Ka Makaainana, Volume IV, Number 3, 15 July 1895 — Page 1
Ka Makaainana.
BUKE IV - Ano Hou. Honolulu, Oahu, Iulai 15, 1895. HELU 3
Anoai a ke Aloha Aina.
Aia i ka lai Kaalawai,
Kahi a makou i luana ai,
O ka leo o ke kai ka'u aloha,
I ka ne hone ae me he ipo la,
Aia Eleu mawaho pono,
Me ka elele hoi a ka lokoino,
Kau e ka weli ia Nolena,
Alakai hopo wale me ka lokoino,
Aia i ka piko o Daimana Hila,
Ke aloha aina e hooulu nei,
Na ka hae Hawaii a i kono mai,
E imi i ka pono o ka aina,
Aele i hope iho a o Wilikoki,
Alakai wiwo ole o ka lahui,
Aia i ka luna o Kaimuk,
Ka uwahi noe o ka pu raifela,
Ua kau e ka weli na Pi Ki,
I ke aloha aina ki pololei;
Haina ka puana la e o mai,
E ola Hawaii a mau loa.
KEONI PAAOAO.
-
Huakai Kaili Aina a Lehua
I ka auwina la o ka Poalua iho la i holo aku ai ka mokukaua Lehua no kekahi huakai kaili mai i na mokupuni papapa a hoohui mai malalo o ka hae Hawaii. He pahuhae kana i lawe pu aku nei me kekahi palapala kuahaua mai ke Aupuni aku. Ua lawe pu aku oia i ke Kuaina Kalaiaina. Ana Aina Aupuni Alekanedero, a me kekahi poe e iho. Ua hoopauia na luina haole a he poe kanaka Hawaii ia i holo hana aku la. E hala ana paha iaia he mau pule loihi mamua o kona huli hoi ana mai.
-
Ko Makou Kamahele no Kauai.
Haalele aku ia oukou i ke ahiahi Poalua i hala, hora 5, a hoea ma Nawiliwili i ke kakahiaka Poakolu, hora 4:25 a haalele ia laila i ka hora 8:30 no Koloa. Hora 10, ku ilaila Malie ka moana ma keia holo ana mai.
I keia pule ae e holo loa ai no Hanalei, a ke loaa ole na akeakea ana, alaila, e huli hoi aku ana no Honolulu ia pule.
Aohe wahi mea hou o kuaaina nei a'u e hoike aku ai ia oukou, he pamalo loa. Oluolu maikai ka noho ana o keia wahi, aole hoi i ka wela loa aole hoi i ka, huihui loa. B.W.
-
He 19 poe kiure i waeia o Hamakua, i hoole ma ka Poakahi i hala aole e lawe i ka hoohiki, aole hoi e noho kiure ma ke kau kiure mai nei o laila. O ka lua keia o ka manawa i eo ai i ka Apana o Hamakua ma keia ane.
AHA KUHINA ENELANI.
-
Kulike ka Hookoia ana no ka
Elua o ka Manawa.
He kanakolu manawa a Enelani i hoololi ai i kona Aha Kuhina iloko o keia keneturia, eia nae, aole i lehulehu loa kona poe kuhina, no ka mea, ua koho hou ia no kahi poe o lakou, a i kahi wa ua oi aku mamua o hookahi manawa. O keia mai la ka manawa ekolu o Haku Saulebure i noiia ai e wae ae i aha kuhina He wahi mea kamahao nae hoi ua loaa ae ka hea ekolu ana iaia i ka la i piha ai o na makahiki he umi o kona hookohu mua ia ana. Ua noho oia ma ka oihana ia manawa no 227 la. A i Augate 3, 1886, i kono hou ia ai oia e wae ae i aha kuhina, aka, ua noho aku ma ka oihana no 15 la wale no, ka manawa pokole loa o kekahi mea hookahi i paa ai ia kulana iloko o keia keneturia. Ua paa ka Eola o Lavapu lu i ka oihana mai Iune 9, 1812, a Aperila 24, 1827, he manawa o 14 makahiki a me 319 la. Eha manawa o Pohakuhauoli i noho kuhina nui ai, a iloko o ia manawa holookoa, ua paa oia i ka oi hana no 12 makahiki a me 132 la.
-
Na Pio o Hilo i Huikalaia.
Ma ke Kinau o ka Poalima iho la i huli hoi mai ai na pio kalaiaina i hoounaia ai no Hilo e hana ai ma na alanui o laila Ua lele ae kekahi ma Kohala, oia o Keoho, a aia no kahi i Hilo, a o ke koena iho eia i Honolulu nei me na ola kino maikai. Mahope iho o ko lakou hookuu ia ana mai, ua apo aloha aku la na poe Aloha Aina o Hilo a malma iho la a hiki i ka hoi ana O kekahi hapa o lakou i koe aku, aia no lakou ke noho la me na ola kino maikai. He 14 ka lakou nui i hoi mai nei. Ua lululima pu ae makou me ka hauoli me kahi poe o lakou i ke ahiahi Poaono nei.
-
O ka holo kaa ahi hoolaulea i na haumana Kula Sabati o Kaumakapili ilalo o Waianae, ua hoopaneeia a keia Poaono iho, la 20.
Aohe i ae na makai e heihei hou me na keiki hana o ka Hale Hana Hao o Ulakoheo i ka Poaono nei O ka makemake ka o na makai kaena e heihei waapa 14 hoe lakou, aole hoi he ae o kekahi aoao, aia no a he 10 hoe. Ua hoihoiia aku o Hanakeoki e Kapena Paka i na poe nona ia waapa.
Mau Hana Hoopahaohao.
He lono ka i wawaia ae aia ke ike mau ia la ma na kapakai o Kahoolawe kekahi mau moku kuna hoopahaohao. Mai ka moana kai uli kai hohonu e holo mai ai a kokoke i ka aina, alaila, hoomamao aku ana. A pehea la i ike ole ia ai e ka mokukaua holo Lehua, oiai, ma ua la mua o keia mahina, ilaila no ia kahi i pokakaa ai. Aohe i maopopo heaha la ka laua hana nui ma ia wahi. Ke manaoia nei he opiuma paha ka ukana a ia mau moku a i ole hoi ia, o na lako kaua no paha.
-
Hoike o na Kula Bihopa.
Auwina la Poaha nei i malamaia ai na hana hoike a haiolelo o ke kula Virigine o Sana Anaru, maloko no o ka pa kula. I ka po mamua iho ka hoao ana a na holopono, a oi loa aku hoi ike ao ana ae. Pau na hana haiolelo, haawiia na makana i na haumana i loaa ka holopono ma na haawina i aoia ai, a o ka paniha loa no hoi ia o na hana. Nui ka mahalo o na poe i hiki aku a ikemaka. Eia na haumana ke hauoli nei i ko lakou wa hoomaha.
I ka auwina la Poalima nei i malamaia ai ka hoike haiolelo o ke Kulanui o Iolani, ma ke kahua kula mauka o Niupaipai, a ua lehulehu no na poe i hiki aku Maikai na haiolelo a maikai pu no hoi me na himeni, a ua oi aku hoi i ko ka makahiki i hala. Pau ia mau hana a me ka haawi makana ana i ua haumana, ua malamaia he mau heihei kukini, lele pa, a me na lealea e ae, a o ka panina loa ia o na hana. Ua lilo ka makana oi o ke kula ia Aberahama Kaulukou, keiki a J L Kaulukou, a o ka oi hoi ma ka ike Enelani, ia Alika Me. Ua hoomaha ia kula a ke hauoli nei na haumana i ka hookuu nui ia e hoi i ka home me na makua a me ka ohana.
-
Mahope iho o ka hora 1 o ka auwina la Poalua i hala i ku mai ai ke Kopatika mai Kapala kiko mai iloko o 5 la holo me 22 hora a keu. Awakea o ka Poakolu i holo aku ai oia no Kina me Iapana me ka lawe pu aku i kekahi heluna ohua nui o na Kepani me Pake.
I ka Poaha nei, oiai e hoopahunahuia ana kela kahua hale hou e kukuluia aku ana mauka iho o ka Haleleta, ua lele aku la kekahi pohaku nui a haule pono iluna o ka hale piula e pili la mauka iho no o ka Haleleta a puka pu o luna o ka piula. Laki nae aohe ola i poino.
Ikeoleia kue ia Kamehameha.
Ma ka mokomoko kinipopo o ka auwina la Poaono nei mawaena o Ikeoleia a me Kamehameha, ua kaa aku la ka oo i ka inoa hope iloko o na hakoko ikaika ana me 7 ai puni kue ia 6 o kona hoa paonioni, iloko o 12 komo ana. E iho na ai puni:
1 2 3 4 5 6 7 8 9 10 11 12
Ikeoleia 1 0 5 0 0 0 0 0 0 0 0 – 6
Kameh 5 1 0 0 0 0 0 0 0 0 0 1 – 7
O keia kekahi o na paani maikai loa o keia kau kinipopo, aole nae he nui loa o na makaikai ia la.
O Hoku a me Kamehameha ko keia Poaono iho.
-
I nehinei i piha ai ka 106 makahiki o ka hoomanaoia ana o kela papu ikaika o Farani i haulehia ai i ka enemi, oia ka Bosetile.
He hui paani kinipopo upena ka ko Alanui Beritania poe o waho aku nei o Kulaokahua. Ua loaa he 18 lala i keia wa. O ke Komisina Beritania ke poo hoohanohano o ia hui o na opio haole a me Hawaii.
Awakea o ka Poalima nei i huhia ai o loko o ka hale o kekahi Pake ma alanui Nuuanu, makai mai o kahi o na lio poniniu, e Makaikiu Kodesa, me ka manao he opiuma ko loko, aole nae he mea o ia ano i loaa aku iloko.
Ma Waikapu, Maui i ka la 4 iho nei, ua puili paa ia iho la o Iosia Keaulana me Misi Maraea Siliva e Rev. S. Kapu. Ma ka Likelike o nehinei i hoea mai ai laua no Honolulu nei no ka hoi loa aku i Laie, kahi noho o ke kane.
I ke ahiahi Poakolu iho la ua pii ke kai o Keo Samoa no kana wahine, a no ia mea ua lalau aku la oia i ka wahine a kiola iho la mai kahi kiekie mai o ka hale a laua o noho ana, ma ka huina o na alanui Moiwahine a me Rikeke. Ua moku na helehelena o ka wahine a na maui ka wawae hema. Ua paa ae ke kane i ka Halewai a na hoihoiia aku ka wahine no ka Halemai Moiwahine, a ke pii ae nei kona oluolu.
Ua eleu ae o Kaapa me na ilio hanu meheu o na poe hakihaki kanawai ma ka hopu ana i kekahi Kepani malama banako kefa ma Kikihale i ke kakahiaka Poakolu nei. Eia nae kahi mea aka i kau wahi makai e hapakue aku ana mahope ua akaaka ia mai oia e kau ili ae hiki i ka uwe ana. Ua paa ae ke Kepani nona ka banako, a o ke koena iho na puhalahiu. He hapalua hora no paha mahope iho, ua kaiehu hou ia ae no he eono Pake pepa piliwaiwai, no kela hale hoomoa puaa makai iho o kahi noho o D Kaapa, a noho nui ae ana no i ke puhi.