Ka Makaainana, Volume II, Number 24, 10 December 1894 — Page 2

Ka Makaainana.

2          HONOLULU, OAHU, POAKAHI, DEKEMABA 10, 1894

 

NA MOKUPUNI.

 

Mau Lono Huikau mai na Apana Kuwaho mai o keia Paeaina.

 

Na mea Hou o Puna Paia ala i ka Hinano.

            Ua malama ae ke komite, L. K. Kalawe, a ka Aha Euanelio Mokupuni i hoouna mai ai e malama ia makou, na hipa kahu ole.  Ka mua, ekolu keiki i bapetizoia; a elua i hookomoia i ka hoahanau, elua i holiloia i mau luna ekalesia.  A mahope o keia ua hanai mai la oia ia makou me ka ai o ka Uhane, ma Hebera 9:14, hapa mua, “E hiki loa aku i ke koko o Karisto,” maona ka Uhane, a mahope iho malamaia ka ahaaina a ka Haku.  A o ka hope oa o na hana, ua malamaia he wahi lulu nona.  Ua loaa he $8.00.  Nui kela.

            Ulumahiehie na hana a ka Haku iwaena o na ekalesia huiia i keia mau la Sabati e nee nei.  A i hoike maopopo iwaena o ka Paeaina no ka ulu o na hana a ke Akua, oia keia: Iho aku elua luna ekalesia o Opihikao no ka hai Euanelio ma Kalapana, pii mai hoi elua o Kalapana no Opihikao no ia kalena hookahi, a he mau mahina ia e nee nei imua o keia hana maikai.  A oia ka Paulo e olelo nei, “Aole a‘u mea hauoli e ae, aka, o ka ike wale aku no ia‘u keiki e hele ana i ka pono.”  Ua malama hou ke komite, L.K. Kalawe, i kaua apana hana ma Kalapana e like me ko Opihikao, a ua loaa mai he mau hua.  Hookahi i hooliloia i luna ekalesia, elua i hoi mai, a he mau keiki bapetizo kekahi, a ua malama pu ia he wahi lulu nona, a o na hua a ke aloha i loaa mai, he $10.00.  He mau ia.  O ka wai aku?

J. K. Kanuha.

Puna, Hawaii, Nov. 20, 1894.

 

Na Materia Hooni Puuwai o Kau, Hawaii

            “A waho au o Mahukona-a,

            Hanaio ka ua ia Kohala,

            A laa wale no ka hoi-a,

            Ka ua e kau nui ia nei.”

            Ma ka Poakolu, Novemaba 21, i kuupau iho ai o Kulanihakoi i na pakaua o ka hooilo, me he mea la e nininiia iho ana maluna o na hale, ke hele la a hakukele na alanui.  Ua hoomau ka ua ana ia la a po, a mai ia po a ua kokoke no e ao ka Poaha, loaa ka malie o ka ua.  Me ka ikaika ka ua e haluku ana i ka la i hoikeia maluna ae, a ua loaa he mau poino ma ke kau wahi, aka nae, aole no i kukonukonu loa, eia nae, loaa ka hana a na kanaka o ka hui ia la.  O na wahi i poino i ka wai ma Naalehu nei, ua piha i ka lepo o waho o kekahi hale moe o na kanaka, a o ka puaa a kekahi kanaka o ka hui, loaa aku malalo o kekahi mau hale aole nae i poino ke ola.

            Ma Honuapo, ua komoia e ka wai ka hale waiho ukana, ma o ka noha ana o ka puka mauka, a o oia ke alanui a ka wai i holo moku aku ai ia po.  A ua piha ke alanui hao mai kela puka a keia puka ma ka akau hikina, nona ke kiekie o ka lepo 3 kapuai a oi, a ua pulu kekahi mau busela palaoa i ka wai a me kekahi mau eke kopaa.  No ka hui no ia mau waiwai i poino.

            Ma Hilea, ua lilo i ka wai ka hale inu kope o Aki, Pake a ua “kapakahi Manuia” kahi uwapo ma ia wahi no, a pela aku no kekahi uwapo ma Moaula.

            “He kaua a hiki mai i Hawaii nei,” wahi a kekahi Iapana i hoike mai ai i kekahi kanaka Hawaii, a wahi no a ua Iaana nei, elua, a i ole, ekolu paha mahina i koe mai keia wa aku, alaila, kaua no ma Hawaii nei, aole nae au i manao he oiaio ka hoike a keia Iapana.  Ua olelo hou mai no ua Iapana nei, o na mahiko e noho mai nei ua lako me na pono kaua, aka, na ke au o ka manawa e hoike mai.

            Ke hoomaka nei ka wili ana o ke ko o Naalehu nei, a me he mea la o ke kau wili nui keia.

            Ua loaa o P. Kahula me kekahi poino ulia ma o kona hina pu ana me kona lio e kau ana.  Ma ke loa ka lio a ehaia kona iwiaoao.  Aalia ua kamau wahi sake.

            A.K. Hakikeau.

            Naalehu, Kau, Novemaba 27, ’94.

 

Hana e Hilo i ke Poi a ka Ua- Kaa i ka Lolokaa Ua a ka Ulumano, Pau ka Wale Hana Hemo o Hilo Paliku, ke Koena Paaoao a ka Ino, ua Omino ke Kai o Piihonua.

            He la ua nui keia o Hilo nei a‘u e kakau aku nei ia oe, o ka ua, ka makani, hekili, uwila, a ala pu mai me na keiki o ke kai, haki kaikoo ka moana, haki kakala Piilani, ike pono o luna ia lalo.  He la ua no Hilo a po ka la.

            Oiai o Kole i kona mau la ma Hilo nei, uhi paa pu ka aina me na ao hakumakuma ekaeka, aole nae hoi i olapa ka uwila a kui ka hekili a hala wale aku la oia.  Hiki mai nei hoi o Alapati, he okoa hoi, i hoikeia ae la maluna.  Nolaila, e like me na la i o Kole a emi mai hoi kona hoowahawahaia e na lani, no ke akahele no hoi paha o kana mau hana, oiai, he kanaka akahele ia o ka noonoo, nolaila, pela no i na la o Alapaki a oi aku ka ino o kona mau la i hoowahawahaia e na lani.  Malia e like me ka oi pakela ana aku o ka ia nei mau hana hooonaukiuki i ke Akua, a oi loa aku imua o ka lahui Hawaii nona ka aina i haawiia mai e ke Akua lokomaikai, no kona poe ohua ma ka lepo aloha, o Hawaii a Alapaki i hoonuu ai i ka momona; aka, i keia la i ala mai ai o Alapaki a kipi i ka Moi a me ka lahui, na poe no lakou ke kuleana paa mai lalo loa mai.

            Nolaila, e like me ka ka Palapala Hemolele i olelo mai ai, “O ka ino o kekahi la ua nui ia nona iho,” e like me Alapaki.  O kana mau ino i hailuku ai maluna o ka lahui a me kona Moiwahine, maluna ona ponoi iho kana ino i hana ai a maluna hoi o kona poai pakaha o ka limanui i ke kuleana paa o ka lahui Hawaii.  Nolaila, ke i hou mai nei no ka Palapala Hemolele, “No‘u no ka hoopai ana, a na‘u no e uku aku i kela kanaka a me keia kanaka e like me kana i hana ai, ina no ka pono, ina no ka hewa, no ka mea, ua pau loa na lauoho o ko oukou mau poo i ka heluia.”

            Nolaila, o na oe a pau i kipi i ka lahui a me ka Moi, e ukuia ana lakou, aole e koe kekahi opala maluna o kekahi.  A oiai no hoi, i nehinei, Novemaba 20, ua lehau nui ae o ua o Alapaki ma me ia auna o lakou ma Waiakea, no ka holoholo moku lealea, a mawaho ae o Alapaki hookahi ke kahunapule Kiwini, Kahunapule (inoa ole) haole, Kewalena, ka ona nona kahi moku Bill Bomb, a me kekahi keonimana i maopoo ole ia‘u, a niau nui aku la mai ka muliwai aku no ka hoopuka ana iwaho.  Mamua o ko lakou puka loa ana iwaho, ua i-kaia ae la lakou a kau iluna o kahi ahua one o Kawili, oiai, ua maloo iki ka wai a malaila lakou no kekahi mau minute loihi, a no ka hoomau mai o na aui nalu me ka ikaika pu hoi me ka wai, pela lakou i palekana ai a lilo ai he kuka no Kewalena a me kekahi hoe, a pae ka hoe i kula a o ke kuka ua komoia e ka papai.  Aohe i liuliu hoi nui mai ana, a ina o ka ili ana a ua ala ka hiamoe o kamalii heenalu o Kawili, ina la ua pau nui ka lomiia.

            KAI O OHELE.

            Waiakea, Hilo, Nov. 21, ’94.

 

            Ua lilo ae ka aelike no ke kukulu, kapili a hana ana i kekahi hale hou ma ke kahua o ke kula o Punahou i kekahi poe ekolu no $21,484, no lakou na inoa o G. L. Dall, R. W. Douglas a me C. Allweia.  He poe paahana kamaaina no lakou a pau. 

            He heluna o na paahana Kepani hou loa i hiki mai malalo o ka hui o Ogura Ma i holo mahuka e @o, aole paha i piha ka mahina hookahi mai ke kepaia ana.  Aia no ke koikoi no ia mea maluna o kela hui mamuli o ka hoopaaia ana malalo o ka bona.

 

Uhuia e ka lio, me ka Poino Ole

            Auwina la Poaono, Novemaba 17, ia TJ Kini, luna nui o ka Hui Kaleponi e kuai mea ai nei na na holoholona ma ko Keoni Kolopana halekuai mua, iaia i hoi aku ai no kona wahi ma alanui Piikoi, ma Ewa iho o ke kahua kinipopo hou ma Kulaokahua, ua uhu aku la ka lio o kona kaa i ke kokoke ana aku ma Kamaki Kuea.  Mai laila aku a hala loa iwaho aku o Pawaa, a huli mauka o Punahou a alanui Beretania.  Lehulehu na poe i ukali aku ma na lio, a iwaena o ia poe o M. Leala, he opio hapa Pukiki lawe nupepa Beletina, iaia ka paa ana o ka lio ma ke kaulawaha a hiki no hoi i ke ku malie ana.  O na lima hoi keia o Kini, ua hele a eha i ka mauluulu i ke kaohi i ka lio, aka, ua oi pakela loa aku no ka uaua o kona waha.  Ina paha aole i paa a hala loa iloko nei, ina ua maopopo ole ko Kini hopena.

 

            Ua hookuuia ae i kahi o keia mau la iho la mai ka halepaahao mai o Kawa he Pake, o Alana ka inoa, i ahewaia ma Kapaa, Kauai, i Novemaba 16, 1893, e uku i $500 hoopai no ka hewa kuai opiuma, malalo o ka mana o kela kanawai o na poe hune i hoopaahaoia.

 

E. M. NAKUINA.

KOMISINA O NA ALA LIILII A ME NA PONO WAI.

            Notari Lehulehu, a he Agena Haawi Palapala Ae Mare no Honolulu nei. 

            KEENA HANA: Helu 308 Alanui Kalepa.

            dk 3-lmk.

 

J. K. KAHOOKANO.

            LOIO a he Kokua ma ke Kanawai.

            KEENA HANA: Alanui Kaahumanu.  Honolulu.

            ian. 8- ‘94

 

MAU APANA AINA KUAI.

            EHA Mau Apana Pa Hale Maikai ma Kapalama, mauka ae o ke Kula Hoopololei o Keoneula, a he

            UMI A OI AKU PAHA MA Kawaiahao, ma kahi o J. W. Kaikanahele.

            No na mea e pili ana, e ninau ia

            R. W. WILCOX,

Kihi o na Alanui Moiwahine a me Nuuanu, i kekahi keena o luna.

            dk 3-ti

 

HOOLAHAINA HOAAINA

            Mai a mahope aku o keia la, o Mr. E. B. FRIEL hookahi wale no ka mea i hoomanaia e lawe mai i na uku hoolimalima mai ko‘u poe hoaaina mai e noho ana ma ke Ahupuaa o Wailuku, Maui.

            CLAUS SPRECKELS.

Ma o kona hope ponoi la, Wm. G. Irwin. 

            Honolulu, Okatoba 15, 1894.

            Ok 22-2 ml

HUI HOOPUKAPUKA HAWAII.

 

HAOLE DALA MALUNA O

Na Waiwai Paa a me Lewa.

 

KUAI A HOOLILO @

 

Kuleana Mahele Hui a me na Bona Aupuni.

 

Mau Agena Waiwai Paa ma na Ano a pau.

 

13 a me 15, Alanui Kaahumanu.  Telepona Mutuala, Helu 637.

Ok. 22- 2ml.

 

C. A. LONG

[KALE LONA OPIO.]

NOTARI LEHULEHU

            KEENA HANA: Helu 13 me 15, alanui Kaahumanu.

            Telepona Mutuala, Helu 637.