Ka Makaainana, Volume IV, Number 9, 26 August 1895 — Page 3
HONOLULU OAHU POAKAHI, AUGATE 26, 1895. 3
keia mau ano i'a, oiai, he mau la kaikoo me ka makani pa pukiki: e pa ana ia mau la, a e loaa mau ana no nae keia mau ano i'a. A no kekahi la, ninau aku nei au i kekahi keiki a Hakuole: "Pehea la e loaa mau nei keia mau i'a ahiu?" Pane mai nei kela: "I hoopahuia me ke giana pauda." Kahaha iho noi au, no ka mea, o Hakuole ka makai o nei wahi, eia nae, laweia mai la no ka i'a hoopahu. Olelo iho la au ia'u iho, "Lanakila ka hoopahu i'a maanei." O makou o na malihini a pau e noho ana malaila, me ke kahunapule o Wailuku, ua ai makou i keia i'a hoopahu. Ke manao nei la, hoi au o ko makou hale wale no la hoi ka i laki i ka i'a hoopahu, oia ka auanei o ka hale no kahi o ka Mea Hanohano J.W. Kalua, oiai, he mau kamaaina okoa aku no kona. Lanakila loa ka hoopahu i'a ma Kipahulu nei, aole makauia mai o na luna Aupuni, a he koho aku no ko'u, ua lohe makou a pau i keia hana mai ka Lunakanawai mai a me ke Kahunapule. Ua lawa keia.
J.N. LANAKILA.
Keanae, Augate, 10, 1895.
-
Huliia ka Mokukuna Roba Roi.
I ke ku ana mai o ka mokukuna Roba Roi i ka Poakahi i hala mai Wailua, Molokai, ua hoopukaia iho la i palapala huli ia luna o ka moku e ka Ilamuku. I ka huliia ana aku me ka manaoia paha he opiuma ko luna ua loaa aku he eono mau omole rama aole nae he wai o loko, e mau ana no nae ka hohono okolehao. Ua hopu koke ia iho la o Kapena Kalei ia wa no ke kuai waiona no ka laikini ole a hoopaaia i ka Halewai me na omole pu. Ua hoohuoi wale ia no oia o Kalei ke hoopae wale nei i ka waiona ma kekahi mau wahi o Molokai. No ka ike mau ia ka o na luina e ona mau ana i na ku ana mai a pau o ka moku ko kumu o keia hopuia ana.
-
Ua hoolakoia iho nei na keena a pau o ka Malulani me na ipukukui uwila i keia holo ana aku la i ka Poalima nei.
O ka Pake i hoopuia ai no ka aihue ana i kekahi mau mea mai ka hale noho aku o Aberahama. Fenana ma ka la 31 o Iulai, ua hookolokoloia imua o ka Aha Apana i ka Poakolu iho la a ua hookuu ka Aha iaia me ke noi a kona loio.
I ka po Poaono i hala, ua hoao iho la kekahi Pake e aihue i ka iliwai o loko o ka pa noho o Kauka Hai, ma alanui Beritania. Aka nae, iaia e hoomaka ana e kiola ae i ka iliwai mawaho o ka pa, ua maalo ae ke kaa hapaumi a mahope mai he makai kaulio, ua hoomaka aku la ka Pake e holo me ka mama nui a nalowale. Ua noho kiai iho la ka makai malaila ia po a hiki i ke ao ana, a aole he hoea hou aku o ke kalohe.
LAUOMIDIHAE
-KA-
UI I MOHAIIA I KE KOKO
-KA-
NANI I ALANA IA I KA OI
O KA PAHIKAUA.
-
Ka Mea Huna Iloko o ke Kiaha
Waina;
Ka Mea Pohihihi i ka Maka o
ke Kuikele.
-A O KE-
KEIKI NUMAREDINA
KE
Komo Lima Maka Popoki.
-
MOKUNA XVIII
Ka Aha hookolokolo a na kupua - Kau ka weli i na kiai o ke Kihapaipua o Numere - Huai puka nui ia na pihaa moewai o kahawai - Ke kilokilo wahine e oloio ana iwaena o na kia
Ae, e ka mea heluhelu, he mea oiaio, aole loa i nalohia aku ke aloha alii oiaio iloko o na koa kiai. A o ke kaumaha a me ka luuluu aia no ia maluna o Numaredina a me Murisedela, no ka mea, i ka wa o ka leo i poha mai ai ua paa pio ko laua mau makua, ua like ia me ke ahi e pao ana iloko o laua. Aka nae, ua hoomaalili ia mai nae ia mau manao uluku mamuli o ka pane ana mai o ko lakou kokua,-
"Mai kaumaha e na keiki. E kali iho oukou ia'u, a e hele ae au maluna o ka aina o Peresia e nana ai ia laua ina paha aia no ke ola nei, a i ole, ua make paha."
Iloko o ka manawa pokole wale no, aia ua wahi luahine la e kuoe malie ana maloko o na alanui o ke kulanakauhale o Siama me kona wahi kookoo a hiki i ka nalowale ana aku me ka ike ole ia e na mea a pau kana wahi i hele hou aku ai.
Hala ae la he mau la loihi ma keia huakai loihi a ua wahi luahine la, ikeia aku la oia maloko o na alanui o ke kulanakauhale o Peresia me ka aahu o na poe kaaholo o na aina hikiia. He wahi papale muouou ke kau ana ma kona poo, a ma kona lima he wahi kookoo poo gula, a ma kona kua e haawe ana oia i kana ukana o ke ano hoomeamea wale iho no.
Iaia e holo ana ma na alanui me ka hoolohelohe ana no na mea e pili ana i alii o Siama, aia na kanaka ke holoke la ma o a maanei me ka olelo ana ae-
"O ka Moneka kela o ka aina hikina, a i hele mai nei paha e kaahele maluna o ka honua."
Ke lohe nei oia i keia mau olelo a pau, a oia kana i minoaka malie iho ai ma ke ano hoohenehne. A i ka wa a na elele o ke aloalii i kaalo iho ai ma kona aoao, ua ku iki iho la oia me ka namunamu ana ae o kona waha i kekahi mau hua pule.
I ka pau ana ae o ia mau hua pule o ka hookamani, ua pane maila na elele:
"E ke kamahele maikai, ma ke kauoha a ko makou moiwahine Mozunadime, ua makemake ia oe e hiki kino aku imua ona i keia manawa."
Minoaka iho la ke kolohe a hele pu aku la e hooko i ka makemake o ke alii, a iaia i hoea aku ai imua ona me kona hoomaopopo ole mai o kona hoa no keia i alo pu ai i na inea o ke alahele no ka imi ana i kana mea i aloha ai, ua pane mai la ua moiwahine la.
"Owai kou inoa a mai ka aina hea mai oe?"
"E hea mai oe ia'u ma ka inoa - o ka Mea Holoholo Waapa o ka muliwai Muzine," wahi a ua wahi wahine la, "a mai ka aina mai au o na manu leo lea i ke mele."
Ninau hou mai la no o Mozunadime:
"Owai ka inoa o ia aina au e olelo mai nei?"
"O Siama, a o Haredina kahi a na manu leo lea i ka mele i noho ai, a ua hoohalikeia ka leo o kuu haku wahine me ko na manu o luna o Haredina. Ua maopopo mai la anei ia oe, e ke alii?"
Aole i ekemu koke aku ke alii no keia mau olelo a kahi luahine, aka, ua noho hamau iho la oia no kekahi manawa loihi a liuliu pane mai la oia -
"Ke maopopo la ia'u na olelo au i hooopuka mai la. Alaila, no ka aina oe o kela moi poe paakiki nana ke keiki pupule i hoole i ka aelike aole e mare me kuu kaikamahine Waremiere."
Akaaka ae la kahi luahine a pane aku la:
"Ua oi, aku anei ka nani o kau kaikamahine mamua o ka'u?"
"Owai kau kaikamahine?" wahi a Mozunadime.
"O ka mea pohihihi i ka maka o ke Kuikele - ka Mea Huna iloko o ke Kiaha Waina," a hehe ae la ka aka a ua wahi luahine la.
Nana pono mai la ko aliiwahine i keia mau hana ano e a kahi luahine a loli ano e ae la kona mau helehelena, me he mea la, ua komo aku la paha iloko ona na hoomanao ana no kela papaaina hanohano ana i haawi ai he mau makahiki loihi i hala ae.
A no ia mea i ninau hou mai ai oia:
"Aia i hea kau kaikamahine i keia wa?"
"Aia oia me ke keikialii Numaredine, ka mea i kapaia - ka Nani o Hurema, a ka oi hoi iwaena o na keikikane.
I ka wa i poha aku ai o kela inoa i na pepeiao o ka Moiwahine ua loli ano e ae la kona mau helehelena, a o ia ka ka wahine holo waapa i ninau aku ai:
"Heaha iho la ia, e kuu moiwahine maikai?"
"O Numaredine, ua kuhi au make oia imua o ke kahua kaua. Eia no ka oia ke ola nei?"
-
Komo Lima Haule.
Ma ke alal mai Koeaka, Alanui Papu, a ka Hale Leta, a hoea i kai o Ulakoheo, a i kai loa o ka uwapo Likelike, a pelu hou no iuka o Koleaka ma Alanui Papu, ua nalowale kekahi Komo Lima Daimana me ewalu pohaku, he hookahi pohaku ua haule, i ka Poalua nei, augate 13, 1895. E loaa no he uku makana kupono ke loaa a hoihoiia ae ma ka keena o
F.J. TESTA (HOKE).
aug 19-tf.
-
E.M. NAKUINA.
KOMISINA O NA ALA LIILII A ME
NA PONO WAI.
Notari Lehulehu, a he Agena Haawi Palapala Ae Mare no Honolulu nei.
KEENA HANA: Helu 308, Alanui Kalepa. dk 3-1mk.
-
HALEPAI MAKAAINANA.
-
F.J. TESTA (Hoke) - - Ona
Aia ma Alanui Konia, mauka o ke kihi Akau, ma ka huli ma Ewa, o Alanui Moi.
Ua makaukau loa e hana i na ano hana paipalapala a pau loa, e laa
Na Bona,
Na Aelike,
Na Laikini,
Na Palapala Kono,
Na Likiki,
Na Bila-poo,
Na Hoolaha Pai Alanui,
A pela aku, a pela aku.
NA HANA BUKE A ME PAI NUPEPA.
Aia malaila e paiia nei na nupepa "Ka Makaainana" a me "Ke Kuokoa" namu.
E hookoia no na kauoha me ka hikiwawe a me eleu. iul 14-mhp
-
No ka Hoolimalima
O ka hale ma Alanui Kalepa, i hoohanaia mamua e ka Hui Hoolaha Buletina Puka La. Ua hiki loa no o lalo ke maheleheleia i mau keena oihana, a pela aku.
E ninau ma ke keena o
WM. G. IRWIN & CO.,
iune 24 Kaupalenaia.
-
G.E. SMITHIES,
[KEOKI KAMILA.]
Mea Hooponopono Hoike Helu, Mea Ohi a Koi A e, Mea Kakau Kope, a Mea Kalepa Aina.
KEENA: Helu 406, Alanui Papu, ma ka Hale Opunui.
Telepone Helu 184. mei 27-3ml
-
NO WAIANAE
O R. & L. CO.
MA NA POAONO A ME NA LA PULE.
E haalele no na Kaamahu ia Honolulu nei ma na hora 9:15 A.M. a me 1:45 P.M.
Ke huli hoi mai, e hoea ana i Honolulu nei ma na hora 3:11 a me 5:55 P.M.
NA PALAPALA UKU PUNI:
Papa Ekahi, - - - - - - - $1 75
Papa Elua, - - - - - - - - - 1 25
F.C. SMITH,
Agena Ohua a Palapala Nui.
jul 29-tf