Ka Makaainana, Volume IV, Number 5, 29 Iulai 1895 — Page 7
HONOLULU, OAHU POAKAHI, IULAI 29, 1895. 7
HOOMANA KATOLIKA
-
He Kuhikuhi no ke Ao ana i na
Hoahanau o ka Ekalesia
Anagalikana.
-
APANA MUA - MAHELE V.
NA MAHAE ANA ILOKO O KA
EKALESIA.
[Hoomauia mai ka Helu 4, Buke IV.]
Ma ka wehewehe ana hoi i na olelo a Sana Paulo, - "Hookahi no Kino a hookahi no hoi Uhane, e like me ka oukou i heaia mai ai i ka manaolana hookahi o ko oukou kohoia ana; hookahi Haku, hookahi manaoio, hookahi bapetizo ana, hookahi hoi Akua a Makua o na mea a pau A," ua kakau ae o Sana Kuperiano. - "E paa a e kakoo poao hoi kakou i keia lokahi kupaa loa ana, a oi loa aku hoi o ko kakou poe bihopa," e hoomalu ana iloko o ka Ekalesia, i mea hoi e hiki ai ia kakou ke apono aku i ka Epicopate ponoi iho ua hookahi a ua mahele ole ia hoi ia. Mai no kahi a hoopunipuni aku i ke anaina o na hoahanau ma na olelo wahahee; aole no hoi kahi e hoohaumia aku i ka oiaio o ko kakou manaoio ma o kekahi kumakaia oiaio ole ana. Ua hookahi ka Epicopate; he mea holookoa ia, a ua noho mana piha hoi kela a me keia iho. Pela no hoi me ka Ekalesia, ua hookahi no ia, oiai no nae hoi ua laulaha loa aku ka palahalaha ana o kona mau lala ma o a maanei a e hoonui aku ana hoi me ka ulu a hua ae o kona ewe; e like la no hoi me ka lehulehu ana o na kukuna o ka la, eia nae , he hookahi no malamalama, a he lehulehu hoi na lala o kekahi kumulaau, eia nae, he hookahi no ona ikaika, aia hoi iloko o kona aa hohonu ka noho ana; a e like hoi me na auwai lehulehu e kahe ana mai ka manowai hookahi mai...ua hoomauia mai ka lokahi mai ke kumu ponoi mai."
Ua ao mai o Sana Kupiriano aia ka hilinai ana o ka lokahi o ka Ekalesia maluna o ka lokahi o ka oihana o na bihopa i hoounaia mai e Karisto, a maluna hoi o na Sakarema a lakou e lawelawe mai ai. Ua ao mai oia ua lilo ka Epicopate i ahahui hookahi i mahele ole ia, e launa pololei ana hoi kela a me keia bihopa me Iesu Karisto, a me ka mea lawelawe o Kona lokomaikai, ke ola no hoi ia o ka Ekalesia.
Pela i hoopoino ole ia ai ka lokahi o ka Ekalesia mamuli o ka make ana, no ka mea, aole loa e hiki i ka make ke hookaawale ae i ka noho hui ana me Karisto. Aole ma ka honua nei ka mahele hapanui o ka Ekalesia, aka, aia ma paredaiso "O na lala wale no o lalo ae o ke kino o o Karisto ka i luna iho o ka honua." Aia ka hapanui loa o na poe Karistiano ma kela ao ma o, kahi hoi a lakou e lualai la iloko o ka lokahi ana o ka Ekalesia, no ka mea, ua hookahi pu lakou me Karisto, ka Mea hoi ma ke kikowaena o ka lokahi. "Aole ma ka honua nei ke kikowaena o ka lokahi, aka, aia iloko o ka lani."
A pehea hoi no na mahae luuluu iloko o ka Ekalesia ma ka honua nei, i ikeia hoi me ka hoehoeha loa? Ua lilo keia mau mahae ana, i na poe hoi a pau loa i hoomaopopo iho i ka Karisto i manao ai, no ke kulana aku o Kona Ekalesia, i kumu e kaumaha a e hilahila ai. Ua lilo na mahae ana iloko o ka Ekalesia i nanaina e uwe ai o na anela, a e hauoli ai hoi o na daimonio. Mai kinohi mai, aole no i lilo i mea ano e loa ia mau mahae ana. Ua oi ae mamua o hookahi olelo ana a Sana Paulo no ia mau mea maloko o kana mau Episetole. No ka manawa pokole wale no keia mau mahae ana i kinohi, a oiai hoi lakou e mau ana, ua pili wale aku la no i kekahi mau mahele uuku loa o ka Ekalesia. Aka, i ka nee ana aku o ke au o ka manawa, ua hoea ae ka mahae nui loa a oi loa aku hoi o ke kukonukonu, i mau mai hoi no kekahi mau keneturia, a eia no ke mau nei. O ka mua a oi loa aku, oia ka mahae ana, mawaena o ka Hikina a me ke Komohana, i hoomaka mai hoi mai ko keneturia umikumamalua, a mahope mai, oia hoi ka mahae hou ana i ikea ae ma ke Komohana mawaena o ka ekalesia o Roma a me ko Enlani, he mahele nui o Geremania, a me kekahi mau aina Europa e ae, i mau mai la hoi no 350 makahiki.
E noonoo pokole ae hoi kakou i na kumu i hoea mai ai o keia mau mahae pilihua ana.
Aole i pau.
-
Apopo ka Malulani e ku mai ai no Kou.
Ua lohe wale ia ae, ma ka pule mua o keia mahina ae e oili ae ai he nupepa hou.
Ua hookohoia aku o H. Peelua i Luna Pa Aupuni no Kapaakea, Molokai, a o S. Kailewa no Paia, Maui.
Ua haawi ae o Kuhina Beritania Haose he wahi paina mama no Kiaaina A.S. Ake, oiai oia e haalele mai ana i keia mau kaiaulu no Enelani ma ka Warimu.
Ua hoolaunaia aku imua o Peresidena Kole i ka Poalua nei, o Kapena Pigimana o ka Benitona e Kuhina Wilisi, a ua loaa mai iaia ua hoohanohano ana e like me ka mea maa mau.
WAIHO NOHOALII.
-
O ke Aliiaimoku a Lawe ai Oia
i ka Hoohiki.
(Hoopau ana.)
Ma na helu i hala i pau ai na mea ano nui i pili i ka waiho nohoalii, a eia mai hoi ka mea pili no ka.
Hoohiki ana Malalo o Repubalika:
HONOLULU, MOKUPUNI O }
OAHU, KO HAWAII} ss
PAEAINA.}
Owau, o Liliuokalani Dominis, ke hoohiki nei au imua o ke Akua Mana Loa e kokua no au i ke Kumukanawai, na Kanawai a me ke Aupuni Repubalika o Hawaii, a aole au e kokua ma kekahi ano i ka hoihoi hou ana a kukulu ana paha i kekahi Aupuni Moi ma ko Hawaii Paeaina.
LILIUOKALANI DOMINIS.
Kakauinoaia a hoohikiia imua} o'u, i keia la 24 o Ianuari,} M.H. 1895.}
W.L. STANLEY,}
Notari no ka Lehulehu.}
Ka Pane a ko ke Aupuni Aoao.
Ua pane aku ke Aupuni i ka palapala maluna ae a ka Moiwahine i pau, ma ka Poalua, Ianuari 26, e like me keia malalo iho:
-
HALE MANA HOOKO.}
Honolulu, Ianuari 29, 1895.}
E MADAME: - O kekahi palapala i hookoia e oe nona ka manao maloko e haalele a hookuu loa ana i na pono aliiaimoku a pau ou mamua aku nei au e koi nei, ua haawiia mai nei i ka Peresidena ma kou inoa.
Oiai oe e paa ana he paahao i ka wa i kakauia ai keia palapala, ua makemakeia mamua o ka ae ana aku e waiho mai, e maopopo lea ia oe, i mea e ala ole mai ai kekahi kuhihewa ma keia hope aku, i na manao o ke Aupuni ma keia mea.
1. O ka hookoia ana o keia palapala, aole pono ke laweia ua hookuuia oe mai kekahi wahi lihi iki mai o kou hewa pilikino a ponoi ae no ke komo ana i ku i ka ninaninau a hookolokoloia e puka mai ana o oe kekahi i ka hewa ohumu kipi hope iho nei e kue ana i ke Aupuni a me ka hopena poino o ke ola; o ia kulana ua ae mai oe maloko o kau palapala.
2 Aole e hiki ke ae iki ia aku o na pono a me na koina au e hookuu ka koa wale mai nei i keia wa, he kuleana ku i ke kanawai e keehi iho ai mai Ianuari 14, 1893 mai, oiai, ma kau kukala akea ua hoole oe aole oe i paa malalo o ke kanawai kumu o ka aina au i hoohiki ai e lawe i ka oihana, a ma kau mau hana o ka hoao ana e lawelawe e like me kou manao iho e kukulu i ano aupuni hou, ua hoopau wale ia kela aelike e paa ana mawaena ou a me na makaainana, a o na pono aliiaimoku a pau e waiho ana iloko ou ua make mai ia oa aku. O ka olelo a na lala o kou aha kuhina e ia wa aole e hiki ia lakou ke hoomalu i kau hana i hoalala ai, a me ko lakou hoopii ana i na kamaaina o Honolulu no na kokua aku, o ia kekahi o na keehina nana i alakai e lawe na makaainana i ka mana o na pono o ke aupuni.
Ma kahi o kau palapala e laweia ai he nonoi no i ka poe Hawaii i alakai hewa ia o kou makemake e ike mai lakou i ka Repubalika oia wale no ke aupuni oiaio a ku i ke kanawai o ka aina, ke mahaloia nei. Ma keia pili ana, o kela koi au e loaa ia lakou, ka poe i komo hope iho nei, ka haawina aloha e hiki ai i ke aupuni ke haawi aku, e noonoo piha ia ana no ia.
(Kakauinoaia)
WILLIAM O. SMITH,
Loio Kuhina.
Ia Mrs. LILIUOKALANI DOMINIS.
-
HALEKUAI KUIKE OAHU
-
"KE OLA O HAWAII."
Oiai hoi, ua pau ae la ke kuahana ana, ua weheia hoi ka halekuai maluna ae i Iulai 1 nei, nolaila, ua makaukau loa e hooko a e hoolawa aku i na iini o na poo a pau. E ko no ka makemake o na wahine ke kipa mai malaila, a e pono no hoi ke kipa mua mai mamua o ka hele ana i na halekuai e ae. Malaila no e loaa ai.
Na Makalena, na Kalakoa, na Keokeo Halua me Vitoria, na Papale, na Kakini, na Hainaka, na Waiala, a pela aku a nui a lehulehu wale.
E ike mai ia kakou hoakanaka.
M.E. SILVA,
iul 8-tf Luna Nui.
-
Hoololi Hoahui.
Mai keia la aku e pau ai ko CHAN KEE noho ana iloko o ka Hui o KWAN TONG HING & COMPANY, e lawelawe, ana i ka oihana kalepa waiwai laulaha ma 315, Alanui Nuuanu, iloko o Honolulu. ma ka Mokupuni o Oahu, a ua komo aku hoi o CHAN MUN KAH iloko o ua hui la ma kahi o ka hoahui i waiho aku la, a o CHAN YOUNG o ka hoahui i waiho aku la, a o CHAN YOUNG a me CHAN MUN KAH na lala o ka hui i keia manawa.
(Kakauinoaia) CHAN KEE,
" CHAN YOUNG,
" CHAN MUN KAH.
Hanaia Iune 29, 1895.
iul 8-3 pl
-
No ka Hoolimalima
O ka hale ma Alanui Kalepa, i hoohanaia mamua e ka Hui Hoolaha Buletina Puka La. Ua hiki loa no o lalo ke maheleheleia i mau keena oihana, a pela aku.
E ninau ma ke keena o
WM. G. IRWIN & CO.,
iune 24 Kaupalenaia.
-
E.M. NAKUINA.
KOMISINA O NA ALA LIILII A ME
NA PONO WAI.
Notari Lehulehu, a he Agena Haawi Palapala Ae Mare no Honolulu nei.
KEENA HANA: Helu 308, Alanui Kalepa. dk 3-1mk.
-
W.H. DANIELS,
[BILA DANIELA]
Agena Kuai, a Hooponopono Aina, Mea Hana Palapala Kanawai, Mea Ohi Aie a pela aku.
O na hana a pau e haawiia aku ana iaia, e lawelaweia no ia me ka eleu a me ka omoole.
Keena Hana a me Wahi Noho, aia ma Wailuku, Maui.
mei 6-mk.
-
J K KAHOOKANO
LOIO a he Kokua ma ke Kanawai.
KEENA HANA: Alanui Kaahumanu,
Honolulu. jan 8, '94-1mk