Ka Makaainana, Volume II, Number 21, 19 Nowemapa 1894 — Page 6

Ka Makaainana.

 

6       HONOLULU, OAHU, POAKAHI, NOVEMABA 19, 1894

 

HE MOOLELO KAAO

 

NO

 

MONE TIKERO

 

KA

 

HOLOLIO I KA WA HOOILO

 

KA

 

UI MAALO I KE KUPULAU

 

A O KE

 

KEIKIALII HARE MATINE

 

KE

 

KIAHA OPAKA O NINEWA

 

MOKUNA XII.

 

Ke aloha o ka Ipo i ka Ipo--Hanini ka waimaka elo ka laau---Ka Ui Maalo i ka wa Kupulau iluna o Hagara--Ke kaoo o na poe me na medala kila no Arabia--Ka hoohui mare i ka wa Hooilo--Ike kumaka i ka nani o Mokuleia, aohe laula a koe aku.

 

          "Ua makaukau o Hare e apahu ae i kou ola no ka wa hope loa no ka paio ana me oe ma ia mea au e olelo mai la, oiai o kekahi ia o da [na] ike i loaa ia'u mai ka'u mau kumu mai ehiku, me kona ano hooio," wahi a ua Hare la i kamailio aku ai me ka hele o kona mau maka a hulili lua i ka piha inaina no kona enemi e ku aku la imua o ua Hare la.

          Iloko o kela manawa i lawe mai ai ke kauwa lawelawe i laau ihe nana, a hopu iho la ia me ka wiliwili ana ae iloko o na leo huro o kona mau kanaka e kuku mai ana i hele a makaukau i na lako kaua.  A oia no hoi ka manawa i hookuene pono iho ai ua mau moho la i ko laua kulana pakahi o ka hoomakaukau ana no ka halawai aku he alo a he alo no ke kue ana o kahi i kahi, mamuli no ia o ka wahine, ka mea hoi a ua Hare nei e moe ole nei o kona po no ka ui ka Pua Lilia o Zabieda, a iloko o ka manawa pokole ua halakau koke ae la na laau ihe a ua mau kaeaea la o na kakaimauna, a me ka eleu nui o Mone Tikero i hookele pono aku ai i ka maka o kana ihe ma ka umauma o kona hoa paio a walawala aku la oia i ka honua a o kona lio hol [hoi] aia oia ke holo pupule la me ka nana kapakahi ana iho i kona hookapuhi nui o keia ao e hokae hele ai ma o a maanei i ka hai mea i malama ai a nui a kupono i ka hoounauna a mai kahi e no ka lapuwale nui a lilo ana.

          I ka wa i ike mai ai ai na powa i keia poino o ko lakou haku opio, ua holo like mai la lakou no ka hoopakele ana iaia a oia pu no hoi ka manawa o Igeboseda i hoonee mai ai i kona lio no mua no ke paniku ana au hoi i ko lakou alahele e hiki mai ai no ka hoopakele ana ko lakou haku opio.  O kekahi poe o na powa ua pauaku lakou i ke auhee no ka hoopakele ana i ko lakou mau ola iho, oiai, ua ike mai la lakou i ka weliweli o na hana ma ke kahua kaua, a ua piha makau maoli no i ka kakou koa a kaeaea hoi nana e paipai na poo o na naita kaulana oia au a ka hewahewa a kakou i ike ole aku ai i ka lakou mau hana oia au kahiko, no ka mea, akahi no ia poe a ike i kekahi naita a ka ikaika nui wale i hanai a ao maikai ia e na makua a he hoohana wale no.

          Ua manao lakou he hiki wale no i ko lakou akamai kakele i na mea kaua ke hoopuhili iaia, aole nae pela.  Ua pahua ia mau noonoo ana o lakou pela, a aia ka poino ke hahai la mahope o ko lakou meheu.  A no ia mea, ao no ke koa, ao no ka holo wale, no ka uhai-a-holo ana no ko lakou ola iho mai ka make mai e uhai aku la mahope o lakou.

          Ia Igeboseda i ike mai ai i ke alakai nui o ua poe powa la e hookokoke mai ana imua ona, o kona wa no ia i kaikai ae ai i kana koi kaua iluna, me ka hoopuka ana aku hoi i keia mau huaolelo:

          "E omo i ke koko o kela bipi ahiu a mai hookuu iaia e holo lanakila maloko o na ululaau, o huikau pu aku auanei me na bipi i laka mua a hele pu me na bipi ahiu a hookahi ka holo pu ana iloko o na ululaau a me na mauna."

          I ke kuu ana iho o kana mau huaolelo i puana ae ai.  O kona manawa iho la no ia i hoomoe aku ai, a mamua o ka loaa ana he manawa iaia e pale ae ai i keia koi kaua a Igeboseka [Igeboseda] e hele iho la e mahele i kona kino i elua apana, ua kaawale ae la kona kino iloko o na apana elua.  Ua pau ae la kona hanu ana i na ea huihui o kona home luahuna.

 

          E ole ka Luna Kiai Awa e uku $2 i kekahi keiki hoehoe waapa, hoikeia ai kahi o kekahi Kepani o ka Nanasana i holo mahuka mai no uka nei.  Mamuli o kona mahuka ana, ua kauaia he elima poe Kepani malama hale hoolimalima o uka nei no ka mea, iluna lakou o ka moku ia wa e ike ana i na hoa'loha, a aole i aeia [ia eia] e hoi hou mai iuka nei aia a ua poeleele loa.  Nui ko lakou makau a haawi dala okoa no ko lakou hookuuia mai.

 

Heihei Kaa Hehihehi Wawae.

 

          He mau heihei hookuku kaa hehihehi wawae ke malamaia ana i ka la 29 ae.  A ma ka la 24 ae hoi, he heihei hookuku kekahi e malamaia ana me ko Kaleponi mau kaeaea mai nei, no umi mile ka pahu hopu, a ua manaoia mai Halealii Kuea aku e hoomaka ai a holo a waho o Punahou a hoi mai na alanui Beritania a komi i alanui Rikeke a kahi i hoomaka ai, a pela a hiki i ke eo ana, no kekahi imakana [i makana].

 

Hoopiiia no ka Waiona Saki.

 

          Eia na ona halekuai waiona ke pioloke nei no ke komo mai o ke saki, ka waiona laiki Iapana, mamuli hoi o ke emi loa o ke kumukuai a me ko na kanaka Hawaii inu nui ia ano waiona.  Ua ku ae imua o ka Aha Apana i ka Poakolu, la 7 i hala, he Kepani i hoopiiia no ke kuai ana he 150 pahu saki i pae mai ma ka Nanasana.  Ma na olelo ike hoi, aohe oia i kuai maoli, aka, ua hoao.  No ia nele i ka ike maopopo, ua noi ae ka Hope Ilamuku e hoopau wale ia ka hihia, eia nae, aole i ae aku ka loio pela, P. Numana.  Ua makemake oia e hookuuia kona haku, a ua hookoia mai e Lunakanawai Apana Wilikoki, no ka hewa ole no.

 

Hana Hoeha a ka Ona Saki.

 

          Ma ka auwina la Poalima, la 9 nei, i hoehaia aku ai o Ferede Lesele, luna nui o ka hale inu rama Kosomopolitana, ma ke kihi komohana o na alanui Nuuanu me Hotele, e Moke Eleele a me Ilai maka hapopo.  Ua ona laua i ka inu saki maloko no o ia hale, a ua hoomaka aku e wawahi i na kiaha, a i ka pane akeakea ia ana aku hoi, nou mai kekahi he kiaha aniani a moku oia ma kekahi papalina ona.  No keia hoeha ana, ua hoikeia ae i na makai a laweia ae laua a noho ana iloko o ka Halewai.  Imua o ka Aha Apana i kakahiaka Poaono mai, ua ae laua i ko laua hewa, a ua hoopaiia mai e uku i $10 a me na koina pakahi.

 

Uu i ke Alelo a Make Loa.

 

          Ma ke awakea o ka Poalua, Okatoba 30, i hoao ae ai kekahi kanaka e huki i kona alelo iwaho a ua hookoia no ia manao ona, me kona kahea ana aku i kana wahine mare, "auhea oe, eia ka waiwai o kaua la."  I ka wa a ka wahine i nana aku ai e hoomau ana no kona lima i ka huki iwaho, ia wa lele aku la ka wahine e paa i na lima o kana kane me ka manao he mau hana ano e keia a kana kane.  Aole i liuliu mahope iho o ia manawa ua luai mai la oia me kekahi haku koko nui a waiho ana i waho, o ka wa iho la no ia o kona hanu hope loa a waiho aku la.  Ua kaa no oia i ka ma'i i kela mau la aku aole nae hoi he ma'i i manaoia ai e make ana.  No Waikiki keia kanaka ae la.

 

          Ua loheia he lehulehu ka na haumana i kipakuia mai kekahi mau kula Aupuni aku no k@ o ole ia.

 

 

NA AINA MAMAO.

 

Na Lono Huikau mai na Wahi Like Ole mai o ke Ao nei.

 

Lanakila Mau no na Kepani.

 

          He palapala no Iokohama o Okatoba 27 ka i olelo ae ua loaa he lanakila kaokoa loa i na Kepani ma Kiurene maluna aku o 17,000 Pake.  Ua auhee aku ka enemi no Anetima.  He heluna nui o na lako ai ka i lilo pio mai i na Kepani.  M ako na Pake aoao, ua 200 na make a me ka lehulehu o na poe i eha.  Lehulehu no hoi na poe i lawe pio ia  Ua hooiaia na lono mua no kekahi kaua mawaena o na Pake a me na Kepani mahop iho o ke kaa ana aku o na Kepani ma kekahi kapa o ka Muliwai Ialu.  I ka lanakina ana malaila, ua nee aku ka pualikaua Kepani holookoa no ka akau a lele kaua aku la i ke Kakela Kiurene ma na aoao a pau, oiai hoi ia wahi e paaia ana e kekahi pualikaua Pake nui.  Ua oolea no na Pake maloko mai a ua hahana no hoi ke kaua ana.  He 20,000 ka nui o na Pake, wahi a ka lonoia.

          Pau ae la hoi keia lanakila, anai hou aku ana no na Kepani no kekahi lanakila hou aku.  No Iokohama mai ka lono o ka la 4 nei no ka lilo pio ana mai o Kini Kao (Kin-Chew), ma ke poo o ke kaikuono o Liaotun@, mahope o ka hakaka hahana ana no kekahi mau hora wale no.  Mamuli o na hana maalea a na Kepani me na aumokukaua ma ka aekai o Sana Tuna (Shang tung) ma kekahi aoao i lilo pio mai ai o Kini-Kao.  Walewale no Pake a pae lakou iuka o Kini-Kao.  Okiia ua uwea telegarapa, mamuli hoi o ia i hiki ole ai ke loaa aku ka lono i ka Adimerala Pake.  Ma ia hope iho ua hoomaka aku he 14 mokukaua Pake a me na waapa topido e kue i na Kepani, aka, ua kahea nui hou ia aku no kahi e.  A iloko iho hoi o keia manawa i ki poka aku ai na moku ia Talienewana a me Kakue, a malalo hoi o ka uhi ana a na uwahi pu mai na moku aku i nee papa aku ai puali mauka a lilo pio aku o Talienewana.

          Ua loheia ae hoi ma Nu Ioka i ka la 2 nei ua lilo mai o Fune Wana Kini (Fung Wang Ching) i na Kepani.  Oia kekahi o na wahi oolea loa ma ke ala e hoea aku ai i Moukedena, he kulanakauhale iloko o ia okana Pake o Lianatini Mai ia wahi aku e hookahua ai, alaila, maalahi loa ke koe ana aku i ka okana o Ki-Li.  Ua oleloia ae he hoomeamea wale no ka na olelo no ka nee aku imua no Moukedena, i wahi ka no na Pake e haalele ai i ke kiai ana i na kap@kai.  Ua loheia ae