Ka Makaainana, Volume III, Number 4, 1 April 1895 — Page 7

Ka Makaainana.

 

NA AINA MAMAO.

Na Lono Huikau mai na Wahi Like Ole mai o ke Ao Nei.

Na Hana Imi no ka Maluhia.

            Ma ka aoao o ke Aupuni o Kina, ua ae aku ke Aupuni o Iapana o Li Hana Kana ka elele e kukai ai no ka maluhia, a ma Iapana e hanaia ai. Ua hoikeia ae ua aoia aku o Li Hana Kana e ae aku i kekahi haawina koi poho, a ina he mea pono e ae aku no hoi i ka hooliloia aku o kekahi mau palena aina o Kina E noho ana na Iapana ia Manakuria, Sanatuna, he aina lae kiekie, a ia Foamosa. E hoopaaia no ke koi poho me na loaa dute a e hookaaia i kela a me keia elima makahiki. Ua makaukau ne hoi o Kina e haawi pio aku i kona mau mokukaua o ka Hema e pee la ma Nakini. Ua ao aku ka Emeperoa a me ka Emeperesa Kanemake ia Li Hana Kana mai manao oia e hoi hou aku aia no a hololea a lanakila oia ma kana huakai imi maluhia. Ua huhu aku hoi laua iaia no ka huna ana mai ia laua aku i ke kulana oki loa o Kina, a mai maalahi loa no hoi paha ka lanakila, wahi a ko laua manao, ina no hoi paha i hoomakaukau kupono e ia mamua.

Koi Kanada ia Amerika Huipuia.

            I ka noho ana ai o kela aha uwao o ke Kai Berina ma Parisa mamua aku nei, ua hooholoia e uku ae ke Aupuni o Amerika Huipuia i ke Aupuni Panalaau o Kanada, no ke poho i loaa i na poe ona o na moku pepehi sila, i ka huina o $425,000. Mai ia wa mai a hiki i keia wa, alua kau ahaolelo o Amerika, aohe haawina i hooholoia no ka hooko ana i kela olelo hooholo. Ke koi la o Kanada ia Beritania Nui no ka hookoia ae o keia koi, a ua ao aku ia Aupuni Makua i kona elele kiekie ma Wasinetona e ninau aku i ke Kuhina Nui no ka hoomaka hou ia o na kukai ana no ia mea, a ua hookoia, a ua hooia ae ke Kuhina Nui e hoomaopopo koke ia aku ana no. Aia na poe pepehi sila i kuleana i kela mau dala ke koi la i ke Aupuni o Kanada e uku aku ia mau dala ia lakou, oiai, ua nui ko lakou pilikia, a na ke Aupuni no hoi ia e kakali aku no kana aia a loaa aku mai ia Amerika Huipuia. He wahi apana hana keia i hiki ole ia Amerika Huipuia ke alo ae.

Mau Lono Pili no Berazila.

            No Lisebona ae ka lono i loaa ma Ladana ua hololea ka hana uwao i lawelaweia e ke Kuhina Beritania ma Rio de Ianeiro no ka hoolaulea ana ae i na lauua pili oihana ana mawaena o na aupuni o Berazila a me Potugala, a o ka hoomaka ae koe o na kukai ana. Ua hoomaka mai keia wahi ano e mawaena o ia mau aupuni mai ka wa a kekahi mokukaua Pukiki i lawe ai ia Adimerala Da Gama a me kahi poe kipi alakai e ae mawaho aku o na palena mana o ke Aupuni o Berazila.

            Aia o Adimerala Da Gama ke alakai la i keia wa, ma ka hema aku o Rio Garana do Sula, i kekahi pualikaua kipi o 3,200 a keu ka nui, no ke kipi aku no ia Berazila.

Mau Lanakila Iapana Hou-

            He 1,600 Pake i lele kaua kue aku i na kahua kiai kuwaho o Kiuliu, kokoke i ka palena o Korea, i kakahiaka o Maraki 11 nei. Ua hoopuehuia lakou me ka poino nui a ua uhaiia aku no hoi lakou. He puali Pake e ae, o 1,000 ka nui, ka i kue aku i na Iapana ma ke kua a ma ka aoao hema, aka, ua hoauheeia mai no me 70 poe i make. O ka poino ma ko na Iapana aoao he eono poe i eha.

            Ua lele kaua ia aku e na Kepani kahi hoolulu o 7,000 poe Pake me 30 pukuniahi ma Dono Sotalono. Iloko o elua hora mahope iho ua auhee aku na Pake no Kini Kao, me ka poino o 400 kanaka. He umi no poe make ma ko na Kepani aoao. No kekahi kumu i kupono i ka manao o na Kepani, ua puhi ahi ia aku o Dono Sotalono, a mahope iho ua hoi hou aku na Kepani no kela kapa o Liao. Na Generala Katasura i alakai ka mahele waena o na Iapana, a ua hakaka lakou me ke koa a me ka hoaano loa. Ia Generala Oku hoi ka mahele akau, a o ka mahele hema hoi, malaila ae na koa o Generala Iamagi mai Kaipina aku.

            Ma kela hoouka kaua ana ai ma Ini Ka@, mahope iho o ko na Iapana waiho ana iho i kekahi puali e hoomalu ia wahi, ua uhai aku kekahi mahele nui i na Pake e holo ana no Tesono Tai. Ma ia hope iho ua hoopuniia na Pake. Nui ko na Pake poino, he tausani paha a keu na make a lakou i waiho iho ai ma ko lakou ala o ka nee hope ana eia nae, aole keia ae la o ka huina nui o ko lakou poino ma ia kaua ana. Ua puhi ahi aku na Pake i ke kulanakauhale o Tiene Kana Tai. He 600 ka nui o o na koa eha e waiho ana iloko o ka halemai ma Iana Kao i Feberuari 24.

Weliweli na Hana Hoomainoino.

            He kau ka weli ma Ladana, iwaena o na wahine, pela ka lonoia mai laila mai Ina e ninauia aku na wahine e kahi poe wahine e ae ma na alanui, ua naholo aku lakou me ka haawi ole mai i pane kupono no ka mea i ninauia aku ai. Ua ulu mai keia ano e a ku i ka pioloke mamuli o kekahi mau hana pepehikanaka manaonao i hanaia e kekahi wahine me ka aahu a uhimaka eleele, a o ka hou pahi i na poe o kona ano kana hana maa mau, a ua ikeia oia maloko o kekahi apana i emi iho malalo o hapalua mile kuea ka nui, aole hoi i emi iho malalo o elima manawa iloko o kekahi pule, a oiai hoi, aia no na makaikiu ke hakilo a ke kiai loa la iaia, aole loa ona wahi mea a loaa iki. Ma ka maka oia i hou ai i ka mea mua a poino, a o ka lua iho ma ka a-i me ka pakele mai o kona ola. Nolaila, ua laulaha loa kona makauia, a ua holo wale aku no hoi na poe e ae ana i hookui olelo aku ai mamua o ka hiki ana ae iaia ke hou aku. Nona keia weliia, a ua ili aku no ia maluna o na wahine e ae a pau. Aia no he wahi hoohuoiia he kane uuku no keia mea i komo hoano e ae iaia iho me ka aahu wahine, no ka mea, he ano kalakala no ka leo, aka, ua manaoio nae hoi na makai he wahine no oia i loaa paha i ka ma'i pupule.

            Ano koke mai nei no i paa ai kekahi haole kane i ka hopuia ma Ladana, a ua manaoia oia ka mea nana na hana hoomanaonao palena ole no kekahi manawa loihi i hala ae, a ua kapaia oia o "Keaka, ka mea kolikoli kihaehae." O kana hana maa mau, oia no ka pepehi ana i na wahine ma na wahi inoino loa o ia kulanakauhale ma ka okioki mainoino a manaonao loa ana ia lakou, me ke ahuwale o na wahi huna, moku na opu a waiho o loko iwaho, a me na hana manaonao e ae.

Na Hunahuna Laulaha.

            Malalo o ke kauoha a ka Pope, ua hoopuka ae o Kadinela Ramapola i kekahi palapala e kue ana i ka hanainoia o na Iudaio ma Auseturia.

 

            Ua olelo ae kekahi lala o ka Aha Kuhina ina e nui loa aku ana ke kikooia o ke dala gula, alaila, e kahea hou ana o Peresidena Kalivilana i kau ahaolelo kuikawa.

 

            Aia no ke mau la ke ala kipi kue Aupuni ma ka Mokupuni o Cuba. Ua kukala ae ka aoao kipi i aupuni kuikawa no lakou. Aohe i hooiaio loa ia ka lono ua pio loa, ke kaua kipi.

 

            Ua waihoia aku ka hookolokoloia ana o ka Makuisa o Kuinibere aia imua o kahi aha kiekie ae ma ke kiure, no ka laibila ana ia Oseka Waile, a he $7,500 ka bela i kauia ai.

 

            Ua hopuia mai nei o James O'Brien, Jr., keiki a ka ona miliona e ia inoa like o Kanada, no ka imi loaa ma ka hoopunipuni. Na ka Banako o Kuibeka keia hoopii, a he $20,000 ka huina i lilo aku iaia.

 

            Ua hoeu hou ia ae no hoi ke kipi ma Haiti. Elua Kuhina o Peresidena Hipolaita i haalele iho iaia, a ua u holo aku no Sana Dominigo. Aohe dala ma ka waihona a ua hiki ole hoi i ka Peresidena ke aie dala aku.

 

            Nui ka pilikia o na ohana lehulehu ma Sana Ioane, Nufaunalana, mamuli mai hoi o ka hune maopopo loa a me ka wi. He 2,800 ohana popilikia a ua palena ole hoi keia haawina nele. Ke loaa la malaila na kokua mea-ai mai Nu Enelani a me Kanada.

 

            Aia no hoi ke kaua kipi ma Panama. Ua lonoia ua koi aku o Amerika Huipuia no ka mihi mai no ka hoopaaia ana o na telegarama i kona mau luna ma ia Puali. Ua lilo mai ke kulanakauhale o Popaia i na koa Aupuni, he 900 ka nui i kue aku i na kipi he 1,6000.

 

Hou Pahi ma Haneoo, Hana.

            Ma ka po o ka la 16 o Maraki, ua hou iho la o J. K. Kuliopailani ia Kaulei (k) i ka pahi a ua manuheu iki ma ke poo he elua puka. No Haneoo, Hana, no laua a i elua. A i ke aumoe o ia po ua hoomanawanui oia e hele mai kona hale mai a hiki i ko E. M. Hanuna hale, a ma ke ao Sabati ae ua hoounaia ka lohe i ka Hope Makai Nui o Hana. Ua huliia a ninauia ka mea nana i hana i ka hewa a ua hoomaopopoia o J. K. Kuliopailani ka mea nana i hana ua hana puuwai eleele nei. Ma ka Poakolu, la 20, ua noho ka aha hookolokolo e hoolohe i ua hihia la; ekolu la o ka noho ana e hoolohe i keia hihia. O ka hoopii a ke Aupuni he hoeha me ka manao ino a me na mea e make ai. G. R. K.

 

            Ma ke ku ana mai o ka moku pea Aloha i ke ahiahi Poakahi i hala, ua lawe pu mai oia he 25 mau pahu pu a me na poka no kekahi mau hui kalepa nunui o kakou nei.

 

            Mai Kohala mai ka lono, ua pau i ka haalele he 15 mau haumana o ke kula hanai kaikamahine o Kohala. O ke kumu ka no ka makemake ole o na haumana i ke kumuluna hou o ke kula, aole he kulike o kana mau hooponopono ana me ka ke kumuluna mua i hoopauia.

 

            Ahiahi o ka Poakolu, la 13 nei, ua lawe aku ka Likelike no ka mahiko o Ookala he 1,739 eke piha o na pulu lepo a me 600 pahu puna mea hoomomona lepo, mai ka Hui o Iwini Ma. A he 1,700 tona mea hoomomona lepo no hoi mai ka hui aku o Devisi Ma no ka mahiko o Laupahoehoe.

 

E M. NAKUINA.

KOMISINA O NA ALA LIILII A ME NA PONO WAI.

            Notari Lehulehu, a he Agena Haawi Palapala Ae Mare no Honolulu nei.

            KEENA HANA: Helu 308, Alanui Kalepa. dk 3—1mk.

 

J. @. KAHOOKANO.

            LOIO a he Kokua ma ke Kanawai.

            KEENA HANA: Alanui Kaahumanu. Honolulu. ian 8. '94-1mk