Ka Makaainana, Volume IV, Number 7, 12 August 1895 — Page 6

6 HONOLULU, OAHU, POAKAHI, AUGATE 12, 1895.

NA AINA MAMAO.
-
Na Lono Huikau mai kela a me
keia Wahi o ke Ao Nei.
-
"E Hoopakele ke Akua ia Bulegaria."

                     O keia ae la na olelo hope loa i ka waha o Kuhina Nui Setamabulofa a aili loa ae ai kona aho i ka hora 8:30 o ka wanaao o Iulai 18, mai na eha a na hiena punikoko i hookau aku ai maluna ona. He 40 wale no makahiki ona a make aku la, eia nae, ua loaa iaia ka inoa kapakapa o ka "Bisimaka o Bulegaria" Ke hooiliia la ke koikoi no kona pepehi ia ana a make maluna o Kama'lii Feredinana a me kona mau Kuhina, me ke kokuaia mai hoi o Rusia. Auwina la Poaono mai i manaoia ai e hoolewa aku i kona kino make. Ee na na manao me ka pioloke nui iwaena o ko laila poe, i hooi loa ia nae paha hoi kahi i ka loheia ana ae ua hapalaia na pahi ona i houia ai me ka laaumake. He aloha aina oiaio oia i make aku la. Aohe ae o kona hoa i hou pu ia ai e haalele i kona kino make, aka, ua noho mau aku oia ma ka aoao mai ka wa mai i kuu aku ai o ke aho hope loa. Lehulehu na palapala hoalohaloha i hiki aku i kana wahine kane make mai na poo aupuni a me na poe koikoi e ao o Europa.
                     Oiai hoi, aia o Kama'lii Feredinana i Kalabada, Geremania, kahi i lualai ai, aohe ona hoeueu aku e hopuia na hiena, a ua ku hi akoa ia ae oia e kekahi mau nupepa alakai oia ka hiena oi loa aku. A o kekahi no hoi, oiai ka mea i hoopoinoia e waiho ana iloko o kona mau ohaoha, ua hiki aku nei imua o ke Za opio o Rusia he poe elele Bulegaria, iwaena o lakou ko ke Kuhina Nui enemi inoino loa, a ua hooia mai ke Za e hoomau mai no ko Rusia kiai a hoomalu ana ia Bulegaria. Ua manaoia aole o Enelani, Italia, Geremania a me Auseturia e noho nanamaka aku ana, a me he mea la nae e lilo aku ana keia i kumuhana e hoonioni ai i ka "wai ua laua malio" o Europa ma nei mua keke iho, a ke kaalelewa ae la hoi na ao haeleele hakumakuma o kekahi hooili kaua weliweli e pau ai ko Feredinana noho alii ana. Ekolu poe hoohuoiia i paa i ka hopuia.

Lawelawe Kalaiaina ma Enelani.

                     Palena ole ka lanakila hiwahiwa a oi kelakela e loaa la i ke au hooponopono aupuni hou o Haku Saulelbure imua o ka lehulehu ma ka pahu balota. Nui ko ke Aupuni ikaika iloko o ka Hale o na Makaainana, a me he la na ia ikaika no auanei paha hoi e hoomau aku ia Haku Saulebure ma ka hoeuli no ehiku makahiki, ke kau noho mau o ka Ahaolelo, ke ole e ulu e ae kekahi ninau e ui koke ia aku ai ko ka lahui manao. O ke alakai hoi nei o ka aoao Liberala, Sa W.V. Hakota, iaia i hoao ai e holo balota hou, ua haule ino oia i kona hoa paio o ka aoao Kahiko, a e ole e holo ma kekahi apana okoa aku, puka ai oia. Ke manao la nae hoi na Liberala e haalele iho ia Hakota e auamo ae hoi lakou ia H H. Asekuita, kekahi o na Kuhina i pau pu me Haku Rosebere, me ka manaoia no e oi aku ana oia ia Rosebere, a o ke Kuhina Nui aku ia o neia mua aku a ia poai. O kekahi mai la keia o na haule ino loa ana o na Liberala, a ua manaoia no ka bia mai ke kumu, no ko lakou hookau ana i auhau koikoi maluna o na poe hana bia. He palapala ka Haku Batona, kekahi o na poe hana bia waiwai loa, i hoopuka ae e kono ana i ka lehulehu e koho i ka aoao Kahiko a e kiola loa i ka aoao Liberala, a me he la ua hooloheia kona leo. Nui loa ko na Liberala huhu a oia aku ana ka lakou maunu o nei mua aku.
                     O kekahi kumu hoi o ka haule ino loa o na Liberala, no ke koho ole ia nai o na lala o ka Aha Kuhina i pau, eia nae, ua ahona iki hoi lakou i ke Kuhina Kaua i pau, he nui kona hilinai ia e kona apana a puka no oia, oia hoi o Sa H Camabela-Banemana. Ua hopohopoia e lilo aku ana ko Pohakuhauoli apana kahiko, a ua manao hoi ka aoao Uniona e lawe a lilo ia ana e lakou. Ke pii mau ae la ka ikaika o na Uniona ma kahi o ko na Liberala haule O ka puupuu ino loa i loaa i na Liberala, o ia no ka haule ana o ka Mea Hanohano J. Mole, Kuhina mua no Irelani A malia, o like aku no hoi oia me ia hoa ona, me Sa Hakota, haule ma kahi wahi a oili pulelo hoi ma kahi wahi ae.

Mau Moku Pauahi ma ka Moana.

                     Ua ku ae ma Nu Oleana, Lusiana, Amerika Huipuia, Iulai l3, ka mokumahu Beritania Eleketirisiana (Electrician) mai Livapulu Enelani, me ke a i e holapu ana iloko o kahi waiho lanahu. Iaia ma ka moana, Iulai 7, i oili ae ai keia ahi, a ua lilo hoi i mea hana nui na na luina ka pauma mau ana no eono la, aka, ua mau no ka holapu ana, me ka lehulehu o na wa i manaoia ai e haalele i ka moku. Eia nae, ua hololea na hana hoomanawanui ana, a ua hoomaluia mai hoi ke ahi a hiki i ke ku ana ae. Me ka hana nui ke kapena i hoomalielie ai i na kanaka.
                     Pela no hoi me ka mokumahu Farani La Nomenade, i ku ae ma Nu Ioka mai Havere i kakahiaka o Iulai 14. Mahope koke iho o kona haalele ana aku, ua hoounaia aku kekahi o na paoahi e hele e wehe i kekahi wahi hoahu lanahu. Ua hana aku oia pela, me kekahi ipukukui i pale ole ia. A i lawa no a hemo ka puka, ua oili mai la ke ea, a o ka a koke ae la no ka ia o ke ahi me ke pahu ana ae me ke oolea a make ua paoahi la, me ka loaa o na poino e ae ma ia wahi o ka moku. He kanaka opio oia o 19 wale no makahiki, a ua kanuia ma ka moana Mahope koke iho o ka noho ana o na ohua e paina ahiahi i Iulai 9 ua ikeia he ahi mamua a ua kani koke ae la ka bele pauahi. Ua eleu ae na luina ma na wahi hana a pau o ka moku me ka hoomoeia o ua ili wai, ua hana nui ia po a wanaao loa, maha mai ka holapu ana, a ka hora 9 A.M. ae o ka la 10 i pio loa ai. Aohe na ohua i pioloke ae, a ua noho nui hoi me ka maluhia a me ka hoolohe, a ua nui no hoi ko lakou mahalo i ke kapena a me na luina no ko lakou hopo ole.

Hui Enelani me Italia e Kue ia Rusia

                     "Aia ke ka ele nui no ko Italia ikaika maluna o ka noho hoa'loha o Enelani," wahi mai nei a ke Duke o Genoa, ma ke kahi aha hoolaulea i haawiia ma Potamouta, Enelani, e na aumo kukaua Pelekane i na aumo kukaua Italia, ano koke mai nei no. He wahi panai paha hoi nei no kela hookelakela ana o Rusia a me Farani mamua aku nei a ano koke mai nei no hoi kahi ma Kiele, Gesemania. O na hiohiona o keia nui ana ae la o Enelani me Italia, he hoike ana ia Rusia e keakeaia aku ana kona manao alunu wale. A he hoike ana no hoi kahi ua makaukau mau o Enelani e haawi aku i na kokua ana i ke Aupuni Hema, a e lilo no hoi keia i leo uwalo e ao aku ana i ke Za "e nihi ka helo'na," o poino a popilikia auanei. I na la hope o ko Haku Saulebure kau hope i noho mana ai, ua nui ke kue o ua Liberala no kekahi ano hoohui ana me Italia, aka, komo mai ia poai kalaiaina iloko o 1892, aohe i walaau nui hou ae a aohe no hoi e hoopau ae a haule hou lakou a noho mana hou o Saulebure

Mau Iwi Nakeke Iloko o Kekahi Ana

                     Ua ku ae i Piladelepia, Penisilivania, i Iulai 8, ke kiapa Serano, mai Ivigitutu, Aina Omaomao, a ua hoike ae la kona kapena ua loaa aku na iwi na keke maloo o 18 poe iloko o kekahi ana uuku ma kekahi wahi waoakua a panoa loa ma ka aoao hema komohana o Aina Omaomao, me he la he poe lala paha no kekahi puali imi a makaikai aina. Owai la ia poe a no hea mai la, aohe i maopopo a he ninau nui hoi ia na neia mua aku e hoomaopopo ae. Aohe mea i hiki ia Kapena Anedesona ke hoomaopopo owai la ia poe, na kana nana a noii ana iwaena o ia mau iwi maloo, no ka mea, aohe mea i loaa aku e hiki ai ke ike a hoomaopopoia. Ua hoouna aku ko Aupuni o Denemaka i kekahi mokukaua ilaila no ka noii pono loa ana aku i nei mea manaonao i hukiia ae la a ahuwale.

Na Hunahuna Laulaha.

                     Ua haalele iho ke Kedevesia Alekanederia, Algapita, Iulai 15, no ka hoohala manawa ana ma Konatinopela, Tureke.
                     No kona elemakule loa, ua hoole ae o Senetoa Soremana i kona kupono e lilo i moho holo Peresidena no Amerika Huipuia.
                     Aohe hoihoiia o ko Konela hui himeni e ko Enelani poe, mamuli paha hoi kahi o ka haule ana mai nei o ka heihei waapa hoehoe.
                     Ke mau la no ke kahe ana o ke ahi pele ma Mauna Visiviusa, Italia Aia ke kahe la ma kahi o 300 kapuai ke akea o mua, a mai ka 14 a 20 kapuai ke kiekie.
                     Aohe makemake o Peresidena Harisona i pau, wahi a kahi oleloia, e lilo i moho holo peresidena hou, aka, wahi no hoi a kahi oleloia, he makemake no a ke hooikaika la.
                     Ina e pau aku ana ko Li Hana Kana noho Kuhina Nui ana no Kina, e lilo aku ana paha hoi kona wahi ia Wana Wene Sono, taotai o Hanakao. He kanaka loea a nana kapakahi ole oia, a he hookolo loa no hoi ma ko Li Haua Kana kahua alakai hana.
                     O na poe a pau loa o Amerika Huipuia e makemake ana e oki mai ka nono mare ana, o Okolanoma ka mokuaina oi aku o ka hikiwawe loa. Iloko o eha malama, ua kaawale aku ka pili'na o na nihoniho. He mau keena kaokoa ia e weheia la e kekahi poe loio malaila no ia ano hana wale no. Ua oi loa aku hoi keia i ko Dakota mau aha hookolokolo.

-
No ka Hoolimalima

                     O ka hale ma Alanui Kalepa, i hoohanaia mamua e ka Hui Hoolaha Buletina Puka La. Ua hiki loa no o lalo ke maheleheleia i mau keena oihana, a pela aku.
E ninau ma ke keena o
WM. G. IRWIN & CO.,
iune 24 Kaupalenaia.

-
HALEKUAI KUIKE OAHU
-
"KE OLA O HAWAII."

                     Oiai hoi, ua pau ae la ke kuahana ana, ua weheia hoi ka halekuai maluna ae i Iulai 1 nei, nolaila, ua makaukau loa e hooko a e hoolawa aku i na iini o na poo a pau. E ko no ka makemake o na wahine ke kipa mai malaila, a e pono no hoi ke kipa mua mai mamua o ka hele ana i na halekuai e ae. Malaila no e loaa ai.
                     Na Makalena, na Kalakoa, na Keokeo Halua me Vitoria, na Papale, na Kakini, na Hainaka, na Waiala, a pela aku a nui a lehulehu wale.
                     E ike mai ia kakou hoakanaka.
M.E. SILVA,
iul 8-tf Luna Nui.