Ka Makaainana, Volume IV, Number 10, 2 Kepakemapa 1895 — Page 6
6 HONOLULU, OAHU, POAKAHI, SEPATEMABA 2, 1895.
NA AINA MAMAO.
-
Na Lono Huikau mai kela a me
keia Wahi o ke Ao Nei.
o Hawaii.
-
Maalahi Ole na Kepani ma Foamosa.
Mai ka wa mai o na Kepani i lawe ae ai a noho ma ka Mokupuni o Foamosa a hooliloia hoi ka Repubalika omaka hou i ku ae i mea ole, aole no ka lakou hana ana i mea maalahi loa, no ka mea, ua koe no na poe o ka auna Hae Eleele ma ka Hema, a mai ia poe mai ko lakou kue ino loa ia. Paakiki no na kipi e kue la, a ua lilo hoi i mea hana nui ka hoao ana aku e hoopio ia lakou. A ma na la 8 a me 9 o Augate i hui ae ai ka ikaika a pau o na pualikoa Kepani a kue aku la i na kahuapoo o na kipi ma ka aoao hema Ua ukaliia mai keia ae la me ka hakaka hahana loa, eia nae, ua loaa he lanakila kaokoa loa i na Kepani maluna aku o na Hae Eleele.
Konoia i ka Mare o Kana Wahine.
He mau la mamua aku o Iulai 12, ua loaa aku ia William D. Betts, he wiliki o 303 paona, o Rokeseta, Nu Ioka, he kono e hiki aku i ka mare o kana wahine. Ua haalele honua aku kana wahine me ke kumu ole iloko o 1892, a aohe mea i ikeia nona a hiki i ka wa o keia palapala i loaa aku ai, ua kuniia me ka hoailona haleleta mai Sanana Calara, Kaleponi, e hoike aku ana e mare ana oia me J.W. Albe, o ia wahi. Ua ukaliia aku keia o kekahi palapala okoa iho i kakauinoaia, "Mrs. Albe, aole o ko wahine." Ma kahi hoi o ko ke kane hooko aku i keia kono, ua noi ae oia imua o kekahi lunakanawai, Iulai 11, no ke okiia mai kana wahine, a ua aeia.
Na Hunahuna Laulaha.
Mamuli o ka hoohuoiia i hopuia ai ke Poo o ka Oihana Makai o Sofia, Bulegaria, Augate 12, no ka pepehiia ana ai o M. Setamabulofa.
Ua kukala ae ka aoao kipi ia Kenerala Maseo i Peresidena no ka Repubalika o Cuba. Ke mau la no ke kaua me ke akaka pono ole o na hopena aku.
Aia he kaua ke liuliu la ma Gaiakuila, Ecuadoa, mawaena o na pualikoa malalo o na alakai ana a na Kenerala Alefaro a me Sarasati. Aohe ka hopena i maopopo.
Hoauheeia mai nei na pualikoa kumau o Guatemala e na Ilikini o Sana Salavadoa me ka lehulehu no o na make ma na aoao a elua. Lili loa kela poe Ilikini i ko Guatemala poe, aole wahi mea a hoihoi iki, a o ia paha hoi kekahi kumu i hakaka ai o lakou me ke alakai ole.
E kukulu ana o Kalausa Sepe kela i hale hou no ka nupepa Kahea o Kapalakiko, nona ke kiekie o 15 hale, me ka puoa maluna iho he 310 kapuai mai ka honua ao.
Ma Deneva, Kolorado, i ke aumoe o Augate 18, i pahu ae ai ka ipuhao-mahu o loko o kekahi hotele, a ua poino ka hale. He 50 poe noho i poino pu me ka hale, pela ka mea i manaoia.
He pauahi nui ka i holapu mai nei i ke kulanakauhale o Piladelepia, i Augate 12, a ua kohoia ke poho ma kahi o $500,000 A pela no hoi ma Loso Anagelese, Kaleponi, i Augate 18, he $10,000 ke poho.
Ua ili mai nei mawaho ae o Manila, ma na Paemoku Pilipine, ka mokumahu Sepania Garavina, oiai kekahi kikiao makani taifuna e noke hala ole ana, a ua poino he 168 ola o luna. He elua no ola i manaoioia ua pakele ae.
Ke holapu la ke ahi i na kula panoa o ka Okana aina o Wasinetona a ua nui ka poino i loaa i na waiwai o na poe mahiai. O o na hoao ana e kinai, ua lilo i mea ole, a ke hooweliweli la e hoopoino i kekahi mau kulanakauhale o loko o ia aina ululaau nui o Keomolewa.
He omaimai ko ka Moi o Denemaka, aia ma ka puumimi ka eha. Ke waiho ino la oia me ka nui o ka eha, a ke noho paa mau la no hoi kona kauka pilikino, iloko no o ka halealii e moe ai. Oiai nae, aohe ka fiva i pii ae, he mau no ka ono o kana ai ana, a nolaila, aohe no i hopohopo loa ia.
Kakahiaka nui o Augate 5, ma Nu Ioka, i make ai Misasa T. De Witi Talamage, wahine a ka haiolelo loea a kaulana, imua no o ke alo o ke kane a me na keiki. Oia ka elua o na wahine a Talamage; ua make ka mua iloko o 1862, i piholo i ka holo waapa, a i Mei 7, 1863, mare hou me keia wahine.
Augate 12 i weheia ai ke kau Ahaolelo umikumamaha o ko ka Moi Votoria noho alii ana me na hoohiwahiwa ano mau. Ua koho hou ia o W.C. Gulley (Gale) i Lunahoomalu no ka Hale o na Makaainana, a i kahi la ae oia e hele aku ai imua o ka Hale o na Haku no ka loaa mai. o ka apono alii i kona koho hou ia ana. Aohe oia i kueia.
He koi poho ka Amerika Huipuia i waiho aku imua o Mekiko no ka hoopaahao kanawai ole ia ana o kekahi Amerika, nona ka inoa o Kale Obalana o Sana Diego, Kaleponi. Oia oia e hooko ana i kana hana ma kona ano Hope Ilamuku, ma ka palena o Mekiko, e kiai ana no ka hookomo malu ia mai o na Pake iloko o Amerika Huipuia, ua hopuia oia a laweia e na aliikoa Mei 20, 1892, a me ka ikaika oia i laweia aku ai mai Amerika a hoopaahaoia ai.
Ua ku ae ka moku heihei Valakairi III., Augate 18, ma Nu Ioka, a i keia mahina paha e hoopapa ae ai me ko Amerika moku no ke kiaha Amerika Ma ka heihei ana mai nei o ka moku heihei Mea Hoopakele a me Vigilana (Makaala), ke kaeaea mua, ua kaa ka eo i ka inoa mua iloko o ka makani malie. Ua manao paa loa na Amerika aohe ke kiaha e lilo ana i Enelani, a ma ka aoao Enelani hoi, e kailiia aku ana. Na keia mua iho e hoike ae i ka mea oiaio a pololei
-
Bana Lahui me na Poe Hula.
Mai ia Tome Siliva, kekahi o na keiki puhiohe o ka Bana Lahui, i loaa mai ai keia mau wahi lalani pokole, i kakauia ma ka la 11 o Augate, ma Kikako: "Ua halawai makou me kamaliiwahine hula a me kekahi mau kumukula o Sana Lui. Eia makou i ka Paka Sunnyside (Aoaola) e paani nei i keia manawa, a ua nui ka lealea o na haole. E holo ana makou no Miliwauki. Aohe mea hou ano nui, koe wale no na lono e pili ana no ko kakou aina."
-
Na Pio Kalaiaina Elua.
Ma ka mokupea S.N. Kakela o ka Poalua iho la i kau aku ai o Wile Gareiga, kekahi o na pio kalaiaina i huikalaia ke haalele mai ia Hawaii nei, a holo aku la no Amerika. Iaia i laweia aku ai no kai o ka uwapo e Lunapaahao Lo a me kekahi makai, aia kona mau hoa'loha o na kane a me na wahine e kali ana iaia o kona hoea aku a lulu lima pu hoi me ia mamua o kona holo ana. I kona hiki ana i ka uwapo, ua puni koke ae la oia i kona mau hoa'loha a makanaia aku la e na lede o ka Hui Lei Ilima he pine gula me na pohaku momi me daimana a he wati gula hoi ka ka Hui Waapa Leilani i mea hoomanao nana. Mawaho ae o ia, ua hele oia a ohuohu i ka lei a me na wahi e ae o ka wao, aole hoi o ia wale, o na ihu pu no hoi kekahi o na ui nohenohea. I ka Poakahi aku no hoi o Lui Masela i holo aku ai maluna o ke kiapa S.C. Alani no Kaleponi.
-
He $100 ka hoopai a ka Aha Apana i kau aku ai maluna o Pilipo, he Paniolo i ka Poakolu nei, no ke kuai waiona me ka laikini ole ma Kamanuwai i ka La Pule, Aug. 25.
He Nani Hooni Puuwai.
He poo, he kino, a he huelo no ko'u. Ina e okiia kuu poo a koe kuu kino a me kuu huelo, ua lilo au i mea ole, ua hoowahawaha ia au, ua hoomaopopo ole ia, hoohemahemaia a haaleleia, a e hoole mau ana au i ko oukou makemake a pau na la o ka honua. Ina e okiia kuu huelo a koe kuu kino, alaila, e kokua nui no au i na lahuikanaka a pau o ka honua nei, a e auamo auauei au i na kaumaha, na ehaeha, a me na luuluu a pau na la o ko lakou ola ana. Ina o kuu huelo wale no, e lilo auanei au i mea e waiwai ai kekahi poe e huli ana i ua pomaikai iloko o ka hohonu o ka moana akea. Ina e huiia kuu poo me kuu kino, e kokua no au i na poe apau e lawalewe ana i na mea kani. Ina e huiia kuu poo me kuu kino, a me kuu huelo, he mea kaulana, hanohano, a mahalo nui ia, a ua hiki aku ko'u kaulana i na palena o ka honua, a owau ka mua loa e ku nei iwaena o na aina o ka poepoe honua e poai nei ma ke kaeiolu akau, a na'u e rula nei i kekahi o na Aupuni o ke ao nei.
Owai ko'u inoa? E kuailo mai.
S.E.L. KANOE.
-
E lawe i KA MAKAAINANA i ike i na mea hou.
Aola i holo aku ka hapanui o na mokumahu piliaina i ka Poalua iho la, o Mokolii wale no ka i holo aku no ka lawe ana i na eke leta o Molokai, Maui, a me Hawaii. Aole he mau ukana mai keia awa aku i laweia, koe na paiai a na ma'i o ke Kahua Ma'i Lepera, me na pahu e hoomoa hou ai i ka ai, ke pae aku i o.
-
HUI KAMAA O NA POE
HANA.
POE KALEPA NUI A LIILII I NA
ANO KAMAA A PAU LOA.
Helu 516, Alanui Papu, ma Kauhale Hou o Burua.
Honolulu, P.H.
iul 15-tf
-
F.J. TESTA, (Hoke).
MEA OHI A KOI AIE.
Mea Huli Moolelo Aina a Waiwai e ae paha.
Mea Unuhi a Mahele Olelo Hawaii a Enelani paha.
Mea Hana Palapala Kanawai o na Ano a pau.
Mea Kuai Mikini Humuhumu Lole.
Mea Hoolimalima a Hoolilo Aina.
Mea Kuai Waiwai no ka Uku Komisina Haahaa.
Ua makaukau mau oia o lawelawe i na hana a pau e haawiia mai ana iaia. He kuike ka rula.
E loaa no oia ma keia keena. apr 8-1mk