Ka Makaainana, Volume II, Number 18, 29 October 1894 — Page 8

Ka Makaainana.

 

HONOLULU, OAHU, POAKAHI, OKATOBA 29, 1894

 

KELA A ME KEIA.

 

            O keia ka la koho balota o na oehaa. 

            Ma ka Monowai i huli hoi mai ai o Lunakanawai Kaapuni Kupa.

            I keia Poakahi ae e wehe ai, ke kau kiure o Novemabama Honolulu nei.

            Kumukuai o ke kopaa ma o, he 32 a me 3@ keneta o ka paona hookahi.

            O nehinei ka la hoano o Simona a me Iuda Hemolele, he mau Aposetole.

            E haalele mai ana ka Haiakina ia Kou nei i kahi mau la o keia mua koke iho no ka hema.

            Ua huli hoi mai o Mr. ame Mrs. T. R. Waka, mai Enelani mai, ma ka Arawa o ka po Poaha nei.

            E paa ana na hale inu rama i ke paaina i keia la no ke koho p@ hemo hou i ka hora 8 @.

            He leo aku nei o Kuauau a me Lunaikaika no Maui i ka Poalima nei a ua @ hoi mai no i nehinei.

            He Pake ka i hoounaia i Kawa i ka Poaono nei no ka hookaa ole i ka auhau.  Auwe no ka hoi e.

            Elima mau Pake piliwaiwai i hoopaia e ka Lunakanawai Apana ma ka $10 pakahi i ka Poakolu iho lam a he eiwa i hookuuia.

            E nana ae hoi i ka hoolaha a ka O@a Miliona Sepekela i kona poe hoaaina o ke Ahupuaa o Wailuku, Maui, ma kekahi wahi okoa ae o keia helu.

            Poaono nei, mahope o ka hora 1 P. M., i hemo ae ai kela kaa @olaumania alanui, mahope o @ paa loihi ana makai o Ulukoheo.

            Po Poaha i hala iho la i koho ai ke Kalabu Repubalika Hawaii @a D. Lima Naone i peresedena no lakou, ma kahi o Keoki Makamu, i waiho aku.

            Mamua aku nei, loheia mai no ka eoeo ole ae o ka Luahine o ka Lua o Kilauea, aka, ua lohe hou ia mai nei ua eena oia a aia ke hoike la i kona inaina.

            E hoomanao ae ana ka Ligi Amerika i ka la i hookumuia ai o ia ahahui a o ka piha ana hoi ia o ka hookahi makahiki mai ka hookohiia ana, i ka Poaha iho, Novemaba 1.

            E awhihi hou ae i ka hoolaha a ka Hui Hoopukapuka Hawaii, a e ikeia iho uo he Notari Lehulehu o Kale Lona opio.  Ua makaukau oia no ka hana i na wa a pau e makemakeia ai oia.

            Ua hookohuia o R. J. Gerina i agena no ka Ahahui Kinai Hoomainoino Holoholoae. I ka Poalua i hala iho la kana hana mua loa, he lio kaapio no ka ma’i hupekole, a ua pepehiia a make.

            He elima poe haole mahuka o luna o ka Monowai i keia ku ana mai nei, a he elima no hoi o ka Arawa.  O lakou a pau, aole i hooleleia mai iuka nei a ua pau nui aku no i ka laweia no ka Hema.

            I kai ae o Ulakoheo i ka auwina la Poalima nei o Alapaki Kauka kahi i waha a ai i keia ikeia ana mai nei o ke Aupuni o lakou e Beritania Nui.  I keia kakahiaka i holo kaapuni ae ai oia e nana i ke koho balota pamalo o lakou.

            Poaha iho ka la hoano o na Poe Hemolele a pau loa a he makanaina ko ia la ma na luakini o Sana Anaru a me Malieokamalu.

            Elua mau mea malalo o na hona eia ke kiai loa ia nei e na poe o ka Oihana Dute o mahuka.  Ina laua e ahai ana i ka pupuhi, poino na hope o laua.

            Ekolu mau keikikane a F. S. Keiki i mareia i ka po Poaha iho la iwaho o Kawehewehe, Waikiki.  Pau ia, he ahaaina iho, a pela no hoi i ka Poalima mai.

            He 160 ka nui o na ohua helu ekahi a me elua i laweia mai nei no keia awa e ka Monowai a me ka Arawa.  I na mokupea ae hoi piha no paha ka 200 iloko o keia pule iho la.

            Ma Kaneohe, Koolaupoko, Oahu, Okatoba 10, ua make iho la o J. H. Pamaiaulu i ke 55 a keu o kona mau makahiki.  Ua haalele iho oia he wahine, na keiki a me na makamaka e o aku nona.

            No ka hele ole i ke kula no hookahi malama i hala ae, ua hoounaia aku la e ka Lunakanawai Apane i ka Poalua I ho la he wahi keiki, nona ka inoa o Kaulua, no hookahi makahiki ma ke Kula Hoopololei o Keoneula.

Ua makana aku na luina hana o ka Hui Paipalapala Kekake i ka luna nui i pau, H. M. Wini, he pika dala i kinohinohiia, he mea hoomanao hoi no kona mau hana maikai oiai oia e noho poo ana no ia keena hana i ka Poakahi i hala.

I kekahi o na kaa hali ohua nunui o Kamika i hele ai a ku i ka auwina la Poalima nei, la 19, mauka ae o Halehai ma alanui Moi uei, ua hemo ae ka pokake hoopaa o kekahi huila a hina ana o mua o ke kaa me ka piha ohua no.  Aohe na lio i puiwa a aohe no mea i poino.

            Ua hoohikilele hauli ia o Mr. a me Mrs. H. W. Simida e ko laua mau hoa’loha i ka po Poaono, la 20 nei, oiai, o ia ko laua la mare kina [lako pa], he 20 makahiki.  Nui ka hauoli malaila ia po a aumoe wale.  Na ka Hui Himeni Leilehua i hoonanea ae me na leo himeni a me na mea kani.

            Makai ae nei o Iwilei, ua uhau aku o Kailioha, he kane, i ka lae o kekahi wahine aoo me ka pauku laau a ena loa i ka auwina la o ka Poaha iho la.  Ua laweia ka mea i eha no ka Halemai Moiwahine, a ua hoopaaia hoi ke kolohe.  Imua o ka Aha Apana i ka Poaono nei, ua ae oia i kona hewa a hoopaiia e uku i $50.  O ka luahine hoi keia, ua loaa iki ae ka oluolum, a ua hiki kino ae imua o ka Aha me ka upuia ua palekana loa oia.

            Poakahi iho la, ua hoopaiia na poe malalo iho, penei: Elua Kepani no ka pepa pili hapaumi, $10 pakahi me na koina; he Pake, o Akana ka inoa, no ka uhaki Sabati, $3; he Pake okoa iho no, ekolu malama ma Kawa, no ke puhi hoomano i ka “lona paipu;”  Kalawaia, no ka hoeha ana i kekahi hapauea ma ke kulai ana iaia mai luna aku o kekahi lanai a pa ke poo i ka pohaku, $20 me na koina; a he mea okoa iho, no ka hoeha no, a no ke ano malani, ua hoopaiia he $5 me na koina.

            Ma ka la 3 ae o Novemaba e ku mai ai ka Miowera i Honolulu nei.  Ua haalele aku oia ia Kikane ma ka la 23 o keia malama.  E ike hou ana oia ia Puuiki, kahi ona i kau ai a ili loa aku i Kawaiahao.

            No kahi wa loihi i hala ae i noho ai o Samu Alani i Kaleponi no ka lapaau ana i kona ma’I hano a me na maka, a oiai hoi, ua loaa ae iaia ka oluolu, ua manaoia e hoea hou mai ana oia a me kona kokoolua i ka aina nei ke huli hoi mai ka Auseteralia.

            Ua hauleia he wahi kaikamahine uuku na Geo. H. Kakela mai luna iho o ka lio i ka Poaono, a 20 nei, ma alanui Kula a eha loa ia.  Ua kii koke ia ke kauka e nana i kahi i eha, a ma kana hoike ua mokuia kekahi aa koko o loko o ka lolo.  Ua ano oluolu oia i keia wa.

            Ma keia Monowai mai nei i loaa mai nei na palapala ike a na aupuni o Beritania Nui, Farani a me Saezelani i keia. Aupuni Repubalika kamehai.  Aole hoi he kai huakai kukui nui ae o ua poe nei, ua ikeia mai la hoi ko lakou aihue ana e ke Aupuni Liona, ka ike hoi ia a lakou i kaunui loa ai.

            Ua noi ae o Ane K. Hata i ka Aha Kaapuni no ka hooko huia o Keo Kaaka i kahu no ka waiwai o kona makuakane, Kimo Love.  He kaikunane omaimai kona aia i Iapana kahi i noho ai a na ka makuakane no hoi e malama aku nei.  No ka ona mau mai paha ke kumuj o keia noi a ke kaikamahine.

            He Pake ka i hoopaiia e ka Lunakanawai Apana i ka Poakolu iho la no ka hoomoemoe wahine a ua hoounaia i Kawa no umi la.  Pakele oia nei i ka Poakahi aku, oiai, he kokoolua oia no kela Pake puhi opiuma i ahewaia ai, a pahemo oia nei ma ka huli ana i hoike Aupuni ma ia hihia, a paa hoi no keia ae la.

            Poeleele na mahele waho o ke kulanakauhale nei i keia mau po iho la, i ka a ole o na kukui uwila. Mea ia mai no ka lawa pono ole o ka ikaika wai e hoohana ai i na enegini, a o kekahi paha hoi, he makau maoli no o kipi aku ka lahui ia lakou, nolaila, makemakeia ai ka malamalama no na wahi kokoke wale no ia waenakonu.

            No ka ona i ke saki, ua uluaoa ae na kane a me na wahine mauka aenei o ka Be Vi-u i ke awakea Poakolu iho la, iwaho ae o ke alanui a i ke akea loa, a he ku maoli no ia ano hana i ka hoohilahila ia kakou iho.  Ia lakou no a me na poe nana aku, piha u ke alanui, a nana aku na poe ma na kaa hapaumi i ka hakaka akea a me ka hoolohe pu aku no hoi i na olelo pelapela.  Hilahila no hoi a ehaeha ka naau.

            Hora 3 o ka auwina la Poaha iho la i ku mai ai ka Monowai mai Kapalakiko mai, ke awa hoi ana i haalele aku ai i ka la 18, iloko o 7 la holo.  Ma ka hora 10 no o ia po iho i niau loa aku ai oia no na Panalaau Hema.  Ia po Poaha iho no hoi i ku mai ai ke Arawa mai Vitoria mai iloko o 8 la holo.  I ka auwina la Poalima nei i holo loa aku ai oia no na Panalaau Hema, a o kana  huakai hope loa hoi ia no keia awa, a pau loa kona ikeia ana.

            O Lui, kekahi o na kanaka o na Paemoku Hema, ka mea nana i ki pu o Kale Hailama, a i noho iho nei i Kawa no kekahi mau makahiki a kalaia iho nei, ua hala aku oia maluna o ka Arawa i ka a@wina la Poalima nei no kona aina hanau.

            “Ma na la 22 me 23 o keia mahina, ua ku nui ke akule a me ka hahalalu ma Puuhaha, Molokai, he mea i ike ole ia iloko o na makahiki i hala.  Malia he ehu wawae paha ia no Kalani e like me na ouli pahaohao e ike mau, ia nei,” pela ka hoike a kekahi palapala ia makou mai Kalaupapa mai.

            Aui ka la o ka la 7 nei, La Pule, ua ulu ae he hoopaapaa mawaena o elua Pukiki mauka o ke awawa o Kalihi no ka aie o kekahi i kahi, a o ka hopena o ia hana ua hiliia kahi me ka pauku laau a eha.  Mahope o na hoopaneenee pinepine ana, i ka Poaono nei i hookolokoloia ai imua a ka Aha Apana a ahewaia ka mea hoeha a hoopaiia no ekolu malama hoopaahao, ma ka hana oolea.  Ua hoohalahalaia aku i ka Aha Kaapuni ma ke kiure.

            Aole o Joe Fereiram aka, o kena pokii iho, oia o Dominigo Fereiia, ka mea nana i peku ka opu o kekahi Pukiki mauka o Puowaina a pakele mai ke ola, oia ka i hopuia, a makou i hoike aku ai ma ka helu i hala, no ka hooweliweli ana ia Paalua D. Kelete opio ma Kamakela aenei, makai iho o ka ka kula o Sana Lui.  Imua o ka Aha Apana i ka Poakahi i hala, ua hoopaaia oia malalo o $100 bona e malama i ka maluhia no eono malama i ka mea ana i hooweliweli ai.

            Ua loheia e mare ana o Miss Mele Leleo me ke kaikoeke o Kauka Maina, oia o Kauka Akale [Atcherley], a ua hala aku nei laua ma ke Kinau no Honokaa, Hamakua, Hawaii, a ilaila aku laua e mare ai.  Ke pau ia a hala na la kinohi o ka noho mare ana, alaila, huli hoi hou mai no ke kapitala nei.  Ea, eleu no ka hoi keia kaikamahine Hawaii i ka “hiu, no a wela a lawe no hoi a lilo,” aole no hoi o kahi lilo a lohe mai, o ka lilo no a lilo loa.  O ka hana ana no ia.  Oi hoi ha!

 

J. K. KAHOOKANO

LOIO a he Kokua ma ke Kanawai,

KEENA, HANA:       Alanui Kaahumanu

Honolulu,                    jan. 8-‘94

HUI HOOPUKAPUKA HAWAII.

 

HOAIE DALA MALUNA O

 

Na Waiwai Paa a me Lewa.

 

KUALA A HOOLILO I NA

 

Kuleana Mahele Hui

a me na Bona Aupuni.

 

Mau Agena Waiwai Paa ma na Ano a pau.

 

13 a me 15, Alanui Kaahumanu

Telepona Mutuala, Helu 637.

ok.       23 - - - 2ml.

 

C. A. LONG

 

[KALE LONA OPIO.]

 

NOTARI LEHULEHU

 

KEENA HANA:        Hola 13 me 15, alanui Kaahumanu

Telepona, Mut@ala, Helu 637