau ana iloko o kahawai.
Ane, he welo hapa paele, no kauhale hoolimalima o uka o Leleo aenei, malalo mai o kahi hana kopa kahiko. Ia kakahiaka no i hoikeia ae ai kona ano e, a make i ka hora 4:45 p.m. o neihinei.
Kaehaalii, he hapauea o 70 paha makahiki, no uka o Kunawai. Hora 3 A.M. i hoikeia ae ai a make i ka hora 9 ae, oiai oia ma ke ala e laweia ana no ka Halemai Moiwahine e kona ohana.
Misasa Emalia McKeague, wahine a Lui Mahiai Kaneakua, hora 4:45 P.M. i hoikeia ae ai, a make i ka 2:05 o keia wanaao.
Poaono, Augate 31 - Papu, he kanaka o 40 paha a keu na makahiki, no Kapuukolo aenei no, i kekahi o na hale makai loa o Alanui Kekaulike, iloko o ke kai, kahi i noho ai. Hora 12:30 o ka wanaao ka hoikeia ana a make i ka hora 5:55 o ia ahiahi iho no.
O Kelekia, he kaikamahine o 13 makahiki, no uka o Leleo, ma kekahi huli iho o ko laila ma'i mua i loaa ai. Ia kakahiaka ka hoikeia ana ae a make no i ka hora 4:25 o ia auwina la. O keia kekahi ma'i i oleloia ua makemake ka ohana e huna, aka, hoikeia e ka Rev. Makua Valekino.
Kenui, i kamaaina loa ia ma ka inoa o J. Haawinaaupo, no Kukuluaeo. Hora 11 A.M. ka hoikeia ana, a make i ka hora 8 P.M., i ke 50 paha a keu o kona mau makahiki.
Keaka, he kanaka o 50 paha makahiki a keu, no uka aenei o Aala. Hoikeia ae i ka hora 8 P.M. a make i nehinei, hora 12:20 P.M.
La Pule, Sepatemaba 1 - Kahana, kapena o ka mokukuna Kaulilua, no Kikihale aenei, kokoke i ke kahawai, mawaena o ka uwapo a Kamika a me ka Hale Kaawai Pake mua. Hora 2 A.M. ka hoikeia ana ae a make koke no i ka hora 3 iho, i ka 26 a keu aku paha o na makahiki.
Kaainoa (k), he aoo o 50 a keu aku paha makahiki, no Kikihale, mawaena o na alanui Hotele me Moi, ma Ewa iho o alanui Kekaulike. Hora 5 p.m. ka hoikeia ana, a make no i ka hora 11:40 o ke aumoe.
Waianuhea (k), he hapauea o 60 makahiki, no Kakaako, mauka iho o ka pa hoomalu ma'i. I ka hora 8 P.M. ka hoikeia ana, a make i ka hora 10:30 ae.
Napoliona Kalilikane, he aoo o 63 makahiki, no Kapuukolo. ma alanui Kekaulike. Hora 9:45 puni i hoikeia ae ai, a eia no ke kamau nei.
Poakahi, Sept 2 - Mua (w), no Aala, 70 makahiki. Hora 3:30 a.m. nei i hoikeia ae ai a make no i ka hora 4:30.
A hiki i ka hora 6 o nei kakahiaka, he 24 ka huina nui o na mai, 23 Hawaii a hookahi Amerika. Ua make he 21, a ke koe nei he 3, hookahi ua ola loa, oia o Nohoanu a 2 iloko o ka halemai.
Mai Kuhihewa i na Laau Hoonaha.
Mai kuhihewa kahi poe o ka inu paakai naha a huaale paha ka mea pono no ka hoomaemae opu. Aole pela, he mau mea hoopuannanu waihona ai ia. O ka hahano ka pono me ka wai mehana, e like me ka wela e hiki ana o ke hoomanawanuiia Mai hoopololi i ka waihona ai, aka, e malama mau me ka piha maikai me na meaai pumehana.
Na Hunahuna o Kela a me Keia.
Eia ke kahawai o Nuuanu ke kiaiia nei mai kai nei a uka loa o ke kiowai o ke kawa o Kapena
Ua hookohuia o Kapena Poo Waipa i agena no ka Papa Ola, a ma ka nana aku he keu oia a ka eleu me ka mikiala, (koe nae hoi ka hapapa wale i ka hai ipu.)
Ua lilo ke Aloha Aina i mea kamailioia imua o ka halawai o ka Papa Ola i nehinei, no kana mau ao lalau e kue ana i KA MAKAAINANA nei.
E hui ana kekahi poe Hawaii me ka Papa Ola, ma kekahi halawai ma Aliiolani Hale i ka hora 11 ae.
-
I ka Poakolu nei ua hookuuia kekahi o na kalaiwa o na kaa panee imua o ka Aha Apana, no ka lawe aihue ana he $7 mai loko mai o kaa pahu waiho dala o kekahi kaa o alanui Beritania i ka Poakolu, Augate 21.
KELA A ME KEIA.
-
Ma ka la 4 iho e hoomaka ai ke kula o Punahou.
Mai poina i ka heluhelu ae i na hoolaha hou e oili aku la ma keia helu.
Aia malalo o Kauka Maea na lawelawe lapaau ana o na ma'i ma Kakaako.
"Kolera" ka huaolelo paanaau i ka waha o na kanaka iloko o keia mau la.
Ua hoonaue ae ke olai ia Kau i ka po o ka Poalua iho la, aole nae he mea i poino.
Aia o V.V. Akepoka ke waiho la me ke onawaliwali ma kekahi o na halemai o Kapalakiko.
Ua make hikiwawe loa kekahi Pake ma alanui Nuuanu i ka Poaha iho la, aole nae he kolera.
Ke nee mua nei ka hoomaemaeia ana o ka hale makeke hou makai o Waikahalulu, Ainahou.
O na Pake a me Kepani i koe iho ma Kahakaaulana, ua pau i ka hookuuia mai i ka Poaha iho la.
He 150 mau tini opiuma i loaa aku i na kiai o ka Hale Dute iluna o ka mokupea Waila i ke kakahiaka Poakolu nei.
I keia la e ku mai ai ka Auseteralia mai Kapalakiko mai, a i ka hora 4 o ka auwina la Poaha iho e pelu hou aku ai oia
Aole e hoomaka koke ana ke kula o Sana Lui a hiki i ka wa e komo like ai me na Kula Aupuni, ke pau ae hoi ke kolera.
He umikumamaha poe Pake i hoomaluia iho nei ma Kahakaulana i hopuia no ka palapala ae holo ole mai i Hawaii nei.
Ua hiu ae i kona heleuma a holo aku la iwaho o ke awa e moku ai ka mokukaua Amerika Beninetona i ka Poaono nei.
Ma ka la 20 o Augate ka haalele ana aku o ka Miowera ia Kikane no onei. A ma ka la 6 iho no hoi ka Rio-Janeiro e ku mai ai mai Honakona mai.
Ua hoopaiia o Keoni Kalau koa no ka hoeha ana ia Kukana (w) ma ka La Pule, Augete 25, he $25 me na koina imua o ka Aha Apana i ka Poaono nei.
Ua holo hoomaha mai nei o Kanikela Konerala Waila ma ka Mariposa o ka Poaha iho la, a e hala ana paha he mau pule mamua o kona huli hoi ana aku no Kapalakiko.
Ua ku mai i kakahiaka nui Poaha nei ka Mariposa mai Kapalakiko a holo no i ka hora 5 o ia ahiahi. Mamua o kona holo ana aku, na puhi kukaepele ia na ohua a me na mea a pau.
Ua hookui aku me ka pou telepona e ku nei ma kahi ko koke i ka hale hoolulu o ka Hui Alahao Oahu kekahi kaapio Pake i ka po Poalima nei, a nahaha ke kaa. Pakele ke kalaiwa aole i eha.
He elima poe o luna o ka Beninetona i loaa i ka ma'i, a ke hoomaluia nei ka moku no ka manaoia he kolera. Iluna no o ka moku i ka po Poaha nei ke kahi poe wahine haole a noi nui mai no uka nei.
E lilo aku ana na kekahi mau keiki maamaalea o Honolulu nei e hoonoho na hua kepau a me ke pai ana o ka nupepa hou e hoopukaia aku ana ma Hilo i keia mua iho, oia ka "Hilo Weekly Tribune."
Ke hoomaemaeia la o Lahaina i keia wa ma o ka hopohopoia o laha aku ke kolera malaila. Pau na opala a me na mea pelapela i ke puhi ahi ia. Ua eleu no!
He kaua kuloko weliweli ko ka Poaono nei mawaena o B.F. Dilinahama a me G.C. Keniona hope-lunahooponopono o ke Kuokoa namu. Naka haalulu ke keiki o ke alahao.
Elua mau wahine Hawaii ena i hoikeike ae i ko laua mau ikaika ma ka hukihuki lauoho ana a me ke kuikui puupuu ma alanui Nuuanu i ka Poaha iho la. A o ka hopena o laua a i elua ua hele na helehelena a paholehole me ke kaheawai o ke koko
Ua lilo aku i ka aihueia he $140 a kekahi ohua haole a ka mokupea S G Waila i halihali mai ai i kela pule aku nei. He $400 ma ke gula ka nui o na dala ana i waiho aku ai ma kekahi wahi ana i manao ai o ia kahi e maluhia ai. Aka, iaia i kii aku ai i ke ku ana mai o ka moku, ua lilo aku kahi a koe mai kahi. E aho no nae hoi ia, aohe e nele loa
I ke ahiahi Poalima iho la no, mauka ae nei o Leleo, ua ano ulu ae la he wahi okaikai mawaena o kekahi lala o ka Papa Ola, L D Keliipio, a me W.H. Kealakai. O ke kumu, ua hele aku nei o Kealakai e kii i pahu ai nana a me kahi wahine okoa iho no, aka, hoea aku nei o Keliipio malaila a papa aku la i ka Pake aole e lawe i ka poi. Ia manawa kauoha aku la o Kealakai me ke oolea i ka Pake e lawe i ka pahu poi i kona hale me ka olelo pu aku ia Keliipio, "Ina oe e paa i kuu pahu poi eha oe ia'u." I keia mau olelo no, kau ka weli ia Keliipio a hookuu aku ia Kealakai e hoi me kana puhu poi, a pela pu no hoi me kela wahine. Aia no ka hoi la!
Mahope iho o ka hora 9 o ka po Poalima nei, i hookuu iho ai ka Warimu i kona heleuma i ka nuku o Mamala, mai Vanekouva mai. Ua aolooloia mai kona ukana a me na eke leta maluna o na kao, a aole he aeia o ko uka nei poe e pii aku iluna ona. I lohi oia ma keia huli hoi ana mai la no kona ili ana iluna o kekahi pukoa mawaena o Vanekouva a me Vitoria, a mahope o ka paa ana no elima paha hora, hemo i ka pii ana o ke kai. Aole no i nui kahi i poino, a ua hana hou ia no a maikai Halahu ke kapena i ka hookolo ana i ka uhi paa a ka noe a kuhihewa hoi i kahi hale halekukui okoa o kona ihu ia e hooholo aku ai i ka moku
-
ILIO NALOWALE
He Ilio hulu makue me keokeo. E loaa no he uku makana i ka mea e loaa ai a hoihoi ae ia. E.A. MCINERNY.
Kihi o na Alanui Papu me Kalepa.
sept. 2.-1p
-
Kuai Emi Loa! Kuai Hoopau!!
Aia ma ka Halekuai o
KU KIMA;
Helu 411, Alanui Nuuanu, ma ka aoao ma Ewa, a helu 59 maluna.
-
E hoomaka ana ke kuai hoopau mai ka Poaono, Augate 31. No elua pule wale no.
Penei na waiwai e kuaiia aku ana;
Na lole o na waihooluu like ole o na Wahine. He emi loa.
Ko na Kane mau lole maikai ano hou o na ano a pau. Oluolu ke kumukuai.
E hele nui ae e ikemaka.
sept. 2-2mnw