Ka Makaainana, Volume III, Number 11, 20 May 1895 — Page 8

8 HONOLULU, OAHU, POAKAHI, MEI 20, 1895.

 

Hele i ka Ala Hoi Ole Mai.

                O ka Poakahi, la 6 nei, i make ai ka bebe o 1 makahiki me hookahi pule a Eugene L me Rose Li, a ua maneleia aku oia no kahi mau o na mea a pau.
                Ma Manoa, i ka la 11 nei, i haalele mai ai i keia ao mauleule o SWB Kaulainamoku, kekhai o ko makou mau luna eleu a hoi aku la ma kela ao ehaeha ole. Me ka ohana ko makou u pu ana iloko o ko lakou mau hora o ke kumakena. La Pule ae i nalo ai. Aloha no oia. Poakahi, la 13 nei hoi, make iho la no hoi ka bebe a T. Hiona iloko o 8 malama me 28 la wale no o ke ola ana, I ka Poalua mai i nalo aku ai oia ma ka ilina o Koula.

Mau Uha no ka Hebedoma.

                I ka Poakahi hala, ia Hikiau e hooholo nui ana i ka mahu o ke kake o luna o Kaala, ua hiki ole iho la i na huila ke kakaa hou aku. No ia mea hehi aku la kona wawae hema i ka huila nui e kakaa ai o ke kake me ka paa no o kona lima i ke ki, a o ka wa no ia i niniu poahi hou ae ai o ka huila a moku pu ae la o mua o ka wawae me ka hai pu o kekahi iwi malalo o ke kuli. Ua hoihoi koke i aaku oia i kona wahi no ka lapaau ana i ka laau Hawaii e like me kona makemake, a ua ano maha iki hoi i nei wa. Aole no oia he luina no luna, aka, he mea hana manawa wale no i kela a me keia wa e makemakeia ana. Pakele kekahi keiki Pake mai pau ka ike i kakahiaka Poakolu iho la, i hookuiia ae me na hoki o ke kaa hapaumi maluna mai o ka uwapo o Haaliliamanu, alanui Moi nei. E huki ana oia he kaa uuku me kekahi owili ili o hookahi aoao maluna iho, a ua hole ae oia mai kahi aoao no kahi aoao o ke alanui, a e holo mai ana ke kaa panee ia wa. Ua hiki ole i ka hookele ke kaohi iho i na hoki, a he hookui ka hopena Walawala ke alo o ke keiki, iluna a pakele nae hoi kona ola, poino kahi kaa, a kaa ka owili ili malalo, a lele kaawale loa hoi ke kaa panee mai ke alahae aku, a me ka hana nui a kau hou. Ekolu luina haole o luna o ke kiapa Amerika Helena Burua i loaa me kekahi ulia i kakahiaka Poaono nei, oiai hoi e hiu ana i na pahu aila mahu, he umi i ka wa hookahi. I ka pii ana mai o kekahi hiu, ua hookui ae me ka papa o kekahi mea e kau ana me ka lou a haule oia ilalo o ka lua a eha ke poo a me na poohiwi, a hoounaia no ka Halemai. Haule ua papa la ilalo o ka lua a pa elua mea, hookahi i eha ka poohiwi a hookahi i loaa he pohole ili.

Mokumahu Holo Pili Aina Hou.

                Auwina la Poakolu i hala i ku mai ai ka mokumahu hou o ka Hui Mokumahu Pili-Aina, malalo o ka hookele ana a Kapena Godefere, iloko o 11 la holo mai Kapalakiko mai. He ano like loa ke ano o keia me ka Hawaii. I ka 1888 kona kapiliia ana, he 339.75 tona ka nui, 145 kapuai loa, 32 kapuai laula, 10.5 kapuai hohonu. Ua hiki ka avarige o kona holo ma ka 8 mile i ka hora. I ke ahiahi Poaha nei i hoau mua loa ai i ko kakou mau kai me ka piha ukena no ke awa o Hanamaulu, Kauai. E o aku ana oia i kona inoa Hawaii ma keia mua iho o Kauai, a pau kona inoa haole i ku mai ai, Cosemopolisa [Cosmopolis] E kapili mokumahu hou aku ana no ua hui la i moku oi ae o ka nui mamua ae o ka Malulani, a no ka holo aku no paha hoi ma ia ala. Ua manaoia keia ua kupono, mamuli o ka pii mahuahua ae o na hooili ukana ana a me ka ulu nui ae hoi o na hana hou ma na Kona Ke hoea mai paha hoi oia, lilo ka Malulani no Kauai.

 

KELA A ME KEIA.

                O ka Auseteralia mai Kapalakiko mai i ka la 27 iho.
                I nei kakahiaka i ku mai ai o Kina mai Honakona a me Iapana. He umikumamakahi ka nui o na heihei like ole no Iune 11 ae. Hoopoluluhi me ka helelei ua ko ka la i nehinei mai kakahiaka a po wale no. Ma ke Kinau o ka la apopo e huli mai ai ka Haku Bihopa o Honolulu a me Misasa Wilisi.
                Ua kukalaia ae nei e ka Peresidena ma ka la 12 o Iune ae e weheia ai a e noho ai ke kau mua o ka Ahaolelo o ka Repubalika. Ua haawi ae ka bana o ke Aupuni he aha puhiohe hoolaulea maloko o ka pa o Kaleleonalani Hale i ka auwina la Poaha iho la. Nui ka ma'i e pahola nei i keia mau la no ka ikiiki o ka wela, a ke pa mai kahi aheahe makani, o ka ma'i no ka hopena. E akahele no paha ka pono.
                Lohe mai makou ua ulu ae he weli hou i ke Aupuni, a pau na makai kumau a me na kiai o Kawa i ke kauohaia e ku kiai i ka po Poalima nei a ao. He ponaha ka i ikeia i na la i hala iho la i ka hoopuni ae i ka la, oia hoi, he lua kalai. O na hopena koe o ia mau ouli a hoea mai. Heaha ana la auanei?
                He lono pauahi ka i loaa ae i i ke kikowaena o ka Oihana Kinaiahi i ka po Poaono i hala, no kahi o J F Balaunu i Waikiki, a mahope lohe hou ia mai ua pio. Aohe no he ahi nui loa.
                Ma ka La Pule nei, ma nae mai o ka uwapo o Haaliliamanu, nui na poe sake i lele uwaki ae i ka wa e malamaia ana o kekahi anaina haipule, pela ka loheia mai.
                Ua noi mai nei ka hui kinipopo o ke kulanui o Setanafoda, Kaleponi, i ka Hui Kinipopo Nui Hawaii maanei, ua makemake e holo mai ianei e hoopapa ai me ko onei poe keiki.
                No na poe e makemake ana i na kii pena hoonuiia mai na kii hooleleaka, ina ma ka waihooluu a inika paha, e pono e ninau mua ia O.K. STILLMAN (Oliva Kilimana), oiai, he agena oia ma ia hana. E ninau ma keia keena nona.
mei 20-mp.

 

                Holopono loa no na mea kuai ma ka Halekuai Lahui o Kalahiki. Aole no e hewa ke kipa ae ilaila, he ike ana ka hoi ia ia kakou oiwi ponoi. Ke pii mau nei na waiwai loaa ae ma ia halekuai.
                Eia ke hoikeikeia nei ma ka halekuai o ka Hui Nuhou Hawaii ma alanui Kalepa, he kii o kekahi huihui pua ponimoi i hana noeau ia mai ka pepa mai e kekahi kaikamahine Pukiki o 13 makahiki wale no o ke kula o Kauluwela.
                Makemake ka Hope Ilamuku e ae aku ka Papa Ola iaia nana ka e hookaawale ae kahi o na wahine Kepani hookamakama.
                Ahiahi loa o ka Poakolu iho la i hookuuia mai ai o Keoni Beka, kekahi o na pio kalaiaina, ma o ka pau ana la o kona manawa hoopai paahao a me ka ukuia ana hoi o kona hoopai dala. I ka auwina la Poakahi iho la i laweia mai ai o Anio, Pake, i hoopaiia e ka Aha Apana o Kaneohe no ka malama opiuma he $50, no ka hoopaa ana ma Kawa no ka hiki ole iaia ke uku i kona hoopai. Ma ka Auseteralia aku nei i holo aku ai e V.V. Akepoka, i ukaliia e kana keiki. Iaia iluna o ka moku, ua laweia aku a haawiia iaia e ka Hoe Ilamuku kona palapala kalahala mai ke Aupuni aku. No ka lawe aihue ana ia ehiku eke lanahu mai ka Hui Mokumahu Pili-Aina, ua hoopaiia o Kaaihue e ka Aha Apana i ka Poakahi i hala he ekolu malama hana oolea ma Kawa. Iloko aku nei o ka la 11 ka hanaia ana o keia hewa. Ua loheia mai ua okioki pahi ia kekahi wahine Kepani ma Nawiliwili e kekahi opio Kepani no, i ke kakahiaka o ka la 11 nei, oiai ke kane a keia wahine ua hale mai ke hale aku. Aia ka mea popilikia ke lapaauia la e ke kauka haole. Ua loheia mai he omaimai ko Kama'lii Kalanianaole e noho mai nei iloko o Kawa. O na poe pio e ae hoi, he oluolu maikai no. I keia ia paha e waihoia ae ai ka palapala noi kuu kino a Kama'lii Kalanianaole imua o ka Aha Kaapuni.
                Aia o Keoki Bitimana, kekahi o na haole i kipakuia mai nei aku, ke hana la ma ka hale hana hao o ka Hui Uniona ma Kapalakiko. Ke waiho mai ka la hoi kona makuahonowai, J.C. White (Waiti), a ke oluolu ae oia, ilala no oia e noho hana pu aku ai me ka hunona. Ma Waiehu, Maui, i ka la 7 iho nei, ua oili mai la he koe o 7 iniha ka loa mai loko mai o ka waha o kekahi bebe ha hookahi makahiki wale no ka nui me na malama he 11. E hiamoe ana ke keiki i ka wa o ke koe i puka mai ai a na kona papa i huki ae a hemo loa iwaho.
                E oi loa kau ana ka hoomanao hoohiwahiwa ia o ka la 24 ae, oia keia Poalima iho, ka la hanau o ka Moi Vitoria o Enelani. He aha ike ka ke Komisina ia auwina la, a he aha hulahula koka po iwaho o Pawaa na kekahi mau ahahui Pelekane kuleko no ke kokua ana i ka waihona dala o ka Ahahui Kokua Manawalea Beritania.
                Ahiahi Poakolu iho la i kiiia ae ai he kauka e kekahi makai kaulio no kekahi Pake elemakule ma'i mauka o Leleo, alanui Moi nei, maloko o ka hale kuai poi makai ae o alanui Liliha. He Pake ai opiuma oia a o ka hemo koke ana iho nei no ia mai Kawa mai, a no ka loaa ole paha o ia mea iaia oiai oia ma kahi paa ke kumu o kona pilikia a make loa i kahi la ae. Na ke Aupuni na lilo o ka hoolewa a kanu ana iaia ia auwina la no, o Kapena Paka ka hookele o kena kaa i lawe ai i kona kino a nalo ma Makiki.
                Alua aenei paha pule o ko Kailipaka hemo ana mai Kawa mai, kahi hoi ona i noho ai no ka hewa aihue. Mai laila mai no oia i holo paukiki ae ai a lawe ana i ka hoohiki, a loaa no ka ia he io liu. O ka hui ikaika paha iho la hoi ia o ka Kamana ao a pakali ana maloko o Kawa. I ka mokukuna Moiwahine i hoopuka ai iwaho o ke awa i ka auwina la Poakahi i hala, ua iliia iho la oia ma ka aoao malalo nei o ka hale ipukukui a paa iho la. Ua hoouna koke ia o Eleu e haawi i na kokua ana, a mahope o ka lula ana o kekahi mau kapuai papa ua hemo mai la oia me kani poino nuku, a hoomau aku la ma kona alahele moana. Waenakonu o ka po a ao iho ka Poalua i hala ae, ua loaa aku kahi haole Olelo E maloko o kahi noho o kahi haole Olelo E ma alanui Kalepa. Ua ki pu aku ka mea komohewa a halahu, a ua loaa mai hoi oia i na lima o ka ona a a kulaiaua a hina ilalo, nokeia iho i ka paluku a eha, a eila ke waiho nei ma ka Halemai. Ua laweia ae ka mea hoeha i ka Halewai a hookuuia mai no e ka Hope Ilamuku, aka, ua hopu hou ia oia no ka hoeha, mamuli o ke kulana ano kupilikii o ka mea i eha. Wanaao Poakahi i hala i hoi mai ai ka manuwa Lehua a moku ma ka aoao o ka Piladelepia. Auwe, kau ka weli! A i ka Poakolu mai i holo hou ai a hoi mai i ka Poaono nei. Ma ia mau huakai a elua, he maa ka i loaa mai mawaho ae o na kapakai o Oahu nei, Maui, Molokai a me Lanai. A hookahi no hana nui, o ke alualu i na moku liilii a he neo ka mea loaa. Po Poalima nei i huliia ai kekahi poe waapa lawaia mawaho ae e Waianae. I ka hoi mua ana mai ka hoi, he ulua nui ka ka mea i loaa.

 

Na Hoolaha Hou.

 

Hale Inu Waiona KALEPA.
[NO SAMU MOLENA MAMUA.]

                Malaila e loaa ai ke SAKE maikai loa i paipai ole ia e like la me ko na wahi e ae, he hapaha [25 keneta] no ka omole,

HE $1 NO KE GALANI HOOKAHI.

                Pela no hoi me ka Barani maikai loa, he $1 no ka omole, aole i paipaiia, aka, e like no me ka loaa ana mai.
                E loaa no na Waiona e ae a pau loa, malaila me ka oluolu loa. S.I. SHAW, Ona Waiwai
mei 20-5mw

 

KALAHIKI,
HALEKUAI LAHUI.

                Helu--, Alanui Moi, keena hana mua o ka Hawaii Holomua.
                E weheia ana ka halehuai maluna ae i ka POAONO, MEI 11, 1895, a malaila e loaa ai na waiwai a me na lole hou loa o na ano a pau, no na kumukuai emi loa mamua o na wahi e ae.
                Aohe hewa ke kipa mua mai a e ikemaka mamua o ka hele ana i na halekuai e ae.
M.PALAU,
Luna Hoohana
mei 6--3 ml

 

Dr. W.D. JONE,
[KAUKA IONE.]

                Kauka Lapaau no na ano ma'i a pau o loko o ke kino, fiva taifoida, maka eha, niho eha, puu eha a me na ano e a pau e loaa ana i ke koko ino a me na palapu e ae. Aole ana mau okioki a kolikoli ana. Hiki loa iaia ke lapaau i na ano ma'i a pau loa, a ke loaa ole ka oluolu, aohe uku ana, ina nae hoi nana wale no e lawelawe ka mea i ma'i.
                MANAWA HANA: Hora 9 a 11:30 A.M.; 1 a 6 P.M.
                KEENA: Alanui Konia, ma na keena mauka loa o Birito Hale, ma ka huli ma Ewa mai alanui Moi aku.
mei 13-3ml