Ka Makaainana, Volume IV, Number 4, 22 July 1895 — Page 1
Ka Makaainana.
BUKE IV----Ano Hou. Honolulu, Oahu, Iulai 22, 1895. HELU 4
Na Pulapula Puuwai Kila.
Nani wale ka ike'na i na hoa,
Ka noho'na o ka hale kaupoku ole,
Ui aku, ui mai ko'u manao,
Pehea kakou e pono ai,
Pane mai na hoa me ka walohia,
O ka Mana Kahikolu ke kokua,
Ka makou ia e kaunui nei,
Ke aloha aina pua rose lani,
Haupu ka manao me ka ehaeha,
I ka noho kalaunu o Liliulani,
Nani wale ka opua ma kahikina,
Kuhikuhi i ke ao malamalama,
E ola o Kalani a mau loa,
A hoi hou oe i ke kalaunu,
A he milimili oe na ka lahui,
Me na mamo hoi a Kamehameha,
Na pulapula o ka puuwai kila,
Nana i kaohi na paemoku,
Auhea oukou e ka lahui,
Kaohi a paa i ke Aupuni,
Mai hoohemahema hou oukou,
I na mali leo a ke aloha ole,
O komo hou mai e ka pakaha,
I ka pono kivila o ke kanaka,
Malama oukou ia Nolena,
I ka moo nahesa hoowalewale,
He puhi ino hoi no ke kai uli,
No ke kai popolohua mea a Kane;
Haina ka puana la i onaia,
Na poe i aloha i ka aina.
D. K. KAUMIUMI.
Hoku me Ikeoleia.
Mamuli no o ka piha ohohiaia o keia mau hui ma ka paani ana, ua piha ae no o waho o ke kahua kinipopo i na poe ake e ike i ko laua makaukau ma ia hana. I ka pau ana o na hora elua o ka paani ana, ua lilo aku la ke eo ia Hoku me 13 puni kue ia 12. Eia iho na hoomaikeike ana o na aipuni.
1 2 3 4 5 6 7 8 9
Hoku 3 3 1 2 1 1 2 0 0 — 13
Ikeoleia 4 1 0 1 1 5 0 0 0 — 12
Ua hoopii aku o Aukai, Kapena o Ikeoleia i ka olelo hooholo a kekahi o na lunakanawai, oia ka mea nana e hoomaopopo na pahu.
Ua ku ka papalina o kekahi wahine haole i ke kinipopo a eha loa, a ua hoihoiia aku oia i ka hale.
O Kamehameha me Hoku i keia Poaono iho.
Ua ku mai ke Kulanakauhale o Pekina i ke ahiahi Poakolu iho la mai Kina a me Iapana me 223 Pake a me 70 Kepani. Ma ka hora 11 o kakahiaka Poaha nei i holo aku ai no Kapalakiko.
Makai o Kakaako i ke ahiahi Poalua iho la i haawi ae ai kekahi o na pio kalaiana i hoi mai nei mai Hilo mai, he paina hoomanao no na la o ka inea i aloia ai e ia a me kona mau hoa. Ua hiki ae malaila kekahi poe i noho pu ai iloko o ka ehaeha e haupa pu ai, a ua lawa i na mea a pau i hoomakaukauia.
Kaili Mokupuni a ka Lehua.
Kakahiaka nui o ka Poaha iho la, hora 6, i ku mai ai ka mokukaua Lehua mai kana huakai aku nei no ka hoohui ana mai i kekahi mau mokupuni papapa malalo aku no Hawaii nei. Hora 5:53 P M o ka la 9 nei kona holo ana a kaalo ma Mokupuni Manu i ke kakahiaka nui o ka la 11. Auwina la o ka la 11, ikeia o Mokupuni Neka a kuu ka heleuma ma ka hora 3 a oi ma kahi he 13 anana ka hohonu. Lele o Kapena Kini, Kuhina Kalaiaina, a me na hoahele, iuka a ikeia iho la aole ka hae Hawaii, ua hina ka pahuhae a ua hamama ka pahu i waiho ai o na pepa. Ua loaa aku no ka palapala kuahaua o ka laweia ana o ia mokupuni e ke Aupuni Hawaii i ka malama o Mei, 1894. Aia ma kekahi aoao he mau olelo i kakauia e na alii o ka mokukaua Kamepiona, e pili ana i ko lakou ana ana i ua wahi mokupuni la. Ma ka la 24 o Sepatemaba ke kakauia ana. Aohe mau akua kii pohaku i loaa aku ilaila, ua pau i ka laweia. Haalele ia laila no French Frigate Shoals, a ma ka hora 5 P M o ia la kuu ka heleuma ma kahi he 18 anana ka hohonu. A ua lilo mai ia mokupuni malalo o Hawaii nei. A mai laila aku no kekahi mokupuni papapa, a ma kahi he 2 1/2 mile ka mamao mai ka aina aku i ku ai ka moku. Ua holo aku o Kapena Kini iuka a lawe ae la ia mokupuni no Hawaii nei, a hea aku la i ka inoa o Lehua Mokupuni. O ia ka mokupuni, aohe honua e hiki ai ke kukulu i pahuhae, no ka mea, he one wale no o laila.
Hipuu Polena ia a Paa Loa.
Ua hooko io ia no ka mare ana, e like me ka makou i hoike mua ai, mawaena o Jacob Friedrich Carl Hagena me Mrs. Eliza Kaipoleimanu Iuko, i ka aluna molehulehu, hora 7:30, o ke ahiahi Poakahi i hala. Na ka Haku Bihopa o Honolulu i uo ae i ka hipuu a paa loa, a hooliloia hoi na puuwai elua i hookahi pana ana, maloko o ka luakini o Sana Anaru a imua hoi o kekahi anaina nui, ua hele o loko a piha. Pau na hana malaila, ua alu aku a uka o Uluhaimalama, Pauoa, ma kahi o J. Mana a me kana wahine, a ilaila ka aha ike i malamaia ai. Mahope iho ka aha hulahula, i ukaliia me na mea ai mama, a i na hora liilii o ka wanaao, hora 3, i hookuu ai a hoi kela a me keia. Ua hoi mua no nae hoi na mea i mareia no kahi o ke kane, ko laua home e nei mua aku mauka o Kalihi. Lehulehu na makana i loaa ae ia laua. Ua nui ka hauoli a me ka lealea o na poe i hiki ae. He mau ui no laua a elua.
Hoohanohano Kiekie ia Mai.
Ma ka mokumahu Pekina i loaa mai nei he kea hoohanohano hou ia Kapena A G S Haoese, Komisina Beritania maanei, mai ka Emepera mai nei o Iapana. Ua loaa mua no iaia he kea hoohanohano o ka papa eha o ka oihana hoohanohano o ka La Hiki Mai. Ua umi aenei makahiki i hala, aka, he kiekie ae hoi keia, o ka papa ekolu o ka oihana hoohanohano o Meiji. Maraki 16 aku nei i kakauinoaia ai kona palapala ma Hirosima. I loaa ka mea mua iaia no kona ao ana i na Kepani i ke kaua moana, a o keia mai la hoi no ka ikeia ua maikai kana ao ana ma keia kaua ana mai nei, a ua haule hope ole hoi ka Emepera na ka hoomaopopo ana no ia mea. He hanohano hiwahiwa loa keia a ke kanaka e hiipoi ai. Ma o ke Kanikela-Generala Iapana la i hoounaia mai nei, a nana hoi i haawi ponoi ae i ke Komisina ma ka inoa o kona Haku Alii.
Kanikela Farani Hou.
Ma ka Auseteralia ulolohi a aui ka Poakahi i hala i hoea mai ai o Monosina A Vezavona, ko Farani Hope Kanikela mua, i paniia iho ai e ka mea i make iho nei. He kamaaina mua no oia i o kakou nei. Ua ike mai ke Aupuni iaia oia ka Hope Kanikela a Komisina o Farani maanei, a pau ae la hoi ko W. M. Gafoda lawelawe ana ia mau kulana oihana, a hoi iho la oia a ke kulana kakauolelo, ana no i noho pani ai no neia mea. Aia a hiki mai he Komisina hou, alaila, lilo ae o Vezavona i kakauolelo, kona kulana mua no, a pau ae hoi o Gafoda. E hookiekieia ae ana ko Farani kulana Kanikela a i Kanikela-Kenerala maanei. He wahi okoa no ka i haawiia iaia, aka, aole oia i ae.
Mau Make Kukolu.
HOAHANAU MATINA.
Auwina la o ka Poakolu nei i kuu mai ai ka hanu ola o Hoahanau Matina, kekahi o na kumukula o ke Kulanui o Sana Lui, i ke 32 o kona mau makahiki. I ke kakahiaka Poaha ae i malamaia ai ke anaina pule maluna o kona kino wailua ma ka luakini Katolika Roma, a mai laila aku i hoolewaia ai a waiho ma ka ilina o Koula. Lehulehu na makamaka a me na haumana i hele aku i kona hoolewa.
KAPENA A. MAKINIKAEA.
Ma ke ahiahi no o ia Poakolu, ho ra 5:15, ua lele ae la ka hanu o Kapena A. Makinikaea, ma kona home noho ma Auwaiolimu alanui Nuuanu, mahope o ke kaa mai ana no kekahi mau la loihi. Ua hanauia oia ma Sekotia iloko o Mei 10, 1819, a ua piha ke 79 makahiki iaia. I kona hiki ana mai i ka 1855, ua hookohuia aku oia i kapena no luna o Pele kahiko. I ke au o Kamehameha V i hookohuia ai oia i pailata no loko nei o ke awa, a i ka la 1 o Aperila, 1893, i waiho aku ai oia mamuli o ka nawaliwali kino. Ua haalele iho oia he ekolu kaikamahine a me hookahi keikikane maanei, a he kaikamahine aia i Kaleponi a me ke keikikane aia i Potalana, Oregona. Auwina la Poaha i nalo aku ai kona kino koou ma ka ilina o Maemae.
THOMAS KAHOEKA.
Ma ka hora 11 A M o nehinei i kuu mai ai ka luhi o Tome Kahoeka, i ka 13 o na makahiki, mauka o Kaakopua, alanui Ema. He eha ma ka manamana lima nui ka ma'i i hoolawehala ae ai a hala aku la. O ke keikikane hookahi ia a Keoni Kahoeka a me Ane, kana wahine mare i okiia. He moopuna oia na Keoni Kamaki, a he punahele no hoi i na makua a me ka ohana. Aloha no ia opio i pii ae a emi pu iho la.
I keia auwina la, hora 3, e maneleia aku ai kona kino wailua. Minamina wale.
Anoai a ko Makou Kamahele.
I ke kakahiaka Poalua iho la no makou i haalele aku ai ia Koloa no Hanalei nei. Loaa i ka ua i ke alanui a hiki i Lihue, loaa hou i Kapaia a waenakonu alanui no hoi, malie loa. A hiki no hoi i Hanalei i ka hora 5 o ke ahiahi.
Ahiahi Poakolu, he ahamele ka i haawiia ae e ka Hui Himeni Hanalei, ma ka luakini o Waioli, a o na loaa, aole no i mahuahua loa.
E holo loa ana paha keia i Niihau, kahi o ka moena pawehe. (A e ike wale aku paha ia wahi.) LULUUPALI.