Ka Makaainana, Volume IV, Number 4, 22 July 1895 — Page 8

8 HONOLULU, OAHU, POAKAHI, IULAI 22, 1895.

KELA A ME KEIA.

                Aia ma ka Ema Kuea ke puhi ohe o keia ahiahi.
            Ua huli hoi aku ka Au seteralia i ka Poaono nei no Kapalakiko.
            Aia ke hoomaluia nei makai o Kahakaaulana na ohua Pake a me Kepani a ka Pekina i lawe mai ai.
            Ua hiki aku ka nui o na poe e noho nei maloko o Lunalilo Home i ke 51, oia hoi na poe hune maoli.
            Ua lilo ma ke kuai i ka Papa Hoonaauao o Keoua Hale, ma alanui Ema, no $30,000 mai ia Bihopa mai.
            Eia o Kimo Olo, kekahi kamaaina oiwi o ka oihana pai, ke waiho nei malalo o na hoohihia ana a ka mai ano lolo.
            Ua hoohapa ae na moku holopiliaina i ko lakou mau hae i ka Poaha nei no ka hoomanao ana ia Kapena Makinikaea.
            E hoea mai ana he puukani ma ka himeni i Honolulu nei ma ka mokumahu Belagika e ku mai ana ma ka la 9 o Augate.
            Ua lilo ia Beni, he wahi keiki opio, ka puaa i ka po Poaono nei ma ke kahua o na lio poniuniu.
            Ua lilo i ka Hui Poi o Wailuku ka aelike o ka hoolawa ana i ke kahua ma'i lepera o Kalwao ma ke 50 keneta o ke paiai hookahi.
            Ua aa mai nei na keiki hoehoe waapa o ka uwapo e heihei me na makai no ka makana he $600, ma ka 6, 10, 12 a 14 hoe o ka waapa.
            Makai o ka uwapo ma alanui Papu kekahi mahele o na koa Pi Ki kahi i paikau hoomaamaa ai me na pukuniahi i kakahiaka nui Poalima nei.
            Ua hala aku ma ke Kinau o ka Poalua iho la ka Bihopa o Honolulu no kana hana maa mau iwaena o na kipahai o ka hoomana Enelani.
            O ka Miowera ke ku mai ana i ka Poakolu mai ka Akau mai. Mai na Panalaau Hema mai hoi ka Mariposa a kakae loa aku no ka Ipuka Gula.
            Elua mau welo lio Hawaii i heihei iho nei ma Kapiolani Paka, i laweia aku e ka Auseteralia no ka hooheihei pu ana me na lio o Kaleponi.
            E hooliloia aku ana o Maki Ailana ma keia mua iho i wahi hoomoana no na koa i mea hoomaamaa no lakou ke hiki mai i ka manawa kaua.
            Ma ka Au seteralia i hoea mai ai he kapena hou no ka Beninetona, a o Kapena Tomasa, ua huli hoi aku ma ka Auseteralia o ka Poaono nei. Ua pau kona manawa.
            He mokumahu ke ku mai ana i Honolulu nei ma kona ala holo loa i Iapana mai Po talana mai, Oregona, ma ka la 8 o Augate ae nei. O Aselouna ka inoa, a o T. H. Davisi Ma na Agena.
            Ma ka halawai ana o ka Hui Waapa Leilani i ka po Poakolu iho la, ua aeia aku ka waiho ana mai o J S Lo i kona kulana no ka hui, a ua hookohuia aku o Kama'lii Kawananakoa i kapena.
            He $1,500 ka lilo o ke Aupuni no ke kau kiure o Wailuku, iloko aku nei o Iune.
            Ua penaia na alahao o ka Hui Alahao a Aina Oahu, i mea hoi e pale aku ai i ka lepohao.
            Ke lilo mai nei o Waianae i wahi makahehiia e na poe holo hoomaha ilaila i na La Pule a pau.
            Ma ka Malulani o ka Poalima nei i hoohiki mai ai i Honolulu nei o Mekia J. H. Wudehausi, ke Komisina Beritania mua ma Hawaii nei, mai Maui mai.
            Ua pau i ka maheleheleia e J. S. Emekona na kuleana i koe iloko o ka Hui Aina o Kapaliluahine, Manoa, a ua waiho ae oia i kana hoike imua o ka Aha Kaapuni.
            Lehulehu loa ka na poe kiu Aupuni e pokaa hele nei, he poe malihini loa wale no ka. Aia kekahi poe kiu iwaena o na kane a me na wahine o na anaina kiekie.
            I ka Poaha iho la, ua poohu ae na lae o keia poe no ka lawelawe i ka piliwaiwai kipa imua o ka Aha Apana: Keolanui, a i ole, o W. Elia, $150; kana wahine, $100; Kaniela a me Beni, $100; pakahi.
            Ma ka Au seteralia i huli hoi mai nei o Hare Iuene, kekahi pio i kipakuia ai, mamuli paha hoi o ka ae ana e hana i ko ke Aupuni makemake. Nana i hoihoi mai nei he kea hanohano no A. P. Pitasona, i make, mai Iapana mai, a ua haawiia ae i kona kaikoeke maanei.
            Aia aku nei ka Luna Dute Nui a me kekahi mea malama buke o ka oihana Dute maanei i Hilo, ma ke Kinau o ka Poalima, a ua lonoia ae no ka noii ana ka i na buke a Kale Notele, Luna Dute malaila. O ke ano ka o kona noho ana, me he la ua oi aku na lilo mamua ae o na loaa mai.
            I keia ahiahi Poalua ae, la 30, e haawi ai ka Hui Hawaii Opio, i kokuaia e kekahi poe e ae, i ahamele maloko o ka luakini o Kaumakapili, no ka pomaikai o ka waihona o ka Ahahui Kokua Manawalea Lahui, e malama nei hoi i na ohana o na poe pio kalaiaina. O ka hana ia, alu like ae kakou a pau.
            Ua lilo i ka Buletina Ahiahi ka aelike no ka hoolaha ana i na kanawai ma ka olelo Enelani no ka hapaha o ke tausani mu, a o ka Hui Kekake hoi no ke Kuokoa ma ka olelo Hawaii no ke kanawalu keneta. O ka mu o ia ke ana ma ka oihana pai no na mea a pau e hoonohoia ai i na hua kepau.
            Mahope iho o na halawai hoololoiahili ana a kekahi poe komi te no ka noii pono ana i ka hewa o ke kumu poo o Kapunahou, ua puka mai la ka lakou olelo hooholo e hoole ana aole i hewa o Porofesa Hosema ma o kela mau lono a makou i hoike mua aku ai "ua pao hewa oia i ka huewai a ke kanaka."
            Ua eu ae ko makou mau wahi keiki wili papapai e inu sake i ka po Poaono nei, a u noke iho la kahi a me kahi i ke kaena i ka ikaika hapai a me ka ikaika wili, a o ka hopena, ua ulele mokomoko ae la laua. Aohe o laua mea i eha, a oia no ke u hana nei i neia kakahiaka. "Hi ka pa, hi ka malau" ia laua, aohe opala koe. Nui ka ona, ea!
            O na kikiki helu elua mai Honolulu a Vanecouva, he maikai no ekolu mahina, e hoomaka ana mai Iune 1 aku, no ke kuai.
            Ma ka hale hana hao o Ulakoheo i hanaia iho nei kekahi mau epaepa o ka mokukaua Beninetona, a ua hoihoiia aku i ka Poaono nei.
            Ilalo aku o Waianae ke Duke nui o Waolani no kela halawai a na eepa i malamaia ma Leilono i ka auwina la Poaono nei.
            Ke aneane loa ae la e pau na hana no ka hoomaemae ana i ke Kalau dine i keia wa, a e pani aku ana oia ma ko Kinau wahi ma keia mua iho.
            Ua loaa ia i ka ma'i kuhewa kekahi wahine ma ke alo iho o ka haleleta i ke awakea Poakolu nei. Maluna o ke kaapio i hoihoi aku ai no kauhale.
            O ka Poaha iho ka la hoano o Sana Iakobo, ka Aposetole a me ka mea i make no kona Haku a Hoola. E malamaia ana he mau anaina haipule ma ia la ma na luakini o Sana Anaru a me Malieokamalu.
            I ke ahiahi Poaono nei, ma alanui Beritania, ua kiolaia aku la kekahi wahine oiai oia maluna o kona kaa huilalua ma ka hookui ana me ka pou uweolelo ma ke alo iho o ko A. V. Gia hale noho. Aole oia i poino.
            Ma ka Miowera o Augate 1 ae, e holo ana no Vitoria a me Vanekouva, B. K., e kau aku ai ke Alii Ake, Mekia a me Misasa Wudehausi, no ka holo loa aku no Enelani, a o Wili Kakela a me ka ohana no Wasinetona, Amerika Huipuia.
            Mai hoopoina mai na poe ona waiwai, eia ke pokole loa aku nei na la i koe no ka waiho ae i na palapala helu waiwai i paihakahakaia. Ke pau keia malama, hana mai ka Luna Auhau e like me kona makemake, a aohe alo ana ae e hala.
            Ua halawai me ka ulia poino ma o ka hoopahupahuia ana o kela lua pao e eliia nei mawaena o Aliapaakai me Aliomanu, Moanalua, o Kalesona, he haole, i neihinei. Ua lele aku kekahi mau apanapana pohaku ma kona mau maka a me ke kino a ua nui ka poino. Ua hoihoiia mai oia i ka Halemai Moiwahine no ka lapaau ana. O ka lua iho la keia o na ulia i loaa ma ia wahi.
            Poalima nei, imua o ka Aha Apana, i hookolokoloia ai o E. Woodward [Wodesada] no ka hoowalewale a onou ana i ka umoki iloko o ka huewai a Mele Akau, pokii o ka wahine a kona kaikuaana, me ka olelo e mare. Kakahiaka Poaono nei i ahewaia ai oia a hoopaiia no ka hookahi makahiki hoopaahao ma Kawa a me na koina. Ua hoohalahala loa aku oia i nei kau kiure ae.
            Ikiiki ka po a ao ae nehinei me kahi koaniani makani ole, eia nae, aole i loihi loa iho mamua o ka hora 7, ua pa mai la he ahe makani makai mai, a aole no hoi i emo ma ia hope iho, pa kikiao ana mauka mai. O ke kikiao ia, pakaawali na lau laau a puehu ka ehu lepo hoopula maka, aohe nae he wahi mea a olu iho. Pela no a po nehinei. Nui ka pilikia o ko makou puuku i ka paki wai mau. Iaia bigi mana loa no.
            Ua nuha kekahi poe no ka holo ole ana ilalo o Waianae i ka auwina la Poaono nei, o na poe Kula Sabati o Kaumakapili. A ua hookekee nui iho la aole e hele hou i ka pule. E nuha la hoi oukou, uwe aku makou!

            No na poe e makemake ana i na kii pena hoonuiia mai na kii hooleleaka, ina ma ka waihooluu a inika paha, e pono e ninau mua ia O. K. STILLMAN (Oliva Kilimana), oiai, he agena oia ma ia hana. E ninau ma keia keena nona. mei 20-mp

            Ma ka Poaono la 20 nei, ua haawi ae ke Kahu Kula Sabati Nui o Kaumakapili i na haumana Kula Sabati he holo kaaahi ilalo o Waianae. Ua akoakoa ae na haumana kula a pau ma ka hale hoolulu, a i ka hora 1:45 P M , ua hoomaka ka holo ana. Ua piha pono na kaa ohua eono i na haumana kula. A i ka hora 5:55 o ia ahiahi no i huli hoi mai ai. Ua nui ka mahalo a me na hoomaikai ana a na haumana i ko lakou Kahu Kula Sabati Nui.
            I ka Poalua nei i haawi ae ai o Hanale Walakahauki he paina hauoli mawaho o Waikiki i na haumana Kula Sabati o Waikahalulu, a me na poe i konoia. Ekolu piha kaa hoonalulu elemu o Kamika i lawe ai ia lakou iwaho o laila, a i ka hoi nui ana mai elua wale no kaa na laua i kii aku a ua hoi wawae mai kekahi poe a loaa ke kaa hapaumi hoea loa mai i ke kaona nei. Ua nukuia aku ka ona kaa bosa e kahi wahine no ka hana pakeekee ia lakou, a aole i ukuia aku kahi hapa o na lilo.
            Ma ke kakahiaka o ka Poaha nei, no ka piha lealea loa o kekahi mau keiki liilii, he 6 makahiki o kahi a he 7 o kahi, ua kau iho la laua maluna o kekahi wahi waapa uuku a holoholo ae la mauka iho o ka uwapo Pakipika, a no ke ano aleale loa o ke kai, ua makau iho la ua mau wahi keiki la a hoomaka aku la e lele iloko o ke kai. Ike aku nei kekahi poe a au aku la e hoopakele ia laua, a i ka loaa ana aku e pihopiho iho ana laua, no ka mea, aohe ike i ka au. E akahele loa na makua i ka lakou mau keiki, mai hookuu ia lakou e auwana hele e like me keia mau keiki, o poino auanei.
            He kani pui panapana ka i loheia i ka po Poakolu iho la mahope aku o ka pa o Keaweamahi, alanui Ema. Ua lohe o Misita Sach i ke pahu ana o kekahi mea ma ka aoao o ka hale, ao e nae ona hoomaopopo aku. I ke kakahiaka ae, i ka wa e hoonee ana i na ukana o ka hale, ike iho la oia i kekahi mea e waiho ana iluna o ka papahele, eia ka he puka. Aia hoi he puka nui ma ka paia o ka hale ma ka rumi moe o ke keiki. A he eiwa iniha ke kiekie ae o ua wahi puka la maluna ae o ke poo o kana keiki. Ma ia puka i komo mai ai ka poka a hala maluna o ke poo o ke keiki e moe ana. Ua hoike koke ia keia mea i ka Ilamuku i ka Poaha nei.

Hookapu Kai Lawaia.

Eia ke hoolahaia aku nei ma keia ua hookapuia ka lawaia ana ma ke Kai Lawaia o Kahala, koe wale no a loaa ka aeia mai e J. HELELUHE, Agena no ke Alii Liliuokalani. Honolulu, Iulai 1, 1895. iul 1—4 pl.