Ka Makaainana, Volume II, Number 26, 24 December 1894 — Page 6

Ka Makaainana.

 

6 HONOLULU, OAHU, POAKAHI, DEKEMABA 24, 1894.

 

NA MOKUPUNI.

 

Mau Lono Huikau mai na Apana

Kuwaho mai o keia Apana.

 

Na Hunahuna Mea Hou o ke Kahua

Maʻi Lepera.

 

(Hoomauia.)

            Aia ma keia home ka Bihopa Wilisi a me ke Komisina o Beritania Nui, no ka nana ana ia home, me na hiohiona o ka panalaau nei. Ua huli hoi mai laua a ma ka haukipila, ua hoolaunaia mai la keia mau malihini kiekie e Kauka Goto, ma kona wahi e lawelawe nei i kana oihana kauka, oia kona hale oihana, malaila lakou i nanea ai no kekahi mau minute pokole a huli hoi aku la no Kalaupapa.

            No na kauka hoi, aia lakou ma Kalaupapa i kela wa, pela hoi me na komite aia lakou ma ka home a W@ i luakaha ai i kona wa e noho luna nui ana no ka panalaau nei. Ua aeia mai makou e iho no Kalaupapa, ma ka oluolu o ke kauka a me ka luna o ka haukipila, J.K. Waiamau, e ike i na mea hou o ka la lea o Halalii.

            O ka hana lahui hoi o ke kahua ma'i nei, aia lakou ke ulele la i na ai o Hinakahua imua o na luna aupuni Repubalika. Malaila ae ka lehulehu kahi i nana ai i na mea hou. Pau ka lakou hoomaikai ana, ua waihoia aku he noi imua o ka Peresidena o ka Papa Ola, I mau mea kani hou, aole hoi o na mea kahiko, e like me keia, a e loaa mai ana paha. Na keia mau la aku e hoike mai.

            O kekahi poe hoi, ua hele aku lakou iloko o ka luakini e hoolohe ai i na mea hou mai na makua mai o ka pono. Emesona a me Waiamau. Ua nui na hoa i hele ae e ike i na hana a ka Haku, a o kou mea kakau nei kekahi malaila.

            Hoomaka na hana hai Euanelio ma ka luakini o "Kanaana Hou." He himeni mai ka papa himeni mai, pule mai ia Waiamau mai a he himeni hou mai ka papa himeni mai. Pau ia, ua heluhelu mai la o Waiamau i kekahi mau pauku baibala ma Halelu 42, a pau ia, i ke kumumanao ma Epeso 4:3. Ua nui na mea ono ana i hookuu mai ai. Pau kaua, ua kokua mai la o Emesona me na nioi wela o Pakaalana. Ua lohe iho la na luna nana kue i ke kahu, a o ka hopena, na kiolaia mawaho o ka Ekalesia. Pau ka laua, ua konoia ka oluolu o kekahi keonimana, oia hoi ke Kanikela Hawaii ma Amerika, a nana i wehe mai i na mea hou, ka nui o kona aloha i na hoa iloko o ka ehaeha a me ua olelo e hoolana mai ana i na hoa a pau. Ua hookuuia na hana me ka himeni a me ka pule a Emesona.

            KA HULI HOI ANA NO LUNA O KA MOKU-Ua akoakoa ae la na mea a pau no ka uwapo, a malaila pu ae no ka bana kahi i houhene ai i ka lakou mau mea kani no ka huli hoi ana o na komite. Ma ia wahi ae la, pau ka ike ana a kou kiu i na mea hou o ka la.

            NA ALAKAI O KA EKALESIA O NA LA HOPE NEI.-Ma ka la 18 ae, ua wehe mai laua i na mea pohihihi o ka Ekalesia, ma ko laua ano, he mau misiona hai Euanelio. Ua akokoa ae na hoahanau ma ko lakou halepule no ka hoolohe ana i na mea hou.

            Ua lawelaweia na hana me ka maikai a hookuu wale no. Ma ia ahiahi no, ua pii mai laua no Kalawao nei, ua akoakoa ae na hoahanau a me na poe mawaho ma ka laua misiona. Ua maikai na hana a laua, nui ua olelo ao me ka naauao, koe wale no keia, o ka ike ole i ka olelo Hawaii, uuku loa ka mea i loaa, he eono wale no mahina i Hawaii nei. Ma ka la 20 ae i huli hoi aku ai laua no na Kona, Maui a me Lanai.

            Aole i pau.

 

"O ke Kanaka i Ao Pinepine ia a Hoopaakiki hoi i Kona A-i, e Make ia."

            Owau, he elele e hoike aku i ka lehulehu, mai Hawaii a Niihau, ua okiia o Iosia Haole mai ka Ekalesia aku o Kalaupapa nei, ma kona ano he lunakahiko, nolaila, ua pau kona inoa lunakahiko a me hoahanau i keia wa, mamuli o ka lohe ole i ke ao o ka makua. Aloha wale nei makua i ka like ae me Nebukaneza, i ka poino no ka paakiki, a i ko ai hoi ka olelo a kahiko, "o ka ohe ke ola, a o ke kuli ka make."

            Poaono, Dekemaba 8, i hele aku ai o A.K. Hutchison e hoike aku i na kokua palapala ole e hele mai keia panalaau aku, a e hele aku ana e like me ke kauoha. Ua lohe au i ka Poaha, Dekemaba 20 ae, e kau ai ma ka moku, a pau ka ike ana ia makou na kane a me na wahine.

            Ke ao nei na haumana kula Sabati o makou nei, no ka hoike nui o Dekemaba 30 aenei.

            He halawai ka ka Ekalesia a me na hoa o ka Ahahui Opiopio i noho poo ia e M.K. Makaena, no ka noonoo ana i kekahi leta mai ia C.M. Haida a me W.W. Holo mai, a eia iho ua leta la:

            I ka Peresidena o ka Ahahui Imi Pono Karistiano,-Me ka mahalo: Ua minamina ka Papa Hawaii i ka hihia mawaena o ka Ahahui Opiopio a me kekahi mau hoahanau e pili ana i ka hale hou no na lilo mai ia G.N. Wilikoki mai. Ua haawi oia i na dala o ka Ahahui Opiopio ma ka lima o ke komite kukulu hale. No ka ahahui keia hale, aole no kekahi mea a mau mea paha. Ua ae mai ka Papa Ola i ke kukulu ana i ka hale ma ke kahua o ka luakini Euanelio, he aina Aupuni ia me keia palena. O ka mana hoomalu i ka hale, aia no ma ka lima o ke Komite Waiwai paa o ka Papa Hawaii, no ua komite la ka mana no hoi e hookohu i agena no ka malama ana i ka hale no ka pono o ka ahahui. Mamuli o ka olelo hooholo a ka Papa Hawaii.

            C.M HAIDA, Komite,

W.W. HOLO, Lunahoomalu.

            Ua ae o G.N. Wilikoki i keia hana.

            J.K. NALAIELUA.

Kalaupapa, Dek. 13, 1894.

 

Hao ke Kiu Wai Lehua o Hanakahi a me ka Huila he Pea-uwini, Hekau i ka Lulu o Kahalii na Kamahele alo Ehukai, Nui ka Ike, ke Akamai, Ike Hou ia Hilo Hanakahi.

            I na hora ehuehu o ke kakahiaka Poakolu, Dekemaba 12, ua loaa mai la he kauoha ia Kaelemakule, ona waapa o Waiakea nei, mai ka hui o Wilisona mai, no ka lawe ana i mau mea-ai no ka halepaahao o Kahalii, ma Onomea, a ua hookoia me ka hikiwawe mahope iho o ka makaukau ana.

            Haalele ia Kawili a me Ohele, hora 15:55, a palamimo aku la ka nele'na a ua noio (waapa) aukai la, e hoonuu ana i na ale kuehuehu, oiai ke kiu e onou iho ana ma ka hope oni o ka huelo boti, a oiai hoi kona kapena e kulai pau ana i ke kianoa, oia no oe la o pahee pakika i ka lawe a ke au, he nonoho wale no i Muliwaa. Aneane ekolu-hapaha hora i holoia no ehiku mile moana, a hekau nui ana i ka lulu o Kahalii me ka hene nui hoi o na aka a lakou. A ilaila i mele nui ae ai lakou ia lakou i alawa ae ai a ike aku la i ka lele mai o ke ao aina, haupa ae ai ka halialia aloha a puana ae la:

"E aloha ae ana i ka malanai,

Ka makani kiu wai lehua o Hilo,

O kau hana o ka unupai,

Pahee makou i ka welowelo,

Aohe hana a kahi kapena,

Ki-kii-pi i ka ehu a ke kai,

Na kahi pe'a ihu i hai mai,

Ike i ka lae kukui mamua pono,

Hookomo i ka lulu ua lai lua,

Kike ke aloha hene ka'u aka."

            Ua hiki pono ua waiwai a pau i hoounaia me ka maalahi a haalele aku, hiu mai la no ko Hanakahi mau keiki kuoe ana.

            Haalele ia Kahalii, hora 2 P.M., manao ka pono o ka huli hoi nui mai, i alawa iho ka hana i na pine, aole ia me lakou, oiai, ua "haalele nui no i Puna na hoa'loha," o ka makani wale no na hoe a pae nui ana, e ole no nae ka nui o ka ike a me ka noonoo, ina no la ua hopu nui i ka laau kaulana ia Hoolehelehekii, e ole nae hoi ke keehi noho lio a me kekahi mea e ae. Pela iho la i hiki nui hou ai i ka aina a honi malihini hou me ka ipo pee poli.

            HENRY L. KAUANOANO.

            Waiakea, Hilo, Dek. 15, 1894.

 

Ike Hou ia Mau o Kamalalawalu.

            Ahiahi Poalua, Dekemaba 11, hora 3:30, i haalele iho ai au i kou mau oneki, e kuu milimili, a peku wawae aku la no ka uwapo, kahi a ke Kalaudine e pili ana. Hora 6:35 i haalele iho ai ka moku i ka uwapo a eku aku la ka ihu no Mamala, kaalo hope ae la o Mamala, aia hoi o Leahi ke oni ae la mamua. Hala hope mai la ia a nee malie ae la o Makapuu i hope, au aku la o ia kai loa. Malie maikai ka moana a hookomo wale no ka moku i Lahaina i ka hora 12:45 A.M. o ka Poakolu. Lele ko laila mau ohua a ku iki ka moku no kekahi manawa. Haalele ia laila i ka hora 3 a no Kahului ka pahu hopu, kahi a'u i kaunui ai e pae koke aku. Kuu ka heleuma o ka moku i ka hora 6, kau iho la ma ka waapa me o'u mau hoa o ka au pu ana aku o nei mau kai loa, a hehi aku la i ke one o Kahului. Kipa iki iho la ma kahi o ko'u mau kamaaina a paina mama iho la, Hora 9:30 kau iho la ma ke kaaahi no Puunene, hiki malaila hora 9:59 a oi iki, a oiai ua loihi ke ku ana o ke kaaahi ilaila, ua loaa he manawa no'u e hele holoholo ai e makaikai i ka nani o keia mahiko nui, o na pukauwahi ewalu o kona halewili aia lakou ke pii koiuiu la iloko o ke aouli. He nani na mea a pau. Kau hou ma ke kaa no Paia, hoea ilaila i hora 10:20. O nei ka palena pau o kahi a ka mokumahu holo honua e oni ai, a hui pu iho la me na kamaaina o ua aina nei, Mr. a me Mrs. J. Kaluna. Pumehana ke aloha me laua.

            He manawa loihi ka makaikai ana me ka auwana hele ana ma o a maanei, hora 5:35 kau ma ke kawalo (lio) no Maunaolu, a oiai ua loaa mua ia'u he lono he ahamele ke weheia ana maloko o na paia o ka halekula, nolaila, ua hoauau aku la au i ko'u wahi lio aia ka pono o ka hoea e aku mamua o ka uniki ana. Na ka lokomaikai hoi o D. Nahaku, a'u e poina ole nei, i alakai aku ia'u a hoea i Maunaolu, oiai ka malamalama palaweka o ka mahina e pahola iho ana. Hora 7:25, aia iluna o ka noho kahi i noho ai, aole i liuliu o ka weheia ae la no ia o na hana me ka himeni, na haiolelo, kukai olelo ma ke telepona, ka moolelo o ko Kristo ola ana, a pela aku. O ka panina loa o na hana, oia no ka himeni. Pau ia, komo iloko o ka rumi o na mea kuai, e laa na lihilihi, na lole kamalii, na meaono o na ano like ole, a pela aku, he mau mea hoi i hana maiau ia e na haumana o ke kula. He nani a maikai na himeni a me na mea kuai.

            Aole loa i liuliu iho ko'u ka ana e nana i na mea hanalima, loaa mai la he kono i ke Komodoa mai ia Misasa M.A. Pa, e hoaumoe ma kona home ia po. Haalele koke iho la i ka halekula i ka hora 9:30 P.M., a kamoe aku la ke alahele no Peahi, ke hao iho la ka ua Ukiukiu o ua aina la, ke anu huihui no hoi, (he ike paha i ka lakou pulapula,) kaalo hope ae la na ululaau a me na kahi wai a hiki