Ka Makaainana, Volume IV, Number 4, 22 July 1895 — Page 6

6 HONOLULU, OAHU, POAKAHI, IULAI 22, 1895.

NA AINA MAMAO.

Na Lono Huikau mai kela a me keia Wahi o ke Ao Nei.

Lawe a Lilo o Iapana ia Foamosa.

                Ma ka la 2 o Iune i haawi aku ai o Kina i ka Mokupuni o Foamosa ia Iapana, e like hoi me ka mea i hooholoia ma ke kuikahi maluhia o Simoneseki. A mahope mai o ia manawa, ua ulu ae he mau hakaka ana aku me na poe Pake kipi a me na poe Hae Eleele. I ka hiki ana i Zui fana, ua lele aku na Kepani mai na aoao ekolu, a ua hoauheeia he 1,500 Pake mai ia wahi. Ua waiho iho na Pake he 130 make ma ke kahua a he 30 i lilo pio. He 9 make a he 16 eha ma ko na Kepani aoao.
            Pau ka hana ana i nei wahi, ua nee aku no Kiluna, he wahi ano nui ma ka aoao akau-hikina, i kaulana hoi no kona mau lua lanahu e hoohanaia la malalo o na lawelawe ana a na haole. Ma ka ho ra 6 AM ka hoomaka ana, aka, ua lilo kaokoa loa mai ia wahi i na Kepani i ka hora 5 o ke ahiahi ana iho. He 6,000 ka nui o na Pake a he 1,700 na Kepani. Ua 300 ka nui o ka poino o ka mua; he 3 make a he 29 eha o ka hope.
            A mai Kiluna aku i nee aku ai na Kepani no Tamasiu, ma ka aekai akau komohana. Ua loaa aku ua pioloke ko laila poe. Ma Taipe, ua auhee aku na koa, a i kokuaia hoi e na aluka hoohaunaele, ua puhi ahi aku lakou ma ke ala me ka hao a powa wale aku no, a o ia ano hana like no hoi ma kahi mau wahi e ae.

Mea Ole ka Repubalika o Foamosa.

                Oiai no hoi keia mau hana maluna ae e noke ana, ua hoikeia aku o Tuna, Peresidena o ka Repubalika hou mai Pekina, e hoomanao oia aia kona ohana i Kina, a ina oia e hoomau a hoopaakiki aku ma kona ala kanawai ole, e kau no ke koikoi maluna iho o lakou. No nei mea, ua hooholo oia e holo, a o kona mahuka a kuemi hope ana ka hoailona no na poe repubalika e ae e hana like aku ai. Aia ka Akau holookoa o Foamosa malalo o na Kepani, a ua pau a lilo loa hoi ka Repubalika i mea no ke au i hala. Aka, o Liu, ke poo i pau o na Hae Eleele nae hoi ka mea i koe ma ka Hema, a malia o hoopilikia ae no oia.

Wiwo a Hopo Ole Iapana ia Rusia.

                Wahi a O zaki Iukio, alakai o ka aoao Holomua o Iapana: "Ina i hoopaakiki aku o Iapana, ina la hoi aole e hoohahana loa mai o Geremania a me Farani. Ia Rusia hookahi wale no makou e hana ai, a aohe o makou makau ia Rusia." Ua wanana ae oia no ka hiolo aku o ka Aha Kuhina, mamuli hoi o ka hopepe a makau wale. Ke noho hou ae ka Ahaolelo, e kueia ana ka Aha Kuhuna no ka nawaliwali a ano makaukau ole, a no ka nele loa hoi kahi i ka manao kaulike a me na hana ano hoohilahila hoi kahi ma ka aelike i hooponopono hou ia me Kina.

Na Lono Kaua o Kina a me Iapana.

                Aia ke Kuhina Rukini a me kana wahine ke kipa ike a ke ao la i ka Moiwahine o Korea.
            Wahi a kekahi lono mai Pekina i loaa aku ma La dana, la 4 nei, ua kakauinoaia ka aie lahui hou o Kina mai ia Rusia mai.
            Ua pau nui ae na haole e noho ana ma Tai Wana i ka holo no Takoa, me ka haalele nui aku hoi i ko lakou waiwai mahope.
            He lono kuloko no Sanahai iho, o Mei 22, ua hoole hoowahawaha ae o Kina i ke koi a Iapana no ona uku poho hou ae no kona haalele aku i ka Puali o Liao Tuna.
            Ua hoike pili oihana ia aku ke Aupuni o Iapana, Mei 22, i ka olelo kauoha i hoopukaia e ka Emeperoa o Kina i ka la mamua iho, e kauoha ana i na luna oihana Pake a pau mai Foamosa, e liuliu ae hoi no ka haawi aku ia mokupuni ia Iapana e like me na olelo o ke kuikahi o ka maluhia i kakauinoaia ai ma Simoneseki.

Kiai Pono o Sepania ia Iapana.

                Imua o ka Ahaolelo ma Made raida, Mei 7, ua hoike aku ka Duke o Tetuana, Kuhina o ko na Aina E, aia o Sepania ma ke kulana maikai loa o ka noho hoa'loha ana me Iapana, aka nae hoi, ua manao no ke Aupuni he mea pono e lawelaweia aku kekahi mau keehina i mea e hoopalekana ae ai i na pono o Sepania ma na Paemoku Pilipine. Ua oleloia ua waihoia ae a na Sepania e hooponopono a e hoolala i ke ano o ka hooponopono hope loa no ka mea i hoopaapaaia mawaena o Iapana a me na mana ekolu. Eia nae hoi, aohe o Sepania i ae e hui pu aku ma ke kue ana i na kumu o ke kuikahi maluhia mawaena o Kina a me Iapana me na aupuni ekolu o Europa i kue aku oia ka lono maopopo ma Maderaida o Mei 6.

Ohumu Kipi Hou Paha ma Berazila.

                Ke upuia la e ala hou ae ana he kaua kipi ma Berazila. Ua laulaha loa ae ka ka lono ma Rio de Ianeiro aia ka kekahi poe kiekie iloko o ka oihana kaua moana a me aina ke manao la e hookahulihia ae i ke Aupuni a e kukala ae i Aupuni Kuikawa, me kekahi Kenerala i Kuhina Kaua a me kekahi Adimerala i Kuhina Moana.
            La 6 nei i manaoia ai e haalele aku ana ke Kuhina I talia ia Rio de Ianeiro, Berazila, a pela e pau ai na launa ana mawaena o ia mau aupuni mamuli o kekahi wahi paee i ulu ae. Ke ano e loa aku la no hoi na launa ana mawaena o Farani a me Berazila, no ka mea e pili ana i ka palena aina o Giana Farani, a ke ano oi loa aku la ka hoomamao loa o kahi i kahi.

Na Hunahuna Laulaha.

                He Aha Kuhina hou ko Serevia i nei wa.
            Lehulehu na kauhale i hoopoinoia ma Lai baka, Auseturia, e kekahi hoonaue olai ana.
            Malia o haalele aku ko Kili Pere sidena mamuli o kekahi ano e iloko a iwaena o kona poe kuhina.
            He mau hoohaunaele weliweli hoi la e nokeia mai la e na poe eli lanahu ma Viriginia Komohana, a ke awiwiia la ka hoouna ana i na koa ma ke kahua o ia hana.
            He kaikamahine hou ka Mi sasa Kalivilana i hanau ae i ka la 8 nei, a o ke kolu iho la ia o na keiki, he poe wahine wale no, a ka Peresidena o Amerika Huipuia.
            He komite ka ke Aupuni o Sepania i hookohu ai no ka noonoo ana i na koi a Amerika Huipuia no ka ukuia aku ia Mora, ka mea mahiai o Cuba i hoopoinoia e na hana o ke kaua kipi ma ia mokupuni.
            E holo aku ana o Alii Kalalena, o ka Aina Makika mamua a he ailoaa hoi na ke Aupuni Beritania i nei wa ma Kinesetona, Iamaica, no ka hoomaopopo ana aku hoi i kana mau koi poho e kue ana i ke Aupuni o Nicaragua.
            Ua kakauinoa ka Moi Vitoria i ka palapala e hoopau ana i ka noho ana o ka Ahaolelo a e kauoha ana hoi no ona kau koho balota laulaha hou. Ma ka a 13 nei i manaoia ai e malamaia ka hapanui loa o na koho balota ana o na apana.
            Aia ma ka aoao komohana-akau o ke ahua pohaku pele nui o luna o Mauna Vesuviusa he owa hamama akea, a puapuai mai la malaila ke kaheawai ana o ka luai ahi pele nokonoko a ke kahe la ma ia aoao o ka mauna. Ke hana apiki la no hoi o Mauna Etena.
            He ala haunaele hahana ka i ulu ae ma Ka tewa (Kuttywar), ma ka apana o Gezerata, Inia, pela ka lono i loaa ae ma Ladana i ka la 6 nei, a o ka hua i loaa ae, he ekolu i make a he 184 i eha, he 12 nae hoi o lakou i ano kukonukonu loa. I ulu keia haunaele mamuli o ka hui ana o kekahi mau huakai pili hoomana o na Hinedu a me na Mohamedana.
            Me ka hookolokolo ole ia, ua ki pu ia kekahi Amerika e kekahi poe koa Mekiko i Iune 26 aku nei, oiai oia e paa ana i kahi paa me ka manao wale ia nana i powa a pepehi a make loa i kekahi mea hookele kaa he mau pule mamua aku. E ui ae ana kona hoahanau i ko laua Aupuni no kekahi uku poho no nei hana kanawai ole, oiai, he ohana nui ko ka mea i make i ano pipilikia loa.
            Aia ke ao omamalu kaua ke kau la maluna iho o Europa, oia hoi, ma ka akau, mamuli o ka paee a like ole o na manao mawaena o Norewai a me Suedena, a ma ka hema hoi, mawaena o Tureke a me kekahi mau aina e ae, mamuli paha hoi o ko Tureke ake e hoi hou mai kona mau okana i lilo aku, a i ole hoi ia, he makemake paha hoi e kipaku loa ia aku mai kona lualai ana ma Europa.
            Mamuli o ka hoike ana aku o ko komi sina nana mokukaua o ka Repubalika Agenetine o ka mokukaua Italia nui Geribaladi ka moku oi loa aku i haawiia no ke kuai. Ia wa koke no i kakauinoa ai ke Ahpuni i ka aelike a kauohaia aku ke Kuhina ma Ladana e hookaa ae i ka mahele uku mua. O keia, a me na moku e ae a ia Aupuni e manao la e kuai, ka mea e hoolilo aku ai iaia i mana helu ekahi ma Amerika Hema.

Dr. W D JONE,
[KAUKA IONE.]

Kauka Lapaau no na ano ma'i a pau o loko o ke kino, fiva taifoida, maka eha, niho eha, puu eha a me na ano e a pau e loaa ana i ke koko ino a me na palapu e ae. Aole ana mau okioki a kolikoli ana. Hiki loa iaia ke lapaau i na ano ma'i a pau loa, a ke loaa ole ka oluolu, aohe uku ana, ina nae hoi nana wale no e lawelawea mea i ma'i. MANAWA HANA: Hora 9 a 11:30 A.M.; 1 a 6 P.M. KEENA: Alanui Konia, ma na keena mauka loa o Birito Hale, ma ka huli ma Ewa ma alanui Moi aku. mei 13-3m

HALEKUAI KUIKE OAHU
"KE OLA O HAWAII."

Oiai hoi, ua pau ae la ke kuahaua ana, ua weheia hoi ka halekuai maluna ae i Iulai 1 nei, nolaila, ua makaukau loa e hooko a e hoolawa aku i na iini o na poe a pau. E ko no ka makemake o na wahine ke kipa mai malaila, a e pono no hoi ke kipa mua mai mamua o ka hele ana i na halekuai e ae. Malaila no e loaa ai Na Makalena, na Kalakoa, na Keokeo Halua me Vitoria, na Papale, na Kakini, na Hainaka, na Waiala, a pela aku a nui a lehulehu wale. E ike mai ia kakou hoakanaka. M. E. SILVA, Luna Nui. iul 8-tf

Hoololi Hoahui.

Mai keia la aku e pau ai ko CHAN KEE noho ana iloko o ka Hui o KWAN TONG HING & COMPANY, e lawelawe ana i ka oihana kalepa waiwai laulaha ma 315, Alanui Nuuanu, iloko o Honolulu, ma ka Mokupuni o Oahu, a ua komo aku hoi o CHAN MUN KAH iloko o ua hui la ma kahi o ka hoahui i waiho aku la, a o CHAN YOUNG a me CHAN MUN KAH na lala o ka hui i keia manawa. (Kakauinoaia) CHAN KEE, CHAN YOUNG, CHAN MUN KAH. Hanaia Iune 29, 1895. iul 8-3pl