Ka Makaainana, Volume III, Number 16, 24 June 1895 — Page 6
HONOLULU, OAHU, POAKAHI, IUNE 24, 1895.
HOOMANA KATOLIKA.
-
Ke Kuhikuhi no ke Ao ana i na
Hoahanau o ka Ekalesia
Anagalikana.
-
APANA MUA - MAHELE III.
KA OIHANA KAHUNAPULE O KA
EKALESIA. III. KA EPICOPATE, KE KAHU
KIAI O KA OIAIO
[Hoomauia mai ka Helu 15 mai.]
Hookahi o na hana nui o ka Epicopate oia no ka haawi ana aku i ka manaoio Karistiano me ka holookoa a me ka ewaewa a haumia ole, e like me ia i hoea mai ai mai na Aposetole mai o Iesu Karisto. I mea hoi e kokua ai i na bihopa iloko o ka nee ana mai o ke au o ka manawa (o na makahiki) ma keia hana nui, ua haawi mai ko kakou Haku i ka olelo no ke alakai ana a ka Uhane Hemolele, ka Uhane o ka oiaio. Eia iho Kana mau olelo, - "E noi no Au i ka Makua, a e haawi mai no auanei Oia i Kokua okoa ae no oukou, i noho mau loa ai hoi Oia me oukou; oia no ka Uhane o ka oiaio."
Ua ano like no keia olelo hoopaa nui ma kona mau olelo ana me ko kela a ko kakou Haku i hoopaa ai Iaia iho me na Aposetole me lakou "mau, pela no a hiki i ka hopena o ke ao nei" Ma kela a me keia hoike ana ua hanaia ka olelo paa no kekahi Noho Okoa ana mai o ke Akua i ka manawa mua i na Aposetole aka, ua hanaia mai na olelo e komo pu aku ai me ko lakou mau hope, na bihopa, i na manawa a pau. O ko kakou Haku "MAU" ana no kahi me na Aposetole, e noho "MAU LOA" aku ana no hoi ka Uhane o ka oiaio me lakou. A oiai hoi, ua make koke nui aku no na Aposetole ma ia hope mai, ua moakaka loa aole wale no i na Aposetole ma ko lakou ano he poe kino pakahi i haawiia aku ai na olelo hoopaa i hoikeia maanei, aka, ma ko lakou ano he poe hope hoi no ka Oihana Kahuna Karistiano, ano, a o lakou hoi na lala mua loa. Aole loa ma kekahi ano e ae e hiki ai ke oluoluia mai ka haawina palua o ka Noho Okoa mai o Karisto ma ke Kino a me Kona Uhane me ka "mau," a "mau loa" aku aka, aia wale no ia i na hope o na Aposetole, na bihopa hoi o ka Ekalesia.
Ua hoomaopoppia no hoi ua pili loa keia mau mamala olelo ae la me ka manao o ke ao ana. Ua hooiaia aku ko ko kakou Haku noho maoli ana mai i na Aposetole a me na bihopa ma ke "ao ana" aku i na lahuikanaka "e malama i na mea a pau A'u i kauoha aku ai ia oukou:" me lakou aku no ka Uhane Hemolele a "mau loa" ma ke ano "oia ka Uhane o ka oiaio." O ia Uhane no i Hoomaikaiia i hoike aku i ka oiaio i na Aposetole, o ka mea no ia i hiki ai i ko lakou mau hope aku ke ku hoike nui ae no ia oiaio.
I ke kupu ana ae o na loina ao oiaio ole, a he manaoio kuhihewa (kipi) paha hoi ia e like la me kona kapaia ana, ua huai pau ia ae ia a hooleia e na bihopa ma ka lawelawe pakahi ana, a iloko paha hoi o ka Ahakuka. O na Anakuka, he mau aha akoakoa nui ana ia o na bihopa o ka Ekalesia Iloko o keia mau Ahakuka, ua kukala a hoolaha aku na bihopa i ka manaoio oiaio e like la me ia i loaa mai ai ia lakou mai na Aposetole mai. Ua hooku hou ae lakou i ka manaoio kahiko mai kinohi mai, e like la hoi me ka loaa ana mai ia lakou.
Ma kekahi hoomaikeike ana ae hoi no keia, e haliu ae kakou i ke kipi ana o Ariusa, ka mea i ho le ae i ke kulana ano Akua o ko kakou Hoola. Ekolu haneri a me umikumamawalu poe bihopa i akoakoa ae ma kekahi Anakuka ma Naisea (Nicaea) iloko o ka makahiki 325, a hoahe waia ke kipi, ma ka hoolaha ana ae i ka oiaio i loaa mai ai ia lakou ma o ko lakou mau mua aku mai na Aposetole mai. "Pela no auanei i loaa mai ai ia kakou," o ke ano ae la ia o ka lakou ku hoike ana ae. Aia ia kakou ka lakou hoakaka no ka Manaoio maloko o ka Manaoio Nikene, e hooia ana hoi, me ka piha pono maopopo loa a pau, i ke Ano Akua o ko kakou Haku Iesu Karisto. Ua apoia aku keia olelo hooholo e ka Ekalesia holookoa, a pela i maopopo lea loa ai ia kakou ua loaa aku ia me ko ka Uhane Hemolele hoomana ana, ka Uhane hoi o ka oiaio.
E like no hoi me ka ulu ana ae o na kipi e ae, ua halawai no lakou me ke kuia a hoahewaia no e like me ia mamua ae la; ua kamailio akea ae hoi na bihopa, a ua hoopaa aku hoi ka Ekalesia ma ke akea i ka lakou mau olelo hooholo.
[Aole i pau.]
-
I keia kakahiaka e malamaia ai ka hana hoike o ke kula o Sana Lui a me ka la apopo. I ka auwina la o ka la apopo ke puhiohe ma ke kahua o ke kula.
Ua holo aku no na paemoku o Maikonisia ka mokukuna Hai rama Binamu i ka hora 4 o ka ahiahi Poakahi iho la. He anaina haipule ka i malamaia ma luna o kona oneki mamua o ko na holo ana. Aole ana mau ukana i lawe aku ai mawaho ae o kona mau lako ai ponoi.
KANAENAE ALOHA.
Halawai Akea na Poe Makee o
Ka Lahui Oiwi.
Ua malama io ia ae no ka halawai makaainana ma Halealii Kuea i ke ahiahi Poalua iho la, iloko o ka manawa pokole wale no o ka puka ana aku o ka hoolaha ma KA MAKAAINANA nei i ka Poakahi aku, a ua piha no i na poe aloha aina oiaio ma kahi o ka eha a elima haneli paha a keu aku.
Na J. Nawahi i hoakaka mai i kekahi mau manao e pili ana i ke kumu i kaheaia ai ka halawai a i ka pau ana o kana mau olelo, ua ku mai la o J.K. Kaulia a heluhelu i keia
MAU OLELO HOALOHALOHA.
OIAI, ua oluolu i ke Akua Mana Loa e lawe aku i ke ola makamae o WALTER Q. GRESHAM, ke Kuhina Nui o Amerika Huipuia, mai keia ili honua aku a iloko o na haawina pomaikai o kela ao maemae ma o, e like me ka makou a manaolana a e manaoio nei, a
OIAI HOI, ma kona ano Kuhina Nui, ua konoia aku oia e huli a e ninaninau i na hana pili ia Hawaii nei, mamuli o na hana pono ole i hanaia i ko makou Moi a me ka Lahuikanaka ma o na luna la o Amerika Huipuia; a
OIAI HOI, mahope iho o ka noii piha a hoomanawanui ana, ua hooholo oia ua hana hewa ia ko makou Moi a me ka Lahuikanaka oiaio o Hawaii nei, a he mea pono i ka Peresidena a me ka Lahuikanaka o Amerika Huipuia e hooponopono i na hewa i hanaia e na kauwa a ia Lahuikanaka Nui; a
OIAI HOI, ma kana mau hana a pau no ko makou mau pono, ua hoike mai oia i ka manao hoopono kiekie me ke kau ike a me ka wiwo ole nui hou a
OIAI HOI. aole i ili aku maluna ona ke koikoi no ka hoomauia ana o neia mau hana pono ole a makou e noho hoomanawanui nei; a
OIAI HOI, ua ili iho maluna o ka wahine kanemake a me na keiki aloha na haawina luuluu no ka hooneleia ana i ke kane hoopono a me ka makua aloha, nolaila, he mea pono i ka lahui Hawaii e hoike aku i ko lakou manao kaumaha no na haawina ehaeha i ili iho maluna o ka ohana; nolaila,
E HOOHOLOIA, ke hoike aku nei makou i ko makou manao kaumaha i ka wahine kanemake a me na keiki makua ole a ko makou hoaloha i hala aku, mamuli o na haawina pilikia i ili iho maluna o lakou; a ke pule nei makou i ke Akua Mana Loa e hookama mai i ko lakou mau manao kaumaha iloko o na hora o ko lakou noho u ana:
E HOOHOLOIA, e hoomakaukauia a e hoounaia aku hoi keia kanaenae ia MRS. GRESHHAM a me kana mau keiki.
Eia keia mau olelo hooholo ae la ke hoomakaukauia nei ma ke kakaupoepoe noeau ana, a ke pau, alaila noounaia aku i nei pule. O ke komite i aponoia na lakou e kakaumoe, oia no o J. Nawahi, lunahoomalu; J.K. Kaulia, kakauolelo; H.A.Wilimana, Enoka Johnson a me Aberahama Fernandez.
Ko Makou Komodoa.
Mahope iho o ka hoopuka ana mai o ka Lunakanawai Apana i kana olelo hooholo i ka Poakahi i hala, e hookuu ana i ko makou Komodoa mai kona hihia i hoopiiia ai no ke apuka i ka waiwai i haawiia iaia e malama, ua hoopuka hou ia mai la he palapala hopu nona no ka imi loaa ma ka hoopunipuni e like no me ka hihia mua. Auwina la Poalua i noho ai ka Aha e hoolohe i ua hihia la a hoopaneeia mai a ke kakahiaka Poakolu. Mahope iho o ka pau ana o na paio hahana a ka loio pale me ko ka aoao hoopii, ua haawi mai la ka lunakanawai i kana olelo hooholo e hookuu hou ana no i ka mea hoopiiia. Ua pii ke kai o ka Lunakanawai Apana i kahi loio Aupuni no ka lalau o kana kumu hoopii mai ka hihia kivila a i ka hihia karaima. Ua oki nae oe e loha ana i ka wa a ka Aha i ao aku ai.
-
Imua o ka Aha Apana i ka Poalua iho la, ua hoopaiia o A G Fereira he $100 no ke kuai waiona me ka laikini ole.
Aole he mau heihei lio e malamaia ana ma Waialua ma ka la 4 aenei o Iulai. Oiai, e malamaia aku ana no he mau lealea o ia ano ma Kapiolani Paka. He elima mau heihei i maopopo i nei wa.
-
Dr. W.D. JONE,
[KAUKA IONE.]
Kauka Lapaau no na ano ma'i a pau o loko o ke kino, fiva taifoida, maka eha, niho eha, puu eha a me na ano e a pau e loaa ana i ke koko ino a me na palapu e ae. Aole ana mau okioki a kolikoli ana. Hiki loa iaia ke lapaau i na ano ma'i a pau loa, a ke loaa ole ka oluolu, aohe uku ana, ina nae hoi nana wale no e lawe awea mea i ma'i.
MANAWA HANA: Hora 9 a 11:30 A.M.; i a 6 P.M.
KEENA: Alanui Konia, ma na keena mauka loa o Birito Hale, ma ka huli ma Ewa ma ai Nui Moi aku. mei 13-3ml
-
G.E. SMITHIES,
[KEOKI KAMILA.]
Mea Hooponopono Hoike Helu, Mea Ohi a Koi A e, Mea Kakau Kope, a Mea Kalepa Aina.
KEENA: Helu 406, Alanui Papu, ma ka Hale Opunui.
Telepone Helu 184. mei 27-3ml
-
Laau ma'i Lepera.
Eia ia Kauka Ogawa (Kepani) he
Laau Lapaau Ma'i Lepera
maikai loa mai Iapana mai nei. Aohe no e hewa ke hoao ae.
Uku haahaa loa no elua malama, ma ka $10 no kanakolu la.
Keena, - Alanui Hotele, kokoke i kahawai loa, Kikihale. iun 10-1ml*
-
Na Mea Kanu no ke Kuai.
Aia ma kahi noho o Kimo Poe, ma ke aku i e holo la iwaho o Waikiki, ma Pawaa, e loaa ai kekahi mau mea kanu kupono no ka hoonau ana i na pa halenoho no ke kumukuai oluolu loa. Aohe e hewa ke kipa aku e ike pono a e kukakuka pu.
iune 3.
-
Aina no ke Kuai.
Elua Eka Aina maikai ma Kapaakea, ma ka hoomaka ana aku e pii i ka puu o Kamoiliili, ma ka aoao mauka. He wahi kahua hale maikai loa keia.
No na mea a pau e pili ana, e ninau i ko makou Pauku, ma keia keena.
mei 27-mh.
-
KALAHIKI.
HALEKUAI LAHUI.
Helu -, Alanui Moi, keena hana mua o ka Hawaii Holomua.
E weheia ana ka halekuai maluna ae i ka POAONO, MEI 11, 1895, a malaila e loaa ai na waiwai a me na lole hou loa o na ano a pau, no na kumukuai emi loa mamua o na wahi e ae.
Aohe hewa ke kipa mua mai a e ikemaka mamua o ka hele ana i na halekuai e ae.
M. PALAU.
mei 6-3ml Luna Hoohana.