Ka Makaainana, Volume IV, Number 1, 1 July 1895 — NA PALAPALA. [ARTICLE]

NA PALAPALA.

Aole maluna iho o makou ke koi koi o na hala a me na hewa no na manao i hoopukaia malalo o keia poe aka, aia no maluna iho o na poe na lakou a kakau mai.

Ua Kapaeia ka Oiaio.

[Hoopau ana] Aloha no paha i poina i kekahi poe e ola mai nei na kanaka Hawaii i hoounaia i na aupuni o Europa, no ka imi ana i ko kakou pomaikai a me kekahi mau mea e ae a he mea pono hoi e hoikeia ko lakou mau inoa i maopopo ai hoi i ka hanauna hou. Eia iho lakou: O Timoteo Haalilio wale no ka mea i hoounaia no Amerika, Beritania a me Farani no ka imi ana i ke kuokoa o Hawaii nei, a aeia mai. O Liholiho a me Lota ka'i hoounaia no Amerika, Beritania a me Farani no ka hoopii koi poho a ke Aupuni Hawaii ia Farani. O ka Moi Kalakaua hoi a me Kamakini Kapena ka i a holo aku no Amerika no ke kuikahi panailike, a aeia mai, Holo makaikai aku o Kala kaua i na aupuni o ka honua, a mahaloia oia no kona kulana naauao i kupono e hoomalu i kekahi mau miliona kanaka. O Kapena a me Kaulukou no lapana no ke kuikahi hoopaelimahana, Piehu laukea ka elele i hoounaia imua o kekahi mau aupuni o Eurpoa malalo o kekahi hana, Nui ko lakou mahaloia. E nana aku hoi ia L Aholo, ke kanaka Hawaii i holo no Wasinetona no ka halawai a ka aha hooponopono merediana. Ua nui kona mahaloia e na poe loea o ka honua ma ia aha. Mamuli o ko lakou ike kalaiaina kuhohonu o ka noiau i komo poo ai na mikanele i ka ohumu kipi i na kanaka Hawaii a hoomaka ai ē hookahuli i ke Aupuni i ka 1887. Eia no hoi kekahi mau manao hookumu o ka ohumu kipi o na mikanele i ka Moi Kalakaua a me ka lahui Hawaii: I ka wa i kuahauaia ai no ke koho ana o kela a me keia aupuni i elele nona e hele ai no Wasinetona no ka hooponopono ana i ka merediana o ka honua nei, ua koho ka Moi ia Aholo oia ka elele, No ia mea, ua ulu mai la na manao kue ino iloko o na mikanele no ka Moi, me ko lakou koi aku no iaia e kapae ia Aholo a o Alekanedero ma ia wahi. Aole naei aeia ko lakou makemake a hiki wale no i ko lakou aumeume ana ia Aholo i kona wa i kau ai i ka moku. Mamuli wale uo o ko ka Moi paakiki me ke kokuaia e kekahi mau haole, pela iho la i hiki ai o Aholo. He oiaio no, e like me ka haiolelo a Alapiki ma ka la 2 o Iune, ma Kaumakapili, ua aie nui keia lahui i na mikanele no

ko lakou hoomanawanui ana i ke ao i keia lahui i ka pono. Ke mahalo nei au, i kela mau olelo a Alapaki, eia nae, ua hala ka pono, ua hulihia ke au o ka manawa no ia mau oielo. Oiai, i ka wa o na kanaka e pii ae ai i kekahi anuu hou o ka ike kalaiaina, oia no ka wa e oleloia aku ai, "Mai pii mai oukou ianei, no makou keia wahi." Eia nae, ua hoomaka no na kanaka Hawaii e pii ma ke alapii o ke kalaiaina a no ka hiki ole i ua poe mikanele nei ke paku mai me ko lakou ike kalaiaina, nolaila, kapae ka alaala a hoomaka mai la o wiliwili i na puupuu ma na maka o ka lahui, i na poe a lakou e waena nei ua aie nui i na makua mikanele no ka pono a lakou i ao mai ai. A ke hoopuka nei i na olelo inoino loa a lakou i papa mai ai he mea hewa ia. Nolaila au e olelo nei ua kapaeia ka oiaio, no ka mea, ua hulihia ke au o ka manawa. Oiwi Ponoi Honolulu, Oahu.